VAKARUA 6
6
Na i Vunau Levu
1Sai koya na i vunau kece ka vakarota vei au ko Jiova na nomuni Kalou, me'u vakatavulica vei kemuni mo ni muria ena vanua o ni sa vakarau la'ki taukena mo ni tawana, 2me rawa kina vei kemuni, na luvemuni kei na makubumuni; mo ni rerevaki Jiova na nomuni Kalou, ena veisiga kece ni nomuni bula ka muria na nona lawa kei na nona i vunau kece ka'u sa vakarota vei kemuni me rawa ni dede kina na nomuni bula. 3O koya oqo kemuni na Isireli, mo ni vakarorogo ka talairawarawa kina. Ena qai vinaka mai na ka kecega vei kemuni, ka o ni na yaco me matanitu levu, ka taukena na vanua vinaka sa dave kina na sucu kei na oni, me vaka sa yalataka ko Jiova na nodra Kalou na nomuni qase.
4Ni rogoca, oi kemuni na Isireli: Ko Jiova na noda Kalou, ko Jiova sa duabau ga.#6.4 Se Ko Jiova na noda Kalou sa Kalou duadua ga; se Ko Jiova sa noda Kalou, ko Jiova sa duabau ga. #Mari 10.27 5Mo ni lomani Jiova na nomuni Kalou ena yalomuni taucoko, ena lomamuni taucoko, kei na nomuni kaukauwa taucoko.#Maciu 22.30; Luke 10.27 6Mo ni kakua sara ni guilecava na i vunau kece au sa vakaroti kemuni kina edaidai.#Vrua 11.18-20 7Vakavulica oqo vei ira na luvemuni. Tokaruataka tale ni o ni sa tiko ena nomuni vale, se, ni o ni sa tiko tani, ena gauna ni nomuni vakacegu kei na gauna ni nomuni cakacaka. 8Ni vesuka e ligamuni ka tokara e yadremuni; oqo me i vakatakilakila se dau veivakananumi vei kemuni. 9Mo ni vola ena veiduru ni katuba ni nomuni vale kei na nomuni matamata ni bai.
Na i Vakaro me Baleta na Talaidredre
10“Me vaka a yalataka ko Jiova na nomuni Kalou vei ira na nomuni qase, vei Epara-ama, Aisake kei Jekope ni na solia vei kemuni e dua na vanua e tu na kena veikoro lelevu ka vutuniyau o ni a sega ni tara.#Vteki 12.7; 26.3; 28.13 11Na kena veivale era sinai ena veika vinaka o ni a sega ni biuta kina, ka ra tu na kena veikeliwai o ni a sega ni kelia; na kena veivaini kei na veiolive o ni a sega ni tea. Sa na kauti kemuni ko Jiova ki na vanua o ya, ka sa tu kina na veika kece o ni via kania, 12ni qarauna sara mo ni kakua ni guilecavi Jiova, o koya ka a vakabulai kemuni mai na vanua o Ijipita, na vanua o ni a vakabobulataki tu kina. 13Mo ni rokovi Jiova na nomuni Kalou ka qaravi koya duadua ga, ka vakayacora na nomuni vosa ni yalayala kecega ena yacana.#Maciu 4.10; Luke 4.8 14Kakua ni muri ira na kalou tani, na nodra kalou na tamata era tu wavoliti kemuni, 15baleta ni ko Jiova na nomuni Kalou ka sa tiko kei kemuni, sa Kalou vuvu. Na nona cudru waqawaqa ena vagolea vei kemuni ka na vaqeyavutaki kemuni mai na dela i vuravura.
16“Mo ni kakua ni vakatovolei Jiova na nomuni Kalou me vaka o ni a cakava mai Masa.#Lako 17.1-7; Maciu 4.7; Luke 4.12 17Mo ni muria vakavinaka sara na i vunau i Jiova na nomuni Kalou, na nona i vakaro kei na nona lawa. 18Ni cakava na veika sa dodonu ka vinaka ena mata i Jiova, ka o ni na qai vinaka kina. Ena qai taukeni na vanua vinaka sa yalataka ko Jiova vei ira na nomuni qase, 19ka o ni na vakasavi ira tani na kemuni meca me vaka sa yalayala kina ko Jiova.
20“Ena gauna mai muri era na tarogi kemuni na luvemuni, ‘Na cava sa vakarota kina ko Jiova na noda Kalou me da talairawarawa ki na i vunau kece oqo?’ 21Mo ni qai tukuna vei ira, ‘Keimami a bobula tu vua na tui Ijipita, sa qai sereki keimami mai ko Jiova ena nona kaukauwa levu. 22Keimami a raica sara ga ena mata i keimami ni a cakava ko Jiova na veika mana, kei na veika veivakurabuitaki lelevu ka rerevaki vei ira na kai Ijipita, ka vakakina vua na nodra tui kei ira kece na nona vakailesilesi. 23A sereki keimami mai Ijipita me kauti keimami mai ka solia vei keimami na vanua oqo me vaka sa yalataka vei ira na neimami qase. 24A sa qai vakarota vei keimami ko Jiova me keimami muria na lawa kece sara ka dokai koya. Kevaka eda sa vakayacora vakakina, ena qai wanonova matua na noda vanua ka vakayacora me vuavuai tikoga.
25Kevaka keimami muria vakavinaka na i vunau kecega oqo ena mata i Jiova na noda Kalou, me vaka sa vakarota vei keda, eda na vakadonui.
Currently Selected:
VAKARUA 6: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
