TIKO VOLI MAI NA LEKUTU 35
35
Na Veikoro e Nodra na Livai
1A sa vosa vei Mosese ko Jiova ena veibuca mai Moapi, voleka ki na Joritani, ka donui Jeriko, ka kaya,#Josua 21.1-42 2“Mo vakaroti ira na Isireli, me ra solia mai na nodra i votavota, eso na koro vei ira na Livai me ra vakaitikotiko kina; ia mo ni solia talega vei ira na Livai na vanua veico sa volita na veikoro. 3Era taukena na veikoro me ra tiko kina; ia na vanua veico sa vakavolivolita me i kanakana ni nodra bulumakau, kei na manumanu yava i va kecega. 4Na vanua veico ka vakavolivolita na veikoro mo ni solia vei ira na Livai, oqo me vakatekivu mai na bainikoro ka lako yani ki na veiyasana me 450 na mita. 5Ia mo ni vakarautaka mai na i bili ni koro me 900 na mita ena yasana vaka ki na tokalau, ka me 900 na mita ena yasana vaka ki na ceva, ka 900 na mita ena yasana ki na ra, ka me 900 na mita ena yasana ki na vualiku; ka me koto e loma na koro: oqo era na taukena me i kanakana ni nodra manumanu ena nodra veikoro. 6O ni na solia vei ira na Livai e ono na koro, me ra i drodro, vei ira era vakamatea e dua na tamata; ia me kena i kuri, mo ni solia talega vei ira e 42 na koro. 7Ena 48 na veikoro kece o ni na solia vei ira na Livai, vata kei na vanua me ra vakania kina na nodra manumanu. 8Ia na veikoro o ni na solia mai na nodra i votavota na Isireli, me vakaoqo: mai na veimataqali lelevu mo taura mai vakalevu, ia mai vei ira na veimataqali lalai mo taura mai vakalailai, na veimataqali yadua me ra solia na nodra veikoro vei ira na Livai, me veirauti kaya na i vakarau ni votavota era dui taukena.”
Veikoro Eso ni Drodro ni Valu
(Vrua 19.1-13; Josua 20.1-9)
9Sa qai vosa vei Mosese ko Jiova, 10me kaya vei ira na Isireli, “Ni o ni sa kosova na Joritani ki na vanua o Kenani; 11mo ni digitaka eso na veikoro me nomuni i drodro, me dro kina o koya sa vakamatea e dua na tamata ka sa sega ni nakita. 12Na veikoro oqo me nomuni i drodro mai vua e dua sa lesi me nona i tavi me sauma na mate, me kakua kina ni mate o koya sa vakamatea e dua, me yacova ni sa tu o koya e matadra na lewenivanua me lewai. 13Ia mai na veikoro o ni na solia vei ira na Livai, me tiko kina e ono na koro me i drodro. 14Mo ni solia e tolu na koro ena tai ni Joritani oqo, ka tolu na koro mai na vanua o Kenani, me koro ni drodro. 15Na veikoro e ono oqo sa na koro ni veivakarurugi, ka i drodro vei ira na Isireli, se vei ira na kai tani, kei ira era mai tiko voli vakavulagi vei kemuni, me dro kina na tamata vakayadua sa vakamatea e dua ka sa sega ni nakita.
Me Baleta na Laba kei na Kena Veisausaumi
16“Ia kevaka sa mokuti koya e dua na i yaya kaukamea, ka sa mate kina, sa laba o koya; ena vakamatei vakaidina o koya sa laba. 17Se, e dua sa mokuti koya e dua tale ena vatu, ka sa mani mate kina, sa daulaba o koya oqo, ia ena vakamatei vakaidina o koya sa laba.
18Se, e dua sa mokuti koya e dua tale ena kau, ka sa mani mate kina, sa daulaba o koya oqo, ia ena vakamatei vakaidina o koya sa laba. 19Me vakamatei koya sa laba o koya sa nona i tavi me sauma na dra; io me vakamatei koya ena gauna ga sa kunei koya kina.
20“Ia kevaka e dua sa cata e dua tale ka mani vakamatea ena nona biliraki koya sobu, se virilaki koya ena dua na ka, 21se vaculaki koya ka sa mate kina, ena vakamatei vakaidina o koya a vacuvacu; sa laba o koya; me vakamatei koya sa laba o koya sa nona i tavi me sauma na dra ena gauna ga e kunei koya kina.
22“Ia e vakaevei kevaka e dua sa vakamatea vakacalaka e dua tale sa sega ni cata, ka yaco oqo mai na nona biliraki koya sobu se virilaki koya ena dua na ka, 23se a viritaka beka e dua na vatu ka la'ki vakavuna na mate vakacalaka ni dua na tamata sa sega ni cata se me kena meca. 24Na kisi vakaoqo e dodonu me vakatulewa kina o ira na lewenivanua, me vaka na veilawa oqo; 25O ira na lewenivanua e dodonu me ra vakabulai koya sa vakamatea vakacalaka na tamata mai na liga i koya na weka ni mate ka sa nona i tavi me sauma na dra, ka me ra vakauti koya ki na koro levu ni i drodro, o ya na vanua ka sa dro yani kina. E dodonu me tiko voli ga mai kina me yacova sara ni sa mate na Bete Levu, o koya sa lumuti ena waiwai tabu.
26Ia kevaka sa lako sivia na i yalayala ni koro ni drodro ka la'ki vakaruru kina o koya sa vakamate tamata vakacalaka, 27ka sa qai kunei koya ena taudaku ni yalayala ni koro ni i drodro o koya na weka ni mate sa nona i tavi me sauma na dra, ka sa vakamatei koya, a cakacaka ni sausaumi lesu oqo ena sega ni okati me laba. 28Ni sa dodonu me tiko ga e nona koro ni drodro me yacova sara ni sa mate na bete levu. Ia ni sa mate na bete levu, sa rawa vua na daulaba me lesu tale ki na nona vanua. 29Ia na veika oqo me sa kena lewa kei na kena i valavala ena nomuni veitabatamata kece, ena nomuni veitikotiko.
30“O koya yadua sa beitaki ena laba sa rawa wale ga ni qai vakataudeitaki kevaka e vakadinadinataka e rua se sivia na i vakadinadina; ia me kakua ga ni vakamatei e dua na tamata mai na i tukutuku ni lewe dua ga na i vakadinadina.#Vrua 17.6; 19.15 31Ia mo ni kakua ni vakadonuya me tauri e dua na i sere ni bula vua sa laba, ka sa dodonu me vakamatei vakaidina ga. 32Ia mo ni kakua talega ni vakadonuya e dua na i sere ni bula ena vukuna o koya sa dro ki na nona koro ni drodro, me rawa kina vua me lesu tale ki na nona vanua ni sa bera mada ni mate o koya na bete levu. 33Mo ni kakua sara ni vakadukadukalitaka na vanua o ni sa tiko kina; ni sa vakadukadukalitaka na vanua na dra; ka sa sega ni sorovaki rawa na vanua me baleta na dra sa dave kina, sa sorovaki rawa ga ena dra i koya ka vakadavea. 34Ia mo ni kakua ni vakadukadukalitaka na vanua o ni sa tiko kina, ni'u sa tiko kina o au; ni sai au ko Jiova ka tiko maliwai ira na Isireli.”
Currently Selected:
TIKO VOLI MAI NA LEKUTU 35: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.