Atu 19

Paulu hã, Éfézu ãma romhuri na te te isãna'ratazé wasu'u

1Apolu hã Corĩtu ãma sãmra ré, ma tô Paulu hã ro'razâ, Éfézu u sa'a nhisi baba. Tame ma tô Zezusihi zazei'wa norĩ hã sõpẽtẽ za'ra. 2Tahawa, ma tô sadanharĩ za'ra, ãne:

— E saze za'ra wa'aba wamhã, ma tô 'Re ihâimana u'âsi mono Tipẽ'ẽzani hã aima sõmri za'ra wa'wa.

Tawamhã asa te tãma siwasu'u za'ra:

— Mare di, zahadu wa te wapari za'ra õ di, Ipẽ'ẽzani 're ihâimana mono zé wasu'u hã.

3Tahawa, ma tô duré sadanharĩ za'ra, Paulu hã:

— E 'wa simirowahutu zarina ma tô â dawabzuri hã i'manharĩ za'ra wa'wa bété.

Tawamhã asa te duré tãma nharĩ za'ra, ãne:

— Zuwãhã nhimirowahutu zarina wa tô 'manharĩ za'ra ni.

4Tawamhã ma tô duré Paulu hã tãma nharĩ za'ra, ãne:

— Zuwã hã dawasété wi 're idasipizari za'ra mono norĩ ma si, ma tô â dawabzuri hã te te dama 're ab'manharĩ. Izaraéu nhihudu norĩ ma, ma tô te te 're roti, isa'u datẽme iwi hã da te dasina 're umnhasi za'ra mono da, Danho'reptui'wa na, tô Zezusi hã.

5Tawamhã Pauluhu nhimirowasu'u hã te te wapari za'ra wamhã, tô sena Wanhib'apito Zezusihi zazei uptabi 'wa na isiwasu'u za'ra zéb zarina, ma tô â dawabzuri hã 'manharĩ za'ra, ta norĩ hã. 6Tahawa, Paulu hã ma tô tinhib'rata na 'rã upi za'ra. Te te 'rã upi za'ra wamhã, ma tô 'Re ihâimana u'âsi mono hã Tipẽ'ẽzani tãma sõmri za'ra. Tahawa, te oto damreme tãma iwaihu'u za'ra õ na dama rowasu'u za'ra, hâiba mono bâ. Timreme nai õ nherẽ, 'Re ihâimana u'âsi mono, Tipẽ'ẽzani na te te tãma iwaihu'u za'ra zéb zarina, te oto mreme zu. 'Re ihâimana u'âsi mono zadawa wasu'u na te duré dama rowasu'u za'ra. 7Ta norĩ hã, ãté 12 na ihâiba za'ra hã.

8Tawamhã Paulu hã te nasi ãza, zudeu norĩ te, rowahutuzéb u, te te dama rowahutu da. A'amo si'ubdatõ, ma tô ãma ai'utõ, tame te te dama 're rowahutu mono ré hã. Da te tãma 're nharĩ za'ra mono nherẽ, pahi ãna ma tô te te dama 're rowasu'u, da te 're saze za'ra mono da. 'Re ihâimana u'âsi mono, za da'ãma 're isib'a'uwẽ mono zém na da te 're saze za'ra mono da, ma tô te te dama 're roti. Tahawa, ni'wam norĩ hã ma tô saze za'ra. 9Tane nherẽ, ni'wam norĩ hã te te saze za'ra õ di, pẽ'ẽ tete za'ra wa. Wanhib'apito 're imorĩzéb zarina 're idanomro mono zép té wasu'u hã ma tô tiwi wẽ'õ za'ra, danho'a, mreme wasété na. Tahawa, Paulu hã ma tô tiwi timorĩ za'ra, rowahutuzém hawi. Zezusihi zazei'wa norĩ hã ma tô te te simro, Tiranuhu na aibâ nhisi te, romnhorézéb u. Awẽ sidâpâsi, ma tô tame te te tãma 're rowahutu za'ra oto. 10Tame te te dama 're rowahutu mono ré hã, maparane ma tô ãma tiwahu. Tahawa, aihĩni Azia na danhipti'a nho'õmo nhisi ãma 're isi'ubumroi mono hã, ma tô Wanhib'apito nhimiroti hã wapari za'ra, zudeu norĩ hã, zudeu'õ norĩ me.

Sewaha 'ra norĩ wasu'u

11'Re ihâimana u'âsi mono, ma tô Paulu hã pawapto, marĩ dama i'manharĩ waihu'u'õ te te dama 're ab'manharĩ mono da, iwẽ hã. 12Romhurizéb da, i'uza wẽ nhisiwi, te te sima 're i'mazai mono hã ma tô da te 're waibu, ihâzé ré norĩ ma, te te 're 'wasari mono da. Dasi'u'õzéb zama ma tô duré da te 're waibu, ihâzé ré norĩ hã te te 're upi za'ra mono da. Te te 're upi za'ra mono wamhã, ma tô 're séptâ'â za'ra. Wa'uburé norĩ hã ma tô duré dahawi 're wairébé. 13Tawamhã ni'wam norĩ hã zudeu norĩ hã wa'uburé te te dama 're sãmra za'ra mono da, 're inomro mono norĩ hã ma tô si'ãma rosa'rata za'ra, Wanhib'apito Zezusihi zadawa para, wa'uburé te te dama 're sãmra za'ra mono da oto, Pauluhu ne. Ta norĩ hã Zezusihi zazei'õ'wa nherẽ, Zezusihi zadawa para newa, te oto tãma rob'ru za'ra, wa'uburé ma, ãne:

— Zezusi hã Paulu te te dama iwasu'u hã taha zadawa para, wa aima rob'ru za'ra wa'aba ni, dahawi aiwairébé aba da.

14Aibâ norĩ hã 7 na ihâiba hã ma tô ãne hã 'manharĩ za'ra. Sewa na imama nhisi za'ra hã. Sasedoti ipire aré, imama hã. 15Tawamhã nimahã bâtâ na Sewaha 'ra norĩ hã te te tãma rob'ru za'ra wamhã, wa'uburé te asa tãma nharĩ za'ra, ãne:

— Zezusi hã wa tô waihu'u. Pauluhu zama wa tô duré waihu'u. E 'wam norĩ hã bété, a norĩ wa'wa hã. Te aiwaihu'u za'ra wa'aba õ di.

16Tawamhã wa'uburé ré 're imorĩ hã zahadu wa'uburé te te rẽme õ wa, sa'ẽtẽ, ma tô sô sime za'ra, Sewaha 'ra norĩ zô. I'uza hã ma tô tiwi hâiwazu za'ra. Ma tô duré te te hâiba hâpré za'ra. Tahawa, Sewaha 'ra norĩ hã ai'uréiwi ma tô sisa're, wa'uburé ré 're imorĩ wi hã. 17Tawamhã taha wasu'u hã da te wapari za'ra wamhã, ma tô tapahi za'ra ni, Zezusihi zadawa para newa, marĩ hã duré da te 're 'manharĩ za'ra mono tõ da. Aihĩni, ma tô iwasu'u hã wapari za'ra ni, Éfézu ãma 're isi'ubumroi mono norĩ hã, zudeu norĩ hã, duré zudeu'õ norĩ hã. Tawamhã da te sazei uptabi za'ra õ nherẽ, ma tô aihĩni ãma tawata za'ra ni, Wanhib'apito Zezusihi ãma. 18Ni'wam norĩ hã te te 're saze za'ra mono õ ré, abzé te te 're i'manharĩ za'ra mono zém na ma tô siwasu'u za'ra danho'a, tiwasédé te te 're i'manharĩ za'ra mono zém hawi isipizari za'ra na hã. 19Duré ahâ na abzé 'manharĩ'wa norĩ hã ma tô ibaihâi mono bâ siwi sa'wa simisutu, abzé 'manharĩ na rob'ui'éré ré hã. Tawamhã ma tô ãma ro'o za'ra, danho'a. Wa'âbâ za'ẽtẽ nherẽ, ma tô ãma ro'o za'ra. 50 miu na ẽtẽ waipo prã prata zapotore na iwa'â hã, simisutu hã. 20Wanhib'apito mreme hã dama pire di oto. Daro mono bâ ma tô da te ãma ropé. Tahawa, da'ahâ na ma tô da te 're wapari za'ra oto.

Éfézu ãma ro'wa'rutuzé wasu'u

21Tawamhã ãne na romhâimana pari, ma tô Paulu hã 'râwi sima waihu'u, Zeruzalẽ u morĩ da, Masédonia wa'wai baba, duré Ataza wa'wai baba. Tahawa, te sima tinha, ãne: “Zeruzalẽ u ĩmorĩ parip si, Roma u ĩmorĩ da, wa duré ĩsima wẽ, te dazabu da.”

22Tawamhã tipawapto'wa norĩ hã ma tô satõrĩ zahuré, Timotiu norĩ hã, Erastuhu me, iwana neb zahuré da, Masédonia na danhipti'a nho'õmo nhisi u. Neb zahuré za'u hã Paulu hã te a'â nhamra, Azia ãma.

23Tame sãmra ré, Wanhib'apito 're imorĩzéb zarina 're idanomro mono zép té wasu'u hã da te wapari za'ra wa, ma tô ro'wa'rudu hã dawi watobro, Éfézu ãma hã. 24Aibâ hã Dimetriu na isisi hã ẽtẽ waipo prã prata na rob'manharĩ'wa hã ma tô ro'wa'rutu na sãna'rata. Rob'manharĩ isurure te te 're ab'manharĩ, Dimetriu hã. Diãna na romhâiba nhisi 're isimasa mono zém ne hã 'ri isurure te te 're ab'manharĩ, ẽtẽ waipo prã prata na. Tãma iromhuri'wa norĩ hã pawa'âbâ za'ẽtẽ di, rob'manharĩ isurure wa'âbâ zarina. 25Tawamhã Dimetriu hã ma tô tãma iromhuri'wa norĩ zô tihârâ za'ra. Siré i'manharĩ'wa norĩ zô zama te duré sô tihârâ za'ra. Itẽme sihutu wamhã, te tãma nharĩ za'ra, ãne:

— A norĩ wa'wa hã te za ĩwapari pese za'ra wa'wa. Wanhimiromhuri wa'âbâ na wa tô aré wanhibro pese za'ra ni. 26Ãhã na, asi'uihâ na ma tô Pauluhu nhimiroti hã iwapari za'ra wa'wa. Isimiromhuri hã ma tô duré i'madâ'â za'ra wa'wa, ãme Éfézu ãma hã duré uburé Azia 'remhã. Ta hã ma tô te te dama 're anharĩ, 're iwahâimana za'ra mono zém hawi, 're dasipizari za'ra mono da. Da'ahâ na ma tô saze za'ra ni, isimirowahutu na hã. Marĩ hã danhib'rata na da te 're i'manharĩ za'ra mono hã tô sena iwaihu'u pese õ di, u, ãma 're idawata za'ra mono da hã. Ãne te te dama 're rowahutu, ta hã. 27Tahawa, romnhimimnhasi di, wanhimiromhuri za'ra hã da te dasiwi wẽ'õ za'ra õ'umnhasite. Tawamhã e wanhimiromhuri si te za dasiwi wẽ'õ za'ra ni. Mare di. Diãna iwaihu'u pese te, 'ri wamri hã te za duré dasiwi wẽ'õ za'ra ni. Azia ãma uburé 're idasi'ubumroi mono hã, ãma 're idawata za'ra mono zé hã te za da te dasima 're wasu'u wasété za'ra, daro mono bâ ãma 're idawata za'ra mono zé hã, tô õ hã Diãna na iwaihu'u pese wamri hã. Ta hã dama tarére wa, te za tô da te dasiwi 're wẽ'õ pese.

28Ãne hã imreme te te wapari za'ra wamhã, ma tô ab'ru za'ra ni. Ma tô 're hãsi, hârâ 'rãihâ na, ãne:

— Diãna hã, ta hã iwaihu'upe. Danhipai u, dama siptete uptabi di. Ãme, Éfézu ãma 're iwasi'ubumroi mono hã ãma 're iwawata za'ra mono hã, wẽ uptabi di.

29Tawamhã 'ri nho'õmo ãma ma tô idazahi za'ra zé hã te te ropé, 'ri wa'õtõ mono bâ. Ãhã wa uburé ro'wa'rutu di oto. 'Ri nho'õmo ãma 're isi'ubumroi mono norĩ hã te nasi tihârâ na ai'rahâri za'ra. Tawamhã Paulu norĩ siré 're ineb zahuré hã ma tô dasiwi pamrami ni, Gaiu norĩ hã, Aristacuhu me. Masédonia ãma 're isimasisi zahuré mono aré, ta norĩ hã. Tawamhã dasi'aba'ré na ma tô ipano na dasiwi sari zahuré ni, dasi'rã'õtõzéb u, da'ahâ uptabi na. 30Paulu hã datẽme morĩ neza, te te dama nharĩ da. Tane nherẽ, Zezusihi zazei'wa norĩ hã ma tô siwi ãma ropti, morĩ tõ da. 31Duré isiwadi norĩ hã tame danhib'apito norĩ hã ma tô duré itẽme da'mazatõrĩ za'ra, te te tiwi rosawi za'ra da, dasi'rã'õtõzéb u morĩ tõ da, dazahi za'ra na dâ'âsina. 32Marĩ u newa, sisatõrĩ wa, ma tô tamomo ubumro ni. Tawamhã dasi'rã'õtõzéb ãma ma tô 're dahãsi, damreme aimawi na. Damreme aiwab õ di. Siwa'ru te nasi ãma ai'rahâri za'ra ni, dahârâ na hã.

33Tawamhã zudeu norĩ hã ma tô aibâ ma rob'ru za'ra, Alesãdri na isisi ma, danho're sab da. Ma tô siwi wada'u aré Alesãdri hã, timreme na te te dawi robzâri da. Tahawa, ma tô tinhib'rada hã hâiwi dama wẽ, ari'iwi dasi'ubumro da, te te dama rowasu'u da a'â. 34Tane nherẽ, zudeu na 're ihâimana mono na da te waihu'u za'ra wamhã, ma tô sa'ẽtẽ tihârâ 'rãihâ na 'mahârâ za'ra. Ãne te õhõ si 'mahârâ za'ra:

— Diãna, ta hã iwaihu'upe. Danhipai u, siptete uptabi di, ãma 're iwawata za'ra mono hã, ãme Éfézu ãma hã.

Dahârâ hã da te sahâri su'u za'ra õ di. Maparane bâtâ pibuzé hã ma tô da'ãma ai'utõ, da te nasi 'mahârâ za'ra ré hã.

35Tawamhã 'ri nho'õmo ãma danhib'apito pazapari'wa hã ma tô dazadawa uwati, ari'iwi dasi'ubumro da. Tawamhã dawarõtâ'â wapsi, te oto dama roti, ãne:

— Éfézu ãma 're ai'ubumroi wa'aba mono norĩ, ĩwapari pese za'ra wa'aba. Wa norĩ hã ãme Éfézu ãma 're iwasi'ubumroi mono hã Diãna hã iwaihu'upe 're isa mono zé hã wa wa te 're 'madâ'â pese za'ra, 'ri hã. Diãnahã hâiba ne ẽtẽ 'manharĩ iwazéb zahi hã hâiwa hawi watẽme we iwaptã hã taha zama, wa wa te 're 'madâ'â za'ra, ãme. 36Tawamhã ãne hã ni'wa te te wawi sawi waihu'u za'ra õ di za. Tahawa, te za aiwaimri aihâimana za'ra wa'wa, marĩ na wa te rosa'rata pese za'ra ãna, wa te 'manharĩ za'ra tõ da. 37Aibâ norĩ hã we asiwi isaprõni 'wa hã, Diãna isabzém hawi, marĩ na sipsaihuri zahuré õ di. Pi'õ hã ãma 're iwawata za'ra mono hã te te wasu'u wasété zahuré õ di duré. 38Ãne wamhã, Dimetriu hã, duré tãma iromhuri'wa norĩ zama marĩ iwasété na te te tãma nharĩ za'ra da, ãwa wei wama siwasu'u za'ra õ di za. Dama rowairébé'wa norĩ u si te za siwasu'u za'ra. Tamep si dawasété na dama inharĩzé hã. 39Wazadawa pibu za'ra wa'aba da, wazô aihârâ ze za'ra wa'aba wamhã, wa za ãme wasi'rã'õtõ waré ni, rowẽ na 're iwahâimana za'ra mono zéb zarina, wawaimri na. 40Ã bâtâ na wasi'rã'õtõ waré õ wa, romnhimimnhasi di, wanhib'apito nhimiroti, wa te i'madâ'â za'ra õ zarina, wazada sahi õ'umnhasite. Marĩ hã hâimana õ nherẽ, ma ro'wa'rudu hã watobro. Wasi'rã'õtõzém na ni'wa te te wazadanharĩ za'ra wamhã, e niha wa za asa tãma rowasu'u za'ra ni za. Asa wa te tãma rowasu'u waihu'u za'ra õ di za.

41Ãne na te te dama roti parimhã, ma tô dama rob'ru, dawairébé da oto.

Currently Selected:

Atu 19: xavBP

Highlight

Copy