TIKO VOLI MAI NA LEKUTU 34
34
Na i Yalayala ni Vanua
1A sa kaya ko Jiova vei Mosese, 2Mo vakaroti ira na Isireli, ka kaya vei ira, Ni o ni sa curuma na vanua o Kenani (Oqo na vanua mo ni taukena, na vanua taucoko o Kenani me yacova yani na kena i yalayala,) 3na yasamuni ki na ceva ena tekivu mai na vanua lala o Sini ka cici ravita na yasa i Itomi, ia na nomuni i yalayala ni vanua ena ceva, ena tekivu mai na mua ni Waitui Mate ka gole vaka ki na tokalau; 4eke na nomuni yalayala ena gole vaka ki na ceva ni cabecabe ki Karapimi, ka takoso yani ki Sini me yaco sara ki na ceva kei Katesi Banea, mai kea, ena cici yani vaka ki Asari Atari, me yaco sara ki Asimoni; 5ia na i yalayala ena gole cake mai Asimoni ki na yalayala ni vanua o Ijipita, ka la'ki cava sara ki na Wasa Meditereni.
6Ena yasamuni ki na ra, na Wasa Meditereni kei na kena veibaravi, oqo me nomuni i yalayala ni vanua ena yasana ki na ra. 7Sa na vakaoqo na nomuni i yalayala ena vualiku: mai na Wasa Meditereni me vakadodonu sara ki na Ulunivanua o Ori; 8mai na Ulunivanua o Ori, me vakadodonu sara yani ki na i curucuru ki Emaci, ka lako yani na i yalayala me yaco sara ki Sitati. 9Mai kea ena cici yani na i yalayala ki Sifironi, ka la'ki tini sara ki Asara Enani; oqo na nomuni i yalayala ki na vualiku.
10Mo ni vakaciciva na nomuni i yalayala ena tokalau mai Asara Enani ki Sefami; 11ia na i yalayala ena cici sobu mai Sefami ki Ripila ka toka ena tokalau kei Eini; me qai cici sobu na i yalayala ka yaco ki na baravi ni wasawasa o Kinereci vaka ki na tokalau, 12ka me siro sobu na i yalayala ki na Joritani, ka la'ki tini ki na Waitui Mate. Sa na nomuni vanua oqo kei na kena i yalayala sa vakavolivolita.
13A qai vakaroti ira na Isireli o Mosese, ka kaya, Oqo na vanua o ni na taukena ena vakawirimadigi, ka sa vakarota ko Jiova me soli me nodra na mataqali e ciwa veimama.#Josua 14.1-5 14A sa votai oti na nodra i votavota na mataqali i Rupeni kei Kata kei na veimama ni mataqali i Manasa mai na tokalau; ka votai oqo me vaka na nodra matavale. 15O ira rau na mataqali, kei na dua na veimama ni mataqali e ratou sa taura na nodratou i votavota ena tai ni Joritani, donui Jeriko vaka ki na tokalau, ki na i cabecabe ni siga.
Turaga ni Mataqali me Ra Vota na Vanua
16A vosa vei Mosese ko Jiova, ka kaya, 17Oqo na yacadra na tamata era na vota na vanua vei kemuni me nomuni votavota: o Iliesa na bete, kei Josua na luve i Nuni. 18Mo ni kauta e dua na turaga mai na mataqali yadua, me vota na vanua me i votavota.
19Oqo na yacadra: mai na nodra mataqali na luve i Juta, o Kelevi na luve i Jifune. 20Mai na nodra mataqali na luve i Simione, o Simueli na luve i Amiute. 21Mai na mataqali Penijamini, o Ilitati na luve i Kisiloni. 22Mai na nodra mataqali na luve i Tani, o Puki na luve i Jokili, 23Mai vei ira na luve i Josefa; mai na nodra mataqali na luve i Manasa o Anieli, na luve i Efoti. 24Na nodra mataqali na luve i Ifereimi, me dua na turaga, o Kemueli na luve i Sifitani. 25Ia na turaga ni nodra mataqali na luve i Sevuloni, o Ilisavani na luve i Parinaki. 26Na turaga ni nodra mataqali na luve i Isakari, o Palitieli na luve i Asana. 27Na turaga ni nodra mataqali na luve i Aseri, o Eiitute na luve i Silomi. 28Ia na turaga ni nodra mataqali na luve i Navitalai, o Pitaeli na luve i Amiute.
29O ira oqo na turaga ka vakarota ko Jiova me ra vota na i votavota ena vukudra na Isireli, ena vanua o Kenani.
Currently Selected:
TIKO VOLI MAI NA LEKUTU 34: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.