2 KORINICA 9

Na Nodra Vukei na Wekadra Lotu

1E sega ni yaga na noqu volavola yani vei kemuni me baleta na i loloma vei ira na tamata ni Kalou mai Jutia. 2Au sa kila na nomuni taleitaka na via veivuke; ka'u sa vakacaucautaki kemuni kina vei ira na kai Masitonia. Au sa tukuna vei ira ni a sa vakarau tu o Akaia me veivuke mai na yabaki sa oti. A sa vakauqeta e lewe vuqa vei ira na nomuni yalo gu. 3Au sa talai iratou yani kina na wekada, me vakadinadinataki kina na neitou vakacaucautaki kemuni ena ka oqo. Au vinakata mo ni vakarau sara tu ga me vaka na ka au a tukuna me baleti kemuni. 4De ra na mani lako vata mai kei au eso na kai Masitonia, ka ra qai kunea ni o ni sega tu ni vakarau, keitou na sega ni madua walega kina, o ni na madua talega kina ni sa sivia tale na ka keitou nuitaka. 5Sa i koya oqo au nanuma kina ni daumaka cake me'u kerei iratou na wekada me ratou liu yani vei kemuni ka vakarautaka na nomuni i solisoli o ni sa yalataka oti tu. Au vinakata me na vakarautaki rawa tu ni'u sa yaco yani, ka na vakaraitaka oqo ni o ni sa soli-ka ga ena yalo e vinakata, ka sega ni o ni vakasaurarataki kina.

Soli Ka ena Yalo Marau

6Ni nanuma sara toka oqo: O koya sa kaburaka vakalailai ena tamusuka vakalailai; ia o koya sa kaburaka vakalevu ena tamusuka vakalevu. 7Na tamata yadua me dui solia sara ga na ka e vinakata na lomana, ka me kua ena voraki se ni sa vakaukauwataki. Ni sa dau vinakata na Kalou na tamata e soli-ka ena yalomarau. 8Sa rawa talega vua na Kalou me vakalevutaka vei kemuni na veika ni loloma kecega, me bini tu kina vei kemuni na i yau kecega, me levu cake sara kina na ka o ni solia ki na veicakacaka vinaka kecega. 9#Same 112.9Me vaka sa volai ena i Vola Tabu,

“Sa veisoliyaka na tamata e kila na Kalou na ka e tu vua vei ira na dravudravua.

Sa sega ni mudu rawa na nona yalovinaka.”

10 # Aisea 55.10 Ia na Kalou o koya sa dausolia na sore ni kau vei ira na dau kabukaburaki, kei na madrai me laukana, ena solia, ka vakalevutaka na veika kecega me tu vei kemuni, ka na vakalevutaka na vua ni nomuni cakacaka vinaka. 11Ena vakavutuniyautaki kemuni vakalevu sara o koya mo ni loma soli kina ena veigauna kecega, ka na lewe vuqa era na vakavinavinaka kina vua na Kalou ena vuku ni nomuni i loloma keitou kauta. 12Ni sa sega walega ni qaravi na nodra dravudravua na tamata ni Kalou ena cakacaka oqo, sa tubu cake talega kina na levu ni vakavinavinaka vua na Kalou. 13Ena vuku ni vakadinadina ni nomuni cakacaka oqo, era lewe vuqa era na vakalagilagia kina na Kalou, ena talairawarawa ki na i tukutuku vinaka kei Karisito kei na nomuni lomasoli ni soli ka ni loloma vei ira kei ira kece na tamata. 14Era na masulaki kemuni ena nodra lomani kemuni, baleta na lolomasavu levu ni Kalou sa tu vei kemuni. 15Me ia na vakavinavinaka vua na Kalou ena vuku ni nona i solisoli e sega ni vakamacalataki rawa.

Currently Selected:

2 KORINICA 9: FNV

Highlight

Copy