VAKATEKIVU 32

Sa Vakavakarau o Jekope me Sotavi Iso

1Ni sa gole yani o Jekope ena nona i lakolako, a sa qai sota kei ira na agilosi ni Kalou. 2Ia ni sa raici ira, sa qai kaya, “Oqo na keba ni Kalou”; ka sa qai vakatoka kina na vanua o ya me yacana o Meneimi.#32.2 Meneimi: Na yaca oqo e kena i balebale “e rua na keba” ena vosa vakaiperiu.

3Sa qai mani tala yani eso na mata o Jekope me ra liu vei Iso na tuakana, ki na vanua o Sia ena matanitu o Itomi. 4A sa vakaroti ira me ra kaya: “Dou la'ki vosa vakaoqo vua na noqu turaga o Iso, ‘E kaya mai vakaoqo na nomuni tamata o Jekope; Au sa tiko voli ga kei Lepani, ka sa dede kina na noqu lesu tale mai me yacova mai na gauna oqo. 5Sa tu na noqu bulumakau, na asa, na sipi, na me, kei ira na nona tamata. Au sa talatala yani vua na noqu turaga, ka'u sa vinakata me'u kune loloma e matamuni.’ ”

6Era sa lesu mai na mata ka mai tukuna vei Jekope, “Keitou sa lako vua na tuakamu o Iso, ka sa lako tiko mai me tavaki iko. E salavata voli mai kei koya era lewe 400 na tamata.” 7A sa rere ka kidroa o Jekope, ka sa lako mai ka wasei ira vakarua na tamata era tiko kaya, ka vakakina na sipi, na bulumakau kei na kameli. 8Na nona vakasama sa kaya vakaoqo, “Kevaka e lako mai o Iso ka ravuta na i matai ni wasewase, era na rawa ni dro bula na kena i karua.”

9Sa qai masu o Jekope ka kaya, “Kemuni na Kalou i Epara-ama na tukaqu, na Kalou i Aisake na tamaqu, mo ni rogoci au mada! Oi kemuni ga sa kaya vei au me'u lesu tale ki na noqu vanua vei ira na wekaqu, ka o ni na cakava me vinaka na ka kecega sa yacovi au. 10Sa sega ni kilikili kei au na nomuni loloma tawa yalani kei na nomuni yalodina o ni sa vakaraitaka vei au na nomuni tamata. Au sa lako kosova na Joritani ena liga lala ka vakavo duadua ga na noqu i titoko; ia oqo, au sa lesu mai kei na rua na matailawalawa. 11Au sa kerei kemuni kina, mo ni yalololoma ka vakabulai au mai na liga i Iso na tuakaqu. Au sa rerevaki koya, de sa mani lako mai oqo ka mokuti keimami kece, ka okati kina o ira na yalewa kei na luvedra. 12Mo ni qai nanuma na nomuni vosa ni yalayala ena nomuni na cakava me vinaka na ka kecega sa yacovi au, ka vakalevutaka talega na noqu kawa me vaka na nuku ni matasawa, era na sega ni wiliki rawa.”#Vteki 22.17

13A sa moce mai kea ena bogi o ya o Jekope, ka sa wasea eso na ka e tu vua me i loloma vei Iso na tuakana; 14e 200 na me yalewa kei na 20 na ka tagane, e 200 na sipi yalewa kei na 20 na ka tagane, 15e 30 na tina ni kameli kei ira na luvedra, e 40na bulumakau yalewa ka 10 na ka tagane. 16A sa biuti ira vakaiwasewase na manumanu ka lesia yadua na nona tamata me ra vakatawana na veiqele ni manumanu. Sa qai kaya vei ira, “Dou liu yani, ka me veilutuki toka na i lakolako ni veiqele ni manumanu yadua.” 17Sa qai vakaroti koya sa liutaka na i lakolako, ka kaya “Ni sa sotavi iko o Iso na tuakaqu ka tarogi iko, ‘O cei na nomu turaga? O sa lako tiko ki vei? E nei cei na manumanu oqo?’ 18Mo qai kaya, ‘Sa nei Jekope na nomuni tamata, era sa kau mai me i loloma vei Iso na noqu turaga; ia sa muri tiko mai o Jekope.’ ” 19Sa vakaroti koya talega vakakina na kena i karua kei na kena i katolu, kei ira kece era kauti ira yani na qele ni manumanu, me ra kaya talega na ka o ya vei Iso ni ra sa sota. 20Mo dou qai kaya, ‘Ia sa qai muri sara tiko mai o Jekope na nomuni tamata.’ ” A sa vakasamataka o Jekope, “Au na vakayalovinakataki koya ena i loloma sa kau oqo e liu; ka me rawa ni ciqomi au kina ena gauna keirau sota kina ena matana votu.” 21A sa vakauta yani e liu na i loloma, ka a moce ga ena keba o koya.

Veimulomulo kei na Kalou o Jekope

22Ena bogi vata ga o ya, a sa lako yani o Jekope kei rau na watina, kei rau na watina lalai, kei iratou na luvena e lewe tinikadua, ka lako kosova na Uciwai o Japoki. 23Ni sa kauti iratou oti yani ki tai kadua, a sa vakatalai ira talega yani ki tai kadua na ka kecega e taukena. 24A sa qai mai vo taudua ga yani o Jekope.#Osea 12.3-4

A sa qai lako mai e dua na tamata ka veimulomulo vata kaya me yacova na kida ni mataka. 25Ia ni sa raica na tamata o ya ni sa na sega ni qaqa rawa vei Jekope ena veimulomulo, a sa mokuta na dibina, ka mani veisiri kina na kena i sema. 26A sa kaya vua na tamata o ya, “Mo laivi au me'u lako; sa voleka mai na kida ni mataka.” Sa qai kaya o Jekope,

“Au na sega ni laivi iko me yacova ni o sa vosavakalougatataki au.”

27Sa qai taroga na tamata o ya, “O cei na yacamu?”

A sa sauma, “O Jekope,”

28Sa qai kaya tale na tamata o ya, “Ena sega tale ni vakatokai me yacamu o Jekope, ia sa na vakatokai me yacamu o Isireli;”#32.28 Isireli: Na yaca oqo e rogorogo vaka na “sa veimulomulo kei na Kalou” se “sa sasaga na Kalou” ena vosa vakaiperiu. #Vteki 35.10 baleta ni o sa veimulomulo kei na Kalou vata kei ira na tamata, ka sa rawata na qaqa.

29Sa qai kaya o Jekope, “Yalovinaka, mo kaya mada mai vei au na yacamu.”#Dvei 13.17-18

Ia e sa qai kaya na tamata o ya, “A cava o sa taroga kina na yacaqu?” Sa qai vakalougatataki koya mai kea.

30A sa kaya o Jekope, “Au sa raica na mata ni Kalou, ia ka'u se bula tikoga”; ka sa vakatoka kina na vanua o ya o Jekope me yacana o Penieli.#32.30 Penieli: Na yaca oqo e kena i balebale “na mata ni Kalou” ena vosa vakaiperiu. 31A sa cadra mai na matanisiga ni sa biuti Penieli o Jekope, ka sa lako vakaca yani ena vuku ni dibina. 32O ya na vuna era sega kina ni dau kania na Isireli na ua mai na i sema ni dibi me yacova na siga edaidai, baleta ni a laumoku na ua ni dibi i Jekope.

Currently Selected:

VAKATEKIVU 32: FNV

Highlight

Copy