VAKATEKIVU 34
34
Na Kucuvi nei Taina
1Ena dua na siga, a sa lako yani o Taina na luvedrau yalewa o Jekope kei Lia, me la'ki sikova eso na yalewa ni Kenani. 2Ni sa raici koya o Sikemi na luve i Amori, na Aivaiti ka turaga ni vanua o ya, a sa qai vesuki koya ka kucuva. 3Ia sa qai dreta na yalo i Sikemi na rarai totoka i Taina, ka sa domona ka vosa vinaka vua ena nona tovolea me domoni koya lesu vakakina o Taina. 4Sa qai kaya vei tamana, “La'ki kauta mai na yalewa o ya me watiqu.”
5A sa rogoca o Jekope ni sa vakacacani o Taina na luvena yalewa; ia me vaka ni ratou se tu na luvena tagane mai veikau kei na nona manumanu, a sa sega ni cakava kina e dua na ka me yacova ni ratou sa lesu mai. 6A sa lako mai o Amori na tama i Sikemi me rau mai veivosaki kei Jekope, 7ka donuya o ya na gauna e ratou lesu mai kina na luve i Jekope mai veikau. Ni ratou sa mai rogoca, e ratou sa kidacala ka sa tuburi ratou na cudru katakata ena ka e vakayacora oqo o Sikemi, ka sa vakacudrui ira na Isireli ena nona kucuva na luve i Jekope goneyalewa. 8Sa qai mai vakamasuti iratou o Amori ka kaya, “E sa kauta dina na yalo i Sikemi na luvequ na nomudou goneyalewa; au kerea mo dou yalovinaka sara ka solia me rau veiwatini. 9Me da vakadonuya vata mada me sa ia na vakawati veicurumaki ena keda maliwa. Ni soli ira na luvemuni yalewa vei keimami, ka mo ni tauri ira na luve i keimami yalewa. 10Mo ni sa tiko ga eke ena neimami vanua; mo ni lewa na tiki ni vanua cava ga o ni via tiko kina ka veivoli kina ena galala, ka taukena na kena i yau.”
11A sa kaya talega o Sikemi vei tama i Taina kei iratou na ganena, “Au kerea me'u kune loloma e matamudou; na ka kece sara dou vinakata, au na solia. 12Dou tukuna mai vei au se i loloma cava dou sa vinakata, se na cava na i duguci kei yalewa ena kena e cecere duadua dou sa gadreva. Au na solia na ka kece sara dou kaya, kevaka wale ga mo dou vakaio me watiqu na goneyalewa.”
13E ratou a sega ni sauma vakadodonu na luve i Jekope vei Sikemi kei Amori na tamana, baleta ni sa vakacacani Taina na ganedratou o Sikemi. 14E ratou sa qai kaya, “Keitou na sega ni solia na ganei keitou me watina e dua na tamata sa sega ni cilivi; oqo e rui ka beci sara vei keitou. 15Ia e dua ga na ka keitou rawa ni vakadonuya kei kemudrau, o ya mo ni vakataki keimami; me ra cilivi na nomuni tagane kece sara. 16Ke sa rawa oqori, keimami na qai soli ira na luve i keimami yalewa vei kemuni ka tauri ira na luvemuni yalewa. Keimami na qai tiko vakadua eke ka yaco me da sa dua ga na tamata. 17Ia kevaka o ni sega ni vakadonuya oqo mo ni cilivi, keitou na kauti Taina ka lako tani yani.”
18A rau sa marautaka o Amori kei Sikemi na nodratou vakatutu oqo na luve i Jekope tagane, 19ka sega tale ni qai wawa o Sikemi me cakava na ka sa tukuni, baleta ni sa rui domona vakalevu na luve i Jekope yalewa. A sa tamata dokai duadua vei ira na nona vuvale o Sikemi.
20E rau sa qai lako yani o Amori kei na luvena o Sikemi ki na vanua ni soqo ena matamata ni koro, ka la'ki vosa vei ira na nodrau lewe ni koro: 21“Era tamata vinaka vei keda na tamata oqo; Laivi ira me ra tiko ka veivoli ena vanua oqo. E vo levu talega na vanua oqo me ra tiko kina. Me da vakawatitaki ira na nodra goneyalewa, ka soli ira na noda goneyalewa vei ira. 22Ia era sa vakadonuya wale ga me ra sa tiko vata kei keda me da sa duabau ga na matatamata kevaka era sa cilivi kece sara na noda tagane, me vakataki ira. 23Ena qai sega li ni noda na nodra manumanu, na nodra i yau, na nodra bulumakau, kei na veika kece sara era taukena? Ia oqo, me da sa vakadonuya vata mada me ra sa tiko ga kei keda.” 24Era sa qai mai vakadonuya vata yani na lewe ni koro kece na ka erau kaya o Amori kei Sikemi, ka ra sa mani cilivi kece sara na nodra tagane.
25Ni sa oti e tolu na siga, ni ra se malumalumu tu ga na tagane ena nodra cilivi, erau sa qai taura na nodrau i seleiwau e rua na luve i Jekope tagane, o Simione kei Livai, ka rau ganei Taina, ka lako lo yani ki na koro, ka vakamatei ira kece sara na tagane, 26ka vaka talega kina o Amori kei Sikemi na luvena tagane. E rau sa qai kauti Taina mai na vale i Sikemi ka lako yani. 27Ni oti na veivakamatei, era sa lako talega mai na vo ni luve i Jekope ka tokia na i yau ni koro o ya, baleta ni ra sa vakacacana na ganedratou. 28Era sa kauta na sipi, na bulumakau, na asa, kei na ka kecega sa tu e loma ni koro kei na nodra i teitei. 29Era sa kauta na nodra i yau vakamareqeti kece, na luvedra, na watidra, kei na ka kecega sa tu ena loma ni nodra veivale.
30A sa qai tukuna o Jekope vei Simione kei Livai, “O drau sa kauta mai vei au na leqa ka vakavuna me'u na cati ena kedra maliwa na kai Kenani kei ira na Perisaiti, kei ira na lewenivanua oqo. Sa sega ni levu na noqu tamata; ia kevaka era sa cokovata me ra saqati au, na nodatou vuvale taucoko sara ena vakarusai.”
31Ia erau sa kaya, “E dodonu li vua me vakayacora na i tovo lolovira ka dau vakayacori ga vei ira na yalewa dauvolitaki ira?”
Currently Selected:
VAKATEKIVU 34: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
