MACIU 8

Sa Vakasavasavataka e Dua na Vukavuka ko Jisu

(Mari 1.40-45; Luke 5.12-16)

1Ni sa lako sobu mai na ulunivanua o koya, era sa muri koya yani e lewe vuqa sara; 2ka sa qai lako mai vei koya e dua na tamata vukavuka ka mai tekiduru e matana ka kaya, “Na Turaga, kevaka ga sa lomamuni, sa rawa ni o ni vakasavasavataki au.”

3Sa qai dodoka yani na ligana ko Jisu ka tarai koya, ka kaya, “Sa lomaqu, mo savasava mai.” A vakabulai sara mai na nona vukavuka. 4Sa qai kaya vua ko Jisu, “Qarauna mo kakua ni tukuna vua e dua, ia mo lako ga ka vakaraitaki iko vua na bete, ka vakacabora na i solisoli ka vakarota o Mosese, me i vakadinadina vei ira na tamata ni o sa savasava.”#Vsoro 14.1-32

Sa Vakabula na Nona Tamata na Turaganivalu ni Roma ko Jisu

(Luke 7.1-10)

5Ni sa curu ki Kapenaumi ko Jisu sa lako mai vua e dua na turaganivalu, ka kerei koya 6ka kaya, “Kemuni na Turaga, e davo koto mai vale na noqu tamata e tauvi paralasi, ka sa yaluma sara.”

7Sa qai kaya vua o koya, “Au sa na la'ki vakabulai koya yani.”

8A sauma na turaganivalu ka kaya, “Kemuni na Turaga, sa sega ni veiganiti kei au mo ni curu ki na noqu vale; ia, mo ni cavuta ga na vosa, ka sa na bula kina na noqu tamata. 9Ka ni'u tu ga oi au ena ruku ni lewa, ka ra tu e rukuqu eso na sotia, ka'u kaya vua e dua, ‘Lako,’ ka sa lako yani, ki vua tale e dua, ‘Lako mai,’ ka sa lako mai, ki vua talega na noqu tamata, ‘Kitaka oqo,’ ka sa kitaka.”

10Ni sa rogoca ko Jisu, sa kurabui, ka kaya vei ira ka muri koya tiko, “Au sa kaya vakaidina vei kemudou, au se sega mada ni bau raica vua e dua e Isireli na mataqali vakabauta vakaoqo. 11Au sa kaya vei kemudou ni ra na lewe vuqa era na lako mai na tokalau kei na ra talega; ka tiko sobu me kana vata kei Epara-ama, kei Aisake, kei Jekope ena matanitu vakalomalagi.#Luke 13.29 12Ia, o ira era dodonu me ra tiko ena loma ni matanitu era na biu ki na butobuto e tautuba, era na dau tagi ka vakasequruqurubati kina.”#Maciu 22.13; 25.30; Luke 13.28 13Sa qai kaya ko Jisu vua na turaganivalu, “Mo lako, me yaco vei iko me vaka o sa vakabauta.”

A bula sara na nona tamata ena tiki ni gauna o ya.

Sa Vakabulai Ira na Lewe Vuqa ko Jisu

(Mari 1.29-34; Luke 4.38-41)

14Ni sa curu yani ko Jisu ki na vale nei Pita, sa raica na tina ni watina ni davo koto ka tauvi katakata; 15sa mani tara na ligana, ka sa takali sara vua na katakata, ka mani tucake ka qaravi koya.

16Ni sa yakavi mai, era sa qai kauta mai vei koya e lewe vuqa na curumi tevoro; ka sa vakasavi ira na tevoro o koya ena vosa, ka vakabulai ira kecega era tauvimate, 17me vakayacori kina na vosa ka tukuna o Aisea na parofita, “O koya ga sa kauta vua na noda malumalumu, ka sa kauta tani na noda tauvimate.”#Aisea 53.4

Eso Ka Via Muri Jisu

(Luke 9.57-62)

18Ni sa raica ko Jisu na lewe vuqa era vakavolivoliti koya, sa qai kaya me ia na lako ki tai kadua. 19Sa qai lako mai e dua na daunilawa ka kaya vua, “Na i Vakavuvuli, au na muri kemuni ena veivanua kecega o ni na lako kina.”

20Sa qai kaya vua ko Jisu, “Era vaqara na fokisi, ka ra vakasova na manumanu vuka; ia, na Luve ni Tamata sa sega na vanua me davo sobu kina ka vakacegu.”

21Sa qai vosa e dua tale vei ira na tisaipeli ka kaya vua, “Turaga, laivi au taumada me'u lesu ka la'ki buluti tamaqu.”

22Ia, sa qai kaya vua ko Jisu, “Muri au mai, ka laivi ira na mate me ra buluta na nodra mate.”

Sa Vakamaravutaka na Cava ko Jisu

(Mari 4.35-41; Luke 8.22-25)

23Ni sa vodo ko Jisu ki waqa, e ratou sa muri koya kina na nona tisaipeli. 24Ka raica, sa tubu e dua na cava levu e wasawasa, ka sa luvu kina na waqa ena biau; ia, sa moce koto ga o koya. 25E ratou sa qai vakayadrati koya, ka kaya, “Turaga, mo ni vakabulai kedatou, edatou sa mate.”

26Sa qai kaya vei iratou, “A cava dou sa rere kina, sa lailai na nomudou vakabauta?” Sa qai duri cake ka vunauca na cagi kei na wasawasa, ka sa maravu mai.

27E ratou sa kurabui, ka kaya, “A tamata vakacava mada oqo ni bau talairawarawa vua na cagi kei na wasawasa?”

Sa Vakabulai Rau e Lewe Rua na Curumi Tevoro ko Jisu

(Mari 5.1-20; Luke 8.26-39)

28Ni sa yaco ki tai kadua ko Jisu, ki na nodra vanua na kai Katara, sa qai sota vata kaya e lewe rua na curumi tevoro e rau cavutu mai na i bulubulu; e rau sa rui vakarerevaki sara ka sa sega kina ni lako e dua ena sala o ya. 29Ka raica, e rau sa qai qoqolou mai, ka kaya, “A cava o ni via cakava vei keirau, na Luve ni Kalou? O ni sa lako li mai me vakararawataki keirau ni sa bera mai na kena gauna?”

30Ia, era kana vakayawa tu yani mai vei iratou e dua na qele ni vuaka levu. 31Era sa qai kerei koya na tevoro ka kaya, “Kevaka o ni vakasavi keimami, vakatalai keimami me keimami curumi ira na qele ni vuaka.”

32Sa mani kaya vei ira, “Dou lako.” Era sa lako tani sara ka curumi ira na vuaka. Era qai cici sobu kece sara na qele ni vuaka ena baba ki wasawasa, ka ra sa luvu kina.

33Era sa qai dro na i vakatawa, ka lako yani ki na koro ka tukuna na ka kecega, kei na veika e baleti rau na curumi tevoro. 34Era sa qai lako vakoro mai kina me sota kei Jisu, ia ni ra sa raici koya, era sa kerei koya me biuta na nodra vanua.

Currently Selected:

MACIU 8: FNV

Highlight

Copy