Apocalipsi 2

Éfézu ãma isazei'wa norĩ ma rotizé wasu'u

1Tawamhã Zezusi hã ĩtẽme iwi hã ma tô duré ĩma roti, ãne:

— Zuwã, te za oto irob'ui'é, Éfézu na 'ri nho'õmo nhisi ãma ĩzazei'wa norĩ 'madâ'â'wai ma. Te aima iwaihu'uzém na te za tãma irob'ui'é, ãne:

“Wa hã wa ĩsi'uihâ na aima roti za'ra wa'wa, wasi hã 7 na ihâiba za'ra hã ĩnhib'rata nhimire niwĩ te itété za'ra hã, duré 7 na rob'uiwẽzé sima'warazé wa'wa 're ĩmorĩ hã, oru 'manharĩ wa'wamhã. 2Éfézu ãma ĩzazei'wa norĩ, uburé 're i'aihâimana za'ra wa'aba mono zé hã ĩma waihu'u pese di. Asimi'ẽ na te ĩma 're iromhuri pese za'ra wa'aba mo. Da te aima 're rob'manharĩ za'ẽtẽ za'ra wa'aba mono nherẽ, aiwasété u 're aipizari za'ra wa'aba mono õ di, apâ. 'Re idanomro wasété mono norĩ nhimiroti hã te 're iwẽ'õ pese za'ra wa'aba mo. Ni'wa hã Zezusihi zadawa wasu'u'wa na aima siwasu'u za'ra wa'aba nherẽ, awa'awi 're saze za'ra wa'aba mono õ di. Isimiroti hã te a'â 're iwapari za'ra wa'aba mo. Tawamhã i'uwaibaba'õ na te te aima 're sadawa wasu'u za'ra wa'aba mono wamhã, awa'awi te asina 're iwaihu'u za'ra wa'aba mo, isadawa nhipese na hã. Tahawa, te ã norĩ hã 're iwẽ'õ za'ra wa'aba mo. 3Da te 're ai'ruiwapari za'ra wa'aba mono wa, 're robzépata za'ẽtẽ za'ra wa'aba mono nherẽ, 're ĩrẽme za'ra wa'aba mono õ di. Duré ĩwi 're aipizari za'ra wa'aba mono õ di. Ĩ'ãma si te aihâimana nhiptete sina hã 're aihâimana za'ra wa'aba mo.

“Ãne wa tô te 're aiwaihu'u za'ra wa'wa, 're i'aihâimana wẽ za'ra wa'aba mono zém na hã. 4Tane nherẽ, te oto marĩ hã misi pese ĩwi ro'wa'ré, te ai'ãma iwaihu'u za'ra wa'wa hã. Duréihã 're ĩzazei na'rata za'ra wa'aba mono zém hawimhã, aré asimizawi pese za'ra wa'aba di. Tane nherẽ, ma tô oto asiwi irẽme 'wa, 're asimizawi pese za'ra wa'aba mono zé hã. 5Ma'ãpé, ĩ'ãma asipo're pu'u za'ra wa'aba. 'Re ĩzawi pese za'ra wa'aba mono zém hawimhã ma tô oto asina irosapari pese za'ra wa'wa. Tahawa, aiwasété wi, te za oto 're aipizari za'ra wa'aba mo, apâ. 'Re ĩzazei na'rata za'ra wa'aba mono zém hawim haré, 're i'aihâimana wẽ za'ra wa'aba mono ne, te za tô oto apâ hã 're anomro wẽ wa'aba mo. Ãnei õ wamhã, aiwasété wi 're aipizari za'ra wa'aba mono ãna 're anomro aba mono wamhã, wa za ãma atẽme ĩmorĩ za'ra wa'wa, rob'uiwẽzé sima'warazé ate wa'wa hã te aiwi âri za'ra wa'aba da. Te aiwi âri za'ra wa'aba wamhã, baba di za oto, ate za'ra wa'wa rob'uiwẽzé hã. Ãne, wa aima waihu'u siromo za'ra wa'wa ãma. 6Duré, misi asimirosa'rata za'ra wa'wa hã, tô ĩma iwẽ hã. Nicora'ihi nhimiroti wasédé hã te te 're iwapari za'ra mono norĩ hã te 're hâimana wasété za'ra. 'Re ihâimana wasété za'ra mono zé hã ĩma wẽ õ di, wa hã. Ta hã ĩsine 're wẽ'õ pese za'ra wa'aba mono wa, tahawa, ai'ãma ĩma 're rowẽ za'ra wa'aba mono di.

7“A norĩ wa'wa hã asimipari pese aba wamhã, ma'ãpé wapari pese za'ra wa'aba, Ĩmama pẽ'ẽzani hã ĩzazei'wa norĩ ma, te te irotizém na hã. Ãne isimiroti hã: Ni'wam norĩ hã tidâ'âzéb u ĩwi sipizari ãna Satanasihi ãma te te i'ai'uté za'ra norĩ hã ta norĩ ma si, wa za tãma pisutu za'ra, rob'rãi u'â hã te te 're huri u'âsi mono da. Taha wede hã 'Re ihâimana u'âsi mono 're isãmra u'âsi mono zéb ãma te 're sa, rowẽ uptabi ãma hã, i'rã hã da te 're huri mono wa, dadâ'â ãna 're idanomro u'âsi mono zé hã. Ãne Ĩmama pẽ'ẽzani te te irotizé hã.”

Esmina ãma isazei'wa norĩ ma rotizé wasu'u

8— Te za oto irob'ui'é, Esmina na 'ri nho'õmo nhisi ãma ĩzazei'wa norĩ 'madâ'â'wai ma. Te aima iwaihu'uzém na te za tãma irob'ui'é, ãne:

“Wa hã wa aima roti za'ra wa'wa, duréihã marĩ õ ré 're ĩhâimana mono. Uburé marĩ hã si'utõrĩ pese nherẽ, wa hã, marĩ zarina ĩsi'utõrĩ õ di za. Wa za 're ĩhâimana u'âsi. Wa tô dârâ aré. Ĩdâ'â nherẽ, wa tô apâ duré hâiwa'udu, 're ĩhâimana u'âsi mono da oto apâ. 9Ĩma waihu'u pese di, da te aima 're irob'manharĩ wasété za'ra wa'aba mono zém hawi, 're irobzépata za'ra wa'aba mono zé hã. Duré, ĩma waihu'u pese di, asibrob'õ na 're irobzépata za'ra wa'aba mono zé hã. Tane nherẽ, te asibrob ahâ ne, rowẽ na 're aihâimana za'ra wa'aba mo, ĩnhimipawaptobzém na si 're aihâimana za'ra wa'aba mono wa. Duré ni'wam norĩ hã te te dama 're aiwasu'u wasété za'ra wa'wa. Te te dama 're aiwasu'u wasété za'ra wa'aba mono zé hã ĩma waihu'u pese di. Ta norĩ hã zudeu na 're poto za'ra mono zahã, te Satanasihi nhimiroti zarina si, siwa'ru 're hâimana za'ra. 10Za 're irobzépata za'ra wa'aba mono zém na hã asina 're aipahi za'ra wa'aba mono õ di za. Ĩwapari pese za'ra wa'aba. Wa'uburé hã nimahã na te za dama ai'mai'ru wasété 'wa, da te ai'maimrami aba da, dazazéb 're, da te ai'manheme aba da, te te aipibu za'ra wa'aba da, tô sena ĩzaze za'ra wa'aba zô. Tawamhã 10 na bâdâ hã te za ai'ãma 'maihai'utõrĩ 'wa, dazazéb 're ai'masima'wara aba ré, niha aihâiba za'ra wa'aba na 're 'mairobzépata za'ra wa'aba mono ré hã. Ãne wamhã, ma'ãpé asiwi ĩrẽme aba tõ, tô'ã. Tawamhã da te ai'manhimroi wa'aba zém na ai'masi'utõrĩ aba nherẽ, ĩ'mairẽme aba õ wamhã, duré dawi ĩ'mai'udâ wa'aba õ wamhã, wa za aima wa'âbâ za'ra wa'wa. Rowẽ, wa za aima pisutu za'ra wa'wa, ĩ'rata 're i'ai'ubumroi u'âsi aba mono zéb da hã.

11“Asimipari pese za'ra wa'aba wamhã, ma'ãpé ĩwapari pese za'ra wa'aba, Ĩmama pẽ'ẽzani hã ĩzazei'wa norĩ ma, te te irotizém na hã. Ãne isimiroti hã: Ni'wam norĩ hã tidâ'âzéb u ĩwi sipizari za'ra ãna Satanasihi ãma te te i'ai'uté za'ra norĩ hã ta norĩ hã 're idadâ'â zahu za'ra mono norĩ siré, te te 're robzépata za'ra mono õ di za, unhama ro'o u'âsi ãma hã. Robze na te za 're hâimana u'âsi za'ra. Ãne Ĩmama pẽ'ẽzani te te irotizé hã.”

Pegamu ãma isazei'wa norĩ ma rotizé wasu'u

12— Te za oto irob'ui'é, Pegamu na 'ri nho'õmo nhisi ãma ĩzazei'wa norĩ 'madâ'â'wai ma. Te aima iwaihu'uzéb zarina te za tãma irob'ui'é, ãne:

“Wa hã sib'ézé 'wa si'uiwa 'wa pa pese ré ĩza hã, wa aima roti za'ra wa'wa, i'wa pese ré hã. 13Ĩma waihu'u pese di, 're i'ai'ubumroi wa'aba mono zé hã. Tame te Satanasihi nhimiwada'uri na 're dahâimana za'ra. Tame ma tô Ãtipasi hã dasiwi wĩrĩ ni asõ'a za'ra wa'aba, simi'ẽ na te te dama 're ĩzadawa wasu'u mono hã. Tane nherẽ, asõ'a za'ra wa'aba da te dasiwi wĩrĩ nherẽ, tãma aipahi za'ra wa'aba õ di. Ĩrẽme za'ra wa'aba õ di duré. Õne haré te ĩnhimiroti na si 're aihâimana za'ra wa'aba mo. 14Tane nherẽ, te duré marĩ hã ĩwi ro'wa'ré, te ai'ãma iwaihu'u za'ra wa'wa hã. Ni'wam norĩ hã ma tô aibâ nhimiroti na 're hâimana za'ra, Balaã na aibâ nhisi hã. Ta hã ma tô duréihã Baraquihi ma te te 're roti, Izaraéu nhihudu norĩ ma, sadawa nhipese na te te 're roti wasété za'ra mono da, simiroti wẽ newa, isine 're hâimana wasété za'ra mono da. 'Re ihâimana u'âsi mono upana, romhâiba 'manharĩ ãma 're dawata za'ra mono da, danhimizama da te tãma 're isõmri za'ra mono hã, ma tô Baraqui hã te te 're a'ru, Izaraéu nhihudu norĩ ma, te te 're huri mono da. Ma tô duré te te tãma 're roti pese za'ra, pi'õ, mro ré nherẽ, aibâ aimawi na 're simisaihuri za'ra mono da, duré aibâ, mro ré nherẽ, pi'õ aimawi na 're simisaihuri za'ra mono da. 15Tane, te ãhã na ni'wam norĩ hã Nicora'ihi nhimiroti wasété na 're hâimana za'ra, asiré 're aihâimana za'ra wa'aba mono norĩ hã. 16Ma'ãpé ãhã na hã aihâimana wasédé hã sahâri za'ra wa'aba, aiwasété wi 're aipizari za'ra wa'aba mono da, 'Re ihâimana u'âsi mono u. Aihâimana wasédé hã sahâri za'ra wa'aba õ wamhã, wa za ãma atẽme ĩmorĩ su'u za'ra wa'wa, 're aihâimana wasété za'ra wa'aba mono norĩ hã ĩzadai'ré hawi sib'ézé 'wa si'uiwa isa'o na te ai'wapé za'ra wa'aba da.

17“Asimipari pese za'ra wa'aba wamhã, ma'ãpé wapari pese za'ra wa'aba, Ĩmama pẽ'ẽzani hã ĩzazei'wa norĩ ma, te te irotizém na hã. Ãne isimiroti hã: Ni'wam norĩ hã tidâ'âzéb u ĩwi sipizari ãna Satanasihi ãma te te i'ai'uté za'ra norĩ hã ta norĩ ma, wa za dasa ise hã duréi te dama ihâi'ré'õ hã te tãma 're anhomri, mana na dasa nhisi hã. Duré ẽtẽ'a, wa za te tãma 're anhomri ihâiba mono bâ, isisi itém na ãma irob'ui'éré za'ra ré hã dama isa'rese'õ hã. Te te 're iwaibui mono norĩ ma si, za waihu'u pese di, isisi ité hã. Ãne Ĩmama pẽ'ẽzani te te irotizé hã.”

Tiatira ãma isazei'wa norĩ ma rotizé wasu'u

18— Te za oto irob'ui'é, Tiatira na 'ri nho'õmo nhisi ãma ĩzazei'wa norĩ 'madâ'â'wai ma. Te aima iwaihu'uzém na te za tãma irob'ui'é, ãne:

“Wa hã 'Re ihâimana u'âsi mono 'ra, wa aima roti za'ra wa'wa. Ĩto hã te unhama ro'o si'ubuzi ne 're si'ubuzi zahuré. Duré ĩpara hã te ẽtẽ topsada brõzi ne 're si'ubuzi zahuré. 19Marĩ hã 're i'manharĩ wẽ za'ra wa'aba mono zé hã ĩma waihu'u pese di. Te 're asisawi pese za'ra wa'aba mo. Te duré 're ĩzawi pese za'ra wa'aba mo. Te duré asina 're ĩ'umnhasi za'ra wa'aba mo. Te duré ĩma 're iromhuri pese za'ra wa'aba mo. Da te aima 're rob'manharĩ wasété u'âsi za'ra wa'aba mono nherẽ, te ĩ'ãma si 're anomro u'âsi aba mo. 'Re ĩzaze na'rata za'ra wa'aba mono hawi, ĩma 're iromhuri za'ra wa'aba mono zém nhipai u, te oto ĩma 're iromhuri pese za'ra wa'aba mo. Ãne wa tô ĩsi'ãma aiwaihu'u za'ra wa'wa. 20Tane nherẽ, marĩ hã misi te ĩwi ro'wa'ré, te ai'ãma iwaihu'u za'ra wa'wa hã. Pi'õ iwasédé hã te ai'rata 're hâimana za'ra wa'wa, Zézabéu na isisi hã. Ta hã 'Re ihâimana u'âsi mono zadawa 'mahârâ'wa na te dama 're siwasu'u, taré. Ãne dama 're siwasu'u mono nherẽ, te ĩzazei'wa norĩ ma, simiroti wasété na te te 're roti. Taha zarina, te ta norĩ hã pi'õ aimawi na mro ré nherẽ, ãma dawi 're simisaihuri za'ra. Duré pi'õ, mro ré nherẽ, aibâ aimawi na te ãma dawi 're simisaihuri za'ra. Duré romhâiba 'manharĩ ãma 'Re ihâimana u'âsi mono upana 're dawata za'ra mono da, danhimizama da te tãma 're isõmri za'ra mono hã te duré te te 're huri. Ta hã, pi'õ hã e niha te simiroti wasété nherẽ, ai'rata 're hâimana za'ra wa'wa. E asiwi wẽ'õ za'ra wa'aba ãna. 21Ta hã pi'õ hã simiroti wasété nherẽ, ãma ĩwa'a õ di aré, te i'azârizéb da hã. Tiwasété wi sipi'ra da newa, wa tô aré te 're 'madâ'â. Tane nherẽ, tiwasété wi sipi'rai õ di, aibâ aimawi na dawi 're ihâimana mono zém hawimhã. 22Ma'ãpé, waihu'u pese za'ra wa'aba. Pi'õ hã tiwasété wi sipi'rai õ wa, wa za oto azâ, te te robzépata za'ẽtẽ da. Si'ãma 're ihâimana wasété za'ra mono norĩ zama ã pi'õi hawi sipizari za'ra õ wamhã, wa za isu hâ za'ra, te te robzépata za'ẽtẽ za'ra da. 23Pi'õ nhirã zarina 're ihâimana za'ra mono norĩ hã wa za duré hâ za'ra, si'utõrĩ da, isimiroti zarina ta norĩ hã we 're hâimana za'ra mono wa. Tawamhã ãne te tãma rob'manharĩ za'ra wamhã, te za uburé ĩzazei'wa norĩ hã ãma ĩwaihu'u za'ra, pi'uriwi marĩ hã da te 're 'manharĩ za'ra mono newa, duré pi'uriwi danhimirosa'rada hã da te 're 'manharĩ za'ra mono newa, uburé marĩ hã te dawi 're i'awaihu'u mono na hã. Uburé danhimirosa'rada hã ĩma waihu'u pese di, duré marĩ zô 're idanhimnhasi za'ra mono zéb zama. Tawamhã ni'wam norĩ hã marĩ iwẽ hã te te 're i'manharĩ za'ra mono zé wa'rãmip si, wa za marĩ iwẽ na te tãma 're awa'âbâ. Duré ni'wam norĩ hã marĩ te te 're i'manharĩ wasété za'ra mono zéb zarina si, wa za te 're ahâ za'ra.

24“Pi'õ nhimiroti 're iwapari za'ra wa'aba mono õ norĩ ma si, wa za oto aima waihu'u za'ra wa'wa, ĩzazei uptabi 'wa norĩ ma si. A norĩ wa'wa hã Satanasihi nhimiroti sima'uri pe hã dawi waihu'u za'ra wa'aba õ di. Tô sena, wa aima waihu'u za'ra wa'wa. Te oto aima ãma sahu za'ra wa'aba õ di za, ĩnhimiroti i'amo na hã ipire na hã, te te 're asi'wa'rutu tõ za'ra wa'aba mono da. 25Õhõ na si te za asiptete na ĩ'ãma 're anomro aba mo, we ĩmorĩzéb u.

26-27“Tawamhã ni'wam norĩ hã tidâ'âzéb u ĩwi sipizari ãna Satanasihi ãma te te 're ai'uté za'ra mono wamhã, duré rob'rãsutu u te tãma 're iwẽ za'ra mono zéb zarina si, te te 're 'manharĩ za'ra mono wamhã, ta norĩ hã wa za pisutu za'ra, ĩzadawa para dama pire za'ra da, danhib'apito na 're hâimana za'ra mono da. Ĩmama hã dama ĩpire da, sisadawa para te te ĩpisutu ne, wa za pisutu za'ra, daro mono bâ te te 're da'madâ'â za'ra mono da. Simiroti nhiptete na te za te te 're dawada'uri za'ra. Ub'rẽ ne hã zé 'manharĩ hã da te 're iprub za'ra mono ne, te za ta norĩ hã tô te te 're daprub za'ra. 28Duré awẽ u, wasi wawẽ 're ro'o pese mono ré, da'ãma 're i'awẽ za'ra mono ne, wa za romhâimanazép té, te tãma 're apisutu, rowẽ hã.

29“Asimipari pese za'ra aba wamhã, ma'ãpé wapari pese za'ra wa'aba, Ĩmama pẽ'ẽzani hã ĩzazei'wa norĩ ma, te te irotizé wasu'u hã.”

Currently Selected:

Apocalipsi 2: xavBP

Highlight

Copy