VUNAU NI SORO 8

Cabori nei Eroni kei Iratou na Luvena

(Lako 29.1-37)

1A sa vosa vei Mosese ko Jiova, ka kaya, 2“Mo kauti Eroni kei iratou na luvena, na nodratou i sulu, na waiwai ni veilumuti, na bulumakau me i soro ni valavala ca, kei na sipi tagane ruarua, kei na basikete madrai e sega ni vakatubu; 3ka vakasoqoni ira vata na lewenivanua taucoko ki na katuba ni Vale ni Veitavaki.”

4Sa qai cakava o Mosese me vaka a vakarota ko Jiova; ka ra sa qai soqoni vata yani na lewenivanua ki na katuba ni Vale ni Veitavaki. 5A sa kaya vei ira na lewenivanua o Mosese, “Sa vakaoqo na ka sa vakarota ko Jiova me caka.”

6Sa qai kauti Eroni kei iratou na luvena o Mosese, ka vui iratou ena wai me vaka na kena i valavala. 7Sa vakadaramaka vei Eroni na sote kei na kote balavu, vauca na i oro e tolona, ka daramaka vua na efoti. Sa qai vakasuluma ena i vau talei ni efoti, ka vesuka vata kina na efoti. 8Sa qai vakatokara vua na i ukuuku ni lomaserena, ka vakadabera koto na Urimi kei na Cumimi#8.8 Urimi kei na Cumimi: E rua na i yaya ka ra dau vakayagataka na bete me vakadeitaka na loma ni Kalou; e sega sara ni matata vakavinaka na kedrau i vakavakayagataki. ki na loma ni ukuuku ni lomaserena. 9A sa vakatokara na i sala ki uluna; ia ena tutu ni sala e liu a cobara kina na i ukuuku koula, o ya na i sala vakaturaga savasava ka tabu, me vaka a vakarota vei Mosese ko Jiova.

10Sa qai taura na waiwai ni veilumuti o Mosese, ka lumuta na vale tabu kei na ka kece sa tu kina, ka vakatabuya. 11Sa kureitaka vakavitu ki na dela ni cabocabonisoro, ka lumuta na i cabocabonisoro kei na kena i yaya kecega, na beseni kei na kena i tutu, ka vakatabuya. 12A sa livia eso na waiwai ni veilumuti ki na ulu i Eroni, lumuta, ka vakatabui koya. 13Sa qai kauti iratou mai na luve i Eroni o Mosese, ka vakaisulutaki iratou ena kote balavu, vauca na tolodratou ena i oro, ka vakaisalataki iratou ena i sala; me vaka a vakarota vei Mosese ko Jiova.

14Sa qai kauta mai o Mosese na bulumakau me i soro ni valavala ca, ka ratou tabaka na ulu ni bulumakau o Eroni kei iratou na luvena. 15A vakamatea o Mosese ka kauta eso na kena dra, ka boroya ena nona i qaqalo na ucuna momoto ena tutu ni i cabocabonisoro, me vakatabui kina. Na vo ni dra sa sova yani ki na yavu ni cabocabonisoro. Oqo na sala sa vakatabui ka vakasavasavataki kina. 16A sa taura o Mosese na uro kecega a tu ena gacagaca, na tikina taleitaki ni yatena, na ivi ruarua kei na kena uro, ka vakama ena dela ni cabocabonisoro. 17Sa kauta yani na vo ni bulumakau, kei na kulina, kei na lewena, kei na wawa ni ketena, ka vakama ena taudaku ni i tikotiko me vaka sa vakarota ko Jiova.

18Sa qai kauta yani o Mosese na sipi tagane me i soro kama, ka ratou tabaka e ligadratou na ulu ni sipi tagane o Eroni kei iratou na luvena. 19A sa vakamatea o Mosese, ka kureitaka na dra ena tutu vava ni cabocabonisoro. 20A sa musumusuka vakatikina na sipi tagane o Mosese; a sa vakama na uluna, na veitikina sa musuki, kei na kena uro. 21A sa vakasavasavataka na kena gacagaca kei na yavana ena wai, ka vakama na sipi tagane taucoko ena dela ni cabocabonisoro, me vaka sa vakarota ko Jiova. Na i soro kama oqo sa okati me i madrali laukana, ni sa ka boi vinaka vei Jiova.

22Sa qai kauta mai o Mosese na i karua ni sipi tagane me vakayagataki ena cakacaka ni veibuli vakabete, ka ratou tabaka ena ligadratou o Eroni kei iratou na luvena. 23A sa vakamatea o Mosese, ka kauta eso na kena dra, ka boroya ki na vuso ni daliga i Eroni i matau, ena i dovidovi ni kakana ni ligana i matau, kei na i qaqalo levu ni yavana i matau. 24Sa qai kauti ratou mai ki liu na luve i Eroni o Mosese ka boroya ena dra na vuso ni daligadratou i matau, ena i dovidovi ni kakana ena ligadratou i matau, kei na i qaqalo levu ni yavadratou i matau; ka qai kureitaka na vo ni dra ena tutu vava ni cabocabonisoro. 25A sa taura na uro, na buina uro, na uro kecega sa tu ena gacagaca, na tikina taleitaki ni yatena, na ivi ruarua kei na kena uro, kei na sagana i matau. 26Sa qai taura e dua na i buli madrai mai na basikete ni madrai e sega ni vakatubu sa cabori vei Jiova, e dua na i buli madrai e caka ena waiwai, e dua na keke mamare, ka biuta ena dela ni uro kei na sagana i matau. 27Na magiti kece oqo sa soli ki na liga i Eroni kei iratou na luvena, ka ratou laveta cake me i soro yalovaki vei Jiova. 28Sa qai taura lesu tale mai ena ligadratou o Mosese, ka vakama ena dela ni cabocabonisoro vata kei na i soro kama, me i madrali ni veibuli. Na i soro kama oqo sa okati me i madrali laukana, ni sa ka boi vinaka vei Jiova. 29A sa kauta na lomasere ni sipi o Mosese me vakacabora, ka laveta cake me i soro yalovaki ena mata i Jiova; oqo na tiki ni sipi tagane ni veibuli ka i votavota i Mosese, me vaka sa vakarota ko Jiova.

30Sa qai taura eso na waiwai ni veilumuti o Mosese, kei na so na dra sa tu ena dela ni cabocabonisoro, ka kureitaka vei Eroni kei na nona i sulu, ka vakakina vei iratou na luvena kei na nodratou i sulu. Ena sala oqo e ratou sa vakatabui kina vei Jiova, kei na nodratou i sulu.

31Sa vosa vei Eroni kei iratou na luvena o Mosese ka kaya, “Dou kauta na lewe ni manumanu ki na katuba ni Vale ni Veitavaki, ka vakasaqara, ka kania e kea vata kei na madrai e tiko ena basikete ni madrali ni veibuli, me vaka sa vakarota ko Jiova. 32Dou qai vakama na vo ni lewe ni manumanu kei na madrai. 33Ia dou kakua ni lako tani mai na katuba ni Vale ni Veitavaki ka me siga vitu, me oti mada na nomudou siga ni veibuli. Ena taura taucoko e vitu na siga na nomudou buli tiko. 34Me vaka sa caka ena siga oqo, sa vakarota ko Jiova me caka, me sorovaki kemudou. 35Dou tiko ga ena katuba ni Vale ni Veitavaki ena siga kei na bogi me siga vitu, ka vakayacora na veika sa vakarota vei kemudou ko Jiova de dou mate, ni'u sa vakaroti me vakakina.” 36Sa cakava o Eroni kei iratou na luvena na ka taucoko sara e veivakaroti kina ko Jiova vei Mosese.

Currently Selected:

VUNAU NI SORO 8: FNV

Highlight

Copy