1 Zuwã 3

'Re ihâimana u'âsi mono 'ra norĩ 're ihâimana za'ra mono zé wasu'u

1Ma'ãpé, ãma aipo're pu'u za'ra wa'aba. Wamama 'Re ihâimana u'âsi mono hã, tô sena te te 're wa'azawi pese uptabi. Te te 're wa'azawi pese mono wa, te ti'ra na te te 're wa'anhisi. Tahawa, tô sena, wa oto i'ra na hã 're wahâimana za'ra, isazei'wai mono bâ. Dapo're'õ u'âsi 're idanomro mono norĩ hã, Wamama hã te te siwi 're waihu'u za'ra mono õ wa, wa norĩ zama i'ra na te te duré siwi 're wawaihu'u za'ra mono õ di, ta norĩ hã. 2Ĩsisãnawã norĩ, ĩma asawi pese za'ra wa'aba norĩ hã, 'Re ihâimana u'âsi mono 'ra, wa oto 're wahâimana za'ra. Tane nherẽ, za 're iwahâimana za'ra mono zéb da hã, zahadu wama waihu'u prã za'ra di. Cristu hã apâ wei wazô morĩ wamhã, isine wa za oto 're wahâimana za'ra. Ãhã si wama waihu'u pese za'ra di. E marĩ wa, wa za isine 're wahâimana za'ra. Tô sena Cristu hã 're ihâimana mono zém na 'râwi wa te oto wasiwi 're waihu'u za'ra mono wa, wa za oto tô isine 're wahâimana za'ra. 3Õhõ zô rob'umnhasi sina, sô 're wanhimipari za'ra mono ré, wa za uburé marĩ iwasédé hã wa te wasiwi 're wẽ'õ pese za'ra 'râwi, iwẽ na si 're wahâimana za'ra mono da. Cristu hã wasété ãna 're imorĩ ne, wa za 're wahâimana za'ra.

4E marĩ na tawamhã, 're idawasété za'ra mono zé hã. 'Re ihâimana u'âsi mono nhimiroti, da te dasiwi 're wẽ'õ pese za'ra mono wamhã, ta hã dawasédé. Tahawa, ni'wam norĩ hã 're wasété za'ra mono wamhã, ta norĩ te 'Re ihâimana u'âsi mono nhimiroti te te siwi 're wẽ'õ za'ra, 'râwi. 5Tane nherẽ, Cristu hã ma tô we ti'ai u mo, dawasédé hã te te dama 're apari mono da. Ã hã aima waihu'u pese za'ra wa'aba di. Ta hã 're imorĩ wasété õ, duré marĩ iwasédé hã te te 're i'ab'manharĩ mono õ. 6Tahawa, ni'wam norĩ hã Cristuhu ãma si 're hâimana za'ra mono wamhã, ta norĩ hã tiwasété 'manharĩ na hã te te ãma 're uzusi za'ra mono õ di za. Tane nherẽ, ni'wam norĩ hã tiwasédé te te 're 'manharĩ u'âsi za'ra mono wamhã, ta norĩ hã Cristu, Danho'reptui'wa na te te 're waihu'u za'ra mono õ di, ta norĩ ma, Cristu hã tãma waihu'u za'ra õ wa tô.

7Ĩ'ra norĩ, dahâimana wasété na 're idanomro mono na, da'ãma 're sasõmri za'ra wa'aba mono õ di za, danhimiroti senai'õ na dama 're ihâimana za'ra mono na zama. Ma'ãpé 'râwi asina 're asõpré pese aba mono. Ni'wam norĩ hã 're nomro wẽ mono wamhã, 'Re ihâimana u'âsi mono nhimiroti na sima ãma 're sipa za'ra mono õ wamhã, ta norĩ si hã 're hâimana wẽ za'ra mono di, Cristu hã 're imorĩ ne. 8Wa'uburé hã, wa'rui'wa hã ropoto na'rata hawim haré, te tiwasédé hã te te 're ab'manharĩ u'âsi. Tahawa, ni'wam norĩ hã tiwasédé te te 're 'manharĩ u'âsi za'ra mono wamhã, ta norĩ hã te Wa'uburé nhib'a'uwẽ na 're hâimana za'ra. Taha nhimiromhuri wasédé hã te te tiwi pari da, ma tô 'Re ihâimana u'âsi mono 'ra hã we ti'ai u hã datẽme mo.

9'Re ihâimana u'âsi mono 'ra norĩ hã tiwasédé te te 're 'manharĩ u'âsi za'ra mono õ di za. Mare di. E marĩ wa. 'Re ihâimana u'âsi mono hã ipẽ'ẽ 're, 're ipoto téb za'ra mono zé hã te te tãma 're anhomri mono wa. Duré 'Re ihâimana u'âsi mono hã, ãma 're 'ra za'ra mono wa, tiwasédé hã õne u'âsi te te 're 'manharĩ waihu'u za'ra mono õ di za tô. 10E niha wa za bété waihu'u za'ra ni, 'Re ihâimana u'âsi mono 'ra norĩ hã, duré Wa'uburé 'ra norĩ hã. Ni'wam norĩ hã 're hâimana wẽ za'ra mono õ wamhã, duré te te 're dazawi pese za'ra mono õ wamhã, ta norĩ hã 'Re ihâimana u'âsi mono 'ra, 're nomro mono õ di za. Ãne na wa za ta norĩ hã Wa'uburé 'ra na wa te 're waihu'u za'ra.

'Re idasisawi pese za'ra mono zém na roti wasu'u

11Duréihã isãna'rata hawimhã, ma tô Zezusihi wasu'uwẽ hã 're iwapari za'ra wa'aba mo, uburé 're iwasisawi pese za'ra mono zém na hã. 12Duréihã Caĩ, tino te te i'ruiwapari ne, wa norĩ hã 're wasi'ruiwapari za'ra mono õ di za. Ta hã iwasété nhib'a'uwẽ te 're hâimana, Wa'uburé nhib'a'uwẽ. Ta hã ma tô tino hã tiwĩ. E marĩ wa. Ino si 're ihâimana wẽ mono zarina, 'Re ihâimana u'âsi mono hã te te wẽsãmri 'ru te.

13Ĩsisãnawã norĩ, ipo're'õ norĩ hã te za te te 're ai'ruiwapari za'ra wa'wa. Te te 're ai'ruiwapari za'ra wa'aba mono wa, ãté te za 'râwi asima 're inharĩ za'ra wa'aba mo, ãne: “E marĩ wa, te õ norĩ hã te te 're ĩ'ruiwapari za'ra.” Ãne hã 'râwi asima 're nharĩ za'ra wa'aba mono õ di za. Te za tô ihâimana wasété norĩ hã te te 're ai'ruiwapari za'ra wa'wa. Ãne, wa aima waihu'u za'ra wa'wa, ipo're'õ norĩ hã te te 're ai'ruiwapari za'ra wa'aba mono õ newa, 'râwi asima 're nharĩ za'ra wa'aba mono tõ da. 14Ni'wam norĩ hã te te 're dazawi pese za'ra mono õ wamhã, ta norĩ hã te dâ'â u'âsi ne 're hâimana za'ra, tipẽ'ẽ 'remhã, 'Re ihâimana u'âsi mono nhiti. Tanei õ di, wa norĩ hã wasiré isazei'wa norĩ hã. 'Re ihâimana u'âsi mono nhiti, wapẽ'ẽ 're wadâ'â u'âsi ne aré 're wanomro mono nherẽ, wa tô ihawi 're wawairébé, 'Re ihâimana u'âsi mono niwĩ, rowẽ na oto 're wanomro u'âsi mono da, wapẽ'ẽ 'remhã. Ãne, wa tô oto wasi'ãma waihu'u pese za'ra ni. 'Re wasisawi pese za'ra mono wa, wa ãne hã tô sena na wasi'ãma waihu'u pese za'ra ni. 15Dapãrĩ'wa norĩ ma, 'Re ihâimana u'âsi mono 'rata 're idahâimana u'âsi za'ra mono zé hã tãma 're hâimana za'ra mono õ di. Ãne hã aima waihu'u pese za'ra wa'aba di. Duré ni'wam norĩ hã te te 're da'ruiwapari za'ra mono wamhã, ta norĩ hã dapãrĩ'wa ne, te 'Re ihâimana u'âsi mono ma hã 're hâimana za'ra. Tahawa, wa te 're da'ruiwapari za'ra mono wamhã, 'Re ihâimana u'âsi mono 'rata 're idahâimana u'âsi za'ra mono zé hã wama 're hâimana za'ra mono õ di za, aiwa. 16E niha wa za, 're idasisawi pese za'ra mono zé hã waihu'u pese za'ra ni. Ãne wa za waihu'u pese za'ra ni. Cristu hã te te 're wa'azawi pese mono wa, ma tô sisawi ãna wazada tidâ'â za'ra. Taha zarina wa za duré wa norĩ hã 're wasipawaptob za'ra, 're wasisõ'reptu za'ra mono da. 'Re wadâ'â za'ra mono da nherẽ, wa za tô 're wasipawaptob za'ra, 're wasihâiba zawi za'ra mono ãna. Ãne 're idasisawi pese za'ra mono zé hã za oto. 17Ni'wam norĩ hã marĩ, tãma 're hâimana za'ra mono nherẽ, marĩ zô dawi 're iro'wanhi'riti za'ra mono na te te 're dawaihu'u za'ra mono nherẽ, da'ãma 're pẽ'ẽzé za'ra mono õ wamhã, e ta norĩ hã 'Re ihâimana u'âsi mono nhimizawi pese zéb ré te 're hâimana za'ra. Mare di. 'Re ihâimana u'âsi mono nhimizawi pese zé hã te te 're waihu'u za'ra mono õ di, ta norĩ hã. 18Ĩ'ra norĩ, e wazadawa na si wa za wa te 're dazawi wapti za'ra. Mare di. Wamreme na si wa te 're dazawi wapti za'ra mono õ di za. Uburé wa za marĩ iwẽ na wa te 're dapawaptob za'ra, wanhimizawizé hã tô sena wama 're ihâimana za'ra mono zarina.

'Re ihâimana u'âsi mono nho'a, dasina dahâtâ'â ãna 're idanomro mono zé wasu'u

19Õhõ na si 're wahâimana za'ra mono wamhã, 'Re ihâimana u'âsi mono 'ra, 're iwanomro mono na wa za wasina waihu'u pese za'ra ni, roti tô sena uptabi na si 're iwanomro mono na. Duré isõ'a 're wahâimana za'ra mono nherẽ, 'râwi wasina 're wahâtâ'â za'ra mono tõ da, te za wapẽ'ẽ 're wama 're siwaihu'u u'âsi za'ra, wapẽ hã i're wama 're simi'wara mono da. 20'Re ihâimana u'âsi mono ma hã, uburé marĩ hã tãma waihu'u pese uptabi di. Wa norĩ hã marĩ hã wapẽ'ẽ na 'râwi wa te 're iwaihu'u za'ra mono zém nhipai u, uburé marĩ hã tãma waihu'u pese uptabi di. Tahawa, 'Re ihâimana u'âsi mono 'ra, 're iwahâimana za'ra mono na 'râwi wapẽ'ẽ na 're wasiwawã za'ra mono nherẽ, te za 'Re ihâimana u'âsi mono hã wa'ãma 're po're pu'u u'âsi, taha ma uburé marĩ hã tãma waihu'u pese uptabi wa. Wa'ãma 're pẽ'ẽzé uptabi mono wa, te za wapẽ hã i're wama 're simi'wara, i'ra 're iwahâimana za'ra mono na, 're wasiwawã za'ra mono õ wamhã. 21Ĩsisãnawã norĩ, ĩma asawi pese za'ra wa'aba norĩ, wa norĩ hã tô sena 're wahâimana wẽ za'ra mono wamhã, tawamhã, 'Re ihâimana u'âsi mono nhib'a'uwẽ 're iwahâimana za'ra mono na 'râwi 're wasiwawã za'ra mono õ di za. Ãne wamhã, 'Re ihâimana u'âsi mono ma, wasina 're wapahi za'ra mono õ di za. Wasina wahâtâ'â ãna, wa za tãma 're wamreme zusi u'âsi, isõ'a nherẽ. 22Duré, isimiroti hã wa te 're 'madâ'â pese za'ra mono wamhã, te te wama 're i'awẽ mono zéb uwaibaba si 're wahâimana za'ra mono wamhã, wa te tiwi 're irowaptẽrẽ za'ra mono zéb uwaibaba si, te za uburé marĩ hã iwẽ te te wama 're anhomri.

23E niha tawamhã, 'Re ihâimana u'âsi mono nhimiroti hã, wa te 're i'madâ'â pese za'ra mono zéb da hã. Ãne isimiroti hã. I'ra Zezu Cristu, wa za wa te wasina 're umnhasi za'ra, Danho'reptui'wa na. Duré te te wama 're iroti za'ra mono zéb zarina si, wa za 're wasisawi pese za'ra. Ãne isimiroti hã. 24Ni'wam norĩ hã 'Re ihâimana u'âsi mono nhimiroti te te 're 'madâ'â pese za'ra mono wamhã, tô sena te ta norĩ hã ãma 're hâimana za'ra, 'Re ihâimana u'âsi mono ãma. Ta hã te duré i'rata 're sãmra u'âsi za'ra, 'râwi. E niha wa za tawamhã, wasina waihu'u pese za'ra ni, 'Re ihâimana u'âsi mono, wa'rata 're isãmra u'âsi mono zém na hã. Ta hã ma tô Tipẽ'ẽzani hã te te wama 're anhomri, wapẽ'ẽ 're, 're sãmra mono da, uburé marĩ hã te te wama 're awaihu'u mono da. Taha na wa za wasina waihu'u za'ra ni, wa'rata 're isãmra mono na, 'Re ihâimana u'âsi mono hã.

Currently Selected:

1 Zuwã 3: xavBP

Highlight

Copy