VAKATEKIVU 33

E Rau sa Sota o Jekope kei Iso

1A sa raici Iso o Jekope ni sa lako tiko mai vakayawa vata kei na 400 na nona tamata. Sa qai wasei ira na luvena o koya vei Lia, kei Raijeli, kei rau na nodrau yalewa dauveiqaravi. 2E a lesi rau na yalewa dauveiqaravi kei iratou na luvedrau me ratou liu sara tiko, ka tarava yani o Lia kei iratou na luvena, ka qai muri sara yani o Raijeli kei Josefa. 3A sa qai liu sara vei ira kece o Jekope, ka sa cuva vakavitu ki na qele, ni sa toro voleka yani vei tuakana. 4Ia sa cici yani o Iso me sotavi koya, ka sa mokota, ka reguci koya, ka rau sa ia na veitagicaki. 5Ni sa veiraiyaki o Iso ka raici iratou na yalewa kei ira na gone, a sa qai taroga, “O ira mai vei oqo era sa tiko vata kei iko?”

A sa kaya o Jekope, “Sai ira saka oqo na gone sa solia mai vei au na Kalou me vaka na nona yalovinaka.” 6E rau sa qai lako mai na yalewa dauveiqaravi kei iratou na luvedrau, ka cuva vua; 7ka tarava mai o Lia kei ratou na luvena, ka qai muri sara mai o Josefa kei Raijeli; era sa lako yani ka cuva vua.

8Sa qai taroga o Iso, “E vakacava ga na matailawalawa kei na qele ni manumanu era se liu taumada mai? A cava na kena i balebale o ya?”

A sauma o Jekope, “Oqori na veika me'u kune loloma kina vua na noqu turaga.”

9Ia sa kaya o Iso, “I taciqu, sa rauti au vinaka na veika au sa taukena; mo la'ki maroroya ga na ka sa tu vei iko me nomu.”

10A sa kaya o Jekope, “E sega! Au sa kerea me kua. Ni kevaka o ni sa lomani au, ni taura na noqu i loloma; na noqu raica na matamuni sa vaka na noqu raica na mata ni Kalou, ia o ni sa ciqomi au ena yalololoma. 11Yalo vinaka, ni ciqoma na i solisoli oqo ka'u sa kauta mai me nomuni, baleta ni sa vakalougatataki au na Kalou ka sa solia vei au na veika taucoko e ganiti au.” A sa cikevi koya matua sara o Jekope me yacova ni sa vakadonuya.

12A sa kaya o Iso, “Me daru sa gole yani. Au na liu vei iko.”

13A sauma o Jekope, “O ni sa kila na noqu turaga ni ra se malumalumu na gone, ka dodonu me'u nanumi ira talega na manumanu kei na luvedra. Kevaka era vakusakusataki ena loma ni dua mada ga na siga, era na mate taucoko. 14Mo ni yalovinaka ka liu yani, ka'u na muri yani vakamalua, ka me vakatautaki ena totolo ni nodra toso na manumanu kei ira na gone me yacova ni daru sota yani mai Itomi.”

15Sa qai kaya o Iso, “Me'u lesia mada eso na noqu tamata me ra salavata mai kei iko.”

A sa sauma o Jekope, “E sega ni kilikili me vakakina, ka ni'u sa gadreva ga mo ni yalololoma vei au.”#33.15 ka ni'u sa gadreva… yalololoma vei au; se ka vakavo ga kevaka sa dodonu oqo vei kemuni. 16Ena siga o ya, a sa qai gole yani e liu o Iso me lesu tale ki Itomi. 17Ia sa gole yani ki Sukoci o Jekope ka tara kina e dua na nona vale kei na vanua ni vakaruru ni nona manumanu. Oqori na vuna e vakatokai kina na vanua koya me o Sukoci.#33.17 Sukoci: Na yaca oqo e kena i balebale “vanua ni vakaruru” ena vosa vakaiperiu.

18A sa yaco bula mai o Jekope ki Sikemi ena vanua o Kenani ena nona i lakolako mai Mesopotemia, ka sa mai vakaitikotiko donuya na koro. 19E a volia na tiki ni qele oqori mai vei ira na kawa i Amori na tamai Sikemi ena 100 na tiki ni siliva.#Josua 24.32; Joni 4.5 20A sa tara cake mai kea e dua na i cabocabonisoro, ka sa vakatoka na yacana me o Na Kalou, Na Kalou ni Isireli.#33.20 Na Kalou na Kalou ni Isireli: mai na vosa vakaiperiu El Elohe Israel; ka dua na kena i vakavakadewa Sa kaukauwa na Kalou i Isireli.

Currently Selected:

VAKATEKIVU 33: FNV

Highlight

Copy