LAKO YANI 37
37
Na Kato ni Veiyalayalati
(Lako 25.23-30)
1A sa taya o Bisaleli na Kato ni Veiyalayalati ena kau akasia; a sa 110 na senitimita na kena balavu, e 66 na senitimita na kena raba, kei na kena cere e 66 na senitimita talega. 2A sa boroya na lomana kei na dakuna ena koula dina, ka cakava e dua na beleti koula me volita. 3A sa cakava e va na i daradara ni i vua mokimokiti ena koula, me dau colati kina ka vakacobara e tutuna vava, me rua na i daradara ni i vua mokimokiti ena dua na yasana ka rua ena yasana kadua. 4A sa cakava eso na i vua ena kau akasia ka ubia ena koula. 5A sa daramaka na i vua ena qara ena tutu ni kato vava ni veiyalayalati, me dau colati kina. 6Sa qai cakava na i sogo ni kato ena koula; e 110 na senitimita na kena balavu ka 66 na senitimita na kena raba. 7A sa bulia e rua na jerupi ena koula lautuki me rau yadua na mua ni sogo ni Kato ni Veiyalayalati, 8e dua na jerupi ena dua na muana kei na dua tale ena muana kadua. 9E rau sa vakatetaba toka e cake na jerupi ka vakaruguta na i sogo ni Kato ni Veiyalayalati na tabadrau: e rau sa qara vata ki loma, ka wanonova na i sogo ni Kato ni Veiyalayalati.
Na Teveli ni Madrai e Cabori Vua na Kalou
(Lako 25.23-30)
10A sa taya talega o koya na teveli ena kau akasia, ka 88 na senitimita na kena balavu, e 44 na senitimita na kena raba, ka 66 na senitimita na kena cere. 11A sa boroya ena koula dina ka cakava wavoki na batibatina ena koula. 12A sa cakava wavoki e dua na kau me tutuna ka 75 na milimita na kena raba, ka cakava wavoki na batibatina ena koula. 13A sa cakava ena koula e va na mama me i daradara ni i vua ka vakabira ki na tutuna vava me donuya na yavana e va. 14Na i daradara ni i vua me colati kina na teveli sa vakacobari volekata toka na tutuna. 15A sa cakava o koya na i vua me colati kina na teveli ena kau akasia ka boroya ena koula. 16A sa cakava na i yaya ni kana eso ena koula me ra dau tu ena dela ni teveli: na veleti, na bilo, na saqa, kei na beseni ni i soro liviraki.
Na i Tutu ni Cina
(Lako 25.31-40)
17A sa cakava na i tutu ni cina ena koula. A sa cakava na kena i tutu kei na tolona ena koula lautuki; na kena i ukuuku senikau, ka sa qai kubu kei na kena sa seraka, 18E ono na tabana ena yasana ruarua, tolu ena dua na yasana ka tolu tale ena dua na yasana. 19E tolu na bilo ka bulicaki vaka na senikau na amodi sa kubu cake me seraka mai e sa koto ena dua na tabana, ka tolu tale ena tabana ka tarava, ka vakaoqori na veitabana taucoko sara e ono ka sa tete mai na i tutu ni cina. 20Na tolo ni tutu ni cina sa va na kena i ukuuku senikau vaka na se ni amodi vata kei na kena sa qai kubu kei na kena sa seraka. 21E yadua na sena sa qai kubu mai ena ruku ni veitabana e ono, era sa veisa yarua. 22Na sena sa qai kubu kei na veitabana sa duavata ga kei na i tutu ni cina. Sa caka mai ena dua ga na tiki ni koula lautuki. 23A sa cakava e vitu na cina, na kena i bokoboko kei na kena tere ena koula. 24A sa vakayagataka e 35 na kilokaramu na koula ena i tutu ni cina kei na kena i yaya kece.
Na i Cabocabonisoro ni Ka Boi Vinaka
(Lako 30.1-5)
25A sa cakava o koya na i cabocabonisoro ni ka boi vinaka ena kau akasia. A sa tautauvata na yasana vava, e 45 na senitimita na kena balavu ka 45 na senitimita na kena raba, ka 90 na senitimita na kena cere. Na ucuna momoto ena muana vava sa vakarautaki vata ga kei na i cabocabo mai na dua na tolo ni kau. 26A sa ubia na delana, na yasana vava, kei na ucuna momoto ena koula dina, ka cakava wavoki na batibatina koula. 27A sa cakava e rua na i daradara ni i vua mokimokiti koula ka vakamautaki ena ruku ni tutuna ena yasana ruarua me curumaki kina na i vua me dau colati kina. 28A sa taya na i vua ena kau akasia ka boroya ena koula.
Na Waiwai Tabu ni Veilumuti
(Lako 30.22-38)
29A sa cakava talega o koya na waiwai tabu ni veilumuti kei na ka boi vinaka, me vaka sa cakava na kena dau.#Lako 30.22-38
Currently Selected:
LAKO YANI 37: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
