ROMA 4

Sa i Vakaraitaki o Epara-ama

1Na cava li me da qai kaya, ena vuku i Epara-ama, na tamada vakayago? Na cava sa yaco vua? 2Kevaka sa vakadonui koya na Kalou ena vuku ni veika sa vakayacora, ke sa tu vua eso na ka me boletaka voli; ia sa sega sara ni vakakina ena mata ni Kalou. 3Sa kaya na i Vola Tabu, “A sa vakabauta na Kalou o Epara-ama, ka sa vakadonui koya na Kalou me tamata yalododonu ena vuku ni nona vakabauta.”#Vteki 15.6; Kala 3.6 4O ira era cakava e dua na cakacaka ena soli na kedra i sau, ia sa sega ni okati oqo me ka-ni-loloma; ni sa rawati ga mai na kena cakacakataki. 5Ia o ira yadua sa vakararavi ki na ka era sa vakadinata, ka segai ena vuku ni cakacaka, ka ra sa vakabauta na Kalou ka sa dau vakadonui ira na tamata i valavala ca, sai koya oqo na vakabauta sa vinakata na Kalou me yaco kina na veivinakati kei koya. 6Sa i koya oqo na ka sa tiko ena loma i Tevita ena nona tukuna na marau ni tamata e sa okata na Kalou me i valavala dodonu, ka sega ni vu mai na dua na ka e cakava:

7“Sa kalougata o ira sa vosota na Kalou na nodra i valavala ca,

Ka sa buluti na nodra caka cala!#Same 32.1,2

8Sa kalougata na tamata sa sega ni wilika ka okata na Turaga na nona i valavala ca!”

9A sa nodra wale beka ga na cilivi na veivakalougatataki sa tukuna oqo o Tevita? E segai sara! Sa nodra talega o ira era sega ni cilivi. Ni sa tukuna na i Vola Tabu, “A sa vakabauta na Kalou o Epara-ama, ka sa vakadonui koya kina na Kalou me i valavala dodonu ena vuku ni nona vakabauta.” 10E yaco beka li ena gauna cava na ka oqo? Ni sa cilivi oti o Epara-ama, se ni sa bera ni cilivi? A sa yaco ga oqo ni se bera ni cilivi o koya. 11E a qai cilivi e muri, ka sa yaco na nona cilivi me i vakatakilakila me vakaraitaka ni sa nona vakabauta ga sa vakadonui koya kina na Kalou, ka okati koya me i valavala dodonu ni se bera ni cilivi. A sa yaco kina o Epara-ama me tamadra vakayalo na tamata kecega era sa vakabauta na Kalou ka ra sa vakadonui mai vua na Kalou me ra i valavala dodonu, ka veitalia ga ni ra se bera ni cilivi.#Vteki 17.10 12Sa tamadra talega o ira sa cilivi o Epara-ama, ka kena i balebale o ya ni o ira oqo, ni ra sa cilivi oti, era sa dau bula voli talega ena bula ni vakabauta me vakataki Epara-ama ni se bera na nona cilivi.

Sa Ciqomi na Yalayala ni Kalou ena Vakabauta

13Ena gauna sa yalataka kina na Kalou vei Epara-ama kei ira na nona kawa ni ra na taukena na vuravura, sa sega ni cakava vei Epara-ama na vosa ni yalayala o ya ena vuku ni nona muria na Lawa i Mosese, ia ena vuku ga ni nona vakabauta; na vakabauta ka sa vakadonui koya kina na Kalou ka okati koya kina me i valavala dodonu.#Vteki 17.4-6; 22.17,18; Kala 3.29 14Ni kevaka sa soli na veika sa yalataka na Kalou kivei ira sa muria na Lawa, sa na qai sega ni vakaibalebale kina na vakabauta ka tawa yaga walega na vosa ni yalayala ni Kalou.#Kala 3.18 15Sa kauta mai na cudru ni Kalou na Lawa; ia ni sa sega na lawa, sa sega talega ni ia na basu lawa.

16Ena ka oqo, a sa yavutaki kina na vosa ni yalayala ena vakabauta, me vakadeitaki kina ni sai solisoli wale ni Kalou na nona vosa ni yalayala vei ira na kawa i Epara-ama — ka segai walega vei ira sa muria na Lawa, ia vei ira talega era sa vakabauta me vakataki Epara-ama. Ni sai Epara-ama na tamada vakayalo kecega;#Kala 3.7 17me vaka sa volai tu ena i Vola Tabu, “Au sa vakayacori iko mo tamadra na veimatanitu e vuqa.” A sa vinaka na vosa ni yalayala ena mata ni Kalou, na kena ka sa vakabauta o Epara-ama — na Kalou ka sa vakavuna me bula tale o ira sa mate tu, ka nona i vakaro sa vakavuna me ra yaco na veika era se sega tu ni basika mai.#Vteki 17.5 18A sa vakabauta ka nuidei ga o Epara-ama, ka dina ga ni sa sega na ka me vakanuinui kina, ka sa yaco kina me “tamadra na veimatanitu e vuqa.” Me vaka ga sa kaya na i Vola Tabu, “Era na lewe vuqa sara na nomu kawa me vaka na levu ni veikalokalo.”#Vteki 15.5 19Ena gauna o ya sa voleka sara kina ni yabaki dua na drau o Epara-ama, ia sa sega ga ni lailai na nona vakabauta ni vakasamataka na yagona, ka ni sa wili sara tu ga vaka na mate, kei na leqa e tiko vei Sera o ya ni sega tiko ni rawa ni vakaluveni.#Vteki 17.17 20E sega ni bau yali na nona vakabauta, ka sega talega ni bau vakatitiqataka na vosa ni yalayala ni Kalou. Ia sa vakaukauwataki koya ga na nona vakabauta ka sa vakacaucautaka na Kalou. 21E a sega sara ga ni vakatitiqataka o Epara-ama ni na rawa ni cakava na Kalou na ka e yalataka. 22Oqo na vuna “sa vakadonui Epara-ama kina na Kalou ka okati koya me i valavala dodonu” ena vuku ni nona vakabauta. 23Na vosa “sa vakadonui o koya ka okati me i valavala dodonu,” e sega ni volai me baleti koya taudua ga. 24Sa volai talega ena vukuda eda sa vakadonui me i valavala dodonu, oi keda eda sa vakabauti koya sa vakatura cake tale na noda Turaga ko Jisu mai na mate. 25A sa vakamatei o koya ena vuku ni noda i valavala ca, ka sa vakaturi cake ki na bula me da vakadonui kina vua na Kalou.#Aisea 53.4,5

Currently Selected:

ROMA 4: FNV

Highlight

Copy