LAKO YANI 36

Era Kauta mai na Tamata e Vuqa na i Solisoli

1O Bisaleli, Aoliapi, kei ira kece sara na matai a solia vei ira na vuku kei na kila-ka ko Jiova; era sa kila na cakacaka kecega sa vinakati me caka kina na vale tabu, me ra cakava na ka kecega me vaka sa vakarota ko Jiova.” 2Ia o Mosese a qai kacivi Bisaleli, Aoliapi kei ira kece na matai ka solia vei ira ko Jiova na kila-ka kei ira era via veivuke, ka tukuna vei ira me sa tekivu na cakacaka.

3Sa qai solia vei ira o Mosese na i solisoli kecega sa kumuni me baleta na tara ni vale tabu. Ia era tomana tikoga na Isireli na nodra soli-ka vei Mosese ena veimataka. 4Ena vuku ni ka oqo, era sa lako kece kina vei Mosese na matai era tara tiko na vale tabu, 5ka mai kaya vei Mosese, “Sa sivia na ka era kauta mai na tamata me baleta na cakacaka a vakarota ko Jiova me caka.”

6Sa qai kaya o Mosese me kacivaki e loma ni keba taucoko na i tukutuku oqo: “Sa vakaroti vei kemuni kece sara me sa kakua ni dua na tagane se yalewa me solia tale e dua na ka ni veivuke me baleta na vale tabu.” Na ka oqo sa qai tarovi ira na tamata ena nodra kauta tikoga mai na nodra i solisoli. 7Na i solisoli e sa kumuni rawa sa sivia tale na kena e nanumi me vakacavari kina na cakacaka.

Na Tara ni Vale Tabu

(Lako 26.1-37)

8Era sa tara na vale tabu o ira na kena dau vei ira na tamata cakacaka vakamatai kece sara. Sa caka oqo mai na tini na i latilati era sa caka mai na lineni matailalai roka karakarawa, lokaloka, kei na wa damudamu, ka qai culai vakamatau kina na kedra i yaloyalo na jerupi. 9Na balavu ni tiki ni sulu yadua e tau yatinikarua na mita, ka rua na mita na kena raba, ka tautauvata kece sara na kedra i vakarau. 10A sa culai ira vata e lima me dua na i wasewase, ka cakava vakakina na vo ni lima. 11A sa cakava eso na qara ena i sulu karakarawa ena tutu ni latilati e sau ena i sulu e rua e rau sa sema vata. 12A sa cakava e limasagavulu na qara ena i matai ni latilati kei na limasagavulu na qara me kena i sa ena i karua ni latilati 13A sa cakava e limasagavulu na i qaso koula ka semati rau vata kina na i latilati. Ia oqo sa qai mai taucoko kina na vale tabu.

14A sa qai cakava talega e tinikadua na i latilati vuti ni me, me ubi kina na vale tabu. 15Na tiki ni sulu yadua me tinikatolu na mita na kena balavu ka rua na mita na kena raba, ka tautauvata kece na kedra i vakarau. 16A sa cula vata e lima na tikina me dua, kei na kena vo e ono me dua tale. 17A sa cakava e limasagavulu na qara ena tutu ni matai ni latilati e limasagavulu na qara ena i karua ni latilati: 18A sa cakava e limasagavulu na i qaso parasa me rau sema vata kina na i latilati e rua me taucoko kina na vale tabu. 19A sa cakava e dua na i ubi ni vale tabu ena kuli ni sipi tagane sa boroi damudamu, kei na dua na i ubi kuli-ni-manumanu vinaka me delana.

20A sa cakava na feremi ni vale tabu mai na kau akasia ka me duri cake tu. 21Na feremi yadua e 4 na mita na kena balavu ka 66 na senitimita na kena raba, 22ka toka vata e rua na ucuna momoto ka tautauvata vinaka e rau basika cake tiko mai me semati ira vata na kena feremi. Sa caka kece vakaoqo na feremi ni vale tabu. 23A sa cakava o koya e ruasagavulu na feremi ni vale ki na yasa e donuya na ceva, 24ka vasagavulu na kena qara siliva me ra biu e botona, me yarua na kena qara ena boto ni dua na feremi me curu kina na ucuna momoto ni kena i sema e rua. 25A sa cakava talega e ruasagavulu na feremi me baleta na yasa ni vale tabu ki na vualiku, 26ka vasagavulu na kena qara siliva, me yarua ena dua na boto ni duru. 27Na daku ni vale tabu, ena yasana vaka ki na ra, a sa cakava me ono na kena feremi, 28ka cakava e rua na feremi me baleta na tutuna, ena daku ni vale tabu. 29Na kena feremi ena veitutuna oqo e rau vauci vata mai rukuna ka semati vata me yaco ki cake. Na feremi ruarua ena tutuna sa caka vakaoqo. 30A sa walu taucoko na feremi ka tinikaono na kedra qara siliva, e yarua ena boto ni feremi yadua.

31A sa cakava o koya e tinikalima na kau vakababa mai na kau akasia, me yalima ena feremi ka ra toka ena dua na yasa ni vale tabu, 32ka lima ena feremi era koto mai na yasana kadua, ka lima ena feremi mai na muana ki na ra, o ya ena daku ni vale tabu. 33A sa cakava o koya na kau vakababa e loma, me donuya na veimama ni duru mai na dua na yasana me yaco ki na yasana kadua. 34A sa ubia ena koula na feremi kece oqo, ka vakacobara kina eso na qara mokimokiti me daramaki kina na kau vakababa, ka ubia talega ena koula.

35A sa cakava talega na i latilati ena vuti ni sipi karakarawa, lokaloka kei na ka damudamu, vata kei na lineni qali vakavinaka ka cula vakamatau kina eso na i vakatakarakara ni jerupi. 36A sa cakava e va na duru ena kau akasia ka ubia ena koula, ka koula talega na kena i qaso. A sa cakava e va na i tutu siliva ni duru. 37A sa cakava e dua na i latilati me baleta na katuba ni vale tabu ena vuti ni sipi karakarawa, lokaloka, kei na wa damudamu, ka sa ukutaki ena lineni sa cula vakavinaka ka taliwataki vakamatau. 38A sa cakava o koya e lima na duru ka vakacobara kina na kedratou i ruberube, ka qai botana na domo ni duru kei na kedratou i vau ena koula. A cakava e lima na kena i tutu ena parasa.

Currently Selected:

LAKO YANI 36: FNV

Highlight

Copy