2 Zuwã 1

1Wa hã, Wanhib'apito zazei'wa norĩ 'madâ'â'wa, wa ãma aima rob'ui'éré za'ra wa'wa, tinhib'a'uwẽ da, 'Re ihâimana u'âsi mono te te 're i'aipisutu za'ra wa'aba mono norĩ ma. Tame te asiré isazei'wa norĩ me hã, 're asi'rã'õtõ u'âsi aba mo. Pi'õ norĩ hã ti'ra te te 're i'madâ'â pese za'ra mono ne, te 're asi'madâ'â pese za'ra wa'aba mo, isazei'wai mono bâ. Tahawa, sena na hã ĩma asawi pese za'ra wa'aba di. Tane nherẽ, ĩma si asawi za'ra wa'aba õ di. Uburé Zezusihi wasu'uwẽ waihu'u pese 'wa norĩ ma zama, asawi za'ra wa'aba di duré. 2Iwasu'uwẽ hã tô sena uptabi hã wasiré wa te 're 'madâ'â pese za'ra mono wa, wa wa te 're asawi pese za'ra wa'wa. Õne u'âsi te za iwasu'uwẽ hã wasiré 're hâimana u'âsi.

3Wamama ma, wa 're ĩmreme u'âsi, 'Re ihâimana u'âsi mono ma, duré i'ra Zezu Cristuhu ma zama, isimizawizé hã wa'ãma 're hâimana u'âsi za'ra mono da, ta norĩ ãma si rowẽ u'âsi, ãma 're wanomro mono da. Wa'ãma 're siwãrĩ u'âsi zahuré mono da, wa duré tãma 're ĩmreme u'âsi zahuré. Ãne te za te te wama 're apisutu zahuré, Wamama nhimiroti si tô sena na wasiré wa te ãma 're i'madâ'â pese za'ra mono norĩ ma, duré 're iwasisawi pese za'ra mono norĩ ma zama.

Isazei'wa norĩ, tô sena Cristuhu wasu'uwẽ zarina si 're ihâimana za'ra mono zé wasu'u

4Ni'wam norĩ hã asiré 're i'aihâimana za'ra wa'aba mono norĩ hã iwasu'uwẽ tô sena zarina si te, u, 're hâimana za'ra, Wamama te te wama 're i'aroti mono zéb zarina si. Ãne hã te wapari wamhã, ma tô iwasu'u wẽ za'ra hã ĩma rowẽ waze. Tahawa, ĩtoi uptabi di, ãhã na mono hã. 5Wasiré isazei'wa norĩ, ĩma asawi pese za'ra wa'aba norĩ hã, ãne wa za oto aima roti za'ra wa'wa. Uburé wasiré isazei'wa norĩ hã, oto 're wasisawi pese za'ra wa'aba mono. Ã hã roti hã ãhã na si õ di. Duréihã isãna'rata hawimhã, Zezusi wa te 're isaze na'rata za'ra mono zém hawi, wama 're ihâimana u'âsi za'ra mono, ã hã. 6E niha tawamhã, ãma 're iwasisawi pese za'ra mono zé hã za. 'Re ihâimana u'âsi mono nhimiroti si wa za wa te 're 'madâ'â pese za'ra. Ãne ma tô isãna'rata hawimhã, isimiroti wasu'u hã 're iwapari za'ra wa'aba mo, ãma 're asisawi pese za'ra wa'aba mono sina ãma 're aihâimana u'âsi za'ra wa'aba mono da.

7'Re ihâimana u'âsi mono zadawa wasu'u uptabi 'wa newa, roti tô senai'õ na te te dama 're iroti za'ra mono norĩ hã ahâ uptabi na te oto 're hâimana za'ra. Daro mono bâ te dawazari 're hâimana za'ra. Zezu Cristu hã, a'uwẽ hâiba na dasiré ipoto õ na, te ta norĩ hã sô 're simrami za'ra dama, 'Re ihâimana u'âsi mono hã Danho'reptui'wa da, te te ipisudu hã. Ni'wam norĩ hã ta norĩ ne 're hâimana za'ra mono wamhã, te za iwaihu'u za'ra wa'wa, roti tô senai'õ na te te dama 're iroti za'ra mono hã. Te za duré iwaihu'u za'ra wa'wa, Cristuhu zada 're ihâimana za'ra mono na hã. 8Tahawa, roti tô senai'õ na te te dama 're iroti za'ra mono norĩ wi, te za 're asi'madâ'â pese za'ra wa'aba mo 'râwi, 're iromhuri za'ra wa'aba mono zé wa'â hã 're simini tõ za'ra wa'aba mono da. Uburé marĩ iwẽ na 'Re ihâimana u'âsi mono, za te te aima iwa'âbâ za'ra wa'aba zé hã ubuni na asima 're waibui wa'aba mono da, te za 'râwi 're asi'madâ'â pese za'ra wa'aba mo tiwi.

9Ni'wam norĩ hã Cristuhu nhimiroti si te te 're wapari za'ra mono õ wamhã, tinhimirosa'rata na te te ãma 're uzusi za'ra mono wamhã, ta norĩ hã 'Re ihâimana u'âsi mono siré 'râwi hã 're hâimana za'ra mono õ di. Tane nherẽ, ni'wam norĩ hã Cristuhu nhimiroti zarina si 're nomro mono wamhã, ta norĩ si te Wamama siré 're hâimana za'ra 'râwi, duré i'ra siré zama. 10Duré Cristuhu nhimiroti upana te te dama 're iroti za'ra mono hã ta norĩ hã atẽme 're sihutu aba mono wamhã, sô 're atob'uzu za'ra wa'aba mono õ di za, asõrõwa u 're sisisi aba mono da. 11Sô 're atob'uzu za'ra wa'aba mono wamhã, isimiromhuri wasété na te za ime 're aiwasété za'ra wa'aba mo, ãma 're sasõmri za'ra wa'aba mono wa a norĩ wa'aba zama.

Zuwãhã nhimi'ui'éré 'rãsutuzé wasu'u

12Zahadu marĩ hã ahâ uptabi di, te aima iwaihu'u za'ra wa'aba zéb da hã. Tane nherẽ, ãhã na hã te ĩsima wẽ õ di, ibaihâ na te aima ãma irob'ui'éré za'ra wa'aba da hã. Ãma atẽme ĩmorĩ aba da si, wa oto ĩsima rob'madâ, wasisabu za'ra da 'râwi. Tawapsi wa za 'râwi wasisadawa 'madâ'â za'ra ni. Duré tawapsi wasima hã watoi uptabi za'ra di za oto.

13Ãme wasiré isazei'wa norĩ hã te duré ãma asawi za'ra wa'wa, aihidiba uptabi aba zé 'rem ne, 're inomro mono norĩ hã, 'Re ihâimana u'âsi mono, tinhib'a'uwẽ da, te te ipisutu za'ra norĩ hã.

Currently Selected:

2 Zuwã 1: xavBP

Highlight

Copy