ROMA 3

1E vakaevei e tiko li eso na ka era uasivi cake kina na Jiu mai vei ira na kai matanitu tani? Se dua li na kena yaga na cili? 2Io e levu dina sara na ka era vinaka cake kina na Jiu! Na kena i matai sai koya ni a soli vei ira na vosa ni Kalou. 3Ia e vakaevei kevaka eso era sega ni yalodina? E kena i balebale li oqo ni nodra sega ni yalodina me sa na sega ni yalodina talega kina na Kalou? 4E sega, sega sara, ni vakakina! Ena dina tikoga na Kalou veitalia ga ke ra lasu kece na tamata; me vaka sa volai tu,

“Me kune ni sa dina tikoga na ka o ni kaya,

Ka mo ni qaqa ni o ni sa lewai.”#Same 51.4 (LXX)

5Ia ena vakaevei kevaka e mani vakaraitaki vakavinaka cake mai na i tovo ni Kalou ena vuku ni noda i tovo tawa dodonu? Eda na kaya beka ni sa caka cala na Kalou kevaka e vakaitotogitaki keda? Ni sai koya oqo na mataqali taro ena tarogi dina ga ena vakasama vakatamata. 6E segai sara! Kevaka sa sega ni dau vakataulewa dodonu na Kalou, ena qai lewai vuravura rawa li vakacava?

7Ia e vakaevei kevaka sa vakatakilai vakavinaka cake sara na lagilagi ni Kalou mai na noqu sega ni dina? Na cava na vuna ka'u sa okati tikoga kina me'u tamata i valavala ca? 8E vakaevei kevaka me tukuni vakaoqo, “Me da vakayacora na veika ca me rawa ni tubu cake mai kina na ka vinaka”? E tiko eso na tamata era sa vakasewasewani au voli ena nodra beitaki au ni'u tukuna na ka sara ga oqo! Era na cudruvi, ni sa dodonu dina ga me vakakina.

Sa Sega Sara na Tamata sai Valavala Dodonu

9Ia sa vinaka cake beka na keda i tuvaki na Jiu mai vei ira na kai matanitu tani? E sega sara! Au sa vakaraitaka oti ni da sa tautauvata na tamata kecega, na Jiu kei na veimatanitu tani, ka da sa tu kecega ena ruku ni kaukauwa ni valavala ca. 10Me vaka e kaya na i Vola Tabu:

“Sa sega sara ni dua na tamata e i valavala dodonu,

E sega mada ga ni bau dua.#Same 14.1-3 (LXX); Same 53.1-3 (LXX)

11Sa sega sara ni dua e kila vakavinaka,

Ka sega ni dua e bau vakasaqara na Kalou.

12Era sa gole tani kecega mai vua na Kalou era sa yaco vata kecega,

Me sega na kedra yaga,

Ka sega sara ni dua e i valavala vinaka,

E sega sara mada ga ni bau dua.

13“Sa vaka na i bulubulu sa tadola tu na nodra i tilotilo;

Era sa vakayagataka na yamedra me ia kina na veivakaisini.”

“Na weli gaga ni gata sa tiko ena ruku ni tebenigusudra.#Same 5.9 (LXX); Same 140.3

14“Sa sinai na gusudra ena vosa ni veivakacacani.”#Same 10.7 (LXX)

15“Sa totolo sara na yavadra me ia na vakadave dra;#Aisea 59.7,8

16Ka ra biuta tu mai na rusa kei na rarawa ena vanua era sa lakova oti.

17Era sa sega ni kila na sala ni veivakacegui;

18Ka sa sega talega ni tu vei ira na rerevaka na Kalou.”#Same 36.1

19Eda sa qai kila oqo ni veika kecega sa vakaroti ena Lawa sa baleti ira era sa bula voli ena ruku ni Lawa, me vagalui kina na i ulubale kecega ni tamata ka me vakarorogo kina na vuravura taucoko ena ruku ni nona lewa na Kalou. 20Ni sa sega sara ni dua na tamata sa vakadonui mai vua na Kalou ena nona muria na Lawa; na ka ga e kitaka na Lawa sai koya me vakatakila vua na tamata ni sa caka cala.#Same 143.2; Kala 2.16

Na Sala sa Vakadonuya Kina na Tamata na Kalou

21Ia oqo sa qai vakaraitaka mai na Kalou na sala sa vakadonuya kina na tamata o koya; ka ni sega ni rawa ena kena muri na Lawa, ia era sai vakadinadina ga kina na Lawa i Mosese kei ira na parofita. 22Io, sa vakadonui ira na tamata na Kalou ena vuku ni nodra vakabauti Jisu Karisito. Sa kitaka na ka oqo na Kalou vei ira kecega era sa vakabauti Jisu Karisito, ka ni da sa tautauvata kecega;#Kala 2.16 23ni sai valavala ca na tamata kecega ka sa yawa tani sara mai na nona veivakabulai na Kalou. 24Ia ena vuku ni lolomasavu ni Kalou, ai solisoli ga, era sa vakadonui kina na tamata vua na Kalou ena vuku i Karisito Jisu, o koya ka sa sereki ira. 25A sa soli koya na Kalou me la'ki vakacabori, me rawa ni yaco kina na nona dra me buluta vakadua na nodra i valavala ca o ira kecega sa vakabauti koya. Sa vakayacora oqo na Kalou me vakaraitaka kina ni sa tamata yalododonu o koya. Ena gauna e liu, a sa vosota voli ga na Kalou ka sega ni vakayacora e dua na ka me baleta na i valavala ca ni tamata; 26ia oqo sa qai cakava kina o koya e dua na ka me baleta na nodra i valavala ca, ka me vakatakilai kina na nona yalododonu. Ena sala oqo, sa vakaraitaka kina na Kalou na nona yalododonu kei na nona sa vakadonui ira na tamata yadua sa vakabauti Jisu.

27Sa qai cava beka eda sa rawata me rawa ni da dokadokataka? E sega ni dua na ka. A cava na vuna? E baleta ga ni noda vakadonui e sega ni da rawata ena noda cakacaka; e rawa ga ena ka sa cakava na Karisito kei na noda vakabauti koya. 28O koya oqo ni keitou sa vakasamataka na veika kece oqo, keitou sa vakadinadinataka ni da sa vakabulai ena noda vakabauti Karisito ka sega ena vuku ni veika vinaka eda cakava. 29Se sa nodra Kalou duadua beka ga na Jiu na Kalou? Sa sega beka ni nodra Kalou talega na kai matanitu tani? Io sa nodra Kalou talega na kai matanitu tani. 30Sa duabau ga na Kalou ka na vakadonui ira na Jiu ena vuku ni nodra vakabauta, kei ira na kai matanitu tani ena nodra vakabauta.#Vrua 6.4; Kala 3.20 31E kena i balebale beka oqo me sa biu laivi na Lawa ena vuku ni vakabauta? E sega, eda sa qai biuta ga na Lawa ena kena i tutu dina.

Currently Selected:

ROMA 3: FNV

Highlight

Copy