MACIU 7

Na Dauveivakalewai

(Luke 6.37-38,41-42)

1“Dou kakua ni dauveivakalewai, de dou lewai. 2Ni dou na lewai ga ena lewa dou sa cakava, kei na i vakarau dou sa vakarautaka ena vakarautaki tale vei kemudou.#Mari 4.24 3A cava o raica ga kina na malamala ena mata ni wekamu, ka sega ni raica na tolonikau e matamu? 4O na kaya rawa vakacava vua na wekamu, ‘Me'u leuta mada na malamala mai na matamu,’ ia sa tu ga na tolonikau e matamu? 5O iko na dauveivakaisini, mo cavuta tani mada na tolonikau mai na matamu, o na qai rai vinaka mo leuta na malamala mai na mata ni wekamu.

6“Dou kakua ni solia na ka tabu vei ira na koli, se biuta na nomudou mataniciva e matadra na vuaka, de ra na buturaka sobu e yavadra, ka vuki mai ka basuraki kemudou.

Kerekere, Vakasaqara, Tukituki

(Luke 11.9-13)

7“Dou kerekere, ka na soli vei kemudou; dou vakasaqara ka dou na kunea; dou tukituki ka na dolavi vei kemudou. 8Ni sa taura o koya ga sa kerekere, ka kunea o koya sa vakasaqara, ka na dolavi vua sa tukituki. 9Se o cei mada vei kemudou kevaka e kere madrai na luvena, ena solia vua e dua na vatu? 10Se kevaka e kere ika, ena solia vua e dua na gata? 11Io, kevaka dou sa kila oi kemudou na tamata ca na solia na ka vinaka vei ira na luvemudou, sa na wacava na Tamamudou mai lomalagi na nona via solia na veika vinaka vei ira sa kerekere vua!

12“Na ka ga dou vinakata me ra cakava vei kemudou na tamata, dou cakava talega vei ira, ni sai koya oqo na Lawa kei ira na parofita.#Luke 6.31

Na Matamata Qiqo

(Luke 13.24)

13“Dou curu ki na matamata qiqo, baleta ni sa rabailevu na matamata ki eli ka rawarawa na sala sa gole kina, ka ra lewe vuqa era sa lakova. 14Ia sa qiqo na matamata ki na bula ka sa rui dredre na sala sa gole kina, ka ra lewe lailai ga era sa kunea.

Na Kau kei na Vuana

(Luke 6.43-44)

15“Dou qarauni kemudou mai vei ira na parofita vakailasu, era lako mai vei kemudou ka ra vakaisulu mai vaka na sipi, ia era olifa daukata e loma. 16Dou na kilai ira rawa ena vuadra. E dau veti li na qerepi mai na veiwavakavotona, se na lolo mai na soni? 17Sa vakakina, na kena vuataka ga na vua vinaka na kau vinaka, ka vuataka na vua ca na kau ca. 18E sega na kau vinaka me vuataka rawa na vua ca, se na kau ca me vuataka rawa na vua vinaka. 19Na kau ga e sega ni vuataka na vua vinaka sa dau ta laivi ka biu ki na buka.#Maciu 3.10; Luke 3.9 20Io, dou na kilai ira ga ena vuadra.#Maciu 12.33

Au Sega Sara ni Kilai Kemudou

(Luke 13.25-27)

21“Ena sega ni o ira kece era kaya tiko vei au ‘Kemuni na Turaga,’ era na curu ki na matanitu vakalomalagi; ia, o koya ga e cakava na loma i Tamaqu mai lomalagi. 22Era na kaya vei au e lewe vuqa ena siga o ya, ‘Kemuni na Turaga! Keimami a sega li ni vakatavuvuli ena yacamuni, ka vakasavi tevoro ena yacamuni, ka cakava na cakacaka mana e vuqa ena yacamuni?’ 23Ia, au na qai kaya vei ira, ‘Au sega sara ni kilai kemudou; dou lako tani vei au ni dou sa tamata dau caka ca!’#Same 6.8

E Rua na Dautara Vale

(Luke 6.46-49)

24“Ena ka oqo, o koya vakayadua sa rogoca na noqu vosa oqo ka talairawarawa kina sa vaka na tamata vuku sa tara na nona vale ena dela ni vatu. 25A sa tau na uca, ka coka mai na dobui, ka liwa kaukauwa mai na cagi me vakabalea na vale o ya. Ia sa sega ga ni bale, baleta ni sa vakayavutaki ena vatu.

26“Ia o koya ga sa rogoca na noqu vosa oqo ka sega ni talairawarawa kina sa vaka na tamata lialia sa tara na nona vale ena dela ni nuku. 27A sa tau na uca, ka coka mai na dobui, ka liwa mai na cagi kaukauwa me vakabalea na vale o ya, ka sa bale kina. Sa ka levu sara na kena bale!”

Na Lewa ka Tu Vei Jisu

28Ni sa tinia na vosa oqo ko Jisu, era sa qoroqoro na lewe vuqa ena nona i vakavuvuli,#Mari 1.22; Luke 4.32 29ni sa vakatavulici ira me vaka e dua sa nona na lewa, ka sega ni vakataki ira na qasenivuli ni Lawa.

Currently Selected:

MACIU 7: FNV

Highlight

Copy