LAKO YANI 40

Kena Vakaduri kei na Vakatabui ni Vale ni Veitavaki

1A sa vosa ko Jiova vei Mosese, ka kaya, 2“Mo vakaduria cake na Vale ni Veitavaki ena i matai ni siga ni matai ni vula. 3Mo biuta kina na Kato ni Veiyalayalati ka tiko kina na vatu ni vunau ka mo qai latia ena i latilati. 4Kauta ki loma na teveli ka tuvana vinaka na veika e lesi me tu e delana. Kauta talega na i tutu ni cina ki loma ka tuvana na kena cina e delana. 5Biuta na i cabocabonisoro koula me dau vakamai kina na ka boi vinaka ena mata ni Kato ni Veiyalayalati, ka vakarubeca na i latilati ena katuba ni vale tabu. 6Biuta ena mata ni Vale ni Veitavaki na i cabocabo ni vakacaboisoro kama. 7Biuta na beseni ni vuluvulu ena veimama ni Vale ni Veitavaki kei na i cabocabonisoro, ka tawana ena wai. 8Vakaduria wavoki na kena bai ka vakarubeca na i latilati ena matamata ni bai.

9“Ia mo qai kauta na waiwai ni veilumuti ka lumuta na vale tabu kei na ka kece sara sa tu e loma, mo vakatabuya ka ra sa na yaco me ka tabu. 10Ia mo qai lumuta na i cabocabonisoro kama kei na kena i yaya kece, vakatabuya na i cabocabonisoro me na qai tabu sara kina. 11Lumuta na beseni ni vuluvulu kei na kena i tutu, ka vakatabuya talega.

12“Ia mo qai kauti Eroni mai kei iratou na luvena tagane ki na katuba ni Vale ni Veitavaki ka mai vui iratou ena wai, 13vakadarama vei Eroni na efoti, lumuti koya, vakatabui koya, ka me rawa kina ni qaravi au ena cakacaka vakabete. 14Kauti iratou talega mai na luvena tagane ka vakadarama vei iratou na kote, 15ia mo qai lumuti iratou me vaka na nomu a lumuti tamadratou me na rawa kina ni ratou qaravi au ena cakacaka vakabete: na nodratou lumuti sa na yaco kina me ratou bete ena veigauna kecega.”

16A sa cakava o Mosese na ka taucoko sara e vakarota vua ko Jiova.

17Ena i matai ni siga ena i matai ni vula ena i karua ni yabaki sa mai duri kina na vale tabu.

18A vakaduria o Mosese na vale tabu; a vakadavora na kena i tutu, ka vakaduria cake na kena feremi, ka vakataqara na i coka ni vale, ka cobara na kena duru. 19A sa tevuka na laca ena dela ni vale tabu ka ubia ena dua tale na laca me kena i tuvi e tuba me vaka na ka sa vakarota ko Jiova. 20A sa qai kauta mai na vatu raraba ni vunau ka biuti rau ki na loma ni Kato ni Veiyalayalati, a daramaka na i vua ki na i tubetube mokimokiti ni kato, ka vakataqara e delana na i sogo. 21A sa qai kauta na Kato ni Veiyalayalati ki na loma ni vale tabu ka vakaliliga na i latilati me tabonaka na kato, me vaka sa vakarota vei Mosese ko Jiova.

22A sa biuta na teveli ki na Vale ni Veitavaki ena yasana ki na vualiku ena taudaku ni latilati, 23ka tuvana e delana na madrai ena mata i Jiova, me vaka sa vakarota ko Jiova. 24A sa biuta na i tutu ni cina o Mosese ena loma ni Vale ni Veitavaki me veibasai kei na teveli ena yasa ni Vale ki na ceva, 25ka tutuvaka na cina ena mata i Jiova, me vaka na i vakaro e sa tauci. 26A sa biuta na i cabocabonisoro koula ena loma ni Vale ni Veitavaki ena mata ni latilati, 27ka vakama e delana na ka boi vinaka, me vaka na i vakaro i Jiova. 28A sa vakaliliga na i latilati ena katuba ni vale tabu, 29ka vakarautaka na i cabocabonisoro kama ena mata ni latilati, ka vakacabora e delana na i soro kama kei na i madrali laukana me vaka sa vakarota vei Mosese ko Jiova. 30A sa qai vakarautaka na beseni ni vuluvulu ka la'ki biuta ena veimama ni Vale ni Veitavaki kei na i cabocabonisoro, ka tawana kina na wai. 31E ratou sa dau vuluvulu ka vuya talega na yavadratou e kea o Mosese, ka vakakina o Eroni kei iratou na luvena tagane 32ena gauna ga e ratou sa curu kina ki na Vale ni Veitavaki se ki na i cabocabonisoro, me vaka sa vakarota ko Jiova. 33A sa vakaduria na bai wavokita na vale tabu kei na i cabocabonisoro ka vakaliliga na i latilati ni matamata ni bai. A sa vakaotia na cakacaka kece sara o Mosese.

Na O kei na i Serau

(Tiko 9.15-23)

34Sa qai solega na Vale ni Veitavaki na o, ka vakasinaiti na vale tabu ena i serau i Jiova.#1Tui 8.10-11; Aisea 6.4; Isi 43.4-5; Vtaki 15.8 35Ena vuku ni ka oqo, sa sega ni curu rawa kina ki na Vale ni Veitavaki o Mosese. 36Ena gauna ga e talave cake kina na o mai na dela ni vale tabu, era sa cavutu talega o ira na Isireli me ra dewa tale ki na dua tale na vanua. 37Ia kevaka e sega ni talave cake na o, era na sega ni toso tale ki na dua na vanua na Isireli me yacova na siga sa talave cake kina. 38Ena nodra i lakolako na Isireli, era dau raica na o nei Jiova ena dela ni vale tabu ena siga, kei na bukawaqa ena bogi.

Currently Selected:

LAKO YANI 40: FNV

Highlight

Copy