Hebreu 8

Sasedoti ipire uptabi na Zezusi hã wama 're ihâimana mono zé wasu'u

1Ãhã na te aima ãma irowasu'u za'ra wa'aba zé hã, e marĩ te wama wasu'u za'ra, ipire hã. Sasedoti ipire uptabi hã te oto wama 're hâimana za'ra. Ãhã wasu'u si, ipire uptabi hã. 'Re ihâimana u'âsi mono 're isãmra mono zém nhimire niwĩ, te pire uptabi na 're sãmra u'âsi hâiwa ãma, iwẽ uptabi nhimire niwĩ. 2Taha si te sasedoti ipire uptabi na te te 're romhuri, 'Re ihâimana u'âsi mono nhorõwa ãma iwẽ uptabi 're, hâiwa ãma. Hâiwa ãma 'ri hã ni'wa te te 'ri õ di. Tô õhõ si ma tô iwa 're isãmra mono zéb da hã si'uihâ na sima 'ri, Danhib'apito uptabi hã.

3'Re ihâimana u'âsi mono hã ma tô sasedoti tisiré norĩ nhipai u ipire uptabi norĩ hã te te 're apisutu, danhoprubzé hã da'upana te te tãma 're sõmri za'ra mono da, ãma 're iwata za'ra mono zéb da hã, duré danhimizama hã da'upana te te tãma 're simroi mono da, taha na dawasédé hã te te dama ãma 're i'apari mono zéb da hã. Taha zarina, ma tô duré Cristu hã tinhoprubzém na tãma sihâiba nho, 'Re ihâimana u'âsi mono ma, sasedoti ipire uptabi na taha si wama 're hâimana za'ra mono wa oto. 4Cristu hã ti'ai ãma 're sãmra u'âsi mono 'wa'âhã, sasedoti na dama 're hâimana mono õ di aré. E marĩ wa. Sasedoti norĩ hã 'Re ihâimana u'âsi mono ma, danhoprubzé hã da'upana te te tãma 're sõmri za'ra mono da, iwana dama 're hâimana u'âsi za'ra mono wa ta norĩ hã, zudeu norĩ 're ihâimana za'ra mono zéb zarina. 5Da'awã da te 're 'madâ'â za'ra mono wamhã, dahâiba uptabi hã dama 're ihâimana za'ra mono na te za da te 're waihu'u za'ra. Tane nherẽ, da'awã si hã marĩ hã ãma 're hâimana mono õ di. Tane duré, ti'ai ãma 'Re ihâimana u'âsi mono nhorõwa hã te 're hâimana, sasedoti norĩ hã i're te te da'ãma 're iromhuri za'ra mono zé hã. Hâiwa ãma 'Re ihâimana u'âsi mono nhorõwa awã ne, te ta hã 're hâimana, aiwab uptabi õ nherẽ. Hâiwa ãma isõrõwa si, iwẽ uptabi hã. Duréihã Mozési hã romhâ 'manharĩ na 'ri hã 'Re ihâimana u'âsi mono ma, te te 'manharĩ õ ré, ma tô 'Re ihâimana u'âsi mono hã ãne hã tãma pisutu: “Ẽtẽ 'rãihâ na asãmra ré, romhâ 'manharĩ na 'ri 'manharĩ da, te aima ipisutuzéb uwaibaba si, te za i'manha.” Ãne ma tô 'Re ihâimana u'âsi mono hã tãma waihu'u, Mozésihi ma hã. 6Tane nherẽ, 'Re ihâimana u'âsi mono hã ma tô oto tãma pisutu Zezusihi ma, taha si te te oto da'ãma tãma 're romhuri mono da, pire uptabi na, sasedoti norĩ te te da'ãma 're iromhuri za'ra mono zém nhipai u. Tane duré, 'Re ihâimana u'âsi mono te te dama iropisutuzép té hã, Cristu hã 'Re ihâimana u'âsi mono ma, te te wa'ãma 're i'ab'madâ'â mono hã. Wẽ uptabi di ta hã, duréihã 'Re ihâimana u'âsi mono te te dama iropisutuzéb 'rata ma hã. Danhipai u uptabi hã, marĩ iwẽ uptabi na te te dama 're aropisutu mono wa, te wẽ uptabi na dama 're hâimana, te te dama iropisutuzép té hã.

7'Re ihâimana u'âsi mono te te dama iropisutuzéb 'rada hã wẽ uptabi 'wa'âhã, te aré tô õhõ si dama 're hâimana u'âsi. Duré te te dama iropisutuzép té hã, ãhã wamhã, te te aré duré dama pisutu õ di.

8Tane nherẽ, 'Re ihâimana u'âsi mono hã te te dama iropisutuzéb 'rada hã ma tô 'râwi siwi wẽ'õ. Ãne na ma tô dama ãma rowasu'u, duréihã:

“Wa hã Danhib'apito uptabi, wa za oto aima rowasu'u za'ra wa'wa, ãne: Nimahã na hã Izaraéu nhihudu norĩ ma, wa za ĩnhimiroti té hã tãma pisutu za'ra, Zudaha nhihudu norĩ ma zama.

9Ta norĩ hi'rata norĩ ma, te iropisutu 'rata ne, 're hâimana mono õ di za, te dama iropisutuzép té hã. Ihi'rata norĩ hã Ezitu hawi te simroi mono wamhã, te tãma iropisutu za'ra zé wa'rãmi, ĩnhimiroti hã te te 're 'madâ'â za'ra mono õ di, ta norĩ hã. Tahawa, wa tô ta norĩ wi tiwi aipi'ra za'ra, si'uihâ na 're hâimana za'ra mono da oto, wẽ te bâ.

10Tane nherẽ, nimahã bâtâ na wa za te dama iropisutuzép té hã tãma pisutu za'ra Izaraéu nhihudu norĩ ma hã, duréihã te dama iropisutuzém nhowa're're. Ã hã, wa wa hã Danhib'apito uptabi hã aima wasu'u za'ra wa'wa, ĩnhimiroti tém na te dama iropisutuzé hã.

Tawapsi wa za ĩnhimiroti hã ipẽ'ẽ 're te tãma 're anhomri, iré 're nomro u'âsi mono wa, te te 're 'madâ'â pese za'ra mono da.

Ta norĩ nhib'apito, wa za oto tãma 're ĩhâimana za'ra. Tawamhã ĩnhib'a'uwẽ na si te za tô ta norĩ hã ĩma 're hâimana za'ra.

11Wa hã Danhib'apito uptabi hã, ĩnhib'a'uwẽ norĩ te te 're ĩwaihu'u za'ra mono da, te te sima 're ĩwasu'u za'ra mono zéb zarina si, te te 're ĩwaihu'u za'ra mono õ di za oto ta norĩ hã. Duré isisãnawã norĩ te te tãma 're ĩwasu'u za'ra mono zéb zarina si, te te 're ĩwaihu'u za'ra mono õ di za. Si'uihâ na te za ĩnhib'a'uwẽ norĩ hã tipẽ'ẽ na te te 're ĩwaihu'u za'ra oto, dama wapu na 're ihâimana za'ra mono norĩ hã, duré dama pire na 're ihâimana za'ra mono norĩ zama.

12Iwasété za'ra hã te ãma 're ab'madâ'â mono õ di za oto. Duré marĩ te te 're i'manharĩ wasété za'ra mono zém na hã ãma 're ĩsipo're pu'u mono õ di za duré.”

13Duréihã 'Re ihâimana u'âsi mono te te dama iropisutu 'rata nhowa're're, te te dama iropisutuzép té hã te te dama pisutu wamhã, marĩ dai õ di oto, isimiropisutu 'rada hã. Tahawa, te za oto ai'utõ, marĩ i'ratare hã 're isi'utõrĩ pese za'ra mono ne.

Currently Selected:

Hebreu 8: xavBP

Highlight

Copy