Hebreu 5

1Duréihã ma tô ni'wam norĩ hã 'Re ihâimana u'âsi mono hã te te 're apisutu, tisiré sasedoti norĩ nhipai u, pire uptabi na te te 're romhuri za'ra mono da, tisiré zudeu norĩ ãma, 'Re ihâimana u'âsi mono ma. Ta norĩ si ma tô 'Re ihâimana u'âsi mono ma, danhoprubzé hã te te tãma 're sõmri za'ra da'upana, ãma 're iwata za'ra mono zéb da hã. Danhimizama ma tô duré da'upana te te tãma 're simro, dawasédé hã te te dama ãma 're i'apari mono zéb da hã. 2Ta norĩ hã sasedoti ipire uptabi norĩ hã ma tô hâimana nhib'uware na 're hâimana za'ra, ti'ai ãma dasiré 're hâimana za'ra mono wa. Tahawa, ni'wam norĩ hã tiwasédé te te 're i'manharĩ za'ra mono zém na 'râwi 're isiwaihu'u za'ra mono õ norĩ ãma, ma tô sasedoti norĩ hã 're siwamri za'ra, sada hã 're sahi su'u za'ra mono ãna. E marĩ wa. Ta norĩ hã aiwa tiwasété wi, 're hâimana nhiptete waihu'u za'ra mono õ wa, ma tô tisiré norĩ ãma 're siwamri za'ra sasedoti norĩ hã, aiwa 're hâimana za'ra mono wa. 3Duré ta norĩ hã dawasété u'âbâ si, marĩ hã 'Re ihâimana u'âsi mono ma, te te 're sõmri za'ra mono õ di, dawasédé hã te te dama ãma 're i'apari mono zéb da hã. Si'udâna zama ma tô marĩ hã te te tãma 're sõmri za'ra sasedoti norĩ hã, dasine tiwasédé hã te te 're 'manharĩ za'ra mono wa. 4E ma tô tawamhã ni'wam norĩ hã 'râwi 're sipisutu za'ra si'uihâ na, sasedoti ipire uptabi na dama 're ihâimana za'ra mono da hã. Mare di. Dasi'uihâ na 're dasipisutu za'ra mono õ di, dapire da hã. 'Re ihâimana u'âsi mono nhimipisutu zarina si, ma tô sasedoti ipire uptabi na hã 're hâimana za'ra. Duréihã Arã hã sasedoti ipire uptabi na tisiré norĩ ma, 're hâimana mono da, 'Re ihâimana u'âsi mono te te ipisutu ne, ma tô ta norĩ hã te te 're apisutu, tô õhõ si dapisutu'wai wa.

5Tane duré, Cristu hã si'uihâ na sipisutu õ di, sasedoti ipire uptabi na dama 're ihâimana mono da hã. 'Re ihâimana u'âsi mono si ma tô pisutu. Duréihã ma tô ni'wa hã ãne na ãma rob'ui'éré, 'Re ihâimana u'âsi mono te te irotizém na hã, ti'ra ma:

“A hã ĩ'ra na te 're aihâimana mo. Tahawa, wa za ĩ'ra na te 're asisi, dama aipire na 're aihâimana mono da oto.”

6Ãne duré, 'Re ihâimana u'âsi mono mreme na ãma irob'ui'éré amo hã, Cristuhu ãma:

“A hã sasedoti norĩ, dama 're ihâimana za'ra mono ne, te za dama 're aihâimana u'âsi mo, duréihã Mequizédéqui hã sasedoti na pire na dama 're ihâimana mono zéb zarina.”

7Zezusi hã ti'ai ãma 're morĩ ré hã, ma tô wawa sina Timama ma mre, mreme 'rãihâ na, za te te irobzépatazém na te te pawaptob da. Tawamhã 'Re ihâimana u'âsi mono, Zezusihi mreme te te wapari wamhã, ma tô sima wẽ tô, te te pawaptob da. Zezusi hã uburé marĩ hã Imama te te tãma ipisutuzéb uwaibaba si, te te 're ab'manharĩ mono da, te te sima 're wẽ u'âsi mono wa, ma tô Imama hã sima wẽ, te te pawaptob da. Duré 'Re ihâimana u'âsi mono, niha na hã te te sima wẽ 'wa'âhã, te aré tô tiwaihu'u pese na hã sõ'reptu, dâ'â tõ da. 8Zezusi hã 'Re ihâimana u'âsi mono 'ra, 're hâimana mono nherẽ, ma tô te te 're robzépata, ti'ai ãma 're morĩ ré hã. Taha zarina ma tô ãne hã si'ãma waihu'u: Ni'wam norĩ hã, 'Re ihâimana u'âsi mono nhimiroti te te 're 'madâ'â pese za'ra mono da, te te sima 're wẽ za'ra mono wamhã, taha zarina te za tô te te 're robzépata za'ra, ti'ab ré. Ãne ma tô Zezusi hã si'ãma waihu'u. 9Tawamhã Zezusi hã ti'ab ré, te te 're robzépata mono nherẽ, Imama te te tãma iwẽzéb zarina si te te 're ab'manharĩ mono wa, ma tô sina uwaimra, uburé isimiroti te te 're i'madâ'â pese za'ra mono norĩ hã te te 're sõ'reptu za'ra mono da, hâiwa ãma dâ'â ãna 're hâimana u'âsi za'ra mono da. 10Duréihã 'Re ihâimana u'âsi mono, ma tô Zezusi hã pisutu, sasedoti ipire uptabi na dama 're hâimana mono da, tãma da'ãma romhuri'wa da, duréihã Mequizédéqui hã sasedoti na pire na dama 're ihâimana mono ne, uburé ma, 're hâimana mono da.

'Re ihâimana u'âsi mono nhimiroti mono bâ ipire wasu'u

11Ãne na te duré aima ãma rowasu'u za'ra wa'aba da, wa tô aré ĩsima wẽ. Tane nherẽ, pire di, te aima ãma iwaihu'u za'ra wa'aba zéb da hã. E marĩ wa. Aima rowasu'u hâtob za'ra wa'aba wa. 12A norĩ wa'wa hã Cristu, 're isaze na'rata za'ra wa'aba mono zém na ma tô ai'ãma tironomro pese za'ra wa'wa. Ãhã wamhã, te aré oto isazei'wa norĩ ma, romnhoré'wa da, 're aihâimana za'ra wa'aba mo, 'Re ihâimana u'âsi mono nhimiroti na rowasu'u'wa da, ta norĩ ma hã. Tane nherẽ, te zahadu a norĩ wa'wa hã isazeté'wa ne, 're aihâimana za'ra wa'aba mo. 'Re ihâimana u'âsi mono nhimiroti hã duréihã da te aima 're iwasu'u na'rata za'ra wa'aba mono zé hã e aima waihu'u za'ra wa'aba ã bâ, te za apâ iwasu'u na da te aima ãma 're sahu za'ra wa'wa. Ai'uté hã tisai uptabi na 're saihuri waihu'u mono õ wa, te za tinho'u na si hã 're saihuri, ina norĩ hã isai uptabi hã te te tãma 're ai waihu'u za'ra mono õ wa. Tane, a norĩ wa'aba ma, te za tô 'Re ihâimana u'âsi mono nhimiroti hã duréihã da te aima 're iwasu'u na'rata za'ra wa'aba mono zép si, da te aima 're wasu'u za'ra wa'wa apâ, 'Re ihâimana u'âsi mono nhimiroti ipire hã zahadu aima pibui prã za'ra wa'aba wa, 're iwaihu'u pese za'ra wa'aba mono zéb da hã, asi'uihâ na. 13Ai'uté norĩ ma, tãma waihu'u õ di, 'Re ihâimana u'âsi mono ma iwẽ hã da te 're i'manharĩ za'ra mono zéb da hã, duré tãma iwẽ'õ hã da te 're 'manharĩ za'ra mono tõ da hã. Tane te duré a norĩ wa'wa hã zahadu ãne na 're aihâimana za'ra wa'aba mo. Ai'uté ne, te zahadu asimiza'rese'õ u'âsi 're aihâimana za'ra wa'aba mo, aima waihu'u za'ra wa'aba õ wa. 14Iprédum norĩ si te tisai uptabi na hã 're saihuri. Tane duré, 'Re ihâimana u'âsi mono nhimiroti ipire hã tãma iwaihu'u pese za'ra norĩ si te za waihu'u za'ra, 'Re ihâimana u'âsi mono ma, iwẽ si da te 're i'manharĩ za'ra mono zé hã, duré tãma iwẽ'õ hã da te 're i'manharĩ za'ra mono õ zé hã. Uburé marĩ hã niha iwẽ zô, duré niha iwasété zô, te te 're ipibu za'ra mono zéb zarina si, te za te te 're waihu'u pese za'ra, ta norĩ ma si waihu'u pese wa.

Currently Selected:

Hebreu 5: xavBP

Highlight

Copy