1 PITA 4
4
A i Vakaraitaki ni Bula sa Veisau
1Me vaka ni sa vakararawataki vakaoqo na Karisito ena yagona, mo ni vakaiyaragitaki kemuni talega vakakina ena nona i tovo ni rai, baleta ni o koya sa vakararawataki ena yago sa tarovi koya mai na i valavala ca. 2Ena vuku ni ka oqo, mo ni bulataka kina na bula sa liutaki mai vua na Kalou ena vo ni nomuni bula, ka me kua tale ni lewai kemuni na veigagadre vakayago. 3A sa bau dua toka na gauna balavu na nomuni a bulataka voli mai na nodra i tovo ni bula na tawalotu. O ni a dau goleva kina na veika tawa kilikili, na garogaro ca, na mateni, na i tovo vakasisila ni yago, na i soqosoqo ni gunu eso, kei na i vakarau lialia ni qaravi kalou tani. 4Era sa kurabui kina oqo na tawalotu ena vuku ni nomuni sa sega ni duavata kei ira ena vakayacori ni i tovo velavela vakaoqo, ka ra sa vosa vakacacataki kemuni kina. 5Ia era na qai saumi taro ga vakai ira vua na Kalou, o koya sa tu vakarau me lewai ira na bula kei na mate. 6Oqori na vuna sa vunautaki talega kina na i Tukutuku Vinaka vei ira na mate, o ira sa lewai oti ena vuku ni nodra bula vakayago me vaka ni sa ia na veilewai vei ira na tamata kecega; a sa vunautaki vei ira me rawa ni ra bula ga kina vua na Kalou ena yalodra.
Na Dauniyau Vinaka ni Solisoli ni Kalou
7Sa voleka mai na i vakataotioti ni veika kecega. O koya oqo mo ni taura vakabibi sara kina na veika vakayalo kei na bulataki ni bula vakaivakarau, ena vuku ni kena yadravi na masumasu. 8Sa ka bibi duadua mo ni veilomani dina sara vakai kemuni, ni sa ubia na i valavala ca e vuqa na loloma.#Vbale 10.12 9Ni dolava na nomuni vale vei ira na wekamuni ka kakua ni vosa kudrukudru kina. 10Me vaka e dua na dauniyau vinaka ni solisoli ni Kalou, mo ni vakayagataka vinaka kina ena vukudra na tani na veisolisoli duidui eso sa solia vei kemuni na Kalou. 11Kevaka e dua sa dauvosa, me ia ga o koya na vunautaka na vosa ni Kalou; o koya sa dauveiqaravi me ia ga na veiqaravi ena kaukauwa sa solia vua na Kalou, me rawa kina ni vakalagilagi na Kalou ena veika kecega ena vuku i Jisu Karisito, o koya sa nona na lagilagi kei na kaukauwa ka tawamudu. Emeni.
Na Noda Vakararawataki ni Da sa Lotu Vakarisito
12Oi kemuni na wekaqu lomani, ni kakua ni kurabui ena vuku ni rarawa levu sa yaco tiko vei kemuni mo ni vakatovolei kina, me vaka beka ni sa yaco tiko vei kemuni e dua na ka vou. 13Ia mo ni yalo vakacegu ka marau ga ena vuku ni nomuni sa vakaivotavota tiko ena veivakararawataki i Karisito, me rawa ni ka taucoko kina na nomuni reki ni sa vakatakilai na nona lagilagi. 14Kevaka o ni sa vakacacani ena vuku ni yaca i Karisito, o ni sa kalougata sara kina. Sa dusia oqo ni sa mai tiko vei kemuni na Yalo sa lagilagi, na Yalo ni Kalou. 15Kevaka e dua vei kemuni sa vakararawataki, ia me kakua ga ena vuku ni laba, se butako, se basulawa, se vakaucaca ena kemuni maliwa. 16O koya oqo mo ni kakua kina ni maduataka na veivakararawataki sa yaco vei kemuni ena vuku ni vakabauta Vakarisito, ia mo ni vakavinavinaka ga vua na Kalou ni o ni sa tokara na yaca i Karisito.
17Sa yaco mai na gauna me tekivutaki kina na veilewai, ka ra na lewai taumada eliu na tamata ni Kalou; ia kevaka sa tekivu vei keda, a cava ena qai kedra i tinitini o ira era sa sega ni vakabauta na nona i Tukutuku Vinaka na Kalou? 18#Vbale 11.31 (LXX)Me vaka sa kaya na i Vola Tabu,
“Sa dredre sara vei ira na tamata vinaka
Me ra vakabulai;
A cava ena yacovi ira na tamata ca
Era sa sega ni kila na Kalou?”
19O koya oqo me ra qai soli ira taucoko kina vua na Dauveibuli o ira era sa vakararawataki me vaka na loma ni Kalou, ka me ra ia ga na caka dodonu.
Currently Selected:
1 PITA 4: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.