LAKO YANI 39

Na Nodra i Sulu na Bete

(Lako 28.1-14)

1Na i sulu vakabete rairai vinaka sa cula mai na vuti ni sipi karakarawa, lokaloka, kei na wa damudamu me ra daramaka na bete ni ra veiqaravi ena Tikina Tabu. A sa vakarautaki na i sulu tabu i Eroni me vaka na veika sa vakarota ko Jiova vei Mosese.

2Sa caka na efoti ena wa koula, kei na lineni matailalai culai vakavinaka roka karakarawa, lokaloka, kei na damudamu. 3Era a tukia na tiki ni koula me mamare, ka kotikotiva me vaka na wa me qai culai vata kei na i sulu lineni matailalai ena wa karakarawa, lokaloka, kei na damudamu. 4Era a cula na i wabale me vauca na taba ki na efoti, ka rau sema ena tabana ruarua. 5Na kena i oro tali vakamaqosa sa caka talega mai na veiyaya ni culacula oqori, ka sa culai vata ki na efoti me sa dua ga na i sulu, me vaka sa vakarota vei Mosese ko Jiova. 6Era a cakava eso na vatu talei ka ukutaka wavoki ena koula; era a ceuti kina na yacadra na luve i Isireli me vaka na ceuti ni mama. 7A sa vakacobari ira ena i wabale ni taba ni efoti, me ra vatu ka dau vakananumi kina na luve i Isireli, me vaka sa vakarota vei Mosese ko Jiova.

Kena Caka na i Sulu ni Lomaserena

(Lako 28.15-30)

8A sa cakava o koya na i sulu ni lomaserena mai na veika vata ga sa vakayagataki ena kena caka na efoti kei na kena wa talitali lineni sa cula vakamaqosa. 9Era a cakava me tautauvata na yasana vava ka lobia rua me 22 na senitimita na kena balavu ka 22 na senitimita na kena raba. 10Era a cakava kina e va na i yatu vatu talei: ena i matai ni yatu me toka kina na rupi, kei na topasa, kei na kapakuli; 11ena i karua ni yatu e toka kina na emeralita, kei na safaia, kei na daimani; 12ena i katolu ni yatu e toka kina na takoisi, kei na aketi, kei na amecisita; 13ena i kava ni yatu e toka kina na berili, kei na okisa, kei na jasipa. Era a ukutaki wavoki ena koula. 14E tinikarua na vatu talei ka sa volai kina na yacadra na luve i Isireli. Era sa ceuti me vaka na ceuti ni mama, a sa volai ena veivatu yadua na yaca ni mataqali e tinikarua. 15Me baleta na i sulu ni lomaserena, era sa cakava kina na sinucodo ka buli ena koula, ni sa muloci me vaka na dali. 16Era a cakava e rua na i wasewase ni ukuuku koula kei na rua na mama koula ka vakacobari rau na mama koula ena tutu ruarua ni i sulu ni lomaserena. 17Era a bukia na mua ni wa koula ruarua ki na tutu ni mama ruarua ni sulu ni lomaserena, 18era a bukia vata na mua ni wa ruarua ki na i wasewase e rua ni ukuuku, ena sala oqo era sa sema kina ena mata ni wabale ni efoti. 19Era a cakava e rua na mama koula ka vakacobara ki na tutuna e ra ni i sulu ni lomaserena, mai na batibatina e loma ka volekata na efoti. 20Era a cakava e rua na mama koula ka vakacobara ena mata ni ruku ni wabale e rua na efoti, volekata na i sema ena yasa ni oro ki cake. 21Era a qai vesuka vata na mama ena i sulu ni lomaserena ki na mama ni efoti ena wa karakarawa, ka me koto na i sulu ni lomaserena ena dela ni oro ka me kakua ni tasere mai na efoti, me vaka sa vakarota vei Mosese ko Jiova.

Kena Caka na i Sulu Vakabete Tale Eso

(Lako 28.31-43)

22A talia talega o koya na kote balavu ni efoti ena vuti ni sipi karakarawa. 23Na qara ka toka e lomadonu ni kote balavu e vaka e dua na qara ena dua na kote ni valu. Na bati ni qara e cula wavoki me kakua ni rawa ni kadresu. 24Ena belena sara e ra, era sa cakava kina na pomekaraneti ena vuti ni sipi karakarawa, lokaloka kei na damudamu, ka vakakina na wa talitali sa cula vakamaqosa. 25Era a cakava eso na lali ena koula ka ra biuti ira ena maliwa ni pomekaraneti wavokita taucoko sara na bele ni kote balavu e ra; 26ka ra veilutuki toka na lali koula kei na pomekaraneti me vakavolivolita na belena e ra ni kote balavu ni qaravi na cakacaka vakabete, me vaka sa vakarota vei Mosese ko Jiova.

27Era a cakava talega eso na kote ena lineni tali vakamatau me nei Eroni kei iratou na luvena tagane, 28kei na i vau ni ulu caka ena lineni matailalai, na i sala, na i sulu e loma sa caka ena lineni muloci vakamatau, 29na i oro ena i sulu lineni matailalai sa tali ena wa karakarawa, lokaloka, kei na damudamu ka sa ukutaki ena wa-talitali sa caka vakamaqosa, me vaka sa vakarota vei Mosese ko Jiova. 30Era a cakava na i ukuuku koula ka ra ceuta kina me vaka na ceuti ni dua na mama, “Vakatabui vei Jiova” me i vakaraitaki ni dua sa vakatabui vei Jiova. 31Era sa vesuka oqo ki na mua e liu ni vau ni ulu ena dua na wa karakarawa me vaka sa vakarota vei Mosese ko Jiova.

Kena Vakaoti na Cakacaka

(Lako 35.10-19)

32Sa qai oti na cakacaka kece sara ni Vale ni Veitavaki. Era a cakava na ka kece sara na Isireli me vaka na ka sa vakarota vei Mosese ko Jiova. 33Era a kauta mai vei Mosese na vale tabu; na valelaca, na kena i yaya kece sara, na i qaso, na kena feremi, na kau vakababa, na duru, kei na kena i tutu; 34na kena i ubi kuli ni sipi tagane sa boroi damudamu; na i ubi kuli-ni-manumanu vinaka sara; na i latilati e loma; 35na Kato ni Veiyalayalati ka tiko e loma na vatu ni vunau, na kena i vua, kei na kena i sogo; 36na teveli kei na kena i yaya kece sara, kei na madrai me vakacabori vua na Kalou; 37na i tutu ni cina koula, na kena veicina, na kena i yaya kece sara, kei na waiwai ni cina; 38na i cabocabonisoro koula; na waiwai ni veilumuti; na ka boi vinaka me vakacabori; na i latilati ni katuba ni vale tabu; 39na i cabocabonisoro parasa kei na kena lawalawa parasa, na kena i vua, kei na kena i yaya kece sara; na beseni ni vuluvulu kei na kena i tutu; 40na i latilati ni bai kei na kena duru vata kei na kena i tutu; na i lati ni matamata ni bai kei na kedra dali; na kedra i vakadei kei na i yaya kece sara ni veiqaravi ena Vale ni Veitavaki; 41kei na i sulu sa caka vakamaqosa me ra daramaka na bete ena loma ni Tikina Tabu, oqo na i sulu tabu i Eroni na bete kei iratou na luvena tagane. 42Era a cakava na Isireli na cakacaka kece sara me vaka sa vakarota vei Mosese ko Jiova. 43Ni sa raica o Mosese na nodra a vakayacora kece sara na veika sa vakarota ko Jiova, a sa qai vosavakalougatataki ira.

Currently Selected:

LAKO YANI 39: FNV

Highlight

Copy