VUNAU NI SORO 7

1Oqo na i vakaro me baleta na i madrali ni veisausaumi, ni sa ka tabu sara. 2Na manumanu me i soro ni veisausaumi me na vakamatei ena yasana ki na vualiku ni cabocabonisoro, o ya na yasana ka dau vakamatei kina na i madrali me i soro kama, ka kureitaka na kena dra ena tutu vava ni cabocabonisoro. 3Me vakacabori na kena uro kecega, na buina uro, na uro sa ubia na gacagaca, 4na ivi ruarua kei na kena uro, kei na tikina taleitaki ni yatena. 5O koya na bete me na qai vakama na uro kece sara ena dela ni i cabocabonisoro me madrali laukana vei Jiova; oqo na i madrali ni veisausaumi. 6O ira na tagane ena vuvale vakabete e rawa ni ra kania, ia me laukana ga ena dua na tikina tabu baleta ni sa ka tabu sara. 7Na i madrali ni veisausaumi e vaka na i soro ni valavala ca, ni sa dua ga na i valavala ni kena vakacabori; ka sai votavota ni bete e qarava na vakacacabo na magiti sa cabori. 8Ia na bete sa vakacabora na nona i soro kama e dua ga na tamata, ena nona ga na bete o ya na kuli ni soro kama sa vakacabora o koya. 9Na i madrali laukana kecega sa vavi ena lovo kei na ka kece sa tavu ena i tavuteke kaukamea, ena nona i votavota na bete sa vakacabora. 10Ia na i madrali laukana kecega sa veiwaki vata kei na waiwai se sega, ena kedratou kecega na luve i Eroni, me ratou vota vakatautauvata.

Na i Soro ni Veivinakati

11“Oqo na i dusidusi ni i soro ni veivinakati, ena vakacabora vei Jiova e dua na tamata. 12Kevaka sa vakacabora me i madrali ni vakavinavinaka, ia me vakacabora vata kaya na keke mamare sa sega ni vakatubutaki sa veiwaki vata kei na waiwai, kei na keke mamare sa sega ni vakatubutaki sa boro e delana na waiwai, kei na keke sa buli ena valawa digitaki ka veiwaki vata kei na waiwai. 13Me i kuri ni madrali ni soro ni veivinakati me nona ka ni vakavinavinaka me kauta mai eso na i buli madrai sa vakatubutaki. 14Ia me vakacabora o koya e yadua na i buli mai na i madrali yadua, ai solisoli namaki vei Jiova; oqo e nona na bete sa kureitaka na dra ni soro ni veivinakati. 15Na viciko ni i madrali ni soro ni veivinakati mai na nona i madrali ni vakavinavinaka, me laukana ena siga vata ga sa vakacabori kina; me kakua ni vakavoca o koya me yacova na mataka. 16Ia kevaka sa ka ni bubului, se ka ni lomana ga na nona i madrali, me laukana ena siga ga sa cabora kina o koya, ka me qai laukana na kena vo, ena siga ka tarava. 17Ia na viciko sa vo mai na i madrali ena i katolu ni siga, me vakamai ena bukawaqa. 18Kevaka sa laukana ena i katolu ni siga e dua na tiki ni viciko ni nona i madrali ni veivinakati sa cabori, ena sega ni vakadonui o koya sa vakacabora, ena sega talega ni okati vua; ena ka vakasisila, ia na tamata sa kania ena cudruvi ena nona caka ca.

19“Na viciko sa terega e dua na ka sa sega ni savasava, me kakua ni laukana; me vakamai ga ena bukawaqa. Me ra kania na viciko ni madrali o ira ga sa savasava, 20ia na tamata sa kania na viciko ni madrali ni veivinakati sa cabori vei Jiova ni sa sega ni savasava, ena muduki tani na tamata o ya mai vei ira na kai nona. 21Ia kevaka sa tara e dua na ka sa sega ni savasava, se tawa savasava ni tamata, se manumanu tawa savasava, se dua na ka sa tawa savasava e vakasisilataki, ka qai kania ga na viciko ni madrali ni veivinakati sa cabori me nei Jiova, ena muduki tani na tamata o ya mai vei ira na kai nona.”

22A sa vosa talega vei Mosese ko Jiova, ka kaya, 23“Mo vosa vei ira na Isireli, ka kaya, Ni kakua ni kania e dua na uro ni bulumakau, uro ni sipi se na me. 24Ia na uro ni manumanu sa mate vakailoa, kei na uro ni manumanu sa dresulaka na manumanu kila, e tara me vakayagataki ena so tale na ka; ia mo ni kakua sara ni kania. 25Na tamata vakayadua ga sa kania na uro ni manumanu ka sa kau mai kina na ka sa cabori ena bukawaqa vei Jiova ena muduki tani mai vei ira na kai nona. 26Mo ni kakua talega ni kania e dua na dra ena nomuni veivale kecega, se dra ni manumanu vuka, se dra ni manumanu yava i va.#Vteki 9.4; Vsoro 17.10-14; 19.26; Vrua 12.16,23; 15.23 27O koya sa kania na dra, na tamata o ya me muduki tani mai vei ira na kai nona.”

28A sa vosa talega ko Jiova vei Mosese, ka kaya, 29“Mo kaya vei ira na Isireli, O koya sa vakacabora na nona i madrali ni veivinakati e dodonu me na kauta mai na tiki ni nona i madrali me ka ni loloma vei Jiova; 30me kauta mai ena ligana na ka sa cabori ena bukawaqa vei Jiova; me kauta na uro kei na serena, me laveti cake me i soro yalovaki vei Jiova. 31Ia na bete me vakama na uro ena dela ni cabocabonisoro; ia na serena sa kedratou o Eroni kei ira na luvena. 32Na sagana i matau mo solia vua na bete me i solisoli, mai na i madrali ni nomudou i soro ni veivinakati; 33O koya vei iratou na luve i Eroni sa cabora na dra ni soro ni veivinakati kei na uro, ena kena na sagana i matau me kena i votavota. 34Au na kauta na serena mai na i soro yalovaki kei na sagana sa cabori mai vei ira na Isireli, ena nodra i soro ni veivinakati, ka solia vei Eroni na bete kei iratou na luvena me kedra i votavota tudei mai vei ira na Isireli.” 35Oqo na i votavota ni magiti tabu sa soli vei Eroni kei iratou na luvena ena siga e ratou sa vakatabui kina ki na cakacaka vakabete. 36Ena siga o ya, sa vakarota kina ko Jiova vei ira na Isireli me ra solia na i votavota ni madrali oqo ki na vuvale vakabete. Oqo na i tuvatuva me ra muria na Isireli ena veitabagauna kecega.

37Sai koya oqo na i vakaro ni i soro kama, na i madrali laukana, na i soro ni valavala ca, na i madrali ni veisausaumi, na i madrali ni veibuli, kei na i soro ni veivinakati; 38o koya sa vakarota vei Mosese ko Jiova mai na Ulunivanua o Saineai, ena siga sa vakaroti ira kina na Isireli me ra kauta mai ka vakacabora na nodra i madrali vei Jiova, ena vanua lala o Saineai.

Currently Selected:

VUNAU NI SORO 7: FNV

Highlight

Copy