VAKARUA 5
5
Na i Vunau e Tini
(Lako 20.1-17)
1A qai soqoni ira vata kece mai na Isireli o Mosese, ka kaya vei ira, “Kemuni na Isireli ni rogoca mada na lawa kei na i vunau kece au na tukuna vei kemuni ena siga edaidai. Ni vulica ka qarauna mo ni muria vakavinaka sara.
2E a cakava e dua na veiyalayalati ko Jiova na noda Kalou ena Ulunivanua o Saineai.#5.2 Saineai; se Orepi. 3Ia, e sega ni veiyalayalati wale ga kei ira na noda qase, a veiyalayalati sara talega kei keda eda bula tiko edaidai. 4E a vosa vei kemuni ena bukawaqa mai na ulunivanua ko Jiova ni o ni a veiraici mata. 5Au a tu maliwai kemuni kei na Kalou ena gauna o ya me'u tukuna vei kemuni na ka sa kaya ka ni o ni a rerevaka na bukawaqa, ka sega ni via lako cake ki na ulunivanua.
A sa kaya ko Jiova: 6“Oi au ko Jiova na nomuni Kalou ka kauti kemuni tani mai Ijipita na vanua o ni a vakabobulataki tu kina;
7“Mo ni kakua ni qarava e dua tale na Kalou, o au duadua ga.
8“Mo ni kakua ni cakava vei kemuni na i vakatakarakara ni dua na ka mai lomalagi e cake, se e vuravura, se dua na ka mai na ruku i vuravura e ra.#Vsoro 26.1; Vrua 4.15-18; 27.15 9Mo ni kakua ni cuva vei ira se qaravi ira, ni sai au ko Jiova na nomuni Kalou, na Kalou vuvu. Au na sauma na nodra ca na qase era cati au vei ira na luvedra me yacova na i katolu kei na i kava ni tabatamata.#Lako 34.6-7; Tiko 14.18; Vrua 7.9-10 10Au sa dau vakaraitaka na noqu loloma tawa yalani ki na udolu vakaudolu na nodra i tabatamata era lomani au ka muria na noqu i vunau.
11“Mo ni kakua ni vakayagataka ena i naki cala na yaca i Jiova na nomuni Kalou, baleta ni na cudruva na tamata e vakayagataka vakaveitalia na yacana.#Vsoro 19.12
12“Mo ni vakarokorokotaka na Siga ni Vakacecegu ka vakatabuya me vaka sa vakarota vei kemuni ko Jiova na nomuni Kalou.#Lako 16.23-30; 31.12-14 13E ono na siga mo ni cakava kina na nomuni cakacaka kecega.#Lako 23.12; 31.15; 34.21; 35.2; Vsoro 23.3 14Ia na i kavitu ni siga sa siga ni vakacegu ka sa vakatabui me nei Jiova. Me kakua ni dua me cakacaka ena siga o ya, o iko, na luvemu, na nomu bobula, na nomu manumanu, se e dua na vulagi sa tiko ena nomuni vanua. Me vakacegu na nomu bobula me vakataki iko. 15Ni nanuma ni o ni a bobula mai Ijipita, ia au a qai sereki kemuni, oi au ko Jiova na nomuni Kalou ena kaukauwa levu kei na qaqa. Sai koya oqo au sa vakaroti kemuni kina mo ni maroroya na Siga ni Vakacecegu.
16“Mo vakarokorokotaka na tamamu kei na tinamu, me vaka sa vakarota ko Jiova na nomu Kalou, me yaco kina vei iko na vinaka ka dede kina na nomu bula ena vanua sa solia vei iko ko Jiova na nomu Kalou.#Vrua 27.16; Maciu 15.4; 19.19; Mari 7.10; 10.19; Luke 18.20; Efe 6.2,3
17“Mo kakua ni laba.#Vteki 9.6; Vsoro 24.17; Maciu 5.21; 19.18; Mari 10.19; Luke 18.20; Roma 13.9; Jeme 2.11
18“Mo kakua ni ia na veibutakoci.#Vsoro 20.10; Maciu 5.27; 19.18; Luke 18.20; Roma 13.9; Jeme 2.11
19“Mo kakua ni butako.#Vsoro 19.11; Maciu 19.18; Mari 10.19; Luke 18.20; Roma 13.9
20“Mo kakua ni beitaka vakailasu na wekamu.#Lako 23.1; Maciu 19.18; Mari 10.19; Luke 18.20
21“Mo kakua ni domona na watina na wekamu; kakua ni vinakata na nona vale, na nona vanua, na nona tamata, na nona bulumakau, na nona asa, se e dua ga na ka sa nona na wekamu.#Roma 7.7; 13.9
22“Sai koya oqo na i vunau sa solia ko Jiova vei kemuni sa soqoni vata mai na ulunivanua. Ni sa vosa ena domo levu mai na loma ni bukawaqa, mai na o, kei na butobuto loaloa, a sa solia o koya na i vunau oqo, ka segai tale e dua. A sa qai vola ena rua na vatu raraba ka solia vei au.#Ipe 12.18-19
Era sa Rere na Tamata
(Lako 20.18-21)
23“Ia ena gauna o ni a rogoca kina na domo mai na butobuto ni sa kama tiko na ulunivanua taucoko ena buka, era a qai lako mai vei au na i liuliu ni nomuni veimataqali kei ira na qase, 24ka kaya, ‘Raica sa vakaraitaka vei keimami ko Jiova na noda Kalou, na nona cecere kei na nona lagilagi, ni keimami a rogoca na domona ni sa vosa vei keimami mai na loma ni bukawaqa! E daidai keimami sa qai raica ka kila talega ni rawa ni bula tikoga na tamata, ka dina ga ni a vosa vua na Kalou. 25Ia, na cava me keimami mate kina? Na bukawaqa levu o ya ena tilomi keimami. Keimami na mate vakaidina, kevaka keimami rogoca na domo i Jiova na noda Kalou ni vosa tale mai. 26O cei na tamata sa rogoca na domo ni Kalou mai na loma ni bukawaqa ka qai bula tiko me vakataki keda? 27Mo toro voleka yani, Mosese, ka mo rogoca mada na veika kece ena tukuna ko Jiova na noda Kalou. Ia mo qai lesu mai ka vakadewataka vei keimami na ka sa tukuna vei iko. Keimami na rogoca ka talairawarawa kina.’
28“Ni rogoca ko Jiova na vosa o ni tukuna, a kaya vei au, ‘Au sa rogoca na veika era a tukuna na tamata oqo, ka sa dina kece na ka era kaya. 29Kevaka mada ga ena dau vaka tu ga oqo na nodra vakanananu me ra rerevaki au ka talairawarawa ki na noqu vunau me na rawa ni ra vinaka kina kei ira na nodra kawa ka tawa mudu. 30Lako ka tukuna vei ira me ra lesu tale ki na nodra veivalelaca. 31Ia o iko Mosese mo tiko ga eke kei au, ia au na solia vei iko na noqu vunau kei na lawa. Vakavulica vei ira na tamata me ra vakamuria ena vanua au sa solia tiko vei ira!’
32“O koya oqo, mo ni qarauna mo ni cakava na ka kecega sa vakarota vei kemuni ko Jiova na nomuni Kalou. Mo ni kakua sara ni gole ki na i matau se ki na i mawi. 33Mo ni muria na veika kece sa vakarota vei kemuni ko Jiova na nomuni Kalou mo ni na qai bula, ka vinaka kina, ka tiko vakadede ena vanua o ni sa la'ki taukena.
Currently Selected:
VAKARUA 5: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
