Marika 5

Sa Vakabula o Jisu E Dua na Tamata Curumi Yalo Velavela

(Maciu 8.28-34; Luke 8.26-39)

1Era sa mani yaco yani ki na tai ni drano kadua, ki na nodra vanua na kai Katara. 2Ia ni sa sobu yani ki vanua o Jisu, sa sota kaya sara e dua na tamata ka curumi koya tiko e dua na yalo velavela, sa lako mai na i bulubulu, 3na vanua e dau tiko voli kina. E sega ni dua na tamata e vesuki koya rawa; na sinucodo mada ga qai sega ni yaga. 4Sa dau vesu wasoma o koya ena i vesu ni yava kei na sinucodo, ia e qai dau gutugutulaka na sinucodo ka drutidrutilaka na i vesu ni yava, ka sega ni bau dua e tarovi koya rawa. 5Sa dau qoqolou voli ena bogi kei na siga ena veiulunivanua kei na i bulubulu, ka sa tavatavalaka na yagona ena vatu.

6A sa tu mai vakayawa o koya ena gauna sa raici Jisu kina; ka sa qai cici yani, ka tekiduru e matana, 7ka sa kaci ena domo levu, “I Jisu, na Luve ni Kalou Cecere sara! A cava o ni sa vinakata vei au? Au sa kerei kemuni ena yaca ni Kalou, ni kakua ni vakararawataki au!” 8(A sa kaya vakaoqo baleta ni sa kaya oti vua o Jisu, “Yalo velavela, mo lako tani mai vua na tamata oqo!”)

9Sa qai tarogi koya o Jisu, “O cei na yacamu?”

E a sauma o koya ka kaya, “Na yacaqu o ‘Vavakoso’, ni keimami sa lewe levu!” 10Sa qai vakamasuti Jisu vagumatua o koya me kakua ni vakatalai ira tani na yalo velavela mai na vanua o ya.

11Era a kakana voli ena yasa ni delana sa voleka e kea e dua na qele ni vuaka levu. 12Era sa qai vakamasuti Jisu na yalo velavela, ka kaya, “Ni vakatalai keimami vei ira na vuaka, me keimami curumi ira.” 13Sa mani laivi ira o Jisu me ra lako, ka ra sa lako yani na yalo velavela ka curumi ira na vuaka. Era sa qai ciciva sobu na baba ena yasa ni drano o ira na vuaka ka lutu kece ki na loma ni drano ka luvu kece sara. E rauta tiko ni 2,000 na kedra levu.

14Era sa qai dro na kedra i vakatawa, ka la'ki tukuna na kena i tukutuku ki na koro, kei na veivanua era volekata. Era sa qai lako na tamata, me ra la'ki raica na ka sa yaco e kea. 15Era sa qai lako vei Jisu, ka raici koya ka a curuma tu e vuqa na yalo velavela ni sa dabe tiko e kea, sa vakaisulu tu, ka sa tu vinaka na nona vakasama; ka ra sa rere sara. 16Era sa qai tukuna vei ira na lako yani o ira ka a raica na ka a yaco vua ka curumi tevoro kei na ka e baleti ira na vuaka.

17Era sa mani kerei Jisu me lako tani mai na nodra vanua.

18Ia ena gauna sa vodo kina ki waqa o Jisu, a sa qai kerei koya na tamata ka a curumi yalo velavela, ka kaya, “Au kerea me'u lako vata yani kei kemuni!”

19Ia, a sa sega ni vakadonuya o Jisu. Sa qai kaya ga vua, “Mo lesu tale ki na nomu vale vei ira na wekamu, ka tukuna vei ira na levu ni ka sa cakava vei iko na Turaga, kei na levu ni nona yalololoma vei iko.”

20Sa mani lako yani na tamata o ya ka tekivu vakacuruma yani na Koro e Tini, ka tukuna voli na veika sa cakava vua o Jisu. Era sa qoroqoro na tamata kecega era sa rogoca.

Na Luve i Jairo kei na Yalewa ka Tara na Tutu ni Sulu i Jisu

(Maciu 9.18-26; Luke 8.40-56)

21A sa lesu tale o Jisu ena waqa ki tai kadua ni drano. Era sa soqoni vata yani vua na lewe vuqa ena yasa ni drano. 22Sa qai lako yani vua o Jairo, e dua na i vakalesilesi ni valenilotu. Ni sa raici Jisu, sa qai bale sobu ki yavana 23ka vakamasuti koya vakabibi, ka kaya, “Na luvequ yalewa lailai sa tauvimate levu sara. Au kerea mo ni lako mada mai ka tabaki koya ena ligamuni, me sereki tani kina na nona tauvimate, ka bula!”

24E rau sa mani lako vata yani kei Jisu. Era sa salavata kei Jisu e lewe vuqa sara na tamata, ka ra sa veidrigidrigi kaya mai na veiyasana kecega.

25E tiko ena kedra maliwa e dua na yalewa, sa turudrabalavu ka sa yabaki tinikarua na kena dede. 26Sa lewe levu na vuniwai era sa qaravi koya oti ka sa vakayalia kina na nona i yau, ia sa sega ni vinaka cake kina na nona bula, ka sa toro sobu tikoga.#Tb 2.10 27A sa rogoca o koya na i tukutuku me baleti Jisu, ka sa qai lako mai kina e dakuna ena kedra maliwa na lewe vuqa, ka tara na nona i sulu, 28ni sa kaya e lomana o koya, “Kevaka walega au tara na nona i sulu, au na bula.”

29A sa tara na i sulu i Jisu, ka sa mudu sara vakasauri na kena lako tiko na dra; ka sa kila sara e yagona ni sa vakabulai mai na mate ca o ya. 30Ena gauna vata o ya, sa kila e lomana o Jisu ni sa lako tani mai vua na kaukauwa, a sa qai vuki vei ira na lewe vuqa, ka kaya, “O cei e tara na noqu i sulu?”

31E ratou sa qai kaya vua na nona tisaipeli, “O ni sa raica na nodra veidrigidrigi kei kemuni na tamata, a cava o ni qai taroga tale kina se o cei e tarai kemuni?”

32Ia sa veiraiyaki voli ga o Jisu me kunei koya ka a cakava na ka o ya. 33Ia na yalewa, ni sa kila na ka sa yacovi koya, sa qai lako mai, ka sa sautaninini ena levu ni rere, ka bale sobu ki na yava i Jisu, ka tukuna vua na kena dina taucoko. 34Sa qai kaya vua o Jisu, “Na luvequ, sa vakabulai iko na nomu vakabauta. Mo lako ena vakacegu ka sereki mai na nomu leqa.”

35Ia ni sa vosa tikoga o Jisu era sa lako mai eso mai na vale ni vakailesilesi ni valenilotu, ka kaya, “Sa mate na luvemu; kakua ni vakaoga tale na i Vakavuvuli.”

36E a sega ni via kauwaitaka o Jisu na ka era tukuna, ka sa qai kaya vua na vakailesilesi ni valenilotu, “Kakua ni yalolailai, ia mo vakabauta ga.” 37A sega ni vakatara e dua me muri koya, ia o iratou ga o Pita, kei Jemesa, vata kei Joni na taci Jemesa. 38Ni ratou sa yaco ki na vale ni vakailesilesi liu ni valenilotu, sa raica o Jisu na nodra mamaue kei na veilecayaki ka rogoca na nodra osi kei na veitagicaki. 39Ia ni sa curu yani o koya, sa kaya sara vei ira, “Na cava o ni sa mamaue ka tagi tiko kina? E sega ni mate na goneyalewa oqori, e moce tikoga!”

40Era sa qai dredrevaki koya, ka sa qai vakatalai ira kece kina ki tautuba o koya. A sa kauti rau ga na i tubutubu ni gone kei iratou na nona tisaipeli e tolu ka ratou curu ki na rumu sa davo koto kina na gone. 41Sa qai taura na ligana, ka kaya vua, “Talica, kumi!” (A kena i balebale, “Goneyalewa lailai, au sa kaya vei iko mo tucake mai!”)

42Ena gauna vata ga o ya, a tucake sara na goneyalewa ka tekivu veilakoyaki. (Sa yabaki tinikarua o koya.) Ni sa yaco oqo, era sa kurabui vakalevu sara kina. 43Ia sa vakaroti ratou matua ga o Jisu me ratou kakua sara ni tukuna tale vua e dua na veika sa yaco, ka sa qai kaya, “Dou solia vua e dua na ka me kania.”

Currently Selected:

Marika 5: FNVDC12

Highlight

Copy