LAKO YANI 26

Na Vale Tabu

(Lako 36.8-38)

1“Ia mo cakava na loma ni vale tabu ena tini na i latilati ni sulu lineni vinaka sara sa viviraki, ka karakarawa, lokaloka kei na vuti ni sipi damudamu. Me tali kina na i yaloyalo ni jerupi. 2Me ra tautauvata na veitikina kecega sa caka, ka me tinikarua na mita na kena balavu ka rua na mita na kena raba. 3Me cula vata e lima na tikina ni sa sema vata ka vaka talega kina na lima tale na tikina. 4Mo cakava eso na i curucuru ni wa ena i sulu karakarawa ena muana ruarua ni latilati e taudaku. 5Mo coria e 50 na i curucuru ni wa ena dua na i lati ka mo cakava talega vakakina ki na kena i karua, ka me tautauvata kei na kena i matai. 6Mo cakava talega e 50 na i qaso koula me vauci rau ruarua kina na i lati me dua ga.

7“Mo cakava na i ubi ni vale tabu mai na tinikadua na veitiki ni sulu sa caka mai na kuli ni me. 8Me tautauvata na tikina kecega, me tinikatolu na mita na kena balavu, ka rua na mita na kena raba. 9Mo cula vata e lima me na dua na kena i wasewase, ka ono ena dua tale na kena i wase. Mo lobia rua na i kaono ni tiki ni sulu me ubi kina na mata ni vale tabu e liu. 10Mo coria na 50 na i curucuru ni wa ni sulu ena mua ni tiki ni latilati ena dua na kena i wase, ka 50 na i curucuru ni wa ni sulu ena dua tale na kena i wase ni latilati. 11Mo cakava e 50 na i qaso parasa ka vakacuruma ki na qara ni sulu, me vauci rau na i lati e rua me duabau ga na i ubi. 12Mo vakaliliga na i vovo ni veimama ni tiki ni sulu ena daku ni vale tabu. 13Na vo tale ni 50 na senitimita ena yasana kecega me lili ka ubi kina na tutu ni vale tabu.

14“Mo cakava e rua tale na i ubi, e dua mai na kuli ni sipi sa rokataki ena roka damudamu, ka dua tale ena kuli-ni-manumanu digitaki me i ubi ni vale e taudaku.

15“Mo cakava eso na feremi ni vale tabu ena kau akasia, ka me ra duri cake tu. 16Na feremi ni vale oqo me 4 na mita na kena balavu ka 66 na senitimita na kena raba. 17Me caka e rua na ucuna momoto ka me rau toka veitikivi me rau vauci vata kina kei na kena feremi. Na feremi ni vale tabu kece me na tiko na kedra ucuna momoto vakaoqo. 18Me ruasagavulu na feremi ni vale ena yasana vaka ki na ceva. 19Mo cakava e 40 na kena i tutu siliva me toka ena ruku ni feremi ni vale oqo, me tau yarua na i tutu siliva ena kena feremi yadua, me qasoti rau vata na ucuna momoto. 20Ena vualiku ni vale tabu, mo cakava e 20 talega na kena feremi 21kei na 40 na kena i tutu siliva, me yarurua ena feremi yadua. 22Ena muana ki muri ni vale tabu mai na yasana ki na ra, me caka kina e ono na kena feremi 23ka me rua na feremi ena tutu ni vale e rua. 24Na kena feremi ena tutu ni vale e rua oqo me vauci vata mai e ra, ka veisemati tiko me yaco sara i cake. Na feremi e rua ka bulia na tutu ni vale e rua me na caka vakaoqo. 25Me na walu taucoko na feremi kei na kedra i tutu siliva e tinikaono, ka me yarua na kedra i tutu ena ruku ni feremi yadua.

26“Mo cakava e tinikalima na i kolokolo mai na kau akasia, ka me lima ki na i yatu feremi ena dua na yasa ni vale tabu, 27ka lima na i kolokolo ki na yasana kadua, ka lima ena i yatu feremi ni yasana ki na ra, ena yasa ni vale tabu sara e muri. 28Na i kolokolo e lomadonu, ka tikori ena veimama ni feremi, me dodo mai na dua na yasa ni vale tabu ki na muana tale kadua. 29Mo solega na feremi ni vale kece oqo ena koula, ka cakava na kedra mama koula me i curucuru ni veikolokolo, ka solega talega na veikolokolo ena koula. 30Vakaduria na vale tabu me vaka na kena i tuvatuva ka'u a vakaraitaka vei iko mai na ulunivanua.

31“Mo cakava e dua na i lati ena lineni matailalai ka tali ena wa karakarawa, lokaloka kei na vuti ni sipi damudamu, ka me tali kina na i vakatakarakara ni jerupi. 32Me vakaliligi oqo ena va na duru akasia ka sa boroi tu ena koula, ra vakaiqaso koula, ka duri tu ena va na yavu siliva. 33Me biu na i lati ena ruku ni qaso ena ruku ni dela ni vale tabu ia ena daku ni lati, biuta kina na Kato ni Veiyalayalati ka koto e loma na vatu raraba e rua. Na i lati oqo ena wasei kina na Tikina Tabu mai na Tikina Tabu Sara.#Ipe 6.19; 9.3-5 34Mo biuta na i sogo ena dela ni Kato ni Veiyalayalati. 35Ena taudaku ni Tikina Tabu Sara, mo biuta kina e dua na teveli me donuya na vualiku ni vale tabu kei na i tutu ni cina me donuya na yasana ki na ceva.

36“Ena katuba ni vale tabu me caka kina e dua na i lati ena lineni matailalai, ka tali kina na lineni roka karakarawa, lokaloka, kei na vuti ni sipi damudamu, ka ukutaki ena veika eso sa tali vakamatau. 37Ena i lati oqo mo cakava kina e lima na duru akasia sa boroi ena koula, ka sodoma kina na i qaso koula, ka cakava e lima na kena yavu parasa.”

Currently Selected:

LAKO YANI 26: FNV

Highlight

Copy