Lucas 2

1Jariꞌ tiempo cꞌo jun censo bani. Cꞌo jun nimlaj rey triꞌ, César Augusto rubiꞌ, arjaꞌ xuyaꞌ jun orden chi nba̱n censo chique ja winak ja recꞌo pa tak nación pro ni canojelal. 2Jawaꞌ censo riꞌ jawaꞌ ja kas nabey censo bani tokoriꞌ tok cꞌo jun achi, Cirenio rubiꞌ, arjaꞌ ocnak gobernador xin Siria triꞌ. 3Canojel ja winak xebe na pa tak quitinamit ja catiꞌt quimamaꞌ utzcꞌa chi triꞌ neba̱n wiꞌ censo chique. 4Cꞌo cꞌa jun achi, José rubiꞌ, arjaꞌ aj Nazaret ja cꞌo pa rcuenta Galilea. Ja cꞌa José arjaꞌ be chakajaꞌ utzcꞌa chi neba̱n censo tre. Rmalcꞌariꞌ ja tok xelel chipan ja tinamit Nazaret in be chipan ja tinamit Belén ja cꞌo pa rcuenta Judea ja bar xalax wiꞌ ja rojer rey David. Triꞌ be wiꞌ ja José como ja rey David arjaꞌ sepo quixin ja ratiꞌt rmamaꞌ. Ja José arjaꞌ riy rumam can ja rey David. 5Arjaꞌ cꞌo jun xtan rachbilajel, María rubiꞌ, e utz chic ruqꞌuin chi necꞌuleꞌe. Ja cꞌa María arjaꞌ yawaꞌ chic, xa nnakajinto ja kꞌij ja xtiqꞌuejeꞌ wiꞌ ti ral. 6Kas cꞌa triꞌ pa Belén ecꞌo wiꞌ ja tok tzꞌakati ja kꞌij rxin. 7Triꞌ cꞌa xalax wiꞌ ja ti ral talaꞌ, ti nabey winak. Xubar pa tziak. Ja cꞌa tok bartaj rmal cꞌo jun quiwabal chicop xcanoj in xcotzꞌbaꞌ chipan. Queriꞌ cꞌa xuban, pa quicꞌolibal chicop xeqꞌuejeꞌ na wiꞌ como enojnak chic ja winak chipan ja posada.

* * * * * * * * * *

8Ecꞌo cꞌa juleꞌ yukꞌul tak carnelo, triꞌ ecꞌo wiꞌ chinakaj ja tinamit Belén, quimajon quichajixic ja tak carnelo chakꞌaꞌ pa tak kꞌayis. 9Chaka cꞌa jalal ja tok cꞌo jun ángel winakar chiquewach takonto rmal ja kajaw Dios in cꞌoli ja gloria rxin ja kajaw Dios quetzꞌat, ntajini nuqꞌuiak riꞌ chiquij, congana quixbej quiꞌ rmal. 10Pro bix chique rmal ja ángel: —Ma texbej ta ewiꞌ, tecꞌwaxaj mpeꞌ ja xtinbij chewe riꞌ como anin cꞌo jun utzlaj tzij ja ncꞌamonto chewe, jun utzlaj tzij janila quicotemal rcꞌamonto chique ja winak pro ni canojelal. 11Quewaꞌ ja utzlaj tzij ja ncꞌamonto chewe riꞌ, ja camic cꞌo jun Toꞌonel ewxin cꞌa xalaxi, pa Belén xalax wiꞌ ja bar xalax wiꞌ ja rojer rey David. Ja cꞌa Toꞌonel arjaꞌ ja Cristo ja kajaw. 12Ja tok xtewilaꞌ ja ti yaquiꞌ quewaꞌ banon tre riꞌ, baron pa tziak in cotzꞌban pa quiwabal chicop jariꞌ retal ja nbij can chewe, neꞌe ja ángel chique.

13Chaka cꞌa jalal tok ecꞌo juleꞌ rachbil ja ángel xewinakari e xin chilaꞌ chicaj pro congana e qꞌuiy. Congana quimajon ryaꞌic rukꞌij ja Dios, quewaꞌ nquibij riꞌ: 14—Ja camic janila majtajnak chic ryaꞌic rukꞌij ja Dios chilaꞌ chicaj in ja waweꞌ chwachꞌulew cꞌo chic ja quicotemal, cꞌo chic ja rutzil xin Dios cuqꞌuin ja winak, necheꞌe.

15Ja cꞌa yukꞌul tak carnelo tok xemeloji ja ángel chilaꞌ chicaj ejeꞌeꞌ quewaꞌ quibij chibil tak quiꞌ riꞌ: —Joꞌ cꞌa ja pa Belén tekatzꞌataꞌ ja bantajnak ja takonto rbixic kuqꞌuin rmal ja kajaw Dios, xecheꞌe. 16Queriꞌ cꞌa queban, xebe alnak. Ja cꞌa tok xeꞌekaji quewil ja María rachbil José in quetzꞌat ja ti yaquiꞌ cotzꞌban pa quiwabal chicop. 17Ja tok quetzꞌat ja ti yaquiꞌ cꞌacꞌariꞌ quemaj rcholic chiquewach ja winak ja bin can chique rmal ja ángel trewaꞌ ja jun tacꞌal riꞌ. 18Ja cꞌa winak kas cꞌascꞌoꞌi quicꞌaxaj canojelal ja bix chique cumal ja yukꞌul tak carnelo. 19Pro ja María arjaꞌ xucꞌol pa ranma nojel ja tzij ja rcꞌaxan, congana nuchꞌob rij rwach nak rcꞌamonto. 20Ja cꞌa yukꞌul tak carnelo ejeꞌeꞌ xemeloji, congana quimajon ryaꞌic rukꞌij ja Dios rmal ja quicꞌaxan in rmal ja quitzꞌaton, ni bantaj wiꞌ cumplir ja caniꞌ bin can chique rmal ja ángel.

* * * * * * * * * *

21Ja cꞌa ti yaquiꞌ ja tok xuban waxakiꞌ rukꞌij ja tok ban circuncidar tokoriꞌ canox rubiꞌ. Ja ti rubiꞌ bix tre Jesús como queriꞌ rubiꞌ ja canox rmal ja ángel ja tok majaꞌn tiqꞌuejeꞌ pa gracia.

22Xerilaꞌ cꞌa ja kꞌij chi nebe nequichꞌachꞌojirsaj quiꞌ ja caniꞌ nbij ja ley xin Dios ja tzꞌibtal can rmal ja Moisés cꞌacꞌariꞌ xebe ja pa Jerusalén, quecꞌamel ja tacꞌal utzcꞌa chi nequibanaꞌ presentar chipan ja nimlaj templo xin Dios. 23Queriꞌ queban como ja ley rxin ja kajaw Dios quewaꞌ tzꞌibtal can chipan riꞌ: —Ja tak alaꞌiꞌ ja nabey tak winak ejeꞌeꞌ e rxin ja Dios pro canojelal, neꞌe. 24Ecꞌo caꞌiꞌ tak tzꞌiquin nequitzujuj chwach ja Dios como sacrificio ja caniꞌ nbij ja ley rxin ja kajaw Dios quewariꞌ: —Jun cꞌulaj tak xtrucꞌucꞌ ja netzujuxi owi e caꞌiꞌ tak palomax ja re tak coꞌcoj, neꞌe.

25Cꞌo cꞌa jun achi pa Jerusalén, Simeón rubiꞌ. Ja cꞌa Simeón arjaꞌ congana utzlaj achi, ni nuban wiꞌ respetar ja Dios in ni rayben wiꞌ ja kꞌij ja tok xtipeti ja Toꞌonel chi quitoꞌic ja tinamit Israel. Cꞌoli ja rEspíritu Santo ruqꞌuin. 26Ja cꞌa rEspíritu Santo arjaꞌ cꞌoli rkꞌalasan chic chwach, quewaꞌ rbin tre riꞌ: —Simeón, atat cꞌa atcꞌas na ja tok xtitakto ja Cristo rmal ja Dios ja rawajaw, natzꞌat can na rwach, neꞌ tre. 27Ja cꞌa Simeón arjaꞌ xucꞌax rmal ja rEspíritu Santo, be chipan ja nimlaj templo xin Dios in ni jariꞌ hora tok triꞌ cꞌamarel wiꞌ chakajaꞌ ja ti yaquiꞌ Jesús cumal ja rtataꞌ ruteꞌ utzcꞌa chi neba̱n tre ja caniꞌ nbij ja ley xin Dios. 28Ja cꞌa Simeón tok xeꞌekaj ruqꞌuin xchꞌelej ja ti yaquiꞌ in xumaj ryaꞌic rukꞌij ja Dios, quewaꞌ xbij tre ja Dios riꞌ: 29—Wajaw, camic utz chic ninacꞌamel, quiꞌ chic nucꞌuꞌx ja nincami como camic xaban cumplir ja xatzujuj chwe. 30Como camic xintzꞌat ruqꞌuin nwach ja Toꞌonel 31ja ratakonto pro jun Toꞌonel kaxin kanojelal ja rok winak xa nak ta chi ok winakil, 32jun Toꞌonel ja racojon como jun luz ja nsakirsan quebey ja winak ja ma e aj Israel ta in chakajaꞌ acojon como yaꞌbal kakꞌij ajoj ja rok aj Israel ja rok tinamit awxin. Queriꞌ xbij ja Simeón.

33Ja cꞌa José rachbil María ja ruteꞌ ja ti Jesús ejeꞌeꞌ kas cꞌascꞌoꞌi quicꞌaxaj ja xbij ja Simeón tre ja ti yaquiꞌ. 34Cꞌacꞌariꞌ ja Simeón arjaꞌ xcꞌutuj ja rutzil xin Dios pa quewiꞌ in quewaꞌ xbij tre ja María riꞌ: —Tacꞌwaxaj mpeꞌ ja xtinbij chawe riꞌ, jawaꞌ jun tacꞌal riꞌ arjaꞌ chaꞌon rmal ja Dios utzcꞌa chi rmal arjaꞌ ja tok e qꞌuiy chique ja kach tak aj Israel nekajsax na in e qꞌuiy chique chakajaꞌ netotaj na rmal. In jun chic, arjaꞌ ncꞌutu na chikawach ja kas mero rbey Dios pro jariꞌ xa nchꞌa̱ꞌ na tre cumal ja winak. 35Ja cꞌa xtaban atat, cꞌoli ja xtanaꞌ caniꞌ jun cuchilo xtimin ruqꞌuin ja rawanma. Rmal cꞌa ja tawal riꞌ tok e qꞌuiy ja winak bien nkꞌalajin na nak ja nquechꞌob kaj pa tak canma, neꞌ tre.

36Cꞌo cꞌa jun ti nan triꞌ, Ana rubiꞌ, rmeꞌal jun achi Fanuel rubiꞌ, arjaꞌ riy rumam can ja rAser. Ja cꞌa rAser arjaꞌ jun chique ja cablajuj rcꞌajol Jacob. Ja cꞌa Ana arjaꞌ profeta xin Dios, congana ti riꞌj chic. Cꞌa kꞌapoj na ja tok cꞌuleꞌe in xa wukuꞌ junaꞌ cucꞌaj quiꞌ ruqꞌuin ja rchajil 37como chanim cami ja rchajil, xoc can ti malcaꞌn in ma xcꞌuleꞌ chic ta. Ochenticuatro chic rjunaꞌ. Kꞌij kꞌij ni matel wiꞌ chipan ja nimlaj templo xin Dios, nuban ja rayuno in nuban ja roración jariꞌ nyabej rukꞌij ja Dios chi pa kꞌij chi chakꞌaꞌ. 38Ja cꞌa ti yaquiꞌ Jesús chꞌelen rmal ja Simeón in ni jariꞌ hora peti ja Ana, xmaltioxij tre ja Dios ja cꞌo chic ja Toꞌonel in xlasaj rbixic ja tacꞌal chique canojel ja winak ja quimajon raybexic ja totajem xin Dios triꞌ ja pa Jerusalén.

39Ja cꞌa tatixelaꞌ tok bantaj cumplir cumal nojelal ja caniꞌ nbij ja ley rxin ja kajaw Dios chi nqueban cꞌacꞌariꞌ xemeloj chic jutij chipan ja tinamit Nazaret ja bar ecꞌo wiꞌ ja cꞌo chipan ja departamento Galilea. 40Ja cꞌa tacꞌal arjaꞌ xumaj qꞌuiyem, winakar más rchokꞌakꞌ, congana tzꞌakat ja rnaꞌoj in cꞌoli ja rutzil xin Dios ruqꞌuin.

* * * * * * * * * *

41Ja cꞌa rtataꞌ ruteꞌ ejeꞌeꞌ nojel tak junaꞌ tok nerilaꞌ ja nmakꞌij pascua ni nepi wiꞌ pa Jerusalén. 42In queriꞌ queban chakajaꞌ ja tok cablajuj chic rjunaꞌ ja Jesús, xebe ja pa Jerusalén como ni quicostumbre wiꞌ ja raj Israel chi nequicꞌuluꞌ ja nmakꞌij. 43Ja cꞌa tok xocꞌowi ja nmakꞌij netajini nemeloji pa Nazaret pro ja cꞌa Jesús ja talaꞌ arjaꞌ qꞌuejeꞌ can pa Jerusalén xarwariꞌ mta rnaben ja José chi qꞌuejeꞌ can nixtacꞌa ruteꞌ ta chakajaꞌ. 44Ja nquechꞌob ejeꞌeꞌ chi cꞌoli ja Jesús chiquicojol ja juleꞌ chic winak ja recachbilanto pa bey. Kaj jun kꞌij chi binem cumal. Ja tok quetzꞌat chi mta ja Jesús cꞌacꞌariꞌ quemaj rcanoxic chiquicojol ja cachꞌalal in chiquicojol ja winak ja cotak quewach chakajaꞌ. 45Ja cꞌa tok ma xcanoy ta cumal cꞌacꞌariꞌ xemeloji ja pa Jerusalén chi rcanoxic. 46Cꞌa chi oxiꞌ kꞌij xequiwilaꞌ wiꞌ, chipan ja nimlaj templo xin Dios cꞌo wiꞌ, tzꞌubul chiquicojol ja maestro ja netijon quixin ja winak tre ja rtzobal Dios. Kas nuyaꞌ rxquin tre ja nquibij ja maestro in cꞌoli ja ncꞌaxaj jeꞌe chique chakajaꞌ. 47Kas ncꞌascꞌoꞌi nquicꞌaxaj ja nbij pro canojelal como congana tzꞌakat ja rnaꞌoj in tok cꞌoli nquicꞌaxaj tre congana utz ja nbij chique. 48Peti ruteꞌ rachbil ja José:

—¿Waweꞌ ek atcꞌo wiꞌ ntaꞌ? ¿Nak tre tok xaban quewaꞌ chake? Ok caꞌiꞌ in atataꞌ congana okelnak cꞌay amwal chi acanoxic, neꞌx rmal ja ruteꞌ.

49—¿Nak tre ja tok ninecanoj? ¿La ma ewotak ta chi anin ni rjawaxic wiꞌ chwe chi nban cumplir ja rsamaj ja nataꞌ Dios? neꞌe ja Jesús chique. 50Pro ejeꞌeꞌ ma xchꞌobtaj ta cumal ja xbij chique.

51Cꞌacꞌariꞌ xerachbilajel chic ja Jesús, xemeloj chic jutij pa Nazaret. Arjaꞌ ni nnimaj wiꞌ ja nquibij tre. Ja cꞌa ruteꞌ arjaꞌ xucꞌol ja pa ranma nojel ja bantaji ja pa Jerusalén. 52Ja cꞌa Jesús junaꞌ junaꞌ xa janiꞌ penak más ja rnaꞌoj, ni rchapon wiꞌ qꞌuiyem in más chi na utz ntzꞌa̱t rmal ja Dios in cumal ja winak chakajaꞌ.

Currently Selected:

Lucas 2: tzjW

Highlight

Copy