SAME 140
140
A Masu ni Kere Veitaqomaki
Vua na i liuliu ni sere. A Same i Tevita.
1Kemuni Jiova, ni vakabulai au mai vei ira na tamata ca;
Ni taqomaki au mai vei ira era i tovo kaukauwa.
2Era sa nakita tikoga na veika ca,
Ka ra vakavuna me yaco na veivaluvaluti.
3Sa gata na yamedra me vaka na yame ni gata,
Na nodra vosa sa vaka na weli gaga ni gata bati gaga. #Roma 3.13
4Ni taqomaki au Jiova mai na ligadra na tamata ca,
Ka maroroi au mai vei ira na i tovo kaukauwa;
Era sa bosea me'u vakacacani.
5Era sa cakava na nodra dai na tamata viavialevu me baleti au;
Ka ra tevuka na nodra lawa;
Era sa mai cakava e dua na dai ena bati ni sala me ra vesuki au kina.
6Au sa kaya vei Jiova, “Sa i kemuni na noqu Kalou.”
I Jiova ni rogoca na noqu tagi ni kere veivuke!
7Kemuni Jiova na noqu Kalou na noqu i vakabula qaqa,
O ni a taqomaki au ena i valu.
8Kemuni Jiova, ni kakua ni solia vei ira na tamata ca na ka era vinakata;
Ni kakua ni laiva me yaco na nodra i naki ca!
9Ni kakua ni laivi ira na kequ meca me ra qaqa;
Ni cakava me lauti ira tale na ka era vosataka.
10Me lutuki ira na qilaiso katakata sa waqa tu;
Me ra biu ki na dua na qara ka sega tale ni ra lako cake rawa mai kina.
11Me ra kakua ni rawata e dua na ka na dauveibeitaki vakailasu,
Me yacova na tamata i tovo kaukauwa na ka ca ka vakarusai kina.
12I Jiova, au sa kila ni o ni na taqomaki ira na vakaloloma,
Ka vakataulewa dodonu ena vukudra na dravudravua.
13Era na vakacaucautaki kemuni ga na yalododonu;
Era na dau tiko ga ena matamuni na yalosavasava.
Currently Selected:
SAME 140: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
