SAME 107
107
Ai Kalima ni i Vola
(Same 107—150)
Vakacaucautaki na Vinaka ni Kalou
1Ni vakavinavinaka vei Jiova, ni sa rui vinaka o koya;
Ni sa sega ni mudu na nona loloma tudei. #1Vei 16.34; 2Vei 5.13; 7.3; Esera 3.11; Same 100.5; 106.1; 118.1; 136.1; Jere 33.11
2Me ra qai kaya vakakina o ira sa vakabulai ira ko Jiova,
O ira sa vakabulai ira o koya mai vei ira na meca,
3Ka kauti kemuni lesu mai na veimatanitu tani,
Mai na tokalau, na ra, na vualiku kei na ceva.
4Eso era a veilakoyaki voli ena vanua dravuisiga,
Ka sega ni kunea na sala me ra lako kina
ki na koro me ra la'ki tiko kina;
5Era sa viakana ka viagunu,
Ka sa oti na veika kece era vakanuinui kina.
6Era sa qai masu vei Jiova ena nodra leqa,
Ka sa vakabulai ira o koya.
7A liutaki ira yani o koya,
Ki na koro me ra la'ki tiko kina.
8Sa dodonu me ra vakavinavinaka vei Jiova,
ena vuku ni nona loloma tudei,
Baleta na veika veivakurabuitaki sa cakava vei ira.
9Sa vakaotia na nodra viagunu,
Ka vakamamautaki ira era via kania na veika vinaka.
10Eso era tiko ena vanua ni rarawa ka butobuto,
O ira na kai vesu era sa vakararawataki ena sinucodo,
11Baleta ni ra saqata na i vakaro ni Kalou Kaukauwa,
Ka cata na nona i vakasala.
12Era sa malumalumu mai ena cakacaka kaukauwa,
Era sa bale ka sega e dua e via vukei ira.
13Era sa qai tagi ga vei Jiova ena vuku ni nodra leqa,
Ka sa vakabulai ira mai kina o koya.
14Sa kauti ira tani mai na vanua ni rarawa ka butobuto,
Ka musulaka na kedra sinucodo.
15Sa dodonu me ra vakavinavinaka vei Jiova
ena vuku ni nona loloma tudei,
Ena vuku ni ka veivakurabuitaki sa vakayacora vei ira.
16A sa vorolaka na katuba varasa,
Ka sa musulaka na bai lawalawa kaukamea.
17Eso era tauvi mate ena vuku ni nodra i valavala ca
Era sa vakararawataki baleta na nodra ca.
18Sa cata na lomadra na kakana,
Ka ra sa voleka sara ni mate.
19Era sa qai kaci ga vei Jiova ena vuku ni nodra leqa,
Ka sa vakabulai ira o koya mai na nodra vakararawataki.
20Sa vakabulai ira ga o koya ena nona i vakaro,
Ka vakabulai ira mai na i bulubulu.
21Sa dodonu me ra vakavinavinaka vei Jiova
ena vuku ni nona loloma tudei,
Me baleta na veika veivakurabuitaki sa cakava vei ira.
22E dodonu me ra vakacabora vua na i soro ni vakavinavinaka,
Ka ra seretaka ena marau na veika kece sa cakava o koya.
23Eso era veisokoyaki e wasawasa ena waqa,
Ka ra sa qarava na veika me ra bula kina
ena nodra veisokoyaki voli;
24Era sa raica na ka sa cakava ko Jiova,
Na nona cakacaka veivakurabuitaki e wasawasa.
25Ni sa veivakaroti, sa liwa mai na cagi kaukauwa,
Ka yavalata na wasawasa.
26Era sa laveti cake ki lagi na waqa,
Ka coka sobu yani ki na vanua titobu.
Ena leqa vakaoqo era sa domobula kina na kaiwaqa;
27Era sa suaigelegele ka tataivatia me vaka na mateni,
Ka sa sega ni yaga na nodra kila vakacakacaka.
28Era sa qai tagi vei Jiova ena nodra leqa,
Ka sa vakabulai ira mai na nodra leqa o koya.
29Sa qai tarova o koya na cagi,
Ka vakamaravutaka na ua ni wasawasa.
30Era sa marau ni sa maravu na wasawasa.
Ka sa kauti ira bula mai o koya ki na vanua era via lako kina.
31Sa dodonu me ra vakavinavinaka vei Jiova
ena vuku ni nona loloma tudei.
Me baleta na veika veivakurabuitaki sa cakava vei ira.
32Sa dodonu me ra vunautaka na nona qaqa
ena nodra soqoni na nona tamata,
Ka vakacaucautaki koya ena nodra bose na qase.
33Sa vakamacara sara ga vakadua na veiuciwai ko Jiova,
Ka sa tarova na vure mai ni veitobu wai.
34Sa vukica na vanua bulabula me vanua dravuisiga,
Me baleta na nodra ca na tamata era tiko kina.
35Sa vukica na vanua dravuisiga me veitobu wai
Kei na vanua mamaca me vanua veimataniwai.
36Sa lewa o koya me ra tiko e kea na tamata sega na kedra kakana,
Ka ra sa tara e dua na koro me ra tiko kina.
37Era sa teivaka na buca ka tea na veivaini,
Ka sa levu sara na vuana.
38Sa vakalougatataki ira na nona tamata ka sa levu na luvedra,
Ka sa maroroya na nodra bulumakau o koya,
me kakua ni lailai sobu na kedra i wiliwili.
39Ena gauna era sa vakadrukai ka vakamalumalumutaki kina
na tamata ni Kalou,
Io, ena vuku ni veivakasaurarataki kei na veika rarawa,
40A sa qai vakaraitaka na nona beci ira era vakararawataki ira,
Ka vakavuna me ra veiseseyaki ena vanua dravuisiga
sa sega kina na gaunisala.
41Ia, sa sereki ira ga na vakaloloma mai na nodra rarawa,
Ka vakalevutaka na nodra vuvale me vaka na qele ni sipi.
42Era sa raica na ka oqo na tamata yalododonu,
Ka ra sa marau ka ra galu kece na tamata ca.
43Na tamata yalomatua me vakasamataka sara na ka oqo,
Ka vakananuma ga na loloma tudei i Jiova.
Currently Selected:
SAME 107: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
