VAKARUA 4

Na Vakamamasu i Mosese

1“Ia oqo, kemuni na Isireli, ni rogoca mada na lawa kei na i vakaro au vakarau vakavulica vei kemuni. Mo ni talairawarawa kina, o ni na qai bula ka la'ki taukena na vanua sa solia vei kemuni ko Jiova, na Kalou ni nomuni qase. 2Ni kakua ni vakuria tale e dua na ka ki na noqu i vakaro vei kemuni, ka kakua ni kauta tani mai kina e dua na ka. Ni talairawarawa ga ki na i vunau i Jiova na nomuni Kalou ka'u sa solia vei kemuni.#Vtaki 22.18-19 3O ni a raica sara ga e matamuni na ka sa cakava ko Jiova mai Peali Piori. Ni a vakarusai ira kece na tamata era qaravi Peali mai kea,#Tiko 25.1-9 4ia oi kemuni ga o ni a yalodina tiko vei Jiova na nomuni Kalou, ka o ni sa bula tiko me yacova na siga oqo.

5Raica au sa vakavulica vei kemuni na lawa kei na i vakaro me vaka sa vakarota vei au ko Jiova na noqu Kalou; mo ni talairawarawa ki na veika oqo ena vanua o ni sa vakarau la'ki curuma mo ni taukena. 6Ni maroroya ka talairawarawa kina, ena qai vakaraitaka na nomuni vuku kei na nomuni yalomatua ki vei ira na tamata ena veimatanitu tani. Ni ra na rogoca na lawa kece oqo era na qai kaya, “Era sa tamata vuku ka yalomatua na matanitu levu oqo!”

7“Sa sega tale ni dua na matanitu ka veitalia ga na kena levu me dua na nodra kalou me vakataki Jiova na noda Kalou, ni sa dau rogoci keda ena gauna kecega eda kere veivuke kina vua. 8Na matanitu levu cava, e dodonu na kena lawa kei na kena lewa me vaka na lawa kece au sa virikotora e matamuni edaidai? 9Mo ni qarauni kemuni vinaka! Mo ni kakua sara ni guilecava na ka sa raica na matamuni, ka kakua ni biuta tani mai na nomuni vakasama ena gauna kece o ni bula kina; ia mo ni vakavulica vei ira na luvemuni kei na makubumuni. 10Nanuma na siga o ni a tu kina ena mata i Jiova mai Ului Saineai,#4.10 Saineai; se Orepi. ni a kaya vei au, “Soqoni ira mai na tamata vei au me ra rogoca na noqu vosa me ra vulica kina me ra rerevaki au ena veigauna kece sara era bula kina e vuravura, ka me ra vakavulici ira talega kina na luvedra.”

11“Talanoataka vei ira na luvemuni na nomuni a mai tucake tu ena ruku ni ulunivanua sa solegi tu ena kubou loaloa ni sa kama tiko, ka yacova yani na maliwa lala na yameyame ni buka.#Lako 19.16-18; Ipe 12.18-19 12Tukuna vei ira na sala ka vosa kina vei kemuni ko Jiova mai na bukawaqa; ni o ni a rogoca wale ga na domo ka sega ni raica e dua na ka. 13A sa tukuna vei kemuni na nona veiyalayalati, o ya na Vunau e Tini, a vakarota mo ni vakayacora, ka vola sara ena rua na vatu raraba.#Lako 31.18; 34.28; Vrua 9.10 14A sa vakaroti au ko Jiova ena gauna o ya me'u vakatavulica vei kemuni na i vakaro kei na lawa mo ni vakayacora ena vanua o ni sa vakarau valuta ka tawana.#Lako 21.1

Me Kua ni Qaravi na Kalou Tani

15“Ena gauna a vosa kina vei kemuni na Kalou mai na loma ni bukawaqa ena Ulunivanua mai Saineai,#4.15 Saineai; se Orepi. o ni a sega ni raica e dua na vatukana. O koya oqo mo ni qarauni kemuni vinaka kina, 16ka kakua ni vakadukadukalitaki kemuni ena nomuni bulia me nomuni kalou e dua na i vakatakarakara ni ka, se tagane, se yalewa,#Lako 20.4; Vsoro 26.1; Vrua 5.8; 27.15 17se dua na manumanu yava i va e vuravura, se na manumanu vuka e macawa,#Roma 1.23 18se dua na ka sa qasi voli e dela ni qele, se na ika e loma ni wai. 19Ni qarauna mo ni kakua ni rawai mo ni qarava na veika o ni raica e lomalagi; na matanisiga, na vula, na veikalokalo kei na veika kece ni lomalagi. Na veika oqo sai solisoli ni noda Kalou vei ira na veimatatamata kecega e vuravura. 20Ia oi kemuni na matatamata a kauti kemuni tani ko Jiova mai na lovo ni vakawaicalataki kaukamea o ya o Ijipita, me mai qisi kemuni mo ni nona tamata digitaki me vaka ena siga edaidai.#Lako 19.5; Vrua 7.6; 14.2; 26.18; Taito 2.14; 1Pita 2.9 21A cudruvi au ko Jiova ena vukumuni ka yalataka me'u kakua ni kosova yani na uciwai na Joritani, ka curuma na vanua sa solia vei kemuni ko Jiova na nomuni Kalou mo ni taukena.#Tiko 20.12 22Ia au na mate ena vanua oqo, au na sega ni kosova na Joritani; o kemuni o ni sa vakarau takoso mo ni la'ki taukena na vanua vinaka o ya. 23Ni qarauna mo ni kakua ni guilecava na veiyalayalati kei Jiova na nomuni Kalou, na veiyalayalati a cakava vata kei kemuni; mo ni kakua ni cakava e dua na matakau se na i vakatakarakara ni dua na ka sa vakatabuya vei kemuni ko Jiova na nomuni Kalou. 24Sa bukawaqa dauveivakarusai ko Jiova na nomuni Kalou, io sa Kalou vuvu.#Ipe 12.29

25Ni o ni sa vakaluveni ka vakamakubuni; ka sa dede mai na nomuni tiko ena vanua, kevaka o ni sa mani i valavala ca ka cakava e dua na matakau mo ni caka ca kina ena mata i Jiova na nomuni Kalou ka vakavuna me cudru, 26au sa kaciva na lomalagi kei na vuravura me rau i vakadinadina me beitaki kemuni ena siga oqo ni o na rusa yani vakatotolo mai na vanua o ni sa takosova kina na Joritani mo ni la'ki taukena. O ni na sega ni tiko vakadede e kea, ia o ni na vakarusai dina ga. 27Ena cakava ko Jiova mo ni talabusese ki na veimatanitu, ia ena qai vo wale ga vei kemuni e lewe vica ena veivanua ka biuti kemuni kina.#Vrua 28.36 28O ni na qarava mai na veivanua o ya na veikalou sa caka ena liga; na veikalou kau se vatu era sega ni rai rawa, se, rogo rawa, ka ra sega ni dau kana, se, boica rawa e dua na ka. 29Ia kevaka o ni na qai vakasaqarai Jiova na nomuni Kalou mai na veivanua o ya; o ni na kunei koya kevaka o ni vakasaqarai koya ena lomamuni kei na yalomuni taucoko.#Jere 29.13 30Ena gauna ni nomuni rarawa ena yaco vei kemuni na veika oqo sai koya na gauna mo ni lesu kina vei Jiova na nomuni Kalou ka muria na nona vosa. 31Ni sa Kalou dauloloma ko Jiova na nomuni Kalou, ena sega ni laivi kemuni, vakarusai kemuni, se, guilecava na veiyalayalati a cakava kei ira na nomuni qase.

32Ni vakataroga mada na veigauna sa oti, na gauna o ni a sa bera ni sucu kina, me tekivu sara mai na gauna a qai bulia kina na tamata e vuravura na Kalou. Ni vakasaqara mada na vuravura taucoko. A bau dua li na ka levu vakaoqo a yaco e liu? A bau dua li na tamata a rogoca oti e dua na ka vakaoqo? 33A sa bau dua li na matatamata me rogoca na domo ni dua na kalou ni vosa mai ena loma ni bukawaqa ka sa bula tiko? 34Se, a bau dua li na kalou a saga me lako ka la'ki kauta mai e dua na kawa tamata mai na loma ni dua na matanitu me ra mai nona tamata me vaka a cakava ko Jiova na nomuni Kalou vei kemuni mai Ijipita? A sa vakaraitaka nona kaukauwa levu kei na nona qaqa e matamuni, ni a kauta mai na veika ni veivakaleqai kei na i valu, ka cakava na veicakacaka mana kei na veika sa veivakurabuitaki, ka vakavuna me yaco na veika vakarerevaki. 35Sa vakatakila vei kemuni, mo ni kila kina ni sa Kalou ko Jiova; ka sega tale e dua, o koya duadua ga.#Mari 12.32 36A vakatara mo ni rogoca na domona mai lomalagi me rawa ni vakavulici kemuni, ka laiva mo ni raica na nona bukawaqa levu e vuravura ka rogoca na domona mai na loma ni bukawaqa. 37Me baleta ni a lomani ira na nomuni qase, a digitaki kemuni kina ka kauti kemuni tani mai Ijipita ena nona kaukauwa levu. 38A vakasavi ira na veimatanitu lelevu ka kaukauwa cake mai vei kemuni e matamuni me kauti kemuni mai kina ka solia vei kemuni na nodra vanua o ni sa taukena tu me yacova edaidai. 39O koya oqo mo ni kila kina edaidai ka kakua sara ni guilecava ni sa Kalou dina ga ko Jiova mai lomalagi e cake kei na vuravura era; ka sega tale e dua. 40Ni talairawarawa ki na nona i vunau kei na i vakaro kecega au sa vakarota vei kemuni edaidai ena qai daumaka kina vei kemuni na veika kece, vei ira talega na nomuni kawa. O ni na qai tiko ga kina ena vanua sa solia vei kemuni ko Jiova na nomuni Kalou me nomuni ka sega ni mudu.

Na i Drodro ena Tokalau ni Joritani

41A qai digitaka o Mosese e tolu na koro ena tokalau ni Joritani, 42me dau dro kina na tamata me bula, kevaka e vakamatea vakacalaka e dua na tamata a sega ni kena meca e liu. Sa na rawa ni dro o koya ki na dua vei iratou na koro oqo ka na sega ni vakamatei. 43Na koro o Peseri e toka ena loma ni vanua veidelana me nodra na mataqali i Rupeni, na koro o Ramoci ena vanua o Kiliati me nodra na mataqali i Kata; na koro o Kolani ena vanua o Pasani me nodra na mataqali i Manasa.

Soli na Lawa (Vunau) ni Kalou

44Sai koya oqo na lawa a solia o Mosese vei ira na Isireli. 45Sai koya oqo na i vakaro, lawa kei na i vunau a solia o Mosese vei ira na Isireli ena gauna era a biuti Ijipita mai kina, 46ka mai tiko ena tokalau ni buca ni uciwai na Joritani veidonui kei na koro o Pecipiori. Sai koya na vanua i Sioni na nodra tui na Amoraiti o koya ka tiko mai Esiponi, ka vakadrukai koya o Mosese kei ira na Isireli ena gauna era a lako tani kina mai Ijipita. 47Era a taukena na nona vanua kei na vanua talega nei Oki na tui Pasani. (Sai rau oqo na nodra tui na Amoraiti era a tiko ena tokalau ni Joritani). 48Na vanua era taukena e tekivu mai na koro o Aroeri ena bati ni uciwai na Arinoni, ka mua vaka ki na vualiku me yaco ki na Ulunivanua o Sirioni,#4.48 E dua na i vakavakadewa makawa Sirioni; Vakaiperiu Sioni. o ya na Ulunivanua o Erimoni. 49E okati talega kina na veivanua kece ena tokalau ni Uciwai na Joritani ka mua vaka ki na ceva me yacova na Waitui Mate, kei na tokalau me yacova na ruku ni Ulunivanua o Pisika.

Currently Selected:

VAKARUA 4: FNV

Highlight

Copy