Tiagu 3

Damreme wasété ãna 're idahâimana za'ra mono zém na rowasu'u

1Ĩsisãnawã norĩ, Wanhib'apito zazei'wa norĩ ma rowahutu'wa da hã, ãté ai'umro na si te za 're asirowahutu'wa za'ra wa'aba mo. E marĩ wa, wa ãne aima waihu'u za'ra wa'wa. Nimahã bâtâ na te za wahâimanazém na wa'awaihu'u, Wanhib'apito hã. Tawamhã wa norĩ hã dama rowahutu'wa nherẽ, marĩ, wa te 're i'manharĩ wasété za'ra mono zém na, te za sa'ẽtẽ wama nharĩ za'ra, Wanhib'apito hã, wasiré isazei'wa norĩ nhipai u. 2Uburé wa norĩ hã wa wahâimanazém na wa te 're upa za'ra. Ni'wa hã timreme na te te 're upai mono õ 'wa'âhã, aré 're hâimana wẽ mono di. Duré tiwasédé hã te te 're 'manharĩ tõ mono da hã, te aré 'râwi siwi 're simi'rãmi, tãma waihu'u pese wa. 3Duré marĩ isurure na wa za aima ãma romnhimiré'é za'ra wa'wa. Isi'uwazi nhi'odo hã, wa za awaru zadai'ré 're, wa te 're sé, wa te wasima 're iwẽzé za'ra mono zéb uwaibaba, wa te 're wata pizari za'ra mono da, awaru hã. 4Uba're wasu'u na, te za duré ãma irosa'rata za'ra wa'wa. Uba're hã sa'ẽtẽ nherẽ, te za rowa'u'u za'ẽne hã te te 're simro. Tawamhã iwairĩzé hã surure nherẽ, te za taha na i'mapraba'wa hã te te 're pizari uba're hã, te te sima iwẽzéb uwaibaba, wara da. 5Tane danhoto hã surure nherẽ, te za marĩ hã ihawi te te 're ropé. Wa za duré unhama ro'o wasu'u na aima ãma romnhimiré'é za'ra wa'wa, iro'o surure na. Unhama ro hã surure nherẽ, te te oto 're ropéi mono wamhã, te za marã za'ẽne hã 're sihõmo. 6Tane danhoto hã unhama ro'o ne, te aiwa dama 're hâimana za'ra. Danhoto hawi, te za sipu'u pese na damreme wasédé hã te te 're ropé. Ta hawi te za 'râwi 're dasiwasété za'ra. Unhama ro hã te za danhimarĩ hã te te dawi 're uprosi. Tane danhoto wasété na, te za dahâimana wẽ hã da te dasiwi 're uprosi za'ra. Ropipa hawimhã te za damreme wasédé hã te te dama ãma 're sãna'rata, wa'uburé hã. 7A'uwẽ norĩ hã te uburé abaze norĩ da, siptete na 're hâimana za'ra, si norĩ da, ti'ai baba di'i na 're inomro mono norĩ da, duré â 'rowi 're inomro mono norĩ da zama. 8Tane nherẽ, ni'wa hã si'uihâ na 'râwi si'uwati waihu'u õ di, mreme wasété tõ da hã. Danhoto hã dama 're ihâimana za'ra mono hã, ta hã iwasédé. Wahi 'wa wa'u ne dapãrĩ'wa, damreme wasédé hã. 9Wanhoto na wa za uburé Danhib'apito uptabi ãma 're wawata za'ra, duré Wamama ãma hã. Wa za duré wa te da'ãma 're wasété za'ra, wanhoto ihâiba amo na, 'Re ihâimana u'âsi mono hã te te 're wa'apoto mono nherẽ, isine 're wanomro mono da. 10Siwazari wazadawa hawip si, te wamreme hã 're wairébé, Wamama ãma 're iwawata za'ra mono zém na hã, duré wa te da'ãma 're iwasété za'ra mono zém na zama. Ĩsisãnawã norĩ, ãne aimreme hã 're 'manharĩ za'ra wa'aba mono õ di za. 11Ma'ãpé â na duré rosa'rata za'ra wa'aba. E siwazari te â wẽ hã ub're hawi 're wairébé, â isei õ me hã. Mare di. 12Ma'ãpé duré ãma rosa'rata za'ra wa'aba, rob'rã na. Azeitona 'rã hã e te za ti'rã, aimawi rowede na, figuera wede na. Mare di. Misi haré te za tô ti'rã tiwede hawim na si. E uwa 'ru u, te za podo i'rãi amo hã, figuera na i'rã nhisi hã. Mare di. Taha wazari ipoto da hã mare di. Tane duré â wẽ hã hâimana õ di, â warĩrĩ wazari. Duré siwazari ub're hawi 're wairébé mono õ di, â hã. Tane aimreme hã siwazari 're sani za'ra wa'aba mono õ di za.

'Re ihâimana u'âsi mono hawi dahâimanazém na rowaihu'u na rowasu'u

13E 'wam norĩ hã te 'Re ihâimana u'âsi mono hawi dahâimanazém na rowaihu'u ré 're hâimana za'ra, asiré wa'aba hã isimirosa'rata za'ẽne hã. Ãne hã ni'wam norĩ hã asiré 're hâimana za'ra wa'aba mono wamhã, hâimana wẽ na te za 're hâimana za'ra. 'Râwi tiwẽ na sina 're wata za'ra mono õ di za. Ãne wamhã, hâiwa hawi rowaihu'u ré 're inomro mono na, te za da te ãma 're waihu'u za'ra. 14-15Tane nherẽ, aipẽ'ẽ 're marĩ na 're da'ruiwapari za'ra wa'aba mono wamhã, duré marĩ iwẽ zô asima si 're asõpré wa'aba mono wamhã, hâiwa hawi dahâimanazém na rowaihu'u ré, 're aihâimana za'ra wa'aba mono õ di za. Ãne wa, hâiwa hawi dahâimanazém na rowaihu'u ré 're anomro aba mono newa, 'râwi asina 're aiwata za'ra wa'aba mono õ di za, 'râwi asimirosa'rata na asima 're asadawa nhipese za'ra wa'aba mono tõ da. Ãne 're dahâimana wasété za'ra mono wamhã, isazei'õ'wa nhimirosa'rata wasété zarina, duré Wa'uburé nhimirosa'rata zarina te za 're danomro. Hâiwa hawi, 'Re ihâimana u'âsi mono nhimirosa'rata zarina 're danomro mono õ di. 16Marĩ na da te 're da'ruiwapari za'ra mono wamhã, duré marĩ iwẽ zô dasima si 're danhopré mono wamhã, rowẽ hã dama 're hâimana za'ra mono õ di za. Te za dasiwi da te 're ro'wa'rutu za'ra. Te za duré 're dahâimana wasété za'ra. 17Hâiwa hawi dahâimanazém na rowaihu'u ré, 're dahâimana za'ra mono wamhã, te za dawasété ãna 're danomro. Roti wẽ na te za da te 're dapawaptob za'ra, rowẽ na dasiré 're dahâimana za'ra mono da. Duré danhimizawi pese na, te za 're danomro. Duré danhimipari pese na, te za 're danomro. Duré te za da'ãma 're dapẽ'ẽzé za'ra. Te za duré dasina 're dapẽ'ẽzé za'ra. Duré marĩ iwẽ na te za 're dasipawaptob za'ra. Duré danhimizawizé hã da te dama 're ba'a za'ra mono õ di za. Duré dahâimana zadawa nhipese na 're dahâimana za'ra mono õ di za. 18Amnho iwẽ hã da te 're zuri mono wamhã, te za iwẽ si da te 're ubumro za'ra, amnho hã. Tane roti iwẽ na 're dasipawaptob za'ra mono wamhã, rowẽ na dasiré 're dahâimana za'ra mono da, duré isimiroti na 're danomro mono wamhã, dahâimana wẽ na si te za dasima 're dahâimana za'ra oto.

Currently Selected:

Tiagu 3: xavBP

Highlight

Copy