Atu 18

Paulu hã Corĩtu ãma te te iromhurizé wasu'u

1Tawamhã Paulu hã ma tô watobro, Atena hawi. Corĩtu na 'ri nho'õmo nhisi u te ãhã wamhã oto mo. 2Tawamhã Corĩtu u wisi wamhã, ma tô zudeu norĩ siré hã aibâ hã sõpẽtẽ, mro ré. Aquira na aibâ nhisi hã. Põtu na danhipti'a nho'õmo nhisi ãma iwaptã'ãzé, ta hã. Roma na 'ri nho'õmo nhisi hawi ma tô iwana aimasisi zahuré, timro me, Italia na danhipti'a nho'õmo nhisi hawi. Pi'õ nhisi hã Prisila na. Claudiu na danhib'apito uptabi nhisi hã ma tô zudeu norĩ hã satõrĩ za'ra, Roma hawi, isiti si'aba'ré da. Tahawa, ma tô Corĩtu u aimasisi zahuré, Aquira norĩ hã. Ta norĩ hã te te sabu zahuré da, ma tô itẽme timorĩ zahuré, Paulu hã. 3Tawamhã tame te oto i'rata tinhamra zahuré, isimiromhuri za'ra hã aiwa wa. Romhâ 'manharĩ na 'ri'wa, ta norĩ hã. Tahawa, ma tô siré tihâimana za'ra a'â, siré te te romhuri za'ra da. 4Tawamhã sabadu sidâpâsi, ma tô nasi dama rowahutu, zudeu norĩ te, rowahutuzéb ãma, Zezusi hã da te 're saze za'ra mono da, zudeu norĩ hã, gregu norĩ me.

5Tawamhã tamomo ma tô Sila norĩ hã itẽme aimasisi zahuré, Masédonia hawi, Timotiuhu me. Itẽme simasisi wamhã, Paulu hã ma tô Zezusihi wasu'uwẽ na si romhuri u'âsi oto. Zudeu norĩ ma, te Zezusi hã tãma wasu'u za'ra, õ hã Danho'reptui'wa da, 'Re ihâimana u'âsi mono te te ipisutu na hã. 6Tane nherẽ, iwasu'u hã ma tô tiwi wẽ'õ za'ra. Timreme wasété na ma tô siwi azâ, Paulu hã. Tahawa, Paulu hã ma tô ti'uza zapru wami, damreme wasété na ãma dâ'â tõ da. Tawamhã te tãma nharĩ za'ra, ãne:

— E ĩnhimirowahutuzéb zarina te za ropipa u 're anomro aba mo. Mare di. Asi'uihâ na te za 're asisimini za'ra wa'aba mo. Zudeu'õ norĩ u si wa za oto 're ĩne, ta norĩ ma si te 're rowasu'u za'ra mono da oto, iwasu'uwẽ na hã.

7Tawamhã zudeu norĩ te, rowahutuzém hawi, ma tô oto watobro. Ãhã wamhã, aibâ nhorõwa u ma tô ãzé, Tisiu Zustuhu nhorõwa u. Ta hã zudeu'õ, 'Re ihâimana u'âsi mono ãma 're iwata mono. Zudeu norĩ te, rowahutuzéb zababa, te 're sa, Tisiuhu nhorõwa hã. 8Tawamhã rowahutuzéb ãma 're ida'anhimi'rui mono 'wa hã ma tô saze Wanhib'apito hã, Crispu na isisi hã. Duré, uburé isõrõwa ãma isiré 're isi'ubumroi mono norĩ hã ma duré saze za'ra. Corĩtu ãma 're idasi'ubumroi mono zama ma tô da'ahâ na saze za'ra ni, Zezusihi wasu'uwẽ hã da te wapari za'ra wa. Tahawa, ma tô â dawabzuri hã 'manharĩ za'ra ni.

9Tawamhã nimahã mara na, Paulu hã ma tô Wanhib'apito hã 'madâ, sõtõ 'rowim ne. Taha wamhã, te tãma tinha, ãne:

— Aipahi tõ. Dama 're rowasu'u u'âsi mono. Sazâri tõ duré. 10Wa hã wa asiré 're ĩhâimana u'âsi. Ãmemhã, ĩnhib'a'uwẽ hã ahâ di. Tahawa, ni'wa hã rowasédé te te ai'ãma 'manharĩ waihu'u õ di za.

11Tahawa, te Paulu hã tame a'â nhamra, te te dama 're rowahutu mono da, 'Re ihâimana u'âsi mono zadawa wasu'u na hã. Tame sãmra ré, ma tô ãma tiwahu, misi wahum na, õ wahu hâiba amoi wãiwab u.

12Tawamhã Galiu hã ma tô si'apito, Ataza na danhipti'a nho'õmo nhisi ãma. Romanu norĩ ma, roti'wa zadawa para, ma tô si'apito, tame te te dama 're roti mono da. Tawamhã zudeu norĩ hã ma tô Pauluhu zada si'rã'õtõ. Tahawa, ma tô siwi ti'â, da'ãma rowairébé'wai u. 13Tawamhã zudeu norĩ hã ma tô Paulu hã tãma wasu'u za'ra, Galiuhu ma. Ãne te taha wamhã tãma rowasu'u za'ra:

— Ã hã aibâ hã te sima wẽ, rosa'rata na te te dama ãma azaprĩ mono da, 'Re ihâimana u'âsi mono ãma 're idawata za'ra mono zém na hã. Wanhimiroti 'rata zarina 'Re ihâimana u'âsi mono ãma 're wawata tõ za'ra mono da, te za da'ãma azaprĩ, aibâ hã.

14Tawamhã Paulu hã te aré timreme hã waze, tãma siwasu'u za'ra da. Tane nherẽ, mreme õ ré, ma tô danhib'apito Galiu hã ãma sõzâ, zudeu norĩ ma, te te rowasu'u da. Ãne te tãma nharĩ za'ra:

— Zudeu norĩ, marĩ ipire hã te te 'manharĩ wasété 'wa'âhã, wa aré asadaihu'u za'ra wa'wa. 15Tane nherẽ, mare di. Taré imreme zô te pibu da, ma tô we ĩtẽme asiwi isaprõni 'wa. Asimirowasu'u za'ra wa'aba zarina, duré danhisi na, duré asimiroti za'ra wa'aba zarina imreme zô te ipibu da si, ma tô we ĩtẽme asiwi isaprõni 'wa. Tahawa, te ãma rowairébé õ di za. A norĩ wa'wa hã asi'uihâ na te za ãma irowairébé za'ra wa'wa.

16Tawamhã da'wapéi'wa norĩ ma, ma tô 'ru za'ra, rob u te te sate mono da, zudeu norĩ hã. 17Tawamhã ma tô aibâ hã siwi ti'â, rowahutuzéb ãma 're ida'anhimi'rui mono 'wa hã, Sotẽni na aibâ nhisi hã. Tawamhã ma tô siwi azâ, dama rowairébézé nho're ãma. Te te siwi azâri nherẽ, te te ãma rosa'rata õ di, apito Galiu hã.

Paulu hã Ãtioquia u apâ imorĩzé wasu'u

18Tawamhã Paulu hã bâtâ ahâ na ma tô nhamra, Corĩtu ãma. Tawamhã ma tô oto isazei'wa norĩ ma siwasu'u za'ra, morĩ da oto, Siria na danhipti'a nho'õmo nhisi u. Prisila norĩ hã ma tô ime tineb zahuré, Aquiraha me, Sẽcréia na 'ri nho'õmo nhisi u. Sẽcréia ãma sãmra ré, ma tame 'rã pari ni Paulu hã, marĩ na 'Re ihâimana u'âsi mono ma, te te iropisutuzém na te te sina tãma ãma i'uwaimrami na, ãma iwaihu'uzéb da hã. Ta hawi rowa'u'u na uba'renem na ma tô dame ai'aba'ré, Siria na danhipti'a nho'õmo nhisi u. 19Tamomo si'aba'réi wamhã, ma tô aihutu, Éfézu na 'ri nho'õmo nhisi u. Prisila norĩ hã te za oto isa'u aimasisi zahuré tame, Aquiraha me. Tawamhã tame sãmra ré, ma tô Paulu hã ãzé, zudeu norĩ te, rowahutuzéb u. Tame ma tô zudeu norĩ me marĩ wasu'u na sima ãma rowasu'u za'ra. 20Tawamhã ma tô siwi ãma ropti, a'â hâimana da, i'ratab za'ra. Tane nherẽ, te te sina saze za'ra õ di, Paulu hã. 21Tahawa, ma tô tãma nharĩ za'ra asa, ãne:

— 'Re ihâimana u'âsi mono te te ĩma waihu'u wapsi, wa za we atẽme ĩmorĩ 'wa apâ.

Tawamhã rowa'u'u na uba'renem na ma tô oto mo, Éfézu hawi. 22Sézaréa u, ma tô oto wi. Ta hawi, te duré mo, Zeruzalẽ u awa'awi. Tame, ma tô si'aba'ré na sawi za'ra, isazei'wa norĩ hã. Tawamhã ta hawi, ma tô duré mo, Ãtioquia u, Siria 're, 'ri nho'õmo u. Tame te a'â duré nhamra oto.

23Tawamhã Ãtioquia ãma sãmra parimhã, ma tô duré mo Paulu hã, Galasia na danhipti'a nho'õmo nhisi wa'wai baba, duré Prizia na danhipti'a nho'õmo nhisi wa'wai baba. Daza'rui wa'wai baba 're morĩ ré, ma tô Zezusihi zazei'wa norĩ hã te te 're apawapto, hâimana nhiptete na si 're nomro mono da.

Apolu hã Éfézu ãma duré Corĩtu ãma te te iromhurizé wasu'u

24Tawamhã aibâ hã, zudeu norĩ siré hã ma tô wi, Éfézu u, Apolu na isisi hã. Alesãdria na 'ri nho'õmo nhisi ãma ipodo, ta hã. Mreme wabzuri waihu'u pese di. Duré 'Re ihâimana u'âsi mono nhimiroti 'rata na ibaihâ na da te ãma 're irob'ui'éré za'ra mono hã tãma waihu'u pese di. 25Wanhib'apito 're imorĩ wẽ zém na ma tô da te tãma 're romnhoré za'ra. Tahawa, mreme nhiptete na ma tô i'uwaibaba si te te dama 're rowahutu, Zezusihi wasu'u na hã. Tane nherẽ, uburé Zezusihi wasu'u hã zahadu te te waihu'u õ di. Dawasété wi 're dasipizari za'ra mono da, Zuwã, â dawabzuri te te dama 're iwasu'u mono si ma tô waihu'u, Apolu hã. 26Tawamhã pahi ãna ma tô dama rowahutu na sãna'rata, zudeu norĩ te, rowahutuzéb ãma. Tawamhã Prisila norĩ hã Aquiraha me isimirowasu'u hã te te wapari zahuré wamhã, tinhorõwa u ma tô saprõni zahuré, Zezusihi wasu'uwẽ hã te te tãma waihu'u pese zahuré da, 're idanomro mono zép tém na 'Re ihâimana u'âsi mono te te ipisutu na. 27Tawamhã Apolu hã ma tô sima rowẽ, Ataza na danhipti'a nho'õmo nhisi u morĩ da. Tahawa, Éfézu ãma isazei'wa norĩ hã ma tô ãma ana, Apoluhu ãma. Rob'ui'éré hã ma tô tãma sõmri za'ra, Ataza u te te siré âri da. Isazei'wa norĩ hã te te siwi âri wẽ da, ma tô ãma wada'uri za'ra. Tawamhã Apolu hã Ataza u wisi wamhã, ma tô isazei'wa norĩ hã pawapto pese za'ra, 'Re ihâimana u'âsi mono nhimizawi pese zéb zarina te te 're isaze za'ra mono norĩ hã. 28Tawamhã mreme nhiptete na te nasi zudeu norĩ ma tãma ãma wa'rãmi za'ra. 'Re ihâimana u'âsi mono nhimiroti 'rata na rob'ui'éré zarina, ma tô nasi tãma rowasu'u za'ra danho'a, Zezusi hã Danho'reptui'wa da, 'Re ihâimana u'âsi mono te te ipisutu na sena na da te 're waihu'u za'ra mono da. Zudeu norĩ hã te te ãma wa'rãmi za'ra neza, Zezusihi zazei'õ'wa norĩ hã. Tane nherẽ, Apolu hã ma tô aiwétési ãma ai'uté za'ra, zudeu norĩ ãmamhã, tinhimirowasu'u na.

Currently Selected:

Atu 18: xavBP

Highlight

Copy