LAKO YANI 35

Tuvatuva me Muri ena Siga ni Vakacecegu

1A sa kacivi ira taucoko mai na lewenivanua e Isireli o Mosese, ka kaya vei ira, “Sai koya oqo na ka sa vakarota vei kemuni ko Jiova mo ni vakayacora: 2E ono na siga mo ni cakava kina na nomuni cakacaka, ia na i kavitu ni siga me vakatabui vei Jiova, me Siga ni Vakacecegu. Kevaka e dua sa cakacaka ena siga o ya, me na vakamatei.#Lako 20.8-11; 23.12; 31.15; 34.21; Vsoro 23.3; Vrua 5.12-14 3Mo ni kakua sara ni waqara e dua na buka ena nomuni vale ena Siga ni Vakacecegu.

Solisoli me Soli ki na Vale Tabu

(Lako 25.1-9)

4A sa kaya vei ira taucoko na lewenivanua e Isireli o Mosese, “Oqo na ka sa vakarota ko Jiova. 5Mo ni solia e dua na nomuni solisoli vei Jiova; laivi ira na daulomasoli me ra solia vei Jiova na koula, siliva, kei na parasa; 6na vuti ni sipi karakarawa, lokaloka kei na ka damudamu; na lineni vinaka sara; na i sulu e cula mai na vuti ni me; 7na i sulu kuli ni sipi tagane sa boroi damudamu; na kuli-ni-manumanu cula vakamatau; na kau akasia; 8na waiwai ni cina; na i saluwaki ni waiwai ni veilumuti kei na ka boi vinaka me vakamai; 9na vatu talei onikisa se na vatu talei me ukutaki kina na efoti kei na i sulu ni lomaserena na bete levu.

Na i Yaya ni Vale Tabu

(Lako 39.32-43)

10“Me ra lako kece mai na matai era tiko kei kemuni, me ra mai cakava na veika kece sara sa vakarota ko Jiova: 11na vale tabu, na kena i ubi, na kena i qaso, na kena i daradara kei na kena feremi, na i coka, na kena duru kei na kena qara; 12na Kato ni Veiyalayalati, na kena i vua, na i sogo ni kato, kei na i latilati me latia; 13na teveli, na kena i vua kei na kena i yaya kece, kei na madrai e cabori vua na Kalou; 14na i tutu ni cina me baleta na cina kei na kena i yaya; na kena cina kei na waiwai ni cina; 15na i cabocabonisoro ni ka boi vinaka kei na kena i vua, na waiwai ni veilumuti, na i saluwaki boi vinaka kei na latilati ni katuba ni vale tabu; 16na i cabocabonisoro kama kei na kena lawalawa parasa, na kena i vua kei na kena i yaya kece sara, na beseni ni vuluvulu kei na kena i tutu; 17na i latilati me baleta na kena bai kei na kena duru vata kei na kena i tutu, na i latilati ni sogo ni kena bai; 18na i vakadei ni vale tabu kei na kena dali, kei na i vakadei ni rara sa vakabai; 19na i sulu cula vakavinaka me baleta na cakacaka vakabete ena Tikina Tabu, na nodratou i sulu tabu o Eroni na bete kei iratou na luvena tagane.”

Era Kauta mai na Nodra i Solisoli na Tamata

20Ni oti na nona vosa, era sa lako tani mai na mata i Mosese o ira kecega na tamata. 21Era sa qai vakasoqoni vata mai, o ira yadua sa cokai na yalodra kei ira kece sa uqeti na lomadra, ka kauta mai na nodra i solisoli me tara kina na Vale ni Veitavaki i Jiova. Era kauta mai na ka kece e vinakati ena kena qaravi na sokalou kei na vakarautaki ni i sulu vakabete. 22Era sa lako mai na tagane kei na yalewa; o ira yadua era lomasoli me ra kauta mai na qato rairai vinaka, na sau, na mama, na i taube, kei na veimataqali ukuuku koula. Era sa kauta mai na i yaya koula na tamata yadua ka vakacabora me i solisoli vei Jiova. 23O ira yadua sa tu vei ira na vuti ni sipi karakarawa, lokaloka, se damudamu, na lineni vinaka sara, na i sulu vuti ni me, na kuli ni sipi tagane sa boroi damudamu se kuli-ni-manumanu vinaka sara, era sa dui kauta mai na ka era dui taukena. 24O ira kece e rawa ni ra solia na siliva se parasa, era sa kauta mai me nodra i solisoli vei Jiova; kei ira kece sa tu vei ira na kau akasia e rawa ni vakayagataki ena cakacaka era sa dui kauta mai. 25O ira kece na yalewa matai ena culacula, era sa kauta mai na lineni matailalai era sa cula kei na lineni roka karakarawa, lokaloka, kei na damudamu. 26O ira kece na marama ka vakauqeti na lomadra me ra vakayagataka na nodra taledi era sa cula na vuti ni me. 27O ira na qase era veiliutaki sa kauta mai na vatu onikisa kei na veivatu talei eso me ukutaki kina na efoti kei na i sulu ni lomaserena. 28Era kauta talega mai na i saluwaki kei na waiwai ni cina kei na waiwai ni veilumuti kei na ka boi vinaka. 29O ira kece na turaga kei na marama ni Isireli sa uqeti na lomadra me ra soli-ka ki na cakacaka sa vakarota ko Jiova vei Mosese, era sa solia vakakina vei Jiova ena yalo e galala.

O Bisaleli kei Aoliapi

(Lako 31.1-11)

30A sa kaya vei ira na Isireli o Mosese, “Sa digitaki Bisaleli na luve i Uri tagane, ka makubui Ua mai na mataqali i Juta ko Jiova. 31Sa vakasinaiti koya ko Jiova ena nona kaukauwa#35.31 kaukauwa; se Yalo Vakalou (tabu). ka solia vua na vuku, na yalomatua, na kila-ka ena veimataqali cakacaka kecega vakamatai, 32na kena vakasamataki na vakatakarakara rairai vinaka kei na kena buli ena koula, siliva kei na parasa; 33na ceuti ni vatu talei me i ukuuku, na ceuti ni kau, kei na cakacaka kecega vakamatai. 34Ko Jiova sa vakauqeti koya vata kei Aoliapi na luve i Eisimaki mai na mataqali i Tani me rau vakavulici ira tale eso ena cakacaka vakamatai. 35Sa solia vei rau ko Jiova na vuku me rau cakava na veimataqali cakacaka kece era dau cakava na dauceuceu, na daudroini, na daucula vuti ni sipi karakarawa, lokaloka kei na ka damudamu, na daucula lineni matailalai sara, kei na dautalitali.

Currently Selected:

LAKO YANI 35: FNV

Highlight

Copy