2 KORINICA 8

Na Soli-ka Vakarisito

1 # Roma 15.26 Keitou vinakata mo ni kila na veiwekani na lolomasavu ni Kalou sa soli ki na veisoqosoqo lewenilotu mai Masitonia. 2Era a vakatovolei sara vakaca ena ka rarawa era sota kaya, ia sa vuabale na nodra marau; e dina ga ni ra dravudravua sara, ia sa ka levu na nodra loma soli. 3Au sa vakadinadinataka ni ra sa dau soli me vaka na ka era rawata, era sa dau solia na ka e sivia na ka era rawata. Ena nodra loma soli, 4era sa vakamasuti keitou ka cikevi keitou me ra vakaitavi talega ena ka ni veivukei vei ira na tamata ni Kalou mai Jutia. 5Na ka oqo sa sivia na ka keitou namaka. Era sa soli ira taumada vua na Turaga, ka soli ira talega vei keitou me vaka na loma ni Kalou. 6Keitou sa vakauqeti Taito kina, o koya sa tekivutaka na cakacaka oqo me vakuria tiko mo ni vakaotia kece sara kina na cakacaka loloma oqo. 7O ni sa vutuniyau ena ka kecega e tu vei kemuni; ena vakabauta, ena vosa, ena kila-ka, ena nomuni yalo gu, kei na nomuni loloma vei keitou. Keitou vinakata me levu talega na nomuni lomasoli ena cakacaka ni loloma oqo.

8Au sega ni tukuna na ka oqo me vaka e i vakaro; au vakaraitaka ga na nodra yalo gu eso me'u kunea kina na dina ni nomuni loloma. 9Ni o ni sa kila na lolomasavu ni noda Turaga ko Jisu Karisito; e dina ni a vutuniyau, ia sa yaco me dravudravua ena vukumuni, me yaco kina mo ni vutuniyau ena nona dravudravua.

10Sa i koya oqo na noqu vakasama ena ka oqo: e vinaka cake vei kemuni mo ni vakaotia mada na ka o ni a tekivutaka ena yabaki sa oti. Sa i kemuni na kena i matai, ia o ni sega ni cakava walega, o ni taleitaka sara ga mo ni cakava. 11Au vinakata mo ni cakava tiko ka vakaotia sara. Ni yalo gu mo ni vakaotia me vaka o ni a nakita; me caka ena ka ga e tu vei kemuni. 12Kevaka o ni sa lomasoli mo ni soli ka, sa na ciqomi na ka e tu vei kemuni o ni solia; ka sega ni ka e sega ni tu vei kemuni.

13Au sega ni via vakamamadataka vei ira eso ka me qai tara bi vei kemuni. 14Me vakatautauvata ga; na ka sa levu ka vuabale tu vei kemuni mo ni solia me nodra sa dravudravua ena gauna oqo; ia me qai nomuni na ka sa levu ka vuabale tu vei ira ni o ni sa dravudravua ka me veisosomitaki vinaka ga kina. 15#Lako 16.18Me vaka sa volai ena i Vola Tabu,

“Na tamata sa kumuna vakalevu

Sa sega ni levu na nona,

Kei na tamata sa kumuna ga vakalailai

Sa sega ni lailai sara na nona.”

O Taito kei Ira na Nona i Tokani

16Me ia na vakavinavinaka vua na Kalou, o koya sa vakatubura ena loma i Taito na yalo gu me dau nanumi kemuni. 17Ni sa sega walega ni vakadonuya na neitou vakamamasu, sa taleitaka sara ga vaka i koya, ka nakita me lako yani vei kemuni. 18Ia keitou sa talai koya yani vata kei koya na wekada era sa vakacaucautaka kecega na veisoqosoqo lewenilotu ena nona vakateteya na i tukutuku vinaka. 19E sega ni sai koya walega o ya, sa digitaki talega mai na veisoqosoqo lewenilotu me lako vata voli kei keitou ena neitou qarava voli na cakacaka loloma oqo, me lagilagi kina na noda Turaga ka vakaraitaki kina na neitou via veivuke.

20Keitou sa qarauna me kua sara ni dua me vakalewai keitou ena neitou qarava voli na i solisoli vakailoloma oqo. 21#Vbale 3.4 (LXX)Sa neitou i naki me keitou cakava na ka dodonu; sega walega ena mata ni Turaga, ia ena matadra sara talega na tamata.

22Keitou sa tala talega yani na wekada oqori me lako vata yani kei rau. Keitou sa vakatovolei koya ena vuqa na gauna, ia keitou sa raica ni sa yalo gu ena veika e vuqa, ka sa yalo gu sara tiko vakalevu ena gauna oqo ena levu ni nona vakadinati kemuni. 23Ia o Taito sa noqu i tokani ka cakacaka vata kei au ena vukumuni; oi rau talega na wekada e rau sa lako kaya yani e rau sa matataka na veisoqosoqo lewenilotu me vakalagilagi kina na Karisito. 24Ni vakaraitaka na dina ni nomuni loloma vei iratou me ra vakadinadinataka na veisoqosoqo lewenilotu ka kila ni dina na neitou sakitaki kemuni.

Currently Selected:

2 KORINICA 8: FNV

Highlight

Copy