Zenezi 24

Izaqui hã Rebeca na imrozé wasu'u

1Tawamhã Abra'ã hã ihi uptabi na te 're hâimana oto. Duré Uburé Danhib'apito ma tô marĩ iwẽ hã te te tãma 're apisutu u'âsi. 2Tawamhã nimahã bâtâ na duréi te te tãma 're iromhuri mono, uburé marĩ te te tãma 're i'a'madâ'â mono zô hã ma tô hâ. Tawamhã te ãne tãma tinha, taha ma:

— Ma'ãpé asib'rada ĩzada'õtõ zahâpâ hiri#24.2 Sena na ropisudu, da te dasima i'manharĩzé, dazada'õtõ 'rowi danhib'rata za hã., asimiropisudu ĩma 'manharĩ da. 3Uburé Danhib'apito 'Re ihâimana u'âsi mono, hâiwa ãma duré ti'ai ãma zama uburé marĩ te te 're i'ab'madâ'â mono nhisi na ropisudu hã 'manharĩ, ĩ'ra Izaqui, niwa apto'o ré, ã hã Cana'ã na ti'ai wa'õtõ nho'õmo nhisi ãma 're ĩhâimana mono zéb ãma, pi'õ na imro da hã, tãma 'maipisutu tõ da. 4Tahawa, te za sô aimo za, ĩnhipti'ai 'rata ãma 're ĩnhamra 'rata mono zéb u, ĩsiwapru 'ra norĩ si tãma 'maipisutu da, ĩ'ra Izaquihi mro da hã.

5Tawamhã tãma iromhuri'wa te asa ãne sadanha:

— Bété azarudu we ĩme morĩ da, te te sima rowẽ õ wamhã, e marĩ, wa za 'manha. E ai'ra wa za aihâimanazéb 'rata u apâ hã saprõ.

6Tawamhã Abra'ã ma te asa ãma tãma wa'rã ãne:

— Mare di, tamomo apâ ĩ'ra te te sina isiri da hã. 7Uburé Danhib'apito, 'Re ihâimana u'âsi mono, hâiwa ãma 're isãmra mono ma tô ĩmama nhorõwa hawimhã, duré ĩsisãnawã norĩ nhipti'ai hawimhã we ĩwaze, ãwamhã. Duré ĩnhihudu norĩ ma, ã hã ti'a te te sõmri da, ma tô ĩma ropisutu. Õ hã te za tite hâiwa ãma romhuri'wa we satõ, te te asaprõni wẽ da hã. Ãhã wamhã te za ĩ'ra ma, pi'õ we tãma i'mazaprõ. 8Tawamhã pi'õ we asiré morĩ da, te te sima rowẽ õ wamhã, a hã te za ropisudu ĩma 'manharĩ nherẽ, asima iwẽ na aihâiba za. Tane nherẽ, ĩ'ra apâ tamomo isaprõni da hã mare di za.

9Tawamhã tãma romhuri'wa, Abra'ãhã zada'õtõ zahâpâ tinhib'rada te te hiri wamhã, ma tô sina tãma ropisutu, te te tãma iwaihu'uzéb zarina. 10Tawamhã 10 na Abra'ãhã te, awaru ba'õmore norĩ hã ma tô waibu. Duré isimarĩ iwẽ norĩ ma tô waibu. Taha pari 'ri nho'u Mezopotãmia ãma Nao 're ihâimana mono zéb u ma tô oto mo. 11Tawamhã hâiwahâ wisi wamhã, ma tô awaru ba'õmore simiza'õtõ simi'wara da hã, a'â tãma 'mazahâri za'ra, rowi 'ri ahâ nhiti prã na â zô ab're ihâimana ãma, hâiwahâ pesere pi'õ norĩ, â zô 're inomro mono zé bâtâ ãma. 12Tawamhã ma tô mre ãne:

— Uburé Danhib'apito, ĩnhib'apito Abra'ãhã te, 'Re ihâimana u'âsi mono, ma'ãpé uburé marĩ iwẽ na ĩma watobro da, ĩma 'manharĩ. Duré ĩnhib'apito ma, iwẽ si tãma 're 'manharĩ u'âsi mono. 13Ãhãta â zô ab're 'rata wa ĩhâiba, azarutu norĩ 'ri nho'õmo 're, 're ihâimana za'ra mono, â te te 're amrami za'ra mono da, we sô 're inomro mono zéb ãma. 14Tawamhã nimahã we imorĩ ma, wa za ãne tãma tinha: “Ma'ãpé ĩzawi na hã â suru na te hâ'rẽne da, piza we ĩma si'ra na.” Duré ãne te te ãma ĩzada'âbâ wamhã asa: “Ã hâ'rẽne pé. Hâ'rẽne parip si, wa za ate awaru ba'õmore norĩ ma zama tãma õb za'ra”, ane wamhã, wa hã wa za waihu'u, aima romhuri'wa Izaquihi mro da, pi'õ ipisutu na hã. Ãne wamhã, wa za waihu'u, ĩnhib'apito ma, iwẽ i'manharĩzém na hã.

15Tawamhã zahadu timreme te te sazâri õ ré, Rebeca ub'rẽ tinhisé te te âri sina te wei mo. Ta hã Betu'éhé 'ra, Milcaha 'ra 'ra, duré imro, Abra'ãhã sisãnawã Naoho 'ra 'ra. 16Rebeca azarudu hã iwẽ uptabi, ihâiba ubuni. Zahadu aibâ te te isa'rese'õ. Ta hã â zô ab're u ma tô si'ra. Tawamhã â te te a'âri parimhã, ma tô apâ iré sai'u. 17Tawamhã Abra'ãhã ma romhuri'wa ma tô iteme wara. Ãne ma tô tãma tinha:

— Ĩzawi na hã, ma'ãpé ate ub'rẽ 'remhã â suru na te hâ'rẽne da, a'â ĩma sa'ré na.

18— Hâ'rẽne. — Ãne ma te asa ãma sada'â.

Tawamhã awa'awi tinhisé hawi te te tãma si'rai wamhã, ma tô te te hâ'rẽne ré hã a'â tãma tété. 19Tawamhã te te tãma õ pari, te ãne azarudu hã tãma tinha:

— Ate awaru ba'õmore norĩ ma zama, â hã wa za nasi tãma amrami za'ra, te te i'mahâpãrĩ za'ra zéb u, te tãma õb za'ra da.

20Tawamhã danhimizama te te 're i'âhuri mono zéb 're, ma tô awa'awi â hã sa'wa. Te te sa'wari wi, ma tô nasi â zô ab're u hã si'aba'ré na asamro, awaru ba'õmore norĩ ma, â te te nasi amrami da, te te âhuri da. 21Ãhã ré, te aibâ mreme ãna taré azarudu titõmo na 'madâ'â pese, te te waihu'u da, Uburé Danhib'apito romhâ na imorĩzéb zarina wẽ na marĩ tãma watobro da, te te ipawaptobzéb zô, niha wamhã mare zô duré.

22Tawamhã awaru ba'õmore norĩ te te oto âhuri parimhã, ma tô isi'uwazi zapodo, ẽtẽ waipo pré oru 'manharĩ hã ti'â, 6 grama na ipire pibuzé hã. Tawamhã ta hã ma tô isisi're ãma tãma sasõ. Ma tô duré danhipsisizé 100 grama na ipire pibuzé hã tãma tiza. 23Taha pari te sadanha ãne:

— E 'wai 'ra, a hã. E tô aimama nhorõwa ãma rob're za'ẽtẽ di, ĩte aibâ norĩ me tame bara na iwanhotõ za'ra zéb da hã.

24Tawamhã asa ma te ãma tãma wa'rã ãne:

— Wa hã Betu'éhé 'ra, Milca norĩ nhihudu, Naoho me. 25Wanhorõwa ãma danhotõzéb da hã rob're za'ẽtẽ di. Duré amnho teihi norĩ dui me hã sa'ẽtẽ uptabi di, awaru ba'õmore norĩ sazéb da hã.

26Tawamhã aibâ hi'rãtitõ sãmra sina, ma tô Uburé Danhib'apito ãma hã tiwata. 27Ãne te tinha:

— Uburé Danhib'apito, Abra'ã ĩnhib'apito te, 'Re ihâimana u'âsi mono hã, iwẽ uptabi. Tô sena ma tô ĩnhib'apito ma, umnhasi sina ãma 're isiwãrĩ wẽ mono na hã tãma 're hâimana. Taha zarina ma tô isisãnawã norĩ nhorõwa u hã awa'awi u'âsi we ĩzaprõni wẽ.

28Tawamhã azarudu 'ri u wara sina si ma tô wara. Oto wisi wamhã, tina ma, tãma iromhâimanazé hã ma tô tãma wasu'u. 29-30Rebecaha hitébré, Labã na isisi hã ma tô isi'uwazi zapodo isisi're na isa'o, isimizu na isipsisi me hã 'madâ'â za'ra. Ma tô duré wapa, Rebecaha ma, aibâ te te tãma iwaihu'uzé te te dama iwasu'u hã. Tawamhã Labã si'aba'ré na iwa'rãmimhã ma tô sô mo, Abra'ãhã ma romhuri'wa hâiwi awaru ba'õmore norĩ zababa â zô ab're 'rata isab zô hã. 31Tawamhã Labã te ãne tãma tinha:

— To ĩsiré ãma aimorĩ. A hã aibâ, Uburé Danhib'apito, iwẽ hã te te aima 're i'apisutu mono. E marĩ zô bâ, te rowim haré asa. Asô wa tô robza'ra pese. Duré awaru ba'õmore norĩ isimasabzéb da zama wa tô sô pisutu siromo za'ra.

32Tawamhã ãne te te tãma nharĩ wa, ma tô aibâ 'ri para u hã ãzé. Tawamhã Labã, awaru ba'õmore na marĩ te te i'wasari hã ma tô awami. Taha pari amnho teihi norĩ dui me ma tô te te tãma sa'wari za'ra, te te huri da. Ma tô duré Abra'ãhã ma romhuri'wa zada hã, duré isiré isi'aba'ré norĩ zada hã â hã a'âri za'ra, ãma sipara upsõ za'ra da. 33Tawamhã ĩsa te te tãma amrami za'ra wamhã, ma tô ãne Abra'ãhã ma romhuri'wa hã tãma tinha:

— Ma, ĩsai õ di za a'â, marĩ na za te aima irowasu'uzéb da, te aima rowasu'u õ ré hã.

Tawamhã Labã, ma te ãne ãma sada'â:

— Ma'ãpé marĩ na wamhã, a'â pé rowasu'u na wama za'ra.

34Tawamhã te ãne oto tãma rowasu'u za'ra:

— Wa hã, Abra'ãhã ma romhuri'wa. 35Uburé Danhib'apito ma tô ĩnhib'apito ma iwẽ si te te tãma 're apisutu. Tahawa, ma tô sisimarĩ pese. Isimizama da, pone'ẽrebâ norĩ hã, pone'ẽrebâ zéré uzé norĩ hã, powawẽ norĩ hã, ẽtẽ waipo prã prata 'manharĩ hã, ẽtẽ waipo pré oru 'manharĩ hã, pawa'âbâ ãna tãma romhuri'wa si'aibâ norĩ hã pawa'âbâ ãna romhuri'wa sipi'õ norĩ hã, awaru ba'õmore norĩ hã, duré awaru po're pore norĩ zama hã ma tô tãma sõmri za'ra. 36Tawamhã Sara tô si'ihi uptabi nherẽ, ma tô ĩnhib'apito ma i'ra hã tãma tisõ. Tahawa, te za imama nhimarĩ hã i'ra dâ'âsina õhõ ma si si'uirĩ na hã uburé tãma sõmri za'ra. 37Ĩnhib'apito te ĩsina tãma ropisutu da, ma tô ĩma tinha, te te ĩma iwaihu'uzé hã te 'manharĩ da. Tahawa, ma tô ãne ĩma tinha: “Ĩ'ra, ãme ti'ai wa'õtõ nho õmo 're Cana'ã ãma pi'õ norĩ 're ihâimana za'ra mono na mro da hã tãma sa'réi õ di za, ã hã iwa 're ĩhâimana mono zéb ãma hã. 38Ta norĩ hâiba upana te za ĩmama norĩ siwapru 're ihâimana za'ra mono zéb u si aimo, imro da pi'õ hã tãma 'maipisutu da tamemhã.” 39Tawamhã wa tô ãma tãma wa'rã ãne asa: “Bété za azarudu we ĩme 'maimorĩ da, te te we sima 'mairowẽ õ wamhã, e marĩ wa za ãne wamhã 'manha.” 40Tahawa, ma te ãne asa ãma ĩma wa'rã: “Wa hã sena na Uburé Danhib'apito mreme hã wa tô te 're wapari pese. Ta hã te za tite hâiwa ãma romhuri'wa we atẽme satõ, asiré 're morĩ wa, uburé marĩ aima watobro wẽ da, i'uwaibaba na. Tawamhã te za ĩsiré a'uwẽ norĩ 'remhã, ĩmama siwapru norĩ 'remhã pi'õ ĩ'ra ma da hã i'maipisu. 41Ĩsiwapru norĩ ma nharĩ za'ra nherẽ, õ norĩ azarudu te te aima 'mazatõrĩ za'ra da, te te sima 'maiwẽ õ wamhã, a hã te za asima iwẽ na aihâiba, ropisudu ĩma ãma 'manharĩ nherẽ.”

42— Tawamhã ãhã na â zô ab're u ĩwisi wamhã, wa tô 'Re ihâimana u'âsi mono ma, ãne tãma mre: “Uburé Danhib'apito, ĩnhib'apito Abra'ãhã te, 'Re ihâimana u'âsi mono, wa aiwi waptẽ, we ĩpawaptobzéb zarina i'uwaibaba na si marĩ te 'manharĩ da hã. 43Ãhãta, wa ãme â zô ab're zababa nhamra. Pi'õ â te te a'âri da, we 'maimorĩ wamhã, wa za â hã tiwi 'maiwaptẽ, te te ĩma 'mai'õb da hã tite ub'rẽ 'remhã. 44Ta hã ãne na te te ãma ĩ'mazazei wamhã, duré ĩte awaru ba'õmore ma zama te te tãma õb za'ra da, si'mai'âri wamhã, ã hã te za ĩnhib'apito 'ra ma hã, pi'õ tãma ipisu za, imro da.” 45Zahadu ĩmreme te 'rãsutu õ ré, Rebeca ub'rẽ tinhisé ma tô we ti'â. Ta hã â zô ab're u te te si'rai wamhã, ma tô â hã hu. Tawamhã wa tô ãma 'mahâ ãne: “Ma'ãpé ĩzawi na hã, â ĩma õ na, te hâ'rẽne da.” 46Tawamhã si'aba'ré na tinhisé hawi ub'rẽ te te si'rai wamhã, ma tô ĩma ti'ru ãne: “Ã, hâ'rẽne pé. Ate awaru ba'õmore norĩ ma zama wa za duré tãma õb za'ra.” Ãhã wa, wa tô hâ'rẽ, wa hã. Awaru ba'õmore norĩ ma zama ma tô taha wamhã tãma õb za'ra. 47Tawamhã wa tô duré sadanha ãne: “E 'wa hã aimama.” Tawamhã ma te ĩzada'â ãne: “Wa hã Betu'éhé 'ra, Milca norĩ nhihudu, Naoho me.” Tawamhã wa tô isisi're ãma isi'uwazi zapodo ãma sasõ. Wa tô duré isipsisizé isimizu ãma hã tãma tiza. 48Tahawa wa tô ĩhi'rãtitõ nhamra, 'Re ihâimana u'âsi mono ãma ĩwata da. Ãhã wamhã, Uburé Danhib'apito, Abra'ã, ĩnhib'apito te, 'Re ihâimana u'âsi mono, awa'awi si Izaquihi mro da, pi'õ zô we te te ĩzaprõni wẽ 'wai ãma wa tô ĩwata tô. 49Tahawa te za oto a norĩ wa'wa hã niha na ĩma iwaihu'u za'ra wa'wa, ĩnhib'apito mreme na ibâ na ãma aiwamri za'ra wa'aba da wamhã. Duré mare wamhã, ĩma waihu'u za'ra wa'aba, niha na hã te ĩsima rowairébé hâ.

50Tawamhã Labã norĩ, Betu'éhé me, ma tô ãma asa sada'âbâ zahuré ãne:

— Uburé ta hã, Uburé Danhib'apito hawip si. Tahawa niha na wa te inharĩ da hã mare di, iwẽ na hã iwasété na hã. 51Ãhãta te tihâiba, Rebeca hã. Te za ãma asiré isaprõ, asib'ihâ'a 'ra mro na tãma 're hâimana mono da, Uburé Danhib'apito te te inharĩzéb zarina.

52Tawamhã Abra'ãhã ma romhuri'wa ãne na te te mreme wapari zahuré wamhã, ma tô hi'rãtitõ nhamra. Duré ti'ubu na ti'ai u hã ma tô ropto. Tawamhã Uburé Danhib'apito ãma ma tô tiwata. 53Tawamhã ma tô ẽtẽ waipo prã prata 'manharĩ hã, duré ẽtẽ waipo pré oru 'manharĩ hã, da'uzazé ihâpa siré tãma sõmri za'ra, Rebecaha ma. Tawamhã ihitébré norĩ ma zama ina me hã ma tô taré marĩ iwa'âbâ za'ẽtẽ na hã ãma tãma tinhoprub zahuré. 54Tawamhã siré isi'aba'ré norĩ me tisa ma tô oto tihu. Tahawa, ma tô tamemhã a'â tinhotõ za'ra. Tawamhã awẽm na oto utu za'ra wamhã, ma tô romhuri'wa tãma nharĩ zahuré ãne:

— Ma'ãpé ĩma waprosi waré na, ĩnhib'apito nhorõwa u apâ ĩmorĩ da.

55Tane nherẽ, te Rebecaha hitébré norĩ, ina me tãma nharĩ zahuré ãne:

— Wama wẽ di aré, niha bâtâ na a'â wame hâimana da hã, niha wamhã aré 10 bâtâ na. Taha parip si morĩ da wamhã, te aré tô oto mo.

56Tane nherẽ, romhuri'wa ma ãma tãma wa'rãmi zahuré ãne:

— Ĩwairĩ aba õ di za, a'â ĩnhamra da hã. Uburé Danhib'apito ma tô ĩpawapto, we ĩmorĩzé wẽ na ĩma watobro da hã. Tahawa te za ĩzatõrĩ waré wa'wa, ĩnhib'apito nhorõwa u apâ ĩmorĩ da hã.

57Tawamhã te duré asa tãma nharĩ zahuré ãne:

— Tane wamhã, oto Rebecaha zô a'â wahârâ, niha te te õ hã waihu'u zô.

58Tawamhã ta norĩ, azarutu zô hârâ zahuré wamhã, ma tô sadanharĩ zahuré ãne:

— E te tô asima iwẽ, ã hã aibâ siré aimorĩ da hã.

— Ĩhe, wa ĩsima wẽ, tô isiré ĩmorĩ da hã. — Ãne ma te asa ãma sada'âbâ zahuré.

59Tawamhã ma tô oto tãma rowairébé za'ra, Rebecaha ma, duré iprédu'wai ma, Abra'ãhã ma romhuri'wa siré, duré isiré isi'aba'ré norĩ siré hã neb da. 60Tawamhã iwẽ hã ma tô Rebecaha ma, pisutu za'ra ãne:

“Wahidiba, a hã da'ahâ uptabi 'rata na 're i'aihâimana mono da si, iwẽ hã.

Duré asihudu norĩ, tinhitob'ru norĩ te, 'ri nho'õmo ãma hã te te 're i'ai'uté za'ra mono da si, iwẽ hã.”

61Tawamhã Rebeca, tite romhuri'wa norĩ me ma tô sima ro'ubumro za'ra. Duré awaru ba'õmore te te sima bazadâ za'ra wamhã, ma tô oto Abra'ãhã ma romhuri'wa norĩ siré hã ai'aba'ré. Ãne ma tô oto ta norĩ hã wairé.

62Taha ré Izaqui, ma tô apâ sina siri, Be'e-La'ai-Ro'i hawi, Negevi na supara si 're iropsa'wari mono zém nhisi ãma 're hâimana mono wa. 63Tawamhã hâiwahâ pesere nherẽ, ma tô watobro, ro hã te te 're awaimrami mono da. Tahawa, 'rãi wahutu wi, ma tô awaru ba'õmore we isi'aba'ré hã sãmri za'ra. 64Tawamhã Rebecaha zama, ma tô Izaqui titõmo na 'madâ. Te te 'madâ'â wa, awaru ba'õmore nhisi hawi ma tô tobro. 65Tahawa, ma tô Abra'ãhã ma romhuri'wa ãma sadanha ãne:

— E 'wa hã õ hã aibâ, wa'uwaibaba za'ra we 're imorĩ hã, rom na.

— Ĩnhib'apito te we 're mo. — Ãne ma te asa ãma sada'â.

Tawamhã ti'rã ubuzé, ma tô sisada hã ti'â. Taha na ma tô duré tawamhã oto si'ubu ubu.

66Tawamhã sihutu wi, ma tô Abra'ãhã ma romhuri'wa, uburé te te i'ab'manharĩ mono zé hã Izaquihi ma awasu'u. 67Tawamhã Izaqui, 'ri u ina Sara aré 're isãmra mono zéb u, ma tô Rebeca hã saprõ. Ãhã wamhã, ma tô oto ãma timro. Tawamhã Izaqui, Rebeca ma tô te te 're sawi pese. Ãne zarina, ma tô ina dâ'âzém na 're ipẽ'ẽzé mono zé hã sina tãma tipa.

Currently Selected:

Zenezi 24: xavBP

Highlight

Copy