Vakatakila 11

Na i Vakadinadina e Rua

1 # Isi 40.3; Saka 2.1,2 A sa qai soli vei au e dua na kau rabalailai balavu ka sa vaka na i rairai ni gasau ni vakarau, ka sa tukuni vei au, “Mo lako ka vakarautaka mai na valenisoro ni Kalou kei na i cabocabonisoro, ka wilika mai na levu ni tamata era sa sokalou tiko kina. 2#Luke 21.24Ia mo kakua ga ni vakarautaka na lomanibai ena taudaku ni vale, baleta ni sa soli oti na tikina o ya vei ira sa sega ni kila na Kalou, o ira era na buturaka sobu na Koro Tabu me vula vasagavulukarua. 3Au na vakatala yani e rua na noqu i vakadinadina sa vakaisulu ena sulu taga, ka me rau kacivaka na i tukutuku ni Kalou ena loma ni 1,260 na siga o ya.”

4 # Saka 4.3,11-14 Oi rau na noqu i vakadinadina oqo sai rau na vuniolive e rua kei na i tutu-ni-cina e rua ka sa tu ena mata ni Turaga kei vuravura. 5Ni kevaka e dua sa vinakata me vakacacani rau, ena lako mai gusudrau na bukawaqa ka vakarusai ira na nodrau meca; ena vakamatei vakaoqo o koya sa via vakacacani rau. 6#1Tui 17.1; Lako 7.17-19; 1Samu 4.8Sa tu vei rau na kaukauwa me rau sogoti lomalagi me kakua kina ni tau na uca ena gauna e rau sa kacivaka voli kina na i tukutuku ni Kalou. Sa tu talega vei rau na kaukauwa vei ira na veimataniwai, me rau vukica na wai me dra; sa tu talega vei rau na kaukauwa me rau samuti vuravura ena ka ni veivakararawataki kecega, ka me vaka ga na ka erau sa vinakata.

7 # Tani 7.7; Vtaki 13.5-7; 17.8; Tani 7.21 Ia ni rau sa vakaotia na nodrau i tukutuku, ena qai valuti rau o koya na manumanu rerevaki sa cabe cake mai na loma ni qara sa sega na botona. Ena vakadrukai rau o koya, ka vakamatei rau, 8#Aisea 1.9,10ka na biu wale tu ga na yagodrau ena saqata ni koro levu, ena vanua sa lauvako kina na nodrau Turaga ki na kauveilatai. A sa vakatokai vakaibalebale se vakaiyaloyalo na koro o ya me o Sotoma, se o Ijipita. 9Era na la'ki vakaraica tu na yagodrau me tolu veimama na siga o ira na tamata mai na veimatanitu kecega, kei na veiyavusa, kei na veimataqali vosa duidui eso, kei na veimatatamata ka ra na sega ni vakatara me la'ki buluti na yagodrau ena i bulubulu. 10Era na rekitaka na nodrau mate na lewe rua oqo o ira na kai vuravura. Era na solevu ka veisoli ka-ni-loloma, baleta ni rau a kauta mai ki vuravura na veivakararawataki levu oi rau na parofita oqo. 11#Isi 37.10Ia ni sa oti e tolu veimama na siga, sa qai ceguvi rau na Kalou ena i cegu ni bula, ka rau sa tucake mai; ka ra sa rere kecega na tamata sa raici rau. 12#2Tui 2.11A rau sa qai rogoca na parofita e dua na domolevu mai lomalagi ni sa kaya vei rau, “Drau lako cake mai ki ke!” Ni ra sa sarasara tu na nodrau meca, erau sa qai lako cake ki lomalagi ena o. 13#Vtaki 6.12; 16.18E na gauna vata ga o ya, a sa yaco e dua na uneune levu; a sa vakarusai e dua na i katini ni koro levu, ka ra mate e lewe 7,000 na tamata. Sa tuburi ira na vo ni tamata na rere levu ka ra sa vakacaucautaka ga na kaukauwa i koya na Kalou ni lomalagi. 14Sa qai takali yani na i karua ni ka rarawa, ia sa voleka sara mai na kena i katolu!

Na i Kavitu ni Davui

15 # Lako 15.18; Tani 2.44; 7.14,27 A sa qai uvuca na i kavitu ni agilosi na nona davui, ka sa rogo levu mai lomalagi na veidomo eso, era sa kaya, “Na kaukauwa ni lewa me baleti vuravura sa qai yaco oqo me nona na noda Turaga kei na nona Karisito, ka na veiliutaki tikoga o koya ka sega ni mudu!” 16Era sa qai bale sobu vakatoboicu ena vakarokoroko o ira na qase e lewe ruasagavulukava sa daudabe tiko ena nodra i tikotiko vakaturaga ena mata ni Kalou, ka ia na sokalou ki vua na Kalou, 17ka kaya:

“Kemuni na Turaga na Kalou Kaukauwa,

O ni sa bula edaidai, o ni a bula eliu, o ni na bula tikoga!

Keimami sa vakavinavinakataki kemuni

Ena nomuni sa taurivaka na nomuni kaukauwa levu

Ka ia na vakataulewa!

18 # Same 2.5; 110.5; Same 115.13 Era sa cudru vakalevu na tamata sa sega ni kila na Kalou,

Baleta ni sa yaco mai oqo na gauna ni nomuni cudru,

Na gauna me ra sa veilewaitaki kina na mate.

Sa kena gauna oqo me ra saumi kina na nomuni dauveiqaravi, na parofita,

Kei ira na yalosavasava kecega, o ira kece sara sa rokova na yacamuni,

Se ra tamata wale se ra cecere.

Sa kena gauna oqo me ra vakarusai kina o ira sa vakarusai vuravura tiko!”

19A sa dolavi na vale ni Kalou mai lomalagi, ka sa laurai ni tiko e loma na Kato ni Veiyalayalati. A sa tarava mai na tibi ni liva, na vavadugudugu kei na lutu ni kurukuru, na uneune, kei na tau bi ni uca cevata.

Currently Selected:

Vakatakila 11: FNVDC12

Highlight

Copy