SAME 139
139
Na Vuku kei na Veikauwaitaki ni Kalou
Vua na i liuliu ni sere. A nei Tevita. A Same.
1Kemuni Jiova, o ni sa dikevi au ka kilai au,
2O ni sa kila na veika kecega au cakava,
O ni sa kila sara mai vakayawa na noqu vakanananu kecega.
3O ni sa raici au, se'u cakacaka tiko se'u vakacegu;
O ni sa kila na noqu cakacaka kecega.
4Ni'u sa bera mada ga ni vosa,
O ni sa kila na ka au na tukuna.
5O ni sa tiko ena veiyasaqu kecega, ka voliti au;
O ni sa taqomaki au ena nomuni kaukauwa.
6Na nomuni kilai au sa rui veivakurabuitaki,
Sa sega ni rawa vei au me'u kila.
7Me'u na lako ki vei me'u na dro tani rawa kina mai na yalomuni?
Me'u na lako ki vei me'u na yali kina mai na matamuni?
8Kevaka au na lako cake ki lomalagi, o ni sa tiko mai kina;
Kevaka au lako sobu ki bulu, o ni sa tiko talega mai kina.
9Kevaka au vuka sivita yani na i cabecabe ni siga,
Se'u la'ki tiko sivia sara yani na i dromudromu ni siga,
10O ni sa tiko mai kea mo ni tuberi au,
O ni na tiko mai kea mo ni vukei au.
11Kevaka au kerea me vunitaki au na butobuto,
Se me vuki me bogi na rarama sa wavokiti au
12Ia sa sega ni buto vei kemuni na butobuto,
Ka sa serau vei kemuni na bogi me vaka na siga.
13O ni sa bulia na veitikiqu kecega;
O ni sa vakacokovatataki au ena kete i tinaqu.
14Au sa vakacaucautaki kemuni ni sa dodonu mo ni rokovi;
Sa veivakurabuitaki ka talei na ka kecega o ni cakava.
Au sa kila taucoko sara ena yaloqu.
15Ni vakatekivu me buli na suiqu,
Ena kena biu vata vakamaqosa ena kete i tinaqu,
Ni’u a tubu voli kina vakavuni,
O ni sa kila oti tu na noqu sa tiko kina, 16O ni a sa raici au ni'u se bera ni sucu.
Na veisiga kece sa buli me'u na bula kina
sa volai kece tu ena nomuni vola,
Ni se bera ni se bau tekivutaki e dua vei ira.
17Kemuni na Kalou,
Sa dredre dina vei au me'u kila na nomuni vakasama;
Sa ka levu sara na kena i wiliwili!
18Kevaka au na wilika, ena levu cake mai na mataninuku.
Ni'u sa yadra cake, au sa tiko ga kei kemuni.
19Kemuni na Kalou,
Au gadreva mada ga mo ni vakamatei ira na i valavala ca.
Au gadreva me ra biuti au vakamalua na tamata i tovo kaukauwa.
20Era sa tukuna na veika ca me baleti iko,
Era sa tukuna na veika ca me vakacacani kina na yacamuni.
21Kemuni Jiova, au sa cati ira dina era cati kemuni,
Ka'u beci ira era saqati kemuni!
22Sa ka taucoko sara ga na noqu cati ira;
Au sa okati ira me ra kequ meca.
23Ni dikevi au na Kalou, ka kila na noqu vakasama;
Ni vakatovolei au, ka kunea na nanuma ni lomaqu.
24Ni raica mada de tiko na veivakaisini e lomaqu,
Ka tuberi au ena sala ka sega ni mudu.
Currently Selected:
SAME 139: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
