Apocalipsi 1

1-2Duréihã, 'Re ihâimana u'âsi mono hã ma tô Zezu Cristuhu ma awaihu'u siro, tô sena na za romhutu na 're iromhâimana mono zém na, tinhib'a'uwẽ norĩ ma, te te duré waihu'u siromo za'ra da.

Tahawa, Zezusi hã ma tô hâiwa ãma romhuri'wa hã we satõ Zuwãhã u, marĩ te te tãma waihu'u da. Tawamhã ma tô itẽme wi. Itẽme wisi wamhã, Zezusihi ma, 'Re ihâimana u'âsi mono hã sõ'awi te te oto tãma iromhâi'rézém na ma tô Zuwãhã ma waihu'u. Ãhã wamhã, sõtõ 'rowim ne, ma tô marĩ hã 'madâ, da te 're irosawẽrẽ za'ra mono ne. Tahawa, tô sena na te za oto Zuwã hã ãne aima ãma rob'ui'éré za'ra wa'wa, waihu'u za'ra wa'aba da, uburé marĩ hã te te i'madâ'âzém na, tô sena 'Re ihâimana u'âsi mono nhimiwaihu'uzém na hã, Zezusi hã sena na te te iwaihu'uzém na. 3Tawamhã ãhã wasu'u hã za 're iromhâimana mono zém na ni'wa te te dama 're sõré mono wamhã, tãma 're rowẽ u'âsi mono di za. Duré, ãhã wasu'u hã ni'wa te te 're wapari pese mono wamhã, ãma tãma 're rowẽ u'âsi mono di za. Ãma ronomro õ ré, te za 're romhâimana, 'Re ihâimana u'âsi mono te te iwaihu'uzém na hã. Tahawa, ni'wa hã hâimana nhimiza'rese sina, te te 're wapari pese mono wamhã, tãma hã 're rowẽ u'âsi mono di za ãma.

Azia na ti'a nhisi ãma isazei'wa norĩ, Zuwã te te isawi za'ra zé wasu'u

4Wa hã, Zuwã. Ĩnhimi'ui'éré na wa ãma asawi za'ra wa'wa, Azia na danhipti'a nho'õmo nhisi ãma, Zezusihi zazei'wa, asiré 're asi'rã'õtõ u'âsi aba mono norĩ hã, 7 na daza'rui mono bâ 're i'ai'rã'õtõ aba mono norĩ hã.

Wa hã wa ai'ãma 're ĩmreme u'âsi za'ra wa'wa, 'Re ihâimana u'âsi mono ma, isimizawizé hã ai'ãma 're hâimana u'âsi za'ra wa'aba mono da, rowẽ u'âsi, ãma 're anomro aba mono da. Ta hã duréihã marĩ õ uptabi ré, ma tô 're hâimana u'âsi. Õne u'âsi te za duré ãhã mono na zama hã 're hâimana. Hâiwa ãma te ta hã 're sãmra u'âsi, danhib'apito simasisizém na. Duré Ipẽ'ẽzani zama te te 're aipawaptob u'âsi za'ra wa'aba mono da, wa duré ai'ãma te 're rosa'rata u'âsi za'ra wa'wa. Ta hã te 'Re ihâimana u'âsi mono simasisizé uiwada 're hâimana u'âsi. Taha pẽ'ẽzani hã 7 na isimiromhuri hã. 5Zezu Cristuhu zama te te 're aipawaptob u'âsi za'ra wa'aba mono da, wa duré ai'ãma te 're rosa'rata u'âsi za'ra wa'wa. Ta hã dama i'umnha, te simi'ẽ na 're hâimana, 'Re ihâimana u'âsi mono zadawa wasu'uwẽ 'wa da hã. Ta hã ma tô dawana tihâiwa'utu 'rata, ihâiba si'utõrĩ waihu'u õ na. Uburé ti'ai ãma danhib'apito norĩ nhipai u, Zezusi hã te 're hâimana. Misi Danhib'apito uptabi na, te tô 're hâimana.

Ta hã te te 're wa'azawi pese. Tahawa, ma tô wazada dârâ. Wazada dâ'â wamhã, iwapru ma tiwi puru. Tawamhã wawasété na 're wanomro mono ré, ma tô tiwapru na tidâ'âzém na te te 're wa'a'upsõ, wawasété ãna ãma 're wanomro mono da oto. 6Ma tô duré te te 're wa'apisutu, Imama ma, wa te da'ãma 're romhuri u'âsi za'ra mono da, sasedoti norĩ ne, Isib'apito ma hã. Ma tô duré te te 're wa'apisutu, isadawa para, wapire na 're wahâimana za'ra mono da. Ta hã Zezusi hã wẽ uptabi wa, duré waihu'u pese uptabi wa, wa za tô ãma 're wawata u'âsi za'ra.

7Ma'ãpé, asiwi waihu'u pese za'ra wa'aba. Zezusi hã te za wei mo, hâiwa'a na. Wei morĩ wamhã, uburé te za dasiwi 'madâ'â za'ra ni. I'a're wi, siwi iwa'ré'wa norĩ hã te za duré 'madâ'â za'ra, siwi iwĩrĩ'wa norĩ hã. Tawamhã da'upsãtã mono bâ te za sô aiwa'õ za'ra ni, daro mono bâ. Tô sena te za ãne hã tiromhâiba.

8'Re ihâimana u'âsi mono, dama isiwaihu'uzé hã, ãne: “Wa hã imorĩ'rata na, wa tô 're ĩhâimana u'âsi. Õne u'â, wa za duré 're ĩhâimana u'âsi. Uburé marĩ hã si'utõrĩ pese nherẽ, duré wa hã isarina za'ra ĩsi'utõrĩ da hã mare di za.”

Zuwã hã Zezusi te te isabuzé wasu'u, sõtõ 'rowim ne

9Wa hã Zuwã, asisãnawãi wa'wa. A norĩ wa'wa hã Zezusihi ãma si 're anomro aba mono wa, danhimirob'manharĩ wasédé, 're isépata za'ra wa'aba mono ne, wa duré te 're robzépata, asine za'ra wa'aba, Zezusihi ãma si 're ĩmorĩ wa. Zezusihi ãma si wasiré 're wanomro mono wa, wa duré 'Re ihâimana u'âsi mono nhib'a'uwẽ 're wahâimana za'ra. Ta hã te za duré te te 're wa'apawaptob u'âsi, da te 're wa'ruiwapari za'ra mono wa, wa te 're robzépata za'ra mono nherẽ, wawasété u tiwi 're wasipizari za'ra mono tõ da, wanhiptete u'âsi ãma 're wanomro mono da.

Wa hã wa tô te dama 're sadawa wasu'u, 'Re ihâimana u'âsi mono hã. Tô sena na Zezusihi zazei'wa na wa tô duré dama 're ĩsiwasu'u u'âsi. Tahawa, ma tô dasiwi ĩ'âri ni. Ma tô duré dasiwi ĩzatõrĩ ni, Patemusi na rob'ré za'iti nhisi u. 10Tawamhã tame ĩnhamra ré, Wanhib'apito nhibâtâ na 'Re ihâimana u'âsi mono pẽ'ẽzani hã ma tô ĩ'uihâ pi'ra. Te te ĩ'uihâ pi'rai wa, wa tô aimawi ĩhâiba, ĩhâiba waihu'u õ na. Tawamhã ĩhâiba waihu'u õ na ĩhâimana ré, wa tô ni'wai mreme hã wapa, ĩbabarãi hawi. Mreme 'rãihâ na te ĩma tinha, danhimnhihârâzé hârâ 'rãihâ na ne. 11Ãne te tawamhã ĩma tinha:

— Ãhã na marĩ hã te za i'ab'madâ'â mo. Tawamhã uburé i'ab'madâ'â mono hã te za ibaihâ na ãma irob'ui'é. Ãma rob'ui'éré parimhã, Zezusihi zazei'wa norĩ, 'ri nho'õmo mono bâ siré 're isi'rã'õtõ mono norĩ ma, te za ibaihâ hã isõmri za'ra, 'Ri nho'õmo nhisi mono bâ, ãne isisi norĩ ma: Éfézu, duré Esmina, duré Pegamu, duré Tiatira, duré Sadési, duré Filadéufia, duré Laudiséa. Ã norĩ ma, te za asimi'ui'éré hã tãma isõmri za'ra, isazei'wa norĩ ma, 7 na 'ri nho'õmo ãma 're isi'rã'õtõ mono norĩ ma hã.

12Tawamhã wa tô ĩsibabarãi u 'rãihaipi'ra, ĩma inharĩ'wa zô. Sô ĩsipi'rai wamhã, rob'uiwẽzé sima'warazé hã 7 na ihâiba za'ra hã duré isisiwimhã iro'o ré hã wa tô 'madâ'â za'ra. Rob'uiwẽzé sima'warazé mono hã, ẽtẽ waipo pré oru 'manharĩ. Te rob'madâ'â nherẽ, ĩnhotõ 'rowi te irosawẽrẽ ne, wa tô rob'madâ. 13Tawamhã rob'uiwẽzé wa'wa, te ni'wa hã za, aibâ ne hã. I'uza hâpa, ipara u te tiwi hâihaipra. Duré sõ'utu wasisi ré, te za. Isõ'utu wasisizé hã, oru 'manharĩ na. 14Duré iséré hã, rã uptabi di. Pone'ẽrebâ zéré ne, tô sena irã uptabi, iséré hã. Duré, ito hã, unhama ro'o si'ubuzi ne te 're si'ubuzi zahuré. 15Duré ipara hã ẽtẽ topsada brõzi ne, te 're si'ubuzi zahuré. Duré imreme hã, â'a'a 'rãihâ ruru'u ne. 16Wasi hã 7 na te tété za'ra, tinhib'rata nhimire niwĩ. Duré isadai'ré hawimhã, sib'ézé 'wa si'uiwa 'wa pa te da'o, i'wa pe hã. Duré i'ubu hã te rowa'a za'ẽtẽ. Abzuma bâdâ te te 're irowa'a mono ne, te rowa'a za'ẽtẽ.

17Tawamhã õ hã te 'madâ'â wamhã, wa tô ipapara aime sa'ẽtẽ, ĩdâ'â ne, ĩpahi te. Tane nherẽ, ma tinhib'rata nhimire niwĩ ĩ'upi, ĩpahi tõ da. Ãne te ãhã wamhã ĩma tinha:

— Ĩma aipahi tõ. Wa hã romna'rada duré rob'rãsudu. 18Wa tô dârâ aré. Ĩdâ'â nherẽ, wa oto tô 're ĩhâimana u'âsi. Duré oto ĩdâ'â waihu'u õ di za. Ma'ãpé, ãne na hã awaihu'u pese. Te ĩsima ipisutuzéb zarina, wa te te 're da'anho'reptu, adâ 're ihâimana za'ra mono zém hawi, 'Re ihâimana u'âsi mono 'rata, oto 're dahâimana u'âsi za'ra mono da. 19Tahawa, uburé marĩ hã i'ab'madâ hã te za i'a'ui'éré mo, ãhã na ipusi mono hã, duré nimahã na za ipusi mono da hã. 20Ãhã na wa za duré aima waihu'u. Wasi hã ĩnhib'rata nhimire niwĩ te itété za'ra i'madâ hã, te ãma isimiré'ézé hã waihu'u õ di, a hã. Duré rob'uiwẽ uparizé i'madâ'â za'ra hã te ãma isimiré'ézé hã, waihu'u õ di tô duré aima. Tahawa, wa za oto aima waihu'u, te ãma isimiré'é zahuré zém na hã, waihu'u da. Wasi hã 7 na ihâiba za'ra hã, ĩnhib'rata nhimire niwĩ te itété za'ra hã, isazei'wa norĩ 'madâ'â'wai mono, te wasu'u, tô 7 na ihâiba za'ra hã. Duré rob'uiwẽzé sima'warazé hã, duré isisiwimhã iro'o ré hã 7 na ihâiba za'ra hã, isazei'wa norĩ te wasu'u, 'ri nho'õmo mono bâ siré 're isi'rã'õtõ mono norĩ. Ãne te ãma isimiré'é zahuré zé hã.

Currently Selected:

Apocalipsi 1: xavBP

Highlight

Copy