Zenezi 25

Abra'ãhã nhihudu norĩ hâiba amoi wasu'u

1Tawamhã Abra'ã, pi'õ aimawi na ma tô duré timro, Quetura na isisi na. 2Taha zé're hawim norĩ nhisi hã ãne: Zĩrã, Zocsã, Medã, Midiã, Isibaque, duré Su'a. 3Zocsã hã ma tô Seba norĩ poto zahuré, Dedãhã me. Tawamhã Dedãhã nhihudu norĩ hã, Assurĩ, Retusĩ, duré Reumi. 4Midiãhã 'ra norĩ nhisi hã ãne: Efa, Éfer, Enoqui, Abida, duré Elda. Uburé ã norĩ hã, Queturaha nhihudu.

5Tawamhã Abra'ã, Izaquihi ma, ma tô uburé tinhimarĩ tãma pisutu za'ra, i'uirĩ na ãma site za'ra da. 6Tane nherẽ, timro prãi 'ra norĩ ma, ma tô taré tinhimarĩ na hã ãma tãma tinhoprub za'ra. Tawamhã dâ'â wana ré, ma tô timro prãi 'ra norĩ hã Izaquihi nhiti satõrĩ za'ra, bâtâ pusizém niwĩ 're hâimana za'ra mono da.

Abra'ãhã dâ'âzé wasu'u

7Tawamhã Abra'ã, 175 na ãma iwahum na ma tô 're hâimana. 8Tawamhã si'ihi uptabi wa, oto dâ'â wamhã, ma tô oto tihi'rata norĩ siré hã simisutu 're hâimana. 9Tawamhã i'ra Izaqui norĩ, Ismaeu me ma tô Maquipela ãma ẽtẽ na ab're siromo wa, sẽrẽ zahuré, Mare bâtâ pusizém niwĩ, Efrõ Zoaha 'ra te itehutu ãma. Ta hã, Zoa hitita norĩ siré hã. 10Ã hã itehudu, Abra'ã, hitita norĩ wi te te i'uipra. Tame ma tô Abra'ã norĩ Saraha me ãma ti'a zahuré ni. 11Tawamhã Abra'ã dâ'â parimhã, ma tô 'Re ihâimana u'âsi mono hã, i'ra Izaquihi ma, iwẽ hã ma tô te te tãma 're apisutu. Izaqui hã Be'e-La'ai-Ro'i 'ratamhã ma tô 're hâimana.

Ismaeu nhihudu norĩ wasu'u

12Ã hã, Ismaeu nhihudu norĩ nhisi na rob'ui'éré. Ta hã, Abra'ãhã 'ra, Agaha wa te te ipodo, Saraha ma romhuri'wa, ezipsiu 'ra. Taha sipoto norĩ nhisi hã ãne, 13sisãna're ipoto za'ra mono bâ hã: Nebaiote ipoto'rada. Isõsi hã Queda, Adbe'u, duré Mibsã, 14Misma, Duma, Masa, 15Hadade, Tema, Zetu, Nafis, duré Quedema. 16Ã norĩ hã Ismaeu 'ra 12 na ihâiba za'ra hã. Tawamhã ta norĩ za'ru za'ra hã, duré ite mono bâ romhâ 'manharĩ na 'ri nhoré mono ma tô isisi mono bâ da te ãma 're waptẽrẽ za'ra. Tawamhã ta norĩ hã ma tô tinhib'a'uwẽ mono bâ danhib'ihâ'a na sima 're hâimana za'ra. 17Tawamhã Ismaeu ãma 137 na ãma iwahub ãma, ma tô oto dârâ. Tahawa, ma tô oto tihi'rata norĩ siré simisutu 're hâimana. 18Tawamhã Ismaeu nhihudu norĩ, ma tô Havira na romnhisi norĩ wa'wamhã, Su na duré romnhisi wa'wa 're hâimana za'ra, Ezitu bâtâ pusizém niwĩmhã, Asiria nho'õmoi baba bâdâdi ihâimana niwĩ. Ta norĩ hã ma tô romhâ na Abra'ãhã nhihudu norĩ amo nhiti hã 're hâimana za'ra.

Ezau norĩ, Zacoho me ipoto zahuré zé wasu'u

19Ã hã Izaqui, Abra'ãhã 'ra wasu'u. 20Tawamhã Izaqui 40 na ãma iwahub ãma, ma tô Betu'éhé 'ra Rebecaha ãma timro, Labãhã hidiba ãma hã. Ta norĩ hã Arameu norĩ siré, te Mezopotãmia na romnhisi ãma 're hâimana zahuré. 21Rebeca hã 'razéb 'ré wa, te 'ra ãna 're hâimana. Tahawa te Izaqui, Uburé Danhib'apito ma ãma mre. Tawamhã Uburé Danhib'apito te te tiwi irowaptẽrẽzém na te te wapari wa, ma tô Rebeca hã oto tiwasã. 22Tawamhã idi'i 'remhã ai'uté hã isi'ubza. Tahawa tina di'i 'remhã te nasi siwabzuri zahuré. Ãhã wa, te ãne sina rosa'rata: “E tihai wamhã, ma ãne hã ĩma tiromhâiba.” Tahawa te Uburé Danhib'apito te te sadanharĩ da hã mo. 23Tawamhã ma te ãma sada'â ãne:

“Adi'i 'remhã te maparane a'uwẽ hi'rata da hã tihâimana zahuré.

Ai'ra te za aima tipoto zahuré, maparane a'uwẽ norĩ, tinhitob'ru na sima 're ihâimana zahuré mono da hã.

Ai'ra hâiba amo hã te za siptete na tihâiba amo nhipai u 're hâimana.

Duré dadub'rada hã te za tino zapari 're hâimana.”

24Tawamhã Rebecaha ma, i'ra tãma ipoto zahuré zé bâdâ oto wisi wamhã, ma tô 'watébrémi na maparane tãma tipoto zahuré. 25Imorĩ'rata na ipodo hã ihâiba pré ro, duré ihâiba sui 'ré, da'uza hâ pa ihâi ro ne hã. Tahawa ma tô sisi zahuré, Ezau#25.25 Ezau hã hebreu norĩ mreme na “isui'ré” aiwa prã na ne iwapari na hã. na. 26Taha pari isãna're ipodo ma tô tinhib'rata amo na tidub'rada Ezauhu para na'rada hã te te tété mono sina watobro. Tahawa ma tô sisi zahuré, Zaco#25.26 Zaco hã hebreu norĩ mreme na “dapara na'rada” aiwa prã na ne iwapari na hã. na. Ãne ma tô Izaquihi ãma 60 na iwahub ãma Rebecaha ma ai'uté isi'ubza 'watébrémi hã tãma tipoto zahuré.

Ezau dama ipoto'rata wa, ãma 're ihâimana mono zé, tino Zacoho ma, te te isa'rézé wasu'u

27Tawamhã 'watébrémi norĩ ma tô oto tiprédub zahuré. Tahawa Ezau ma hã wẽ uptabi di, rom na 're ihâimana mono da hã. Tahawa ma tô sisõpãrĩ pese na hã 're hâimana. Tane nherẽ, Zaco, sima iwẽ na 'ri 'rep si 're ihâimana mono da si, tãma iwẽ hã. 28Tawamhã Izaqui, ma tô Ezau te te 're sawi pese, ino nhipai u, i'abaze nhi na 're sai pese mono wa. Tane nherẽ, Rebeca ma tô Zacoho si te te 're sawi pese, idub'rata nhipai u.

29Tawamhã nimahã bâtâ na Zaco dasai wai'o ise na sipi ré, ma tô Ezau a'ubuni hawimhã wi, sadâ'â uptabi na, duré mram uptabi na. 30Tahawa te ãne tiwi waptẽ:

— Mrab uptabi di, ĩma hã. Tahawa ma'ãpé ĩzawi na hã dasai wai'o pré suru na we ĩma a'âri. (Tahawa Ezau ma tô sisi ni Edõ#25.30 Edõ hã hebreu norĩ mreme na “ipré” aiwa prã na ne iwapari na hã. na isisi amo na.)

31Tawamhã Zaco, asa ma te ãma sada'â ãne:

— Wa za tô aima sa'ré, a hã ĩma aipoto 'rata wa, aima 're ihâimana mono, ĩma sa'réi wamhã.#25.31 Dama ipoto'rada hã te za uburé tisiré a'uwẽ norĩ ma, isib'apito za'ra na 're hâimana. Te za duré ino norĩ nhipai u timama nhibro hã i'uirĩ na sima waibu.

32Tawamhã Ezau te duré asa tãma tinha ãne:

— Marĩ õre di, wẽ di. Wa aré oto dârâ. E marĩ da bâ ĩma hã, dama ipoto'rata ma, 're ihâimana mono hã.

33— Tahawa ma'ãpé imorĩ'rata na a'â ĩma ãma ropisutu. — Ãne te Zaco tãma tinha.

Tawamhã Ezau, ma tô ropisudu tãma 'manha. Te te tãma i'manharĩ zarina, ma tô dama ipoto'rata na 're ihâimana mono zé hã oto tãma sa'ré. 34Tawamhã Zaco i'u'ẽtẽ wapu, duré dasai wai'o pré hã ma tô tãma tisõ. Tawamhã te te 'rẽne parimhã, duré te te simizâri parimhã, ma tô oto wahudu, morĩ da. Ãne ma tô Ezau dama ipoto'rata ma, 're ihâimana mono zé hã siwi wẽ'õ.

Currently Selected:

Zenezi 25: xavBP

Highlight

Copy