SAME 141
141
A Masu ni Kere Veitaqomaki mai na Veika Ca
A Same i Tevita
1Kemuni Jiova,
Au kerei kemuni mo ni vakatotolo mai ka mai vukei au.
Ni rogoci au ena gauna au masu kina vei kemuni.
2Ni ciqoma na noqu masu me vaka na ka boi vinaka,
Kei na dulaki cake ni ligaqu me vaka na i soro ni yakavi. #Vtaki 5.8
3Kemuni Jiova, ni lesia e dua na yadra me tiko e gusuqu.
E dua me yadrava na katuba ni tebe ni gusuqu.
4Ni maroroi au me'u kakua ni gadreva na vakayacora na ka ca,
Se me'u vakailala vata kei ira na tamata ca ena nodra i tovo ca.
Me'u kakua ni vakaitavi ena nodra veisolevu.
5Ena totogitaki au ka vunauci au na tamata vinaka ena yalovinaka,
Ia, au na sega ga ni laiva vua na tamata ca me lumuta na uluqu,
Ni'u sa dau masulaka tikoga na vakarusai ni i tovo ca.
6Ni ra sa na viritaki sobu o ira na nodra i liuliu ki na vanua veivatu,
O ira na tamata era na qai vakadinata na dina ni noqu vosa.
7Me vaka na kau sa vidavidai ka musumusulaki,
Era na veibiuyaki vakakina na suidra ena bati ni bulubulu.
8Ia, oi au, kemuni na Kalou,
Au sa vakararavi tikoga vei kemuni;
Au sa vakasaqara ga na nomuni veitaqomaki;
Mo ni kakua kina ni laivi au me'u mate!
9Ni taqomaki au mai na dai era sa cakava me baleti au,
Kei na i vadi ca ni tamata ca o ya.
10Me ra coko ga na tamata ca ena dai era sa cakava,
Ka me'u na dro bula duaduaga oi au.
Currently Selected:
SAME 141: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
