Zuda 1

1Wa hã Zuda, Zezu Cristuhu ma romhuri'wa, Tiaguhu no, wa aima ãma rob'ui'éré za'ra wa'wa. 'Re ihâimana u'âsi mono hã ma tô te te 're aipisutu za'ra wa'wa, isib'a'uwẽ na oto tãma 're aihâimana za'ra wa'aba mono da. Tahawa, tãma asawi pese za'ra wa'aba di, Wamama ma hã. Duré Zezu Cristu hã te te oto 're ai'madâ'â pese za'ra wa'wa.

2Wa hã wa ai'ãma 're ĩmreme u'âsi za'ra wa'wa, 'Re ihâimana u'âsi mono ma, da'ãma 're ipẽ'ẽzé mono zé hã aima 're hâimana u'âsi za'ra wa'aba mono da, sa'ẽtẽ na, duré rowẽ hã te te aima 're pisutu za'ra wa'aba mono da. Wa te te tiwi 're rowaptẽrẽ u'âsi duré, isimizawizé hã ai'ãma 're hâimana u'âsi za'ra wa'aba mono da.

'Re ihâimana u'âsi mono nhimiroti upana, isazei'wa norĩ ma, rowasu'u nhipese'wa norĩ wasu'u

2 Pedru 2.1-22

3Ĩsisãnawã norĩ, ĩma asawi pese za'ra wa'aba norĩ hã, wa tô aré ĩsima rosa'rata, 'Re ihâimana u'âsi mono te te 're iwa'anho'reptui mono zém na te aima rob'ui'éré za'ra wa'aba da. Tane nherẽ, marĩ iwasétére hã ai'ãma 're hâimana za'ra wa'aba mono wa, wa tô ĩnhimirosa'rata na ĩsima ãma saprĩ, taha na si te ãma aima rob'ui'éré za'ra wa'aba da. Wa norĩ hã 'Re ihâimana u'âsi mono nhib'a'uwẽ, wa oto 're wahâimana za'ra. Ta hã ma tô misi haré te te wama 're anhomri, Cristuhu wasu'uwẽ na roti na ãma 're iwanomro mono zéb da hã. Tahawa, wa oto aima ãma rob'ui'éré za'ra wa'wa, tô da'ãma 're ai'aba'ré za'ra wa'aba mono da, Cristu, da te dasina 're i'umnhasi za'ra mono zéb udâna. 4E marĩ wa. Ni'wam norĩ hã, 'Re ihâimana u'âsi mono nhimiroti wẽ'õ'wa norĩ hã te aiwazari 're hâimana za'ra wa'wa. Sõ'awi te te 're rowahutu za'ra mono nherẽ, te ta norĩ hã roti na te te aiwi ãma 're upa za'ra wa'wa. Tahawa, isimiroti za'ra hã tô sena newa, te asiré isazei'wa norĩ hã te te 're wapari za'ra. Duré õ norĩ hã aibâ iwasété norĩ hã 'Re ihâimana u'âsi mono hã te te siwi 're wazé mono õ di. Duré Wanhib'apito Zezu Cristu hã misi uptabi 're ihâimana mono hã ma tô te te siwi 're wẽ'õ za'ra. 'Re ihâimana u'âsi mono nhimiroti hã te te duré 're 'madâ'â pese za'ra mono õ di. Aimawi na si te duré te te dama 're rowasu'u za'ra. Ãne isimiroti za'ra hã: “'Re ihâimana u'âsi mono hã te te 're da'azawi pese uptabi mono wa, te dawasédé hã te te dama 're apari. Tahawa, da te 're saze za'ra mono nherẽ, te za da te dasima 're iwẽ za'ra mono zéb uwaibaba, 're danomro wasété, 'Re ihâimana u'âsi mono nhimihâzém na dasina 're dapahi za'ra mono ãna.” Ãne isimiroti wasété za'ra hã, dama. Duréihã 'Re ihâimana u'âsi mono hã ma tô ta norĩ ãma waihu'u siro ibaihâ na hã, 're inomro wasété mono norĩ ãma, te te 're iwẽ'õ pese za'ra mono u'âbâ, za te te 're ihâ za'ra mono zém na hã.

5Wa za oto ãma aipo're pu'u za'ra wa'wa, aima waihu'u pese za'ra wa'aba nherẽ. Duréihã Wanhib'apito hã ma tô Izaraéu nhihudu norĩ sõ'reptu za'ra. Ezitu hawimhã ma tô sani za'ra. Tawamhã te te sõ'reptu za'ra nherẽ, ni'wam norĩ hã te te sina 're i'umnhasi za'ra mono õ norĩ hã ma tô uprosi. 6Tane duré, hâiwa ãma 'Re ihâimana u'âsi mono ma romhuri'wa norĩ hã, isipizari za'ra norĩ ãma, wa za duré ãma aipo're pu'u za'ra wa'wa. Ta norĩ hã ma tô 'Re ihâimana u'âsi mono hã pisutu za'ra aré, isadawa para niha na te te tãma 're romhuri za'ra mono da, pire na. Tane nherẽ, ma tô hâiwa ãma romhuri na tiwi ãma upa za'ra. Taha wamhã, 're ihâimana za'ra mono zé hã ma tô rẽme za'ra. Tahawa, ma tô oto 'Re ihâimana u'âsi mono hã satõrĩ za'ra, robra si 're isa'wari mono u, tame pawasisi ré 're simasab u'âsi mono da. 'Re ihâimana u'âsi mono hã ropsi'utõrĩzéb u za te te da'ãma irowairébézéb u, te za tame ta norĩ hã a'â 're hâimana u'âsi za'ra. Tawapsi te za oto wẽ'õ pese za'ra. 7Duré ãma asipo're pu'u za'ra wa'aba, duréihã Sodoma na 'ri nho'õmo nhisi ãma 're idahâimana wasété za'ra mono norĩ ãma, duré Gomora na 'ri nho'õmo nhisi ãma 're idahâimana wasété za'ra mono norĩ ãma, duré i'rata 'ri wa'õtõ mono bâ 're idahâimana wasété za'ra mono norĩ ãma hã. Tamemhã ma tô uburé dahâimana wasété uptabi na 're dahâimana za'ra, dasiwazari. Dahâiba na ma tô dasina 're danhimisaihuri za'ra. Duré aibâ nherẽ, ma tô aibâ si'uiwa na dasina 're dawasété za'ra. Hâiwa ãma aré te te 're iromhuri za'ra mono norĩ hã, 'Re ihâimana u'âsi mono hã te te 're iwapari za'ra mono õ ne, da te 're wapari za'ra mono õ di. Tahawa, ma tô unhama ro'o na dama rob'manharĩ za'ra, 'Re ihâimana u'âsi mono hã, da te 're robzépata u'âsi za'ra mono da, wẽ te bâ, unhama ro'o u'âsi na. Taha na te za ãma 're dasipo're pu'u u'âsi za'ra, ta norĩ zarina ãma 're danomro wasété tõ mono da, isirã za'ra zéb zarina.

8-9Duréihã 're idawasété za'ra mono ne, te ãhã na hã aibâ norĩ hã 're hâimana wasété za'ra, roti tô senai'õ na te te aima 're iroti za'ra wa'aba mono norĩ hã. Ta norĩ hã sõtõ 'rowim ne, marĩ iwasétére hã te te 're i'madâ'â za'ra mono zéb zarina, te tihâiba na 're siwasété za'ra. 'Re ihâimana u'âsi mono nhimiroti hã ma tô duré te te siwi 're wẽ'õ za'ra. Hâiwa ãma 'Re ihâimana u'âsi mono ma, romhuri'wa norĩ ãma, te duré te te 're wasété za'ra, ta norĩ hã. Tanei õ di, Migueu hã hâiwa ãma romhuri'wa norĩ ma ipire hã. Ta hã duréihã ma tô Mozésihi hâiba hã sawi Wa'uburé wi, te te âri tõ da. Tawamhã Migueu aré sada sahi nherẽ, iwasédé hã te te ãma hiri õ di, te te ãma iwasété na hã. Ãne si ma tô tãma waihu'u, Wa'uburé ma: “Wanhib'apito si te za sa'ẽtẽ aima tinha.” Õ hã Wa'uburé aré dama pire na hâiwa ãma romhuri'wa na 're ihâimana mono. Tahawa, te te tô ãma wasété õ di, Migueu hã. Tane nherẽ, te ta norĩ hã hâiwa ãma 'Re ihâimana u'âsi mono ma romhuri'wa norĩ ãma, te te 're wasété za'ra, aibâ iwasété norĩ hã. 10Tane nherẽ, te aibâ iwasété norĩ hã rosa'rada hã uburé tãma iwaihu'u za'ra õ ma, nharĩ wasété za'ra. Robzari norĩ hã rosa'rata ãna siwa'ru 're ihâimana za'ra mono ne, te ta norĩ hã 're hâimana za'ra, simirosa'rata 'wa'rutu na. Taha zarina te za ai'utõ. 11Ta norĩ ma, tãma ropipa uptabi za'ra di za, duréihã Caĩ, 're ihâimana wasété mono zém ne, 're hâimana za'ra mono wa. Duré Balaã hã rob'uiprazéb zô 're imorĩ wasété ne, te te 're rob'ruiwapari za'ra mono wa, tãma 're ropipa uptabi za'ra mono di za. Duréihã Cora hã ma tô ti'madâ'â'wa hã wẽ'õ, 'Re ihâimana u'âsi mono nhimipisutu nherẽ. Tane te duré aibâ iwasété norĩ hã isazei'wa norĩ 'madâ'â'wa norĩ nhimiroti hã te te 're wẽ'õ pese za'ra, 'Re ihâimana u'âsi mono nhimipisutu nherẽ. Tahawa, Cora isi'utõrĩ ne te za duré ai'utõ za, aibâ iwasété norĩ hã. 12A norĩ wa'wa hã te asiré isazei'wa norĩ me 're asisawi za'ra wa'aba mono sina, asa hã asima 're i'manharĩ za'ra wa'aba mo, simisutu. Tane nherẽ, te iwasété norĩ hã atẽme 're sihutu 'wa, asa hã asima 're 'manharĩ za'ra wa'aba mono ré. Siséb za'ra õ zarina te ta norĩ hã te te aiwi 're ro'wa'rutu za'ra wa'wa, siwa'ru. A norĩ wa'wa hã zazahâ ihâirã ne te 're aihâimana wẽ za'ra wa'aba mo, iwẽ na si. Tane nherẽ, ta norĩ hã zazahâ ihâirã, da te 're ihâ'uptob za'ra mono ne, te 're hâimana wasété za'ra, sima si te te 're rosa'rata wasété za'ra mono wa. Ta norĩ hã hâiwa nhirõno hã, tã ihawi 're ta'a za'ra mono ãna, rowa'u te te 're i'mapraba za'ra mono ne, marĩ iwẽ hã te te 're 'manharĩ za'ra mono õ di. Duré rob'rã, 're i'rã prédu mono zéb u, wede hã 'rãi ãna 're isimasa mono ne, duré da te oto 're sariza'o'o za'ra mono wa, 're i'ré pese za'ra mono ne, marĩ iwẽ hã te te 're 'manharĩ za'ra mono õ di, ta norĩ hã. 13Â sisasi hã 're isibzaihâ za'ra mono ne, te ta norĩ hã tãma 're rowẽ za'ra mono da newa, hâiwi si 're nomro, 're wa'utu za'ra mono ãna. Duré â nhibzaihâ zaipro iwasédé, supara 'ré u te te 're isãmra mono ne, te marĩ iwasété si te te 're 'manharĩ za'ra, ta norĩ hã. Wasi hã siwa'ru 're inomro mono ne, te duré ta norĩ hã siwa'ru 're hâimana za'ra, te te 're rob uptabi za'ra mono ãna. Ta norĩ ãma ma tô 'Re ihâimana u'âsi mono hã sima ãma roti siromo za'ra, za te te ihâ za'ra zém na hã. Robra si 're isa'wari mono zéb u te za satõrĩ za'ra, robra u'âsi u, iwa 're hâimana u'âsi za'ra mono da, tame.

14Duréihã Enoqui hã te 're hâimana, Adãhã 'ra nhihudu hã. Ta hã ma tô romhâ ré da'ãma waihu'u siro, 're idahâimana wasété za'ra mono norĩ ãma hã. Ãne ma tô da'ãma waihu'u siro:

“Ma'ãpé waihu'u za'ra wa'aba. Wanhib'apito te za wei mo. Tãma iromhuri'wa norĩ hã ahâ uptabi na te za we isiré ai'aba'ré. 15Tawamhã te za oto da'awaihu'u, 're idahâimana wasété za'ra mono na, duré 're idahâimana wẽ za'ra mono na zama. Taha zarina te za oto da'ãma arowairébé. Tamep si te za oto 're ihâimana wasété za'ra mono norĩ hã awẽ'õ pese. Uburé marĩ iwasédé hã te te 're 'manharĩ za'ra mono wa, te za awẽ'õ pese, duré mreme wasété na 'Re ihâimana u'âsi mono ãma te te 're wasété za'ra mono wa.”

16Ta norĩ hã te 're siwapsari u'âsi za'ra, soto wasété na. Si'upana si te duré ta norĩ hã dawasédé hã te te da'ãma 're sa'ra, 're danomro wẽ mono nherẽ. Si'uihâ na marĩ hã te te sima 're iwẽ za'ra mono zéb uwaibaba si, te te 're 'manharĩ za'ra, iwasétére hã. 'Râwi te ta norĩ hã duré sina 're wata u'âsi za'ra, tiwẽ na. Te duré taré dawẽ te te da'ãma 're sa'ra, iwa'rãmi marĩ iwẽ hã da te tãma 're sõmri za'ra mono da.

Zuda hã, isazei'wa norĩ hã siptete sina ãma 're nomro mono da, te te tãma iroti za'ra zé wasu'u

17Ĩsisãnawã norĩ, ta norĩ nhimiroti wasu'u wasédé hã 're wapari za'ra wa'aba mono õ di za. Wanhib'apito Zezu Cristuhu zadawa wasu'u'wa norĩ nhimirowasu'u na si te za 're asipo're pu'u u'âsi za'ra wa'aba mo. 18Ãne ma tô ta norĩ hã wama waihu'u siromo za'ra: “Nimahã na iropsi'utõrĩzéb u hã aibâ norĩ te za dawazari 're hâimana za'ra, iwasété norĩ hã. 'Re ihâimana u'âsi mono hã te te siwi 're wazé mono õ di za. Te za duré ai'ãma 're wa'ẽ za'ra wa'wa. Si'uihâ na marĩ hã te te sima 're iwẽ za'ra mono zéb uwaibaba si, te za te te 're 'manharĩ za'ra, iwasétére hã.” Ãne ma tô wama waihu'u siromo za'ra, Zezu Cristuhu zadawa wasu'u'wa norĩ hã. 19Aibâ iwasété norĩ hã te isazei'wa norĩ wi tinhimirowasu'u wasété na te te 're ro'wa'rutu za'ra, isazei'wa norĩ hã siré 're si'rã'õtõ u'âsi mono nherẽ, siwi 're siwanhizari za'ra mono da, ta hawi. 'Re idahâimana wasété za'ra mono norĩ nhimirosa'rata zarina si te ta norĩ hã te te 're rosa'rata za'ra. 'Re ihâimana u'âsi mono pẽ'ẽzani hã ta norĩ pẽ'ẽ 're, 're hâimana za'ra mono õ di. 20Ĩsisãnawã norĩ, tane nherẽ, te za ãma 're asipawaptob u'âsi za'ra wa'aba mo, Wanhib'apito wasu'uwẽ na 're isaze za'ra wa'aba mono zém na, aihâimana prédubzé hã asima 're sa'ẽtẽ u'âsi za'ra wa'aba mono da. Duré 'Re ihâimana u'âsi mono ma, 're aimreme zusi aba mono wamhã, Ipẽ'ẽzani te te aima 're iwaihu'u za'ra wa'aba mono zém na si, te za tãma 're aimreme zusi aba mo. 21'Re ihâimana u'âsi mono nhimiroti zarina si, te za 're aihâimana u'âsi za'ra wa'aba mo, isimizawi pese zém hawi asina tiwi 're aipahâ za'ra wa'aba mono tõ da. Duré Wanhib'apito Zezu Cristuhu nhimizawi pese na dama 're isõpru mono zéb zô, te za asina 're asimipari u'âsi za'ra wa'aba mo, 'Re ihâimana u'âsi mono 'rata 're aihâimana u'âsi za'ra wa'aba mono zéb da hã, te te aima isõmri za'ra wa'aba zô.

22Ãne wa za duré aima waihu'u za'ra wa'wa. Ni'wam norĩ hã Wanhib'apito zadawa wasu'uwẽ hã te te 're saze za'ra mono nherẽ, ãma 're isiwawã za'ra mono norĩ ãma, te za ãma 're aipẽ'ẽzé za'ra wa'aba mo, Wanhib'apito wasu'uwẽ na apâ 're pẽ'ẽ nhimi'wara mono da. 23Duré, unhama u aré 're darere'e mono wa, da te 're idanho'reptu za'ra mono ne, te za ni'wam norĩ hã 're ipawaptob za'ra wa'aba mo, Zezusi te te 're saze za'ra mono da, ropipa u 're sisisi tõ mono da. Duré ni'wam norĩ hã, wasété uptabi na 're ihâimana za'ra mono norĩ hã ta norĩ ãma zama te za duré 're aipẽ'ẽzé za'ra wa'aba mo. Ãma 're aipẽ'ẽzé za'ra wa'aba mono nherẽ, te za ta norĩ wi 're asi'madâ'â pese za'ra wa'aba mo, tihâimana wasété zéb u te te 're aipizari za'ra wa'aba mono tõ da, sitẽme. Da'uza hã hâi wẽ nherẽ, da te dasiwi 're hâ uptob za'ra mono wa, da te 're iwẽ'õ pese za'ra mono ne, tihâimana wasété zém na 're isi'uptob za'ra mono zép si te za asiwi 're iwẽ'õ pese za'ra wa'aba mo.

Zuda hã, 'Re ihâimana u'âsi mono ãma iwatazé wasu'u

24-25'Re ihâimana u'âsi mono ãma si 're wawata u'âsi za'ra wa'aba mono. Taha si uburé Danhib'apito hã te 're hâimana, Wa'anho'reptui'wa hã. Wanhib'apito Zezu Cristu we te te wazada isõmrizém na ma tô ta hã te te 're wa'anho'reptu, tô wazada idâ'âzém na. Ta hã wẽ uptabi di. Wẽ uptabi wa, uburé wa te 're wazéb u'âsi za'ra wa'aba mono za. Waihu'u pese uptabi di duré. Danhipai u dama pire uptabi di, õhõ si. Ãne 'Re ihâimana u'âsi mono hã, marĩ õ ré 're ihâimana mono zé hã, duré ãhã na zama hã. Õne u'â te 're hâimana u'âsi, tiwaihu'u pese uptabi na. Tahawa, ãma 're wawata u'âsi za'ra wa'aba mono za.

Taha ma, uburé marĩ hã tãma waihu'u pese di, te te 're aipawaptob za'ra wa'aba mono zéb da hã, 're rẽme za'ra wa'aba mono tõ da, aiwasété u 're aipizari za'ra wa'aba mono tõ da. Te za duré sitẽme aiwaibui wa'wa, aiwasété ãna isõ'a 're aihâimana u'âsi za'ra wa'aba mono da, duré ato sina i'rata 're anomro u'âsi aba mono da, rowẽ ãma. Tane tô.

Currently Selected:

Zuda 1: xavBP

Highlight

Copy