LAKO YANI 13

Vakacabori na Ulumatua Tagane

1A sa kaya vei Mosese ko Jiova, 2“Mo vakacabora vei au na ulumatua tagane taucoko sara. Na ka kece sara sa sucu taumada mai na veikete yadua ni Isireli, mai vua na tamata kei na manumanu, oqo sa noqu.”#Tiko 3.13; Luke 2.23

Solevu ni Madrai Sega ni Vakatubu

3A sa kaya vei ira na tamata o Mosese, “Mo ni dau nanuma na siga oqo, o ni a biuti Ijipita mai kina, na vanua ni nomuni vakabobulataki, ni a kauti kemuni tani mai kina ko Jiova ena ligana kaukauwa. Mo ni kakua sara ni kania na madrai vakatubu. 4O ni sa na biuti Ijipita ena siga oqo ena i matai ni vula, na vula o Apipi. 5Ena gauna sa kauti kemuni yani kina ko Jiova ki na nodra vanua na kai Kenani, na Itaiti, na Amoraiti, na Aivaiti kei na Jepusaiti, na vanua sa yalataka oti tu vei ira na nomuni qase me solia vei kemuni, oqori na vanua sa drodro kina na sucu kei na oni, ia mo ni qai dau vakayacora kina na solevu vakalotu oqo ena vula talega oqo. 6Mo ni kana madrai sega ni vakatubu ena vitu na siga, ia ena i kavitu ni siga me qai vakayacori kina e dua na solevu vei Jiova. 7Na madrai sega ni vakatubu me na laukana ena loma ni vitu na siga, me kakua sara ni dua na madrai vakatubu se e dua na i vakatubu me kune ena nomuni i tikotiko. 8Ena siga o ya mo na qai tukuna vua na luvemu: ‘Na ka oqo sa vakananumi kina na veika sa vakayacora vei au ko Jiova ena gauna ka'u a biuti Ijipita mai kina.’ 9Na solevu vakalotu oqo sa na yaco me kena i vakatakilakila ena ligamuni se i vakananumi ena yadremuni, me na rawa kina ni o ni dau wiligusutaka ka vulica tikoga kina na Lawa i Jiova, baleta ni a vueti kemuni mai Ijipita ena ligana kaukauwa. 10Mo ni dau vakayacora na i vakaro oqo ena veiyabaki ena kena gauna sa lokuci.

Na Nodra Cabori na Ulumatua

11Ni sa kauti kemuni ko Jiova ki na nodra vanua na kai Kenani me vaka sa yalataka vei kemuni kei ira na nomuni qase, me na solia vei kemuni, 12mo ni qai vakacabori ira kece sara na nomuni ulumatua tagane vei Jiova. Na veiulumatua tagane taucoko sara ni nomu manumanu sa nei Jiova.#Lako 34.19-20; Luke 2.23 13Ia mo volia lesu na ulumatua yadua ni asa ena lami, ia kevaka o sega ni via volia lesu mo qai musuka na domona. Mo na volia lesu na nomu ulumatua tagane yadua. 14Ni ra na tarogi iko na luvemu tagane ena gauna mai muri, ‘A cava na i balebale ni ka oqo?’ Mo qai kaya vua, ‘E a kauti keimami tani mai ko Jiova mai na vanua ni veivakabobulataki mai Ijipita ena ligana kaukauwa. 15Ena gauna a kaukauwa kina na lomana na tui Ijipita ka vakadredretaka me keimami lako, a qai vakamatei ira kece sara na ulumatua tagane mai na vanua o Ijipita ko Jiova; na ulumatua ni tamata kei na manumanu. Sai koya o ya na vuna keimami sa vakacabora kece sara kina na neimami ulumatua tagane vei Jiova; ia keimami na qai volia lesu tale na neimami ulumatua tagane.’ 16Na solevu vakalotu sa na yaco me i vakatakilakila ena ligamu se na i vakananumi ena yadremu ka ni a kauti iko tani mai Ijipita ko Jiova ena ligana kakauwa.”

Na Duru O kei na Duru Bukawaqa

17Ni sa laivi ira na tamata na tui Ijipita me ra lako, a sa sega ni kauti ira na Kalou ena sala ka gole vaka ki na baravi kei Filisitia, ka dina ga ni gaunisala lekaleka taudua. A sa kaya ga e lomana na Kalou, “Au sa sega ni vinakata me ra veisautaka na lomadra na tamata ka via lesu tale i Ijipita ena gauna era na raica kina ni dodonu me ra na sotava na i valu eso.”

18Sa mani kauti ira kina na Kalou ena dua tale na sala ka lako wavokita na vanua lala, ka gole yani vaka ki na Wasa Damudamu.#13.18 wasa damudamu: (ena Vosa vakaiperiu, “Wasawasa ni Veigasau”) ka dusimaka na (1) veidrano eso kei na veivanua suasua ena kedrau tadrua na ucuna momoto ni ‘Toba o Suesi’ kei na ‘Meditereni’, na vanua e vakabauti ni yaco kina na veika e volai ena Lako Yani wase 13, ka dusia talega na (2) “Toba o Suesi,” kei na (3) “Toba o Akapa.” Era sa vakaiyaragi vakaivalu tu na Isireli ni ra sa lako voli. 19A sa kauta tiko o Mosese na sui i Josefa, me vaka era a bubului kina na Isireli vei Josefa. Ni a kaya taumada o Josefa, “Ena gauna sa na vueti kemuni kina na Kalou, mo ni qai kauta tani mai na vanua oqo kei kemuni na suiqu.”#Vteki 50.25; Josua 24.32

20Era sa biuti Sakoca ka la'ki tiko mai Ecami, ena i yalayala ni vanua lala. 21A sa liu e matadra ko Jiova ena duru o me vakaraitaka vei ira na sala ena siga, ka sa liu e matadra ena duru bukawaqa ena bogi me vakararamataki ira, me rawa kina ni ra lako voli ena siga kei na bogi. 22A sa liutaki ira tikoga na tamata na duru o ena siga kei na duru bukawaqa ena bogi.

Currently Selected:

LAKO YANI 13: FNV

Highlight

Copy