1 Zuwã 2

Zezu Cristu hã Timama ma, te te 're ida'apawapto mono zé wasu'u

1Ĩ'ra norĩ, ĩma asawi pese za'ra wa'aba norĩ hã, e marĩ da, wa ãne na aima rob'ui'éré za'ra wa'wa. Aiwasété ãna oto ãma 're aihâimana za'ra wa'aba mono zéb da hã, wa ãne ĩnhimi'ui'éré na ãma aipo're pu'u za'ra wa'wa. Tane nherẽ, aiwasédé hã 're 'manharĩ za'ra wa'aba mono wamhã, 're 'manharĩ za'ra wa'aba mono nherẽ, Zezu Cristu hã 're imorĩ wẽ uptabi hã te za ai'ãma 're sisaprĩ za'ra wa'wa, tinhimiroti wẽ na. Timama ma, te za ãne te te 're aiwasu'u za'ra wa'wa, Zezusi hã: “Ã norĩ hã, tiwasédé te te 're 'manharĩ za'ra mono wa, asiwi 're awẽ'õ mono õ di za. Wa hã wa tô i'upana sada ĩdâ'â za'ra, uburé iwasédé hã te tãma 're i'apari mono zéb da hã.” Ãne te za Timama wi te te 're rowaptẽrẽ, ai'upana za'ra wa'aba. 2Ta hã ma tô wazada dârâ, 'Re ihâimana u'âsi mono wawasédé hã te te wama 're i'apari mono zéb da hã. Tane nherẽ, wazada si dâ'â õ di. Uburé da'udâna dawasédé hã da te 're i'manharĩ za'ra mono norĩ da zama, ma tô dârâ, da'upana.

3E niha, wa za tawamhã wasina waihu'u pese za'ra ni, 'râwi isiré 're iwahâimana za'ra mono na hã. 'Re ihâimana u'âsi mono nhimiroti hã wa te 're 'madâ'â pese za'ra mono wapsi, wa za wasina wa te 're waihu'u za'ra, 'râwi isiré 're iwahâimana za'ra mono na. 4Ãté ni'wa te za ãne dama 're siwasu'u: “Wa hã, 'Re ihâimana u'âsi mono hâimanazé hã ĩma waihu'u pese di.” Ta hã isimiroti hã te te 're 'madâ'â pese mono õ nherẽ, te za taré dama 're siwasu'u, sadawa nhipese sina. Duré taha ma, 'Re ihâimana u'âsi mono nhimiroti hã tô sena uptabi hã ipẽ'ẽ 're, tãma 're hâimana mono õ di. 5-6Tane nherẽ, ni'wam norĩ hã 'Re ihâimana u'âsi mono nhimiroti si te te 're 'madâ'â pese za'ra mono wamhã, 'Re ihâimana u'âsi mono te te 're ida'azawi pese mono zém ne, 're isisawi pese za'ra mono zéb zô, ta norĩ wi tiwi 're rowaptâ'â za'ra mono õ di za. Te za te te tãma ãma 're uwaimrami u'âsi za'ra, 'Re ihâimana u'âsi mono ma. Duré ni'wam norĩ hã 'Re ihâimana u'âsi mono ãma 're ihâimana za'ra mono na dama 're siwasu'u za'ra mono wamhã, e niha tawamhã, ta norĩ 're ihâimana za'ra mono zé hã za. Zezu Cristu hã ti'ai ãma 're morĩ ré, 're ihâimana wẽ mono zém ne, te za ta norĩ hã tô 're hâimana wẽ za'ra. Ãne hã wa norĩ hã 're wahâimana za'ra mono wamhã, wa za tô sena na wa te wasina 're waihu'u pese za'ra, 'Re ihâimana u'âsi mono ãma si 're iwahâimana za'ra mono zém na hã.

Duréi nherẽ, 'Re ihâimana u'âsi mono nhimiroti té wasu'u

7Ĩsisãnawã norĩ, ĩma asawi pese za'ra wa'aba norĩ hã, ãhã na 'Re ihâimana u'âsi mono te te dama irotizép tém na te ãma aima rob'ui'éré za'ra wa'aba õ di. 'Re isaze na'rata za'ra wa'aba mono zém hawi, aima 're ihâimana za'ra wa'aba mono zém na, wa ãma aima rob'ui'éré za'ra wa'wa, za 're iwasisawi pese za'ra mono zéb da na. Ta hã te 're iwapari u'âsi za'ra wa'aba mo. 8'Re ihâimana u'âsi mono te te dama irotizé hã ãhã na te ãma irob'ui'éré hã duréi nherẽ, ãhã na hã duré oto ité. E marĩ wa. Cristu hã ti'ai ãma 're morĩ ré, ma tô Timama nhimiroti zarina te te 're da'azawi pese, tô õhõ zarina si. A norĩ wa'aba zama te duré isimiroti zarina 're aihâimana za'ra wa'aba mo, 're asisawi pese za'ra wa'aba mono sina. Tahawa, wa tô oto wa te 're waihu'u za'ra, duréi nherẽ, ãhã na hã ité duré, Wamama nhimiroti hã, õhõ si nherẽ. Zezusi hã ti'ai ãma 're morĩ ré, ma tô te te dama 're rowasu'u, rowa'a na si 're danomro wẽ mono da, robra na si 're danomro wasété tõ mono da, danhimiza'rese ãna. Tahawa, te oto robra hã te te sina rosapari u'âsi. Iwa'rãmi te duré rowa'a isa'ẽne hã te te sina rosa'ré, hâimomhã.

9Ãté ni'wa hã dasiré isazei'wa newa te za taré ãne dama 're siwasu'u: “Wa hã, 're ĩmorĩ wẽ di. Rowa'a na si wa 're ĩhâimana, 'Re ihâimana u'âsi mono nhimiroti zarina.” Ãne ni'wa hã dama 're siwasu'u mono nherẽ, isazei'wa norĩ te te 're a'ruiwapari mono wamhã, ta hã te zahadu robra na 're hâimana. 10Ni'wa hã isazei'wa norĩ te te 're azawi pese mono wapsi, te za rowa'a na 're hâimana u'âsi, tipẽ'ẽ 're. Tawamhã rowa'a na si 're morĩ wamhã, 're si'marõpãrĩ mono õ di za tiwasété na, 'Re ihâimana u'âsi mono nhimiroti zarina 're hâimana wẽ mono wa. 11Tane nherẽ, ni'wa hã isazei'wa norĩ te te 're a'ruiwapari mono wamhã, ta hã te zahadu robra u'âsi siwa'ru 're hâimana, tipẽ'ẽ 're. Robra na, duré datob'a ne siwa'ru 're idahâimana za'ra mono ne, te 're hâimana wasété.

12-14Ĩ'ra norĩ, ĩma asawi pese za'ra wa'aba norĩ, 'Re ihâimana u'âsi mono aiwasété 'wa hã te te ai'ãma 're ab'madâ'â aba mono õ di oto, Zezusi hã dazada idâ'âzéb zarina. Duré Wamama hâimanazé hã aima waihu'u pese za'ra wa'aba di. Tahawa, wa aima ãma rob'ui'éré za'ra wa'wa.

Iprédum norĩ, duréihã marĩ õ uptabi ré, 're ihâimana mono siré 'râwi 're aihâimana za'ra wa'aba mono wa, wa duré aima rob'ui'éré za'ra wa'wa.

Duré ipréduptém norĩ, Iwasété uptabi ãma ai'uté za'ra wa'aba wa, wa aima rob'ui'éré za'ra wa'wa. Duré, 'Re ihâimana u'âsi mono zadawa wasu'u zarina si asiptete na 're aihâimana za'ra wa'aba mono wa, wa oto ãne aima ãma rob'ui'éré za'ra wa'wa.

15-16Ti'ai ãma uburé marĩ 're ihâimana za'ra mono hã asima 're sawi za'ra wa'aba mono õ di za. Taha si asima 're sawi za'ra wa'aba mono wamhã, 'Re ihâimana u'âsi mono zawizé hã ai'reb za'ra wa'aba 're hâimana mono õ di. Uburé marĩ ti'ai ãma 're ihâimana za'ra mono hã, Wamama tei õ di, 'râwi da te dasima 're i'ruiwapari za'ra mono hã, duré datõmo na marĩ zô da te dasima 're idanhopré mono hã, duré danhipai u dapire na 'râwi dasina 're idawata za'ra mono zé hã.

Tahawa, ti'ai ãma uburé 're idahâimana wasété za'ra mono norĩ ne, aiwasété zô asima 're rob'ruiwapari za'ra wa'aba mono õ di za. Aiwasété zô asima 're rob'ruiwapari za'ra wa'aba mono wamhã, tô sena Wamama hã 're sawi waihu'u za'ra wa'aba mono õ di za.

17Ti'ai ãma uburé 're idahâimana wasété za'ra mono zé hã isi'utõrĩzéb u, ãhã na hã te te sina rotété u'âsi, duré uburé marĩ iwasédé hã da te dasima 're i'ruiwapari za'ra mono zama. Zahadu wapsi te za ai'utõ, simisutu. Ni'wam norĩ hã 'Re ihâimana u'âsi mono nhimipisutuzém na si 're hâimana za'ra mono wapsi, ta norĩ si te za 're hâimana u'âsi za'ra, si'utõrĩ ãna.

Cristuhu zada za 're ihâimana mono wasu'u

18Ĩ'ra norĩ, ĩma asawi pese za'ra wa'aba norĩ, ropsi'utõrĩzéb u hã romhuture di oto. Tame te za oto aibâ iwasédé hã dama sihâi'ré sõ'awi, Cristuhu zada 're ihâimana mono hã. Cristuhu newa te za isimiroti hã da te 're wapari za'ra. Taha wasu'u hã ma tô 're iwapari u'âsi za'ra wa'aba mo. Tane nherẽ, te duré ãhã na wanho'a 're hâimana za'ra ahâ uptabi na, za Cristuhu zada 're ihâimana mono ne. Tahawa, wama waihu'u pese za'ra di oto, ropsi'utõrĩzéb u iromhuture na hã. 19Ta norĩ hã ma tô aré wasiré 're si'rã'õtõ u'âsi, iwasu'uwẽ u. Wasiré uptabi 're hâimana za'ra mono õ nherẽ, ma tô aré wasiré 're hâimana za'ra. Wasiré uptabi, 're hâimana za'ra mono 'wa'âhã, te aré wasiré 're hâimana u'âsi za'ra, 'râwi. Tane nherẽ, ma tô wahawi 're wairébé. Tahawa, wa tô wasina waihu'u za'ra ni oto, wasiré uptabi 're ihâimana za'ra mono õ na hã.

20A norĩ wa'wa hã ma tô Zezusi hã 're imorĩ wẽ uptabi hã te te 're aipisutu za'ra wa'wa, Timama pẽ'ẽzani hã te te aima 're sõmri za'ra wa'aba mono da. Tahawa, ma tô oto Wamama nhimiroti tô sena uptabi hã aihâiba mono bâ iwaihu'u za'ra wa'wa. 21E Wamama nhimiroti hã tô sena uptabi hã waihu'u za'ra wa'aba õ wa, wa ãne ãma aima rob'ui'éré za'ra wa'wa. Mare di. Taha wab õ di. Isimiroti hã waihu'u pese za'ra wa'aba wa, wa ãne aima ãma rob'ui'éré za'ra wa'wa. Duré 're idazadawa nhipese za'ra mono zé hã 'Re ihâimana u'âsi mono nhimiroti tô sena uptabi hawib õ na hã waihu'u pese za'ra wa'aba wa, wa ãne aima rob'ui'éré za'ra wa'wa.

22E 'wam norĩ hã bété 're isadawa nhipese za'ra mono hã. Ta norĩ hã te ãne Zezusi hã te te dawi 're udâ za'ra: “Zezusi hã Danho'reptui'wa da, 'Re ihâimana u'âsi mono te te ipisutu õ di.” Ta norĩ hã sadawa nhipese uptabi na 're ihâimana za'ra mono. Ta norĩ hã te Cristuhu zada 're hâimana za'ra, te te dawi 're udâ za'ra mono wa. Imama zada zama te duré 're hâimana za'ra, ta norĩ hã. 23Ni'wam norĩ hã 'Re ihâimana u'âsi mono 'ra, te te dawi 're udâ za'ra mono wamhã, ta norĩ hã Imama siré 'râwi 're hâimana za'ra mono õ di. Ni'wam norĩ si, Zezusi hã Wamama hawi we imorĩ na te te 're isaze za'ra mono na tô sena dama 're isiwasu'u za'ra mono norĩ si, te Wamama siré 'râwi 're hâimana za'ra, rowẽ na.

24Ma'ãpé, iwasu'uwẽ hã 're isaze na'rata za'ra wa'aba mono zém hawi 're iwapari za'ra wa'aba mono zém na si 're anomro u'âsi aba mono. Ãma 're anomro u'âsi aba mono wapsi, te za duré 'Re ihâimana u'âsi mono 'ra ãma 're anomro aba mo, duré Imama ãma zama. 25Cristu hã ma tô ãne wama ropisutu siromo za'ra, 're wadâ'â za'ra mono ãna, i'rata 're iwasi'ubumroi u'âsi mono zéb da hã.

26E 'wam norĩ ãma, wa aima rob'ui'éré za'ra wa'wa. Sadawa nhipese na taré te te aima 're iroti za'ra wa'aba mono norĩ ãma, wa aima rob'ui'éré za'ra wa'wa. Isiniwĩ 're aipizari za'ra wa'aba mono da, te ta norĩ hã tinhimiroti tô senai õre na te te 're aipibui u'âsi za'ra wa'wa. 27Tane nherẽ, ma tô Cristu hã Timama pẽ'ẽzani hã te te aima 're sõmri za'ra wa'wa. Taha ré, te oto iré 're anomro u'âsi aba mo. Aipẽ'ẽ 're, te aima 're hâimana u'âsi za'ra wa'wa. Tahawa, roti aimawi zô asina 're asimipari za'ra wa'aba mono õ di za. Taha si te za uburé marĩ iwẽ hã te te aima 're waihu'u za'ra wa'wa, 'Re ihâimana u'âsi mono pẽ'ẽzani hã. Tô sena uptabi, isimiroti hã. Taré te te aima 're roti za'ra wa'aba mono õ di. Tahawa, te za isimiroti si 're i'madâ'â pese za'ra wa'aba mo. Cristuhu ãma si te za duré 're anomro u'âsi aba mo.

28Ĩ'ra norĩ, ãne wa za oto aima roti za'ra wa'wa. Zezusi hã apâ wei morĩ õ ré, ma'ãpé õhõ ãma si 're anomro u'âsi aba mono, niwa apâ za wei morĩ wa, tãma aipahi za'ra wa'aba tõ da, duré rowazép te, tãma ai'rãpo za'ra wa'aba tõ da. 29Cristu hã 're imorĩ wẽ uptabi na hã aima waihu'u pese za'ra wa'aba di oto, marĩ na 're isiwasété mono õ na hã. Tahawa, ni'wam norĩ hã 'Re ihâimana u'âsi mono te te dama 're i'apisutu mono zéb zarina si 're nomro wẽ mono wamhã, tawapsi te za oto iwaihu'u za'ra wa'wa, ta norĩ hã 'Re ihâimana u'âsi mono nhib'a'uwẽ, sena na 're inomro mono na hã.

Currently Selected:

1 Zuwã 2: xavBP

Highlight

Copy