LAKO YANI 34

Taya o Mosese e Rua Tale na Vatu Raraba Vou

(Vrua 10.1-5)

1A sa kaya vei Mosese ko Jiova, “Mo taya e rua na vatu raraba me rau vaka na kena e liu, ka'u na qai vola kina na veivosa sa volai ena vatu e rua e liu o a voroka. 2Mo cavutu ena mataka lailai ni mataka, ka cabe cake mai ki na Ulunivanua o Saineai, ka mai tavaki au ena dela ni ulunivanua. 3Me kakua sara ni dua me lako cake vata mai kei iko; me kakua ni dua me laurai ena dua na tiki ni ulunivanua; ka me kakua talega ni dua na sipi se bulumakau me kana voli ena mata ni ulunivanua.”

4Sa qai taya o Mosese e rua na vatu raraba me vaka na vatu raraba e rua e liu, ka mai cabe cake yani ki na Ulunivanua o Saineai ena mataka lailai ka tarava, me vaka sa vakarota ko Jiova, ka kauta cake na vatu raraba e rua.

5A sa lako sobu mai ko Jiova ena dua na o, ka rau tiko vata kei koya mai kea, ka sa kacivaka na yacana, “Ko Jiova.”#34.5 Vakaiperiu (Heb) YHWH; raica na i vakamacala ena 3.14

6A sa lako siviti Mosese ko Jiova ka kacivaka, “Sai au oqo, ko Jiova, na Kalou sa sinai ena loloma kei na yalovinaka, na Kalou sa berabera ni cudru, ka sa tawa yalani na noqu loloma kei na yalodina.#Lako 20.5-6; Tiko 14.18; Vrua 5.9-10; 7.9-10 7Au sa yalololoma vei ira na udolu na i tabatamata ka vosota na nodra i valavala ca; ia au na sega ga ni guilecava me'u vakatauca na noqu cudruvi ira na qase era caka ca, ka me tau oqo vei ira na luvedra kei na makubudra me yacova na i katolu kei na i kava ni tabatamata.”

8A mai cuva sobu yani vakatotolo ki na qele o Mosese ka masu. 9A sa kaya, “Kemuni na Turaga, kevaka o ni lomani au dina, au sa kerei kemuni mo ni lako vata kei keimami. Sa dina sara ni ra tamata yalokaukauwa o ira oqo, ia mo ni vosota na neimami dukadukali kei na neimami i valavala ca, ka ciqomi keimami me vaka keimami sa nomuni tamata.”

Sa Vakavoui na Veiyalayalati

(Lako 23.14-19; Vrua 7.1-5; 16.1-17)

10Sa qai kaya vei Mosese ko Jiova, “Au sa na cakava oqo e dua na veiyalayalati kei ira na tamata. Raica, au na cakava ena matadra kecega na Isireli na cakacaka veivakurabuitaki eso ka sega ni se bau yaco vakadua ena dua na matanitu e vuravura raraba. Era na raica kece na tamata vata kei iko na ka e rawa ni cakava ko Jiova, baleta ni'u na cakava eso na ka cecere ena vukumu. 11Mo maroroya na i vunau au sa solia vei iko edaidai. Au na vakasavi ira tani e matamu na Amoraiti, na kai Kenani, na Itaiti, na Perisaiti, na Aivaiti, kei ira na Jepusaiti. 12Qarauna mo kakua sara ni cakava e dua na veiyalayalati vata kei ira na tamata ena vanua o sa lako tiko kina baleta de na yaco me na coriti iko. 13Ia mo talaraka sobu na nodra i cabocabonisoro, mo vorolaka na nodra duru vatu vakatabui, ka taya laivi na nodra i vakatakarakara ni kalou yalewa o Asera.#Vrua 16.21 14Kakua ni qarava e dua na kalou tani baleta ni'u sa Kalou vuvu oi au, ko Jiova. 15Kakua ni cakava e dua na veiyalayalati kei ira na tamata ni vanua oqo baleta ni gauna era na la'ki sokalou kina ka vakacaboisoro, era na sureti kemuni mo ni tomani ira ka o ni na qai temaki mo ni kania na nodra i soro vei ira na nodra kalou. 16O ira na luvemuni tagane ena rawa ni ra vakawatitaki ira na yalewa vulagi ni veivanua oqo, ka na qai vakavuna oqori me ra vakanadakui au, baleta ni ra sa na rawai mai vei ira na watidra me ra qarava na nodra kalou.

17Kakua ni cakava na kalou matakau eso ka buli mai na kaukamea, mo qarava.#Lako 20.4; Vsoro 19.4; Vrua 5.8; 27.15 18Mo vakayacora na Solevu ni Madrai Sega ni Vakatubu. Me vaka au a vakarota vei iko, e vitu na siga mo kania kina na madrai sega ni vakatubu ena vula o Epipi, baleta ni o ni a biuti Ijipita mai ena vula o ya.#Lako 12.14-20; Vsoro 23.6-8; Tiko 28.16-25

19Na ulumatua tagane kece era sa noqu, na ulumatua tagane kece sara ni nomu bulumakau kei na nomu sipi.#Lako 13.2 20Ia mo qai volia lesu tale na ulumatua ni asa kece sara ena nomu vakaisosomitaka ena dua na sipi; kevaka o sega ni volia lesu mo qai musuka na domona. Mo volia lesu kece na ulumatua tagane.#Lako 13.13

“Me kakua sara ni dua me lako liga lala mai vei au.

21“E ono na siga mo cakacaka kina, ia ena i kavitu ni siga mo kakua ni cakava kina e dua na cakacaka, veitalia ga kevaka e gauna ni siviyara se gauna ni tatamusuki, mo vakacegu ga.#Lako 20.9-10; 23.12; 31.15; 35.2; Vsoro 23.3; Vrua 5.13-14

22“Me qaravi na Solevu ni Tatamusuki ena gauna o ni tamusuka kina na i sevu ni witi, ka qarava na Solevu ni Kumukumuni ena mua ni yabaki ni kumuni na vuata.#Vsoro 23.15-21; 23.39-43; Tiko 28.26-31

23O ira kece na tagane e dodonu me ra mai sokalou vei au, ko Jiova na Kalou i Isireli, ka me vakatolu ena loma ni dua na yabaki. 24Ena gauna au sa vakasavi ira tani kina na veimatanitu e matamu ka tosoya na nomu i yalayala, ena sega ni dua ena ravuta na nomu vanua ena loma ni tolu na gauna ni sokalou oqo ena veiyabaki.

25“Mo kakua ni vakacabora na madrai sa vakatubutaki ni sa cabori vei au na manumanu. Mo kakua talega ni maroroya me yacova na mataka lailai na manumanu sa vakamatei me baleta na Solevu ni Lakosivia.#Lako 12.10

26Mo kauta mai na i sevu ni sila vinaka duadua ki na vale i Jiova.#Vrua 24.21; 26.2

Mo kakua ni vakasaqa na luve ni sipi ena wai ni sucu i tinana.”

27A sa qai kaya vei Mosese ko Jiova, “Mo vola na veivosa oqo; baleta ni'u sa vakayacora na veiyalayalati kei iko kei Isireli ena veivosa oqo. 28A tiko ga mai kea ko Jiova kei Mosese me vasagavulu na siga ka vasagavulu na bogi ka sega ni kania se gunuva e dua na ka. A sa vola ena vatu raraba na vosa ni veiyalayalati, oqori na i Vunau e Tini.

Na i Serau ena Mata i Mosese

29A sa siro sobu mai o Mosese mai na Ulunivanua o Saineai, ka sa taura tiko mai e rua na vatu raraba ni veiyalayalati, ia sa sega ni kila ni sa serau tu na matana baleta ni rau a veivosaki vata kei Jiova.#2Kori 3.7-16 30A sa raici Mosese o Eroni kei ira kecega na Isireli ni sa serau tu na matana, ka ra sa rere ni lako voleka vua. 31Ia a kacivi ira o Mosese, ka lesu vua o Eroni kei ira na nodra i liuliu na Isireli, ka sa veivosaki kei ira o Mosese. 32Ni sa oti o ya, era a toro voleka kece mai na Isireli ka solia vei ira o Mosese na lawa kece sara sa solia vua ko Jiova mai na Ulunivanua o Saineai. 33Ni sa vosa oti vei ira o Mosese, a sa qai ubia na matana ena dua na i ubi. 34Ena veigauna kece sa curu kina ki na vale tabu i Jiova o Mosese me rau veivosaki kei Jiova, ena luvata o koya na i ubi ni matana me yacova ni sa lesu mai ki tuba. Ia ni lako mai ki tuba, sa tukuna vei ira na Isireli na ka kece sara sa vakaroti mai vua me tukuna, 35ka rawa vei ira na Isireli me ra raica na serau ni matana. Sa qai dau ubia tale na matana me yacova na gauna ka tarava ni veivosaki vata kei Jiova.

Currently Selected:

LAKO YANI 34: FNV

Highlight

Copy