3 Zuwã 1

1Gaiu, a hã ĩsiwadi uptabi, ĩma i'asawi uptabi, tô sena. Wa hã, Wanhib'apito zazei'wa norĩ 'madâ'â'wa, 're ĩhâimana mono, wa za oto aima ãma rob'ui'éré.

2Ĩsiwadi, 're aimorĩ wẽ da, wa te ai'ãma te 're rowaptẽrẽ, 'Re ihâimana u'âsi mono wi. Tahawa, wa tô ĩsima te 're aiwẽ u'âsi, uburé marĩ iwẽ si aima 're hâimana u'âsi mono da. Wa duré te ĩsima 're aiwẽ, aihâzé ãna 're aihâimana mono da. 3'Re aihâimana mono zém hawi, ma tô wasisãnawã norĩ hã we ĩtẽme 're sihutu. We 're sihutu mono sidâpâsi, ma tô siparabâsi te te ĩma 're aiwasu'u wẽ za'ra, 'Re ihâimana u'âsi mono nhimiroti zarina si 're i'aihâimana wẽ mono na hã. Tahawa, aiwasu'u ma hã ĩtoi uptabi di. Õhõ na si te tô 're aihâimana u'âsi mo, rẽme waihu'u ãna. 4Ãne hã ĩ'ra norĩ ãma te 're wapari wẽ za'ra mono wa, ĩma 're rowẽ uptabi mono di, Wanhib'apito wasu'uwẽ na te ãma 're ipo're pu'u za'ra mono zéb zarina te te 're isazei pese za'ra mono norĩ ãma. Ĩ'ra norĩ 're ihâimana wẽ za'ra mono wasu'u te 're wapari mono wamhã, ĩma 're rowẽ uptabi mono di. Marĩ na uburé rowasu'u hã te 're wapari wẽ mono nherẽ, te te siwi ãma 're wabzu mono õ di, ĩ'ra norĩ wasu'u te 're iwapari zei mono zé hã.

Gaiuhu wasu'u wẽ wasu'u

5Ĩsiwadi, ĩma i'asawi pe, asimi'ẽ na te isazei'wa norĩ ãma 're aiwãrĩ u'âsi mo, darob amoi hawi atẽme 're isihutu mono norĩ ãma. Ta norĩ hã aima sa'rese za'ra õ nherẽ, te ai'umnhasi na tãma 're aihâimana za'ra mo. 6Ta norĩ hã ma tô asimizawi pese zém na we te te 're aiwasu'u za'ra, ãme isazei'wa norĩ 're isi'rã'õtõ mono norĩ nho'a. Isazei'wa norĩ hã darob amoi hawi atẽme 're isihutu mono norĩ hã, aihawi nimomo 're nomro mono õ ré, marĩ na ãma 're aiwãrĩ za'ra mono wamhã, wẽ di, ubana 're nomro tõ mono da. Wẽ uptabi di. 'Re ihâimana u'âsi mono te te aima 're i'awẽ mono zéb zarina si te za ãma 're aiwãrĩ za'ra mo. 7Ta norĩ hã Wanhib'apito ma, te te 're romhuri za'ra mono da, ma tô si'uihâ na asatõrĩ za'ra, tirom hawi, daro mono bâ te te dama 're sadawa wasu'u za'ra mono da. Duré isazei'õ'wa norĩ hã marĩ na ãma 're siwãrĩ za'ra mono da, sina sô 're simnhasi za'ra mono õ di, isadawa wasu'u'wa norĩ hã. Mare di. 8Tahawa, wa norĩ si wa za ãma 're wasina u'âsi. Zezusihi wasu'uwẽ hã ta norĩ hâiba u'âbâ, wa te ãma 're ropéi mono da, wa za ãma 're wasina u'âsi za'ra, sena na si.

Diutrefesihi wasu'u, Dimetriuhu wasu'u me

9Ãne wa za duré ãma aima waihu'u. Ĩnhimi'ui'éré hã tamomo wa tô ãma tisõ isurure hã, isazei'wa norĩ hã asiré 're isi'rã'õtõ mono norĩ ma. Tane nherẽ, te ni'wa hã tame 're sãmra, ĩwẽ'õ'wa hã, Diutrefesi na isisi hã. Ta hã uburé asiré isazei'wa norĩ ma, si'apito da si te te sina 're rob'ruiwapari u'âsi mono wa, ĩnhimiroti hã te te 're wapari mono õ di, isipai u da'madâ'â'wa na 're ĩhâimana mono 'ru te. 10Tahawa, atẽme ãma ĩwisi wapsi, wa za isimiromhuri wasété na asiré isazei'wa norĩ hã ãma po're pu'u za'ra, isõ'a. Ta hã te sadawa nhipese na taré te te dama 're wabâsi wasété u'âsi. Tane nherẽ, taha si õ di, tiwasédé te te 're i'manharĩ mono zé hã. Isazei'wa norĩ hã darob amoi hawi itẽme 're sihutu mono wamhã, isõrõwa u itẽme 're isisisi mono da hã, te te 're dawaibui mono õ di. Õne haré te te tãma 're arob'ru. Duré tame isazei'wa norĩ hã 're isi'ubumroi mono norĩ wi, te duré te te 're awẽ'õ, isiré isazei'wa norĩ hã darob amoi hawi itẽme 're sihutu mono wa, sô 're hãsi tõ mono da, isõrõwa u itẽme 're sisisi tõ mono da. Tane nherẽ, isazei'wa norĩ hã te te 're wapari za'ra mono ãna, tisiré isazei'wa norĩ hã tinhorõwa u te te 're 'mazasi za'ra mono wa, te duré õ hã da'mazasi'wa norĩ ma, te te tãma 're arob'ru, tisiré isazei'wa norĩ wi 're wairébé mono da, siré 're hâimana tõ za'ra mono da oto, rowahutuzéb 'remhã.

11Ĩsiwadi, ĩma asawi pe hã, dapo're ãna dawasédé da te 're i'manharĩ za'ra mono ne, 're aihâimana mono õ di za, õ aibâ hã 're imorĩ wasété ne. Marĩ iwẽ zô si te za asima 're irob'madâ'â u'âsi mo, 're idahâimana wẽ za'ra mono norĩ ne. Ni'wam norĩ hã marĩ iwẽ si te te sima 're 'madâ'â za'ra mono wamhã, ta norĩ si te 'Re ihâimana u'âsi mono nhib'a'uwẽ 're hâimana za'ra. Duré ni'wam norĩ hã tihâimana wasété si te te sima 're wẽ uptabi za'ra mono wamhã, ta norĩ hã 'Re ihâimana u'âsi mono hâimanazé hã 'râwi te te 're waihu'u za'ra mono õ di.

12Aibâ hã te aihĩni isazei'wa norĩ hã te te siwi 're wasu'u wẽ za'ra, Dimetriu na, isisi hã. Duré 'Re ihâimana u'âsi mono te te tãma 're iwẽ mono zéb zarina si, sena na 're ihâimana mono na ma tô iwaihu, 're ihâimana wẽ mono zém na hã, ta hã. Ĩzama wa duré te ãma 're wasu'u u'âsi, wẽ na dama 're ihâimana mono na hã. A hã ma tô, tô sena ĩnhimiroti na hã ĩwaihu.

Zuwã te te irob'ui'éré 'rãsutu zéb ãma, isazei'wa norĩ te te i'azawizé

13Zahadu marĩ hã ahâ uptabi di, te aima ãma iwaihu'uzéb da hã. Tane nherẽ, te ĩsima wẽ õ di, ibaihâ na te aima ãma irob'ui'éré da hã, ãhã na hã. 14'Râwi iwasisõpẽtẽ su'u da si, wa ĩsima te rosa'rata u'âsi. Tawapsi wa za 'râwi wasisadawa 'madâ'â ni, marĩ mono na hã.

15Wa duré ai'ãma 're ĩmreme u'âsi, 'Re ihâimana u'âsi mono ma, rowẽ u'âsi 're aihâimana mono zé hã te te aima 're pisutu u'âsi mono da. Ãhã na wasiwadi norĩ zama te ãma asawi za'ra, ãme ĩsiré 're ihâimana za'ra mono norĩ hã. Ma'ãpé, wasiwadi norĩ ai'rata 're ihâimana za'ra mono norĩ hã ihâiba mono bâ ĩma azawi mono.

Currently Selected:

3 Zuwã 1: xavBP

Highlight

Copy