VAKATEKIVU 31

Sa Dro o Jekope

1A sa rogoca o Jekope ni ratou sa kaya voli na luve i Lepani tagane vakaoqo: “Sa taura ga o Jekope na veika kecega nei tamadatou. Na nona i yau kece sara e rawata ga mai na i yau nei tamadatou.” 2A sa raica talega o Jekope ni sa veisau na i tovo ni veimaliwai i Lepani ki vua, ni sa sega ni vaka e liu. 3Ia sa qai kaya vei Jekope ko Jiova, “Mo lesu tale ki na nodra vanua na nomu qase, kivei ira na wekamu; ia au na tiko ga kei iko.”

4Sa qai talatala yani o Jekope vei Raijeli kei Lia me ratou la'ki sota yani i veikau, ena vanua era tiko kina na nona qele ni manumanu. 5A sa kaya vei rau, “Au sa raica ni sa veisau na i tovo ni veimaliwai nei tamamudrau vei au, ka sa sega ni vaka e liu; ia sa tiko vata ga kei au na Kalou i tamaqu. 6O drau sa kila ni'u sa qaravi tamamudrau ena noqu i gu taucoko. 7Ia sa qai veidabuitaki au ga o koya, ka veisautaka vakatini na kequ i sau. E dina ni sa yaco oqo, ia sa sega ni vakatarai koya na Kalou me vakamavoataki au. 8Ena gauna ga sa kaya kina o Lepani, ‘Me kemu i sau na me tavukadiridiri,’ era sa vakasucuma na me tavukadiridiri na me taucoko sara. Ni sa kaya, ‘Me kemu i sau na me veivolavolai,’ era sa vakasucuma na me veivolavolai na me taucoko sara. 9Na Kalou sa kauta tani na manumanu i tamamudrau ka solia vei au.

10“Ena gauna era dau veidauci kina na manumanu, au sa qai tadra ka raici ira na me tagane veivolavolai, tavukadiridiri kei na ka tavutonotono ena kedra maliwa na ka yalewa. 11Sa qai kaya vei au na agilosi ni Kalou ena noqu tadra, ‘I Jekope!’ Au sa qai kaya, ‘Oi au saka oqo.’ 12Sa qai kaya tale mai, ‘Mata cake ka raica, o ira na sipi tagane kece era veiyacovi tiko oqo era sa veivolavolai, tavukadiridiri, ka tavutonotono. Au sa vakayacora na ka oqo baleta ni'u sa raica na ka kece sara sa vakayacora o Lepani vei iko. 13Oi au na Kalou ka a rairai vei iko mai Peceli ena vanua o sa lumuta kina e dua na vatu i vakananumi ka bubului kina vei au. Mo vakarau, mo sa biuta sara ga na vanua oqo ka lesu yani ki na nomu vanua ni sucu.’ ”#Vteki 28.18-22

14E rau sa qai kaya vei Jekope o Raijeli kei Lia, “Sa sega tale ni dua na ka sa vo ena vale i tamai keirau me neirau. 15O koya sa okati keirau me vaka na vulagi. Sa volitaki keirau oti, ka sa vakayagataka talega na keirau i voli. 16Na i yau kece sara sa kauta tani na Kalou mai vei tamai keirau sa nodatou vata kei ira na luvedatou. Mo vakayacora ga na veika sa kaya vei iko na Kalou.”

17Sa mai vakarau yani o Jekope; ka vakavodoki rau na watina kei ira na luvena ena kameli. 18A sa kauti ira kece na nona manumanu kei na ka kecega sa rawata mai Mesopotemia, ka sa lako yani vei Aisake na tamana ki na vanua o Kenani.

19A sa lako tu o Lepani me la'ki kotiva na nona sipi; ia sa qai butakoci ira na kalou matakau ni vuvale i tamana o Raijeli. 20A sa lawakitaki Lepani na kai Aramea o Jekope ena nona a sega ni vakaraitaka vua na nona lako. 21A sa kauta na ka kece sara sa taukena ka lako vakusakusa yani. E a kosova na Uciwai na Uferetisi ka gole yani vaka ki na vanua veiulunivanua o Kiliati.

Sa Cici Muri Jekope o Lepani

22Ena i katolu ni siga, a sa qai tukuni vei Lepani ni sa dro o Jekope. 23Sa qai kauti ira yani na nona tamata o Lepani ka cici muri koya, ia ni oti e vitu na siga, sa qai la'ki toboki koya ena delana mai Kiliati. 24Ia ena bogi, a sa rairai na Kalou vei Lepani na kai Aramea ena tadra ka kaya vua, “Qarauna mo kakua ni vakasosataki Jekope ena nomu kaya vua e dua na ka vinaka se ka ca.” 25Sa qai yaco yani ka lako siviti Jekope o Lepani. A sa birika na nona valelaca o Jekope ena veidelana, ka sa birika na nona valelaca o Lepani kei ira na nona tamata ena vanua veidelana mai Kiliati.

26Sa qai kaya vei Jekope o Lepani, “A cava o sa cakava? A cava o veidabuitaki au kina, ka drotaki rau mai kina na luvequ yalewa me vaka na yalewa sa vesu ena i valu? 27A cava o lawakitaki au kina ni o sa dro vakavuni mai, ka o sega ni bau kaya vei au? Kevaka beka mo a kaya vei au, ke'u a talaci iko mai ena nomu i lakolako ena marau kei na sere, ena i vakatagi tibereli kei na api. 28O sega mada ga ni solia vei au me'u bau reguci rau na luvequ yalewa kei ira na makubuqu. Sa dua na ka lialia o sa cakava oqo! 29E tu vei au na kaukauwa me'u vakacacani iko; ia ena bogi, a sa vosa vei au na Kalou i tamamu me'u kakua ni vakasosataki iko ena dua na ka, se vinaka se ca. 30Au sa kila ni o sa lako tani mai, baleta ni o sa gadreva mo lesu tale ki na vale i tamamu; ia na cava ga o butakoci ira mai kina na noqu veikalou matakau?”

31Sa qai kaya o Jekope, “Au a rere, baleta ni'u sa nanuma ga ni o na kauti rau tani mai vei au na luvemu yalewa. 32Ia kevaka o kunea rawa na nomu veikalou vua e dua vei keimami, ena vakamatei o koya. Ia oqo, mo vakaraica na veika sa nomu ka kauta yani, ka ra sai vakadinadina ni ka oqo o ira na nodaru tamata.” A sa sega ni kila o Jekope ni a butakoca mai o Raijeli na veikalou ni vuvale i Lepani.

33Sa qai curu yani o Lepani ena valelaca i Jekope ka vaqaqara kina, ka vakakina ena valelaca i Lia, kei na nodrau na yalewa bobula, ia sa sega ni kunea e dua na ka. Ni sa lesu mai na valelaca i Lia, sa qai la'ki curu ki na valelaca i Raijeli ka sega ga ni kunea e dua na ka. 34A sa kauti ira taumada na veikalou ni vuvale i tamana o Raijeli ka vunitaki ira ena i dabedabe ni kameli, ka sa dabeca toka. A sa vaqaqara ena loma kece ni valelaca o Lepani, ka sega ni kunei ira. 35Sa qai tukutuku cake mai o Raijeli vei tamana, “Me kakua mada ni cudruvi au na noqu turaga, baleta ni'u sega ni rawa ni tucake e matamuni, ka ni sa yacovi au tiko na noqu matenivula.” E a vakasaqaqara o Lepani, ka sega ga ni kunea na nona veikalou ni vuvale.

36Sa qai vakatekivu me cudru o Jekope ka vosavosa vei Lepani ka kaya, “Na i valavala ca cava au sa cakava? A cava na noqu cala o sa cici muri au mai kina? 37Ia oqo ni o sa mai vakaraica kece na noqu i yaya, o sa bau kunea kina li e dua na i yaya ni nomu vale? Vakaraitaka mai ena matadra na noqu tamata kei ira na nomu tamata, ka me ra lewa ena vukudaru. 38Sa ruasagavulu na yabaki na noqu tiko vata kei iko, ka sa sega sara ni bau dua na nomu sipi yalewa se me yalewa me vakasucu dole; ka'u sa sega ni bau kania e dua na sipi tagane mai na nomu qele ni sipi. 39Au a sega ni kauta mai vei iko na sipi sa vakamatea na manumanu kila, ka'u sa sauma ga vakataki au. Ia o sa dau vinakata me'u sauma na manumanu sa butakoci ena siga, se ena bogi. 40Sa vuqa sara na gauna au vosota voli kina na katakata ni siga kei na batabata ni bogi; ka'u sega ni dau moce rawa. 41Sa vaka o ya na ruasagavulu na yabaki au tiko kina ena nomu vale. E tinikava na yabaki na noqu cakacaka ena vukudrau na luvemu yalewa, ka yabaki ono na noqu qaravi ira na nomu manumanu, ka o sa veisautaka vakatini na kequ i sau. 42Kevaka me a sega ni tiko kei au na Kalou ni noqu qase, na Kalou i tamaqu, na Kalou sa dau qarava o Aisake, ke rairai o a vakatalai au tani yani ena liga lala. Ia sa raica na Kalou na noqu rarawa kei na cakacaka ka'u sa cakava, ka sa vunauci iko kina ena bogi.”

Na Veiyalayalati i Jekope kei Lepani

43Sa qai sauma o Lepani ka kaya vei Jekope, “O rau na yalewa oqo erau luvequ; o iratou na luvedrau e ratou sa noqu, kei na qele manumanu oqo era sa noqu. Na ka kece sara o sa raica eke era sa noqu. Ia me vaka ni sa sega ni rawa ni'u cakava e dua na ka me baleti rau na luvequ yalewa kei na luvedrau, 44au sa tu vakarau me'u cakava e dua na veiyalayalati kei iko. Me daru tara caka mada e dua na i binibini vatu me i vakananumi ni nodaru veiyalayalati.”

45Sa qai taura e dua na vatu o Jekope ka vakaduria me vatu ni vakananumi. 46A sa kaya talega vei ira na nona tamata, “Dou tomika mai eso na vatu,” era sa vakayacora vakakina ka binia vata. Era sa qai kana ena yasa ni binibini vatu o ya. 47A sa vakatoka o Lepani me yacana o Jikari Saetuca;#31.47 Jikari Saetuca: Na yaca oqo e kena i balebale “na i binibini me i vakananumi” ena vosa vaka-arameka. ia o Jekope sa vakatoka me yacana o Kaleti.#31.47 Kaleti: Na yaca oqo e kena i balebale “na i binibini me i vakananumi” ena vosa vakaiperiu. 48Sa qai kaya o Lepani “Na i binibini vatu oqo me sai vakadinadina vei kedaru ena siga edaidai.” Oqori na vuna sa vakatokai kina na vanua o ya me yacana o Kaleti. 49A sa kaya talega o Lepani, “Me qai yadravi iko kei au matua ko Jiova ni daru sa tawase ka dui tiko tani.” A sa vakatoka kina me yacana o Misipa.#31.49 Misipa: Na yaca oqo e balebale vaka na “vanua ni yadra” ena vosa vakaiperiu. 50Sa qai kaya tale o Lepani vei Jekope, “Kevaka o na vakasosataki rau na luvequ yalewa se vakawati tale kei na so na yalewa tani, ka'u sa sega ni kila na veika sa yaco oqo, ia mo nanuma deivaki ga ni sa yadravi kedaru tiko na Kalou.” 51“Raica, oqo na i binibini vatu au sa binia cake ena kedaru maliwa, kei na vatu ni vakananumi na kena oqo. 52Oi rau na binibini vatu oqo kei na vatu ni vakananumi sai vakadinadina. Au na sega ni lako sivita na i binibini vatu oqo me'u la'ki vakasosataki iko, ka mo kakua talega ni lako sivita o iko se lako sivita na vatu ni vakananumi mo mai vakasosataki au. 53Na Kalou i Epara-ama kei na Kalou i Neori#31.53 Epara-ama… Neori: O Epara-ama e tukai Jekope ka tukai Lepani o Neori. ena vakataulewa ena kedaru maliwa.” Sa mai bubului yani o Jekope ena yaca ni Kalou sa dau qarava o Aisake na tamana. 54A sa vakamatea e dua na manumanu, ka vakacabora me i madrali ena ulunivanua ena bogi o ya, ka sureti iratou na wekana me ra kana vata. Ni oti na nodra kana, era sa moce ena ulunivanua. 55Ena mataka lailai ka tarava, a sa yadra cake o Lepani ka reguci ira na makubuna kei rau na luvena yalewa, ka vakalougatataki iratou; a sa qai lesu yani ki na nona i tikotiko.

Currently Selected:

VAKATEKIVU 31: FNV

Highlight

Copy