Tiagu 5

Isibro pese norĩ ãma, Wamama nhimihâzém na rowasu'u

1Asimarĩ ahâ na 're aihâimana za'ra wa'aba mono norĩ, ma'ãpé ĩwapari pese za'ra wa'aba. Niwapsi te za robzei'õ hã 're isépata za'ra wa'aba mo. Tahawa, te za ãne wana ré asina 're ai'ru'ru siromo aba mo. 2Asimarĩ za'ra wa'wa hã te za aiwi 're si'utõrĩ za'ra wa'wa. Duré ai'uzazé iwẽ hã te za ihâ tetere hã te te aiwi 're hâzapu'u za'ra wa'wa. 3Marĩ hã ate za'ra wa'wa, ẽtẽ waipo pré oru 'manharĩ hã duré ẽtẽ waipo prã prata 'manharĩ hã 're si'ubuzi za'ẽtẽ za'ra mono õ di za oto. Ta norĩ hã asima si 're ubumroi pese za'ra wa'aba mono wamhã, te za asõti na aiwaihu'u za'ra wa'aba ni. E asibro hã asima si 're isa'ẽtẽ za'ra wa'aba mono zarina, te za rowẽ hã aima 're hâimana u'âsi za'ra wa'wa. Mare di. Danhimarĩ hã unhama ro'o na, dawi 're isi'utõrĩ za'ra mono ne, te za rowẽ hã aiwi 're si'utõrĩ za'ra wa'wa. Rob'rãsutuzéb u romhutu nherẽ, ma tô asima si 're isa'ẽtẽ za'ra wa'aba mo, asima si marĩ asima 're rob'ubumro za'ra wa'aba mono hã. 4Aiburu na romhuri'wa norĩ hã 're pawa'âbâ za'ra wa'aba mono õ di. Õhõta te aiwapsari za'ra. Hâiwa hawi te za dawapa, amnho ubumroi'wa norĩ 're isiwapsari za'ra mono zé hã 'Re ihâimana u'âsi mono, danhipai u iwaihu'u pe hã.

5Ti'ai ãma te asibro hã asima si 're i'ubumroi pese za'ra wa'aba mo, asima ãma 're rowẽ za'ra wa'aba mono da, asibrom na. Wa za aima ãma romnhimiré'é za'ra wa'wa, ãne. Powawẽ hã hâipese wamhã, romhutu di oto, da te iwĩrĩzéb da hã. Tane, romhuture di oto, 'Re ihâimana u'âsi mono hã dazu te te i'aihâ za'ra wa'aba zéb u hã. 6Ni'wam norĩ hã marĩ hã te te 're 'manharĩ wasété za'ra mono õ nherẽ, ma tô a norĩ wa'wa hã taré dama 're i'ru za'ra wa'aba mo, da te 're simroi mono da. Ta norĩ ma, waihu'u za'ra õ di, 're isisõ'reptu za'ra mono zéb da hã.

Wanhib'apito zô danhimi'ẽ na sô 're idanhimipari za'ra mono zém na rowasu'u

7Ĩsisãnawã norĩ, rowasédé hã 're hâimana mono nherẽ, te za asimi'ẽ na Wanhib'apito zô 're asimipari za'ra wa'aba mo, apâ wei morĩ õ ré. Ma'ãpé rosa'rata za'ra wa'aba, buru tede'wa na. Buru tede'wa norĩ hã te simi'ẽ na, tã zô 're simipari za'ra, a'ẽ ta'a zô, duré ipĩni 'rãsutuzéb zô zama. Simi'ẽ na te sô 're simipari za'ra, ropoto té te te 're i'ubumro za'ra mono zéb zô, tãma sawi za'ra wa, buru nho hã. 8Tane a norĩ wa'wa hã te za duré asimi'ẽ na Wanhib'apito zô 're asimipari za'ra wa'aba mo. Za we apâ morĩ su'u na dâ'âsina, te za robze na sô 're asimipari u'âsi za'ra wa'aba mo.

9Ĩsisãnawã norĩ, asima 're aiwapsari za'ra wa'aba mono õ di za, 'Re ihâimana u'âsi mono hã aiwasédé hã te te ai'ãma 're sa'ra za'ra wa'aba mono tõ da. Dahâimanazéb zarina da'ãma rowairébé'wa hã we imorĩzéb u hã romhuture di oto. Ãne wa, asima 're aiwapsari za'ra wa'aba mono õ di za. 10Duréihã Uburé Danhib'apito zadawa 'mahârâ'wa norĩ hã, da te tãma 're rob'manharĩ wasété za'ra mono nherẽ, ma tô simi'ẽ na tihâimana wẽ na te te 're robzépata za'ra. Tane te za duré ta norĩ wasu'u na 're irosa'rata u'âsi za'ra wa'aba mo, isine 're aihâimana za'ra wa'aba mono da. 11Ta norĩ hã te te 're robzépata za'ẽtẽ za'ra mono nherẽ, siptete sina ma tô Wamama ãma si 're hâimana u'âsi za'ra. Tahawa, tãma 're rowẽ za'ra mono di oto. Taha wasu'u hã wama waihu'u pese za'ra di. A norĩ wa'wa hã ma tô Zoho wasu'u hã 're iwapari za'ra wa'aba mo. 'Re ihâimana u'âsi mono umnhasi sina ma tô ãma 're mo, Zo hã. 'Re ihâimana u'âsi mono hã, isimizawizé hã sa'ẽtẽ uptabi di. Duré da'ãma 're ipẽ'ẽzé mono zé hã sa'ẽtẽ di. Ãne wa, Zo hã te te robzépata za'ẽtẽ pari, ma tô marĩ iwẽ na hã apâ tãma tinhopru.

12Ĩsisãnawã norĩ, ãhã na marĩ ipire hã wa za aima waihu'u za'ra wa'wa. Marĩ na dama 're ropisutu za'ra wa'aba mono wamhã, te za aimreme uptabi na si dama 're iropisutu za'ra wa'aba mo. Ãté ni'wa hã te za marĩ na dama ropisutu. Tawamhã ãté te za ãne dama tinha, tô sena na te te dama iropisutuzém na, da te ãma waihu'u za'ra da: “'Re ihâimana u'âsi mono hã hâiwa 'manharĩ'wa, ti'ai 'manharĩ'wa, uburé marĩ 'manharĩ'wa, te 're hâimana. Ta hã ma tô ĩwaihu'u, tô sena na te aima iropisutuzém na.” Ãté ãne te za ni'wa hã dama tinha, 'Re ihâimana u'âsi mono nhisi na hã, te te dama ãma waptob sina. Ãne dama 're nharĩ za'ra wa'aba mono õ di za. Aimreme uptabi na si, te za dama 're iropisutu za'ra wa'aba mo, 're sisi za'ra wa'aba mono ãna, aimreme hã tô senai õ wa, Wamama hã aiwasédé hã te te ai'ãma 're sa'ra za'ra wa'aba mono tõ da.

Ihâzé ré norĩ wasu'u

13Ãté asiré isazei'wai wa'wa hã te za robzépata. Ãne wamhã, te za sina rowaptẽ, hâiwa u. Duré ni'wa hã rowẽ tãma hâimana wamhã, tinho're na te za Wamama ãma tiwata. 14Duré ni'wa hã hâzé wamhã, te za sô tihârâ za'ra, isazei'wa pawapto'wa norĩ zô, Wamama wi te te ãma rowaptẽrẽ za'ra da, duré azeitona 'rãi wa'ui wabre na te te ãma 'rãi u'ré za'ra da, Wanhib'apito zadawa para. 15Tawamhã Wanhib'apito umnhasi sina te te tiwi rowaptẽrẽ za'ra wamhã, Wanhib'apito te za tô sõ'reptu, ihâzé ré hã. Te za tô duré pese. Duré ihâzé ré hã tiwasédé te te 're ab'manharĩ mono nherẽ, iwasédé te te ãma 're ab'madâ'â mono õ di za tô oto. 16Ãne wa, Wanhib'apito hã aihâzé wa, te te 're aipese za'ra wa'aba mono da, marĩ 're 'manharĩ wasété za'ra wa'aba mono wamhã, te za asima 're asiwasu'u za'ra wa'aba mo. Te za duré asima tiwi 're irowaptẽrẽ za'ra wa'aba mo, Wanhib'apito wi. Tawamhã dahâimana wẽ sina, da te tiwi 're rowaptẽrẽ za'ra mono wamhã, da te tiwi 're irowaptẽrẽ za'ra mono zéb zarina, te za tô te te dama ãma 're a'uwaimrami, Wanhib'apito hã. 17Duréihã Wamama zadawa wasu'u'wa hã te 're hâimana, Eliasi na isisi hã. Ta hã wasine hã te a'uwẽ na 're mo. Ta hã ma tô rowaptẽ hâiwa u, tã we ta'a tõ da hã, ti'ai u hã. Tahawa, si'ubdatõ wahu wãiwamhã, tã hã we ta'a õ di. 18Taha pari, ma tô duré rowaptẽ, tã hã we ta'a da apâ. Tawamhã te we tã hã tita'a oto. Tahawa duré oto amnho hã ahâ di, da te 're i'ubumro za'ra mono da hã.

19-20Ĩsisãnawã norĩ, ãne wa za duré aima waihu'u za'ra wa'wa. Ãté asiré isazei'wa hã te za aipi'ra, roti senai'õ niwĩ. Tawamhã ãté misi te za i'maipawapto wa'wa, apâ te te sina siri da, roti tô sena niwĩ 're hâimana mono da apâ. Ãne asimiroti wẽ na 'manho'reptui wa'aba wamhã, ipo're'õ hã, 'Re ihâimana u'âsi mono nhiti 're hâimana u'âsi mono õ di za, rowẽ u'âsi nhiti. Duré Wamama hã te te ãma 'madâ'â õ di za, marĩ hã ahâ na tiwasédé te te 're i'ab'manharĩ mono zé hã. Ta hã te za tãma pari za'ra.

Currently Selected:

Tiagu 5: xavBP

Highlight

Copy