Tiagu 4

Wamama nhimiroti ma, dawapu na 're idanomro mono wasu'u

1A norĩ wa'wa hã te aimreme na 're asi'wapé za'ra wa'aba mo. Te duré 're asisada'âbâ za'ra wa'aba mo. E marĩ wa. Asimirosa'rata wasété za'ra wa'aba zarina, marĩ zô asi'rep si asima 're rob'ruiwapari za'ra wa'aba mono wa. 2A norĩ wa'wa hã ma tô marĩ hã ahâ na asima 're iwẽ za'ra wa'aba mo. Tawamhã uburé asima ãma 're uwaimrami za'ra wa'aba mono õ wa, te za sô 're idanhimroi wa'aba mo, ãma asima 're uwaimrami za'ra wa'aba mono da. Marĩ na te duré 're ida'ruiwapari za'ra wa'aba mo. Tawamhã ãma asima 're uwaimrami za'ra wa'aba mono õ wa, te aimreme na 're asi'wapé za'ra wa'aba mo. Marĩ iwẽ, 'Re ihâimana u'âsi mono wi, a'â 're waptẽrẽ za'ra wa'aba mono õ wa, te te aima 're sõmri za'ra wa'aba mono õ di za, iwẽ hã. 3Ãté te za asima si tiwi 're irowaptẽrẽ za'ra wa'aba mo. Tane nherẽ, asimirosa'rata wasété zarina, tiwi 're rowaptẽrẽ za'ra wa'aba mono wamhã, te te aima 're sõmri za'ra wa'aba mono õ di za. 4E Wamama nhimiroti hã 're 'madâ'â za'ra wa'aba mono bâ, te isazei'õ'wa norĩ nhimiroti si bété, 're i'madâ'â pese za'ra wa'aba mo. Ãne wamhã, Wamama zawi'wa 're aihâimana za'ra wa'aba mono õ di za. E ãne na aima waihu'u za'ra wa'aba õ di bété. Isazei'õ'wa norĩ nhimiroti si, da te dasima 're wẽ za'ra mono wamhã, Wamama ãma te za 're danhitob'ru za'ra. 5Duréihã ma tô ãne imreme na rob'ui'éré, 'Re ihâimana u'âsi mono zadawa 'mahârâ'wa hã, ãne: “Wamama, Tipẽ'ẽzani te te wama 're isõmri mono hã, wapẽ'ẽ 're wama 're hâimana za'ra mono da, te te sima 're wa'awẽ uptabi, Wamama zawi'wa na oto 're wanomro mono da.” E taré ma tô ãne na hã rob'ui'éré, ibaihâ na hã. Mare di. Taré te te ãma rob'ui'éré õ di. Tô sena ma tô ãma rob'ui'éré. 6Ãne wa, Wamama zawi'wa 're wanomro mono da, te za te te 're wa'apawaptob u'âsi. Duréihã ma tô taha wasu'u na rob'ui'éré, isadawa wasu'u'wa hã, ãne: “Si'uihâ na 'râwi tinhimirosa'rata na 're isi'madâ'â ze za'ra mono norĩ zada, te za 're hâimana, Wamama hã. 'Râwi tinhimirosa'rata na 're isi'madâ'â za'ra mono õ norĩ si, te za te te 're apawapto.” Ãne ãma irob'ui'éré hã.

7Tahawa, ma'ãpé 'Re ihâimana u'âsi mono ma, aiwapu na 're aihâimana za'ra wa'aba mono, isimiroti na si ãma 're anomro aba mono da. Wa'uburé norĩ nhib'apito nhimipibui wasété zé wi, te za 're asiptete za'ra wa'aba mo. Tawamhã si'aba'ré na, te za asiti za'ra wa'aba hã sina 're pahâ. 8Ma'ãpé Wamama u asimirosa'rata na 're aihutu aba mono. Tawamhã õ hã te za duré 'râwi atẽme 're simasisi 'wa. Ipo're'õ norĩ, asib'rata u're wa, 're asimisõ za'ra wa'aba mono ne, te za 'râwi aipẽ'ẽ na aiwasété na 're asiwẽ'õ za'ra wa'aba mo, aiwẽ na 're anomro aba mono da oto. Wamama ãma tô sena 're aihâimana za'ra wa'aba mono newa, tazahã tô sena ãma 're aihâimana za'ra wa'aba mono õ di. Tahawa, ma'ãpé aihâimana wasété wi 're aipizari za'ra wa'aba mono, aihâimana wẽ na ãma 're aihâimana za'ra wa'aba mono da. 9Aiwasété na 'râwi 're asisãmri za'ra wa'aba mono wa, te za 're ai'ru'ru wa'aba mo. Rowẽ te, aipẽ'ẽ 're, 're ato za'ra wa'aba mono õ di za a'â. Robzei'õ na te za a'â 're aihâimana za'ra wa'aba mo. 10Aihâimana wẽ na tãma 're asiwasu'u za'ra wa'aba mono õ di za, Danhib'apito uptabi ma hã, asina 're aiwata za'ra wa'aba mono tõ da. Aihâimana wasété na si te za tãma 're asiwasu'u za'ra wa'aba mo. Tawamhã robzei'õ hawi te za ai'ãma 're sisaprĩ za'ra wa'wa, rowẽ na oto 're aihâimana za'ra wa'aba mono da.

11Ĩsisãnawã norĩ, asisa're'ra 're asibâsi za'ra wa'aba mono õ di za. Ni'wam norĩ hã tisiré isazei'wai ãma, te te ãma 're wasété za'ra mono wamhã, niha wamhã, te te duré 're wẽ'õ za'ra mono wamhã, tisiré isazei'wai u'âbâ, Wanhib'apito nhimiroti hã 're idasisawi pese za'ra mono zé hã te za te te siwi 're wẽ'õ za'ra. Ãne wamhã, isimiroti te te 're 'madâ'â pese za'ra mono ãna, te za 're nomro. 12'Re ihâimana u'âsi mono si danhipai u roti wẽ 'manharĩ'wa hã te 're hâimana. Taha si dahâimanazéb zarina da'ãma rowairébé'wai uptabi hã te duré 're hâimana. Õhõ ma si waihu'u pese di, te te 're ida'anho'reptui mono zéb da hã, duré te te 're ida'a'uprosi mono zéb da hã. E a norĩ wa'wa hã dahâimanazéb zarina da'ãma rowairébé'wa pâ, te bété asiré Cristuhu zazei'wa 're iwẽ'õ za'ra wa'aba mo.

Dasisõwa rowaihu'u nhomri na rowasu'u

13-14Ma'ãpé ĩwapari pese za'ra wa'aba. Ãté ãne te za asisõwa wa'aba, dama 're asiwasu'u za'ra wa'aba mo: “Ãté ãhã na 'ri ahâ u wa za ai'aba'ré ni, niha wamhã awẽ. Tame te za misi wa'ãma tiwahu, rob'uiprazéb zô wa te romhuri za'ra ré, wa te wasima sa'ẽtẽ za'ra da, rob'uiprazé hã.” Ãté ãne te za dama 're asiwasu'u za'ra wa'aba mo. E awẽmhã niha ai'ãma iromhâimana za'ra wa'aba zé hã aima waihu'u pese za'ra wa'aba bâ, te za ãne dama 're asiwasu'u za'ra wa'aba mo. Aihâimana za'ra wa'aba zé hã aiwa romnhizédé ne. Romnhizé hã 're hâimana za'ra mono wamhã, te za awa'awi 're si'utõrĩ. Tane 're aihâimana za'ra wa'aba mono zé hã, aiwa romnhizédé ne te za aiwi 're si'utõrĩ su'u za'ra wa'wa. 15Tahawa, te za ãne si asima 're asiwasu'u za'ra wa'aba mo: “'Re ihâimana u'âsi mono te te sima 're wa'awẽ mono wamhã, marĩ wa te 're i'manharĩ za'ra mono da hã, wa za tô wa te 're 'manharĩ za'ra.” Ãne te za asima 're asiwasu'u za'ra wa'aba mo. 16Tane nherẽ, niwa romhâimanazé hã waihu'u pese za'ra wa'aba newa, te 'râwi asi'uihâ na 're asi'madâ'â za'ra wa'aba mo. Ta hã dawasédé. 17Tahawa, wa za ãne aima waihu'u za'ra wa'wa. Marĩ iwẽ na da te dama ãma 're i'uwaimrami za'ra mono da hã, wẽ di. Tane nherẽ, taha wasu'u hã dama waihu'u pese za'ra nherẽ, marĩ iwẽ na da te dama ãma 're uwaimrami za'ra mono õ wamhã, ta hã duré dawasédé.

Currently Selected:

Tiagu 4: xavBP

Highlight

Copy