LAKO YANI 21

Lawa me Baleti Ira na Bobula

(Vrua 15.12-18)

1“Oqo na lawa mo solia vei ira na Isireli: 2Ni kevaka o sa volia e dua na Iperiu bobula tagane, me veiqaravi o koya me ono na yabaki. Ia ena i kavitu ni yabaki, me sa vagalalataki tale o koya mai na nona vakabobulataki kei na veika kece sa dinau kina.#Vsoro 25.39-46 3Kevaka sa lako mai ka sega ni vakawati, ia me lako tale yani ka sega ni vakawati; ia kevaka sa vakawati tu ni bera ni yaco me nomu bobula, me qai kauta lesu ga na watina ni sa lako yani. 4Ia kevaka sa solia na watina na nona turaga, ka sa vakaluveni kina, na watina kei iratou na luvena sa nona ga na nona turaga, ia sa sereki ga o koya me lako. 5Ia kevaka sa kaya na bobula, “Au sa lomana na noqu turaga, ka'u lomani iratou na luvequ kei na watiqu, ka'u na sega ni lako tani eke me'u tamata galala.” 6Ena ka oqo, me qai kauti koya yani na nona turaga ki na mata i Jiova, me kau sara yani ki na katuba se duru ni katuba; ka me qai cula-basika na daligana na nona turaga; ia ena dauqaravi koya tiko o koya me yacova na mate.

7Kevaka e dua na tamata sa volitaka na luvena yalewa me bobula, ia me qai kakua ni sereki o koya me vaka na bobula tagane. 8Kevaka sa sega ni vinakati yalewa na nona turaga, o koya ka a voli koya me watina, ia me qai volitaki koya lesu tale vei tamana; sa sega ni dodonu vua na nona turaga me volitaki koya vei ira na vulagi, baleta ni sa sega ni caka vinaka vua na yalewa o koya na nona turaga. 9Ni kevaka sa voli koya me baleta na luvena tagane, ia me qai maroroi koya me vaka e dua na luvena yalewa. 10Kevaka sa taura tale o koya e dua na watina, me qai kakua ni cegu ena veiqaravi vua na watina taumada, ena i sulu, kakana kei na dodonu ni vakamau. 11Ia kevaka sa sega ni vakayacora na ka e tolu oqo vua, me sa lako yani o koya ena galala ka sega ni saumi vakailavo.

Lawa me Baleta na i Valavala Kaukauwa

12“O koya sa mokuta e dua na tamata, ka sa mate kina, me na vakamatei o koya.#Vsoro 24.17 13Kevaka me a sega ni nakiti taumada, ka sa vakayacori ga e dua na cakacaka ni Kalou, ka'u na qai digitaka e dua na vanua me dro yani kina o koya ka veivakamatei.#Tiko 35.10-34; Vrua 19.1-13; Josua 20.1-9 14Ia kevaka e dua sa nakita me ravuta tale e dua ka vakamatea ena nona i naki ca, me qai biu tani mai na noqu i cabocabonisoro o koya ka laba, me vakamatei.

15“O koya yadua sa mokuta na tamana se tinana, me vakamatei.

16“O koya yadua sa taura vakavesu e dua na tamata me volitaka, se me vesuka voli me nona bobula, me vakamatei.#Vrua 24.7

17“O koya yadua sa vosacataka na tamana se na tinana me vakamatei.#Vsoro 20.9; Maciu 15.4; Mari 7.10

18“Kevaka sa yaco na veivala, ka dua na tamata sa virika e dua ena vatu se vacuki koya, ka dina ga ni sega ni a mate kina ka sa davo koto ga vakabalavu, 19ia sa qai bula cake tale mai ka sa vakaititoko ni lako voli e tautuba — me qai sereki o koya ka cala, ka me na qai sauma ga vua na veisiga a davo kina, ka qaravi koya tiko me yacova ni sa bula vinaka.

20“Kevaka e dua na i taukei ni bobula sa taura e dua na kau ka mokuta na nona bobula tagane se yalewa, ka moku mate ena vanua o ya, e dodonu me totogitaki na i taukei ni bobula. 21Ia kevaka e bula tiko na bobula me dua se rua na siga, ena sega ni totogitaki na kena i taukei. Sa rauti koya vinaka na i totogi ni kena vakayali na nona i yau.

22“Kevaka era veivala eso ka mavoa kina e dua na yalewa bukete ka vakavuna na nona vakalutu, ka sega ni yaco tale kina e dua na leqa e muri, sa dodonu vua ka vakavuna na mavoa o ya me sauma na i totogi sa lavaka na wati yalewa o ya, me saumi na kena levu me vaka sa vakatau lewa kina na turaganilewa. 23Ia kevaka sa yaco na leqa e muri ka a vu mai na mavoa o ya, ia mo qai solia me i sau ni bula na bula. 24Me i sau ni mata na mata, na i sau ni bati na bati, na i sau ni liga na liga, na i sau ni yava na yava,#Vsoro 24.19-20; Vrua 19.21; Maciu 5.38 25na i sau ni kama na kama, na i sau ni mavoa na mavoa, kei na i sau ni kuita na kuita.

26“Ia kevaka e dua na i taukei ni bobula sa mokuta na matana na nona bobula tagane se yalewa, ka vakacacana vakadua; me qai sereki koya na bobula me lako ena galala me i sau ni matana sa vakacacani o ya. 27Kevaka e dua na i taukei ni bobula sa vakalutuma na batina na nona bobula tagane se yalewa, e dodonu me sereki koya na bobula o ya me lako ena galala me i sau ni batina sa vakacacani o ya.

Lawa me Baleta na i Yau e Taukeni

28Kevaka e dua na bulumakau sa cumuta mate e dua na tagane se yalewa, me qai vakaviriki na bulumakau o ya me mate; ia me kakua ni laukana na lewena, ka me kakua talega ni beitaki kina na i taukei ni bulumakau. 29Ia kevaka sai valavala ni bulumakau o ya me dauveicumu, ka sa vakasalataki vakakina na kena i taukei ka sega ni rogoca, ka sa vakamatea e dua na tagane se yalewa, me qai vakaviriki na bulumakau o ya, ka vakamatei talega na kena i taukei. 30Ni kevaka sa lavaki me sauma na bula na i taukei ni manumanu, ia me qai sauma kece o koya na i lavo sa lavaki vua me i sau ni bula. 31Kevaka sa cumuta e dua na gonetagane se goneyalewa na bulumakau, me qai saumi ga vua na kena i taukei na ka oqo me vaka na lewa ni lawa. 32Kevaka sa cumuta e dua na bobula tagane se yalewa na bulumakau, me qai sauma na i taukei ni bulumakau vua na i taukei ni bobula e 30 na tiki ni siliva, ka me qai vakaviriki na bulumakau ena vatu me mate.

33“Kevaka e dua sa kauta laivi na i sogo ni qara se kelia e dua na qara ka sa sega ni sogota, ka mani lutu kina e dua na bulumakau se asa, 34me qai sauma na i taukei ni qara ena nona solia na i lavo vua na kena i taukei, ia me maroroya na manumanu mate.

35Kevaka sa vakamatea e dua na bulumakau na nona bulumakau e dua tale na tamata, me rau qai volitaka na i taukei ni manumanu ruarua na bulumakau e bula tiko ka wasea na kena i sau; ka me rau qai wasea talega na lewe ni manumanu ni bulumakau sa vakaleqai. 36Ia kevaka e sai vakarau tiko ni manumanu o ya me dauveicumu ka qai sega ni vesuka tiko vakavinaka na kena i taukei, sa dodonu me vakaisosomitaka na bulumakau sa mate o koya na i taukei ni manumanu ka veivakamatei ena dua na bulumakau bula, ka sa rawa talega vua me maroroya na manumanu sa mate.

Currently Selected:

LAKO YANI 21: FNV

Highlight

Copy